[A1ai] Ad te levavi animam meam, Deus meus, in te confido, non erubescam. Neque irrideant me inimici mei, etenim universi qui te exspectant non confundentur.

[A2co] Da, quaesumus, omnipotens Deus, hanc tuis fidelibus voluntatem, ut, Christo tuo venienti iustis operibus occurrentes, eius dexterae sociati, regnum mereantur possidere caeleste.

[A3so] Suscipe, quaesumus, Domine, munera quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A4am] Dominus dabit benignitatem, et terra nostra dabit fructum suum.

[A5pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A6ai] Audite verbum Domini, gentes, et annuntiate illud in finibus terrae: Ecce Salvator noster adveniet, et iam nolite timere.

[A7co] Fac nos, quaesumus, Domine Deus noster, adventum Christi Filii tui sollicitos exspectare, ut, dum venerit pulsans, orationibus vigilantes, et in suis inveniat laudibus exsultantes.

[A8so] Suscipe, quaesumus, Domine, munera quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A9am] Veni, Domine, visitare nos in pace, ut laetemur coram te corde perfecto.

[A10pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A11ai] Ecce Dominus veniet, et omnes sancti eius cum eo; et erit in die illa lux magna.

[A12co] Propitiare, Domine Deus, supplicationibus nostris, et tribulantibus, quaesumus, tuae concede pietatis auxilium, ut, de Filii tui venientis praesentia consolati, nullis iam polluamur contagiis vetustatis.

[A13so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A14am] Coronam iustitiae reddet iustus iudex iis qui diligunt adventum eius.

[A15pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A16ai] Veniet Dominus et non tardabit, et illuminabit abscondita tenebrarum, et manifestabit se ad omnes gentes.

[A17co] Praepara, quaesumus, Domine Deus noster, corda nostra divina tua virtute, ut, veniente Christo Filio tuo, digni inveniamur aeternae vitae convivio, et cibum caelestem, ipso ministrante, percipere mereamur.

[A18so] Devotionis nostrae tibi, Domine, quaesumus, hostia iugiter immoletur, quae et sacri peragat instituta mysterii, et salutare tuum nobis potenter operetur.

[A19am] Ecce Dominus noster cum virtute veniet, ut illuminet oculos servorum suorum.

[A20pc] Tuam, Domine, clementiam imploramus, ut haec divina subsidia, a vitiis expiatos, ad festa ventura nos praeparent.

[A21ai] Prope es tu, Domine, et omnes viae tuae veritas; initio cognovi de testimoniis tuis, quia in aeternum tu es.

[A22co] Excita, Domine, potentiam tuam, et magna nobis virtute succurre, ut, quod nostra peccata praepediunt, gratia tuae propitiationis acceleret.

[A23so] Suscipe, quaesumus, Domine, munera, quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A24am] Iuste et pie vivamus in hoc saeculo, exspectantes beatam spem et adventum gloriae magni Dei.

[A25pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A26ai] Ecce Dominus veniet cum splendore descendens visitare populum suum in pace, et constituere super eum vitam sempiternam.

[A27co] Excita, quaesumus, Domine, potentiam tuam, et veni, ut, ab imminentibus peccatorum nostrorum periculis, te mereamur protegente eripi, te liberante salvari.

[A28so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A29am] Salvatorem exspectamus Dominum Iesum Christum, qui reformabit corpus humilitatis nostrae, configuratum corpori claritatis suae.

[A30pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A31ai] Veni, et ostende nobis faciem tuam, Domine, qui sedes super Cherubim, et salvi erimus.

[A32co] Deus, qui, ad liberandum humanum genus a vetustatis condicione, Unigenitum tuum in hunc mundum misisti, largire devote exspectantibus supernae tuae gratiam pietatis, ut ad verae perveniamus praemium libertatis.

[A33so] Devotionis nostrae tibi, Domine, quaesumus, hostia iugiter immoletur, quae et sacri peragat instituta mysterii, et salutare tuum nobis potenter operetur.

[A34am] Ecce venio cito et merces mea mecum est, dicit Dominus, dare unicuique secundum opera sua.

[A35pc] Tuam, Domine, clementiam imploramus, ut haec divina subsidia, a vitiis expiatos, ad festa ventura nos praeparent.

[A36ai] Populus Sion, ecce Dominus veniet ad salvandas gentes; et auditam faciet Dominus gloriam vocis suae in laetitia cordis vestri.

[A37co] Omnipotens et misericors Deus, in tui occursum Filii festinantes nulla opera terreni actus impediant, sed sapientiae caelestis eruditio nos faciat eius esse consortes.

[A38so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A39am] Ierusalem, surge et sta in excelso, et vide iucunditatem, quae veniet tibi a Deo tuo.

[A40pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A41ai] Audite verbum Domini, gentes, et annuntiate illud in finibus terrae: Ecce Salvator noster adveniet, et iam nolite timere.

[A42co] Dirigatur, quaesumus, Domine, in conspectu tuo nostrae petitionis oratio, ut ad magnum incarnationis Unigeniti tui mysterium nostrae vota servitutis illibata puritate perveniant.

[A43so] Suscipe, quaesumus, Domine, munera quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A44am] Veni, Domine, visitare nos in pace, ut laetemur coram te corde perfecto.

[A45pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A46ai] Ecce Dominus veniet, et omnes sancti eius cum eo; et erit in die illa lux magna.

[A47co] Deus, qui salutare tuum cunctis terrae finibus declarasti, tribue, quaesumus, ut nativitatis eius gloriam laetanter praestolemur.

[A48so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A49am] Coronam iustitiae reddet iustus iudex iis qui diligunt adventum eius.

[A50pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A51ai] Veniet Dominus et non tardabit, et illuminabit abscondita tenebrarum, et manifestabit se ad omnes gentes.

[A52co] Omnipotens Deus, qui nos praecipis iter Christo Domino praeparare, concede propitius, ut nullis infirmitatibus fatigemur, qui caelestis medici consolantem praesentiam sustinemus.

[A53so] Devotionis nostrae tibi, Domine, quaesumus, hostia iugiter immoletur, quae et sacri peragat instituta mysterii, et salutare tuum nobis potenter operetur.

[A54am] Ecce Dominus noster cum virtute veniet, ut illuminet oculos servorum suorum.

[A55pc] Tuam, Domine, clementiam imploramus, ut haec divina subsidia, a vitiis expiatos, ad festa ventura nos praeparent.

[A56ai] Prope es tu, Domine, et omnes viae tuae veritas; initio cognovi de testimoniis tuis, quia in aeternum tu es.

[A57co] Excita, Domine, corda nostra ad praeparandas Unigeniti tui vias, ut, per eius adventum, purificatis tibi mentibus servire mereamur.

[A58so] Suscipe, quaesumus, Domine, munera, quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A59am] Iuste et pie vivamus in hoc saeculo, exspectantes beatam spem et adventum gloriae magni Dei.

[A60pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A61ai] Ecce Dominus veniet cum splendore descendens visitare populum suum in pace, et constituere super eum vitam sempiternam.

[A62co] Concede, quaesumus, omnipotens Deus, plebi tuae adventum Unigeniti tui cum summa vigilantia exspectare, ut, sicut ipse docuit auctor nostrae salutis, accensis lampadibus in eius occursum vigilantes properemus.

[A63so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A64am] Salvatorem exspectamus Dominum Iesum Christum, qui reformabit corpus humilitatis nostrae, configuratum corpori claritatis suae.

[A65pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A66ai] Veni, et ostende nobis faciem tuam, Domine, qui sedes super Cherubim, et salvi erimus.

[A67co] Oriatur, quaesumus, omnipotens Deus, in cordibus nostris splendor gloriae tuae, ut, omni noctis obscuritate sublata, filios nos esse lucis Unigeniti tui manifestet adventus.

[A68so] Devotionis nostrae tibi, Domine, quaesumus, hostia iugiter immoletur, quae et sacri peragat instituta mysterii, et salutare tuum nobis potenter operetur.

[A69am] Ecce venio cito et merces mea mecum est, dicit Dominus, dare unicuique secundum opera sua.

[A70pc] Tuam, Domine, clementiam imploramus, ut haec divina subsidia, a vitiis expiatos, ad festa ventura nos praeparent.

[A71ai] Gaudete in Domino semper: iterum dico, gaudete. Dominus enim prope est.

[A72co] Deus, qui conspicis populum tuum nativitatis dominicae festivitatem fideliter exspectare, praesta, quaesumus, ut valeamus ad tantae salutis gaudia pervenire, et ea votis sollemnibus alacri semper laetitia celebrare.

[A73so] Devotionis nostrae tibi, Domine, quaesumus, hostia iugiter immoletur, quae et sacri peragat instituta mysterii et salutare tuum nobis potenter operetur.

[A74am] Dicite: Pusillanimes, confortamini et nolite timere: ecce Deus noster veniet et salvabit nos.

[A75pc] Tuam, Domine, clementiam imploramus, ut haec divina subsidia, a vitiis expiatos, ad festa ventura nos praeparent.

[A76ai] Audite verbum Domini, gentes, et annuntiate illud in finibus terrae: Ecce Salvator noster adveniet, et iam nolite timere.

[A77co] Voci nostrae, quaesumus, Domine, aures tuae pietatis accommoda, et cordis nostri tenebras gratia Filii tui nos visitantis illustra.

[A78so] Suscipe, quaesumus, Domine, munera quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A79am] Veni, Domine, visitare nos in pace, ut laetemur coram te corde perfecto.

[A80pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A81ai] Ecce Dominus veniet, et omnes sancti eius cum eo; et erit in die illa lux magna.

[A82co] Deus, qui novam creaturam per Unigenitum tuum nos esse fecisti, in opera misericordiae tuae propitius intuere, et in adventu Filii tui ab omnibus nos maculis vetustatis emunda.

[A83so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A84am] Coronam iustitiae reddet iustus iudex iis qui diligunt adventum eius.

[A85pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A86ai] Veniet Dominus et non tardabit, et illuminabit abscondita tenebrarum, et manifestabit se ad omnes gentes.

[A87co] Praesta, quaesumus, omnipotens Deus, ut Filii tui ventura sollemnitas et praesentis nobis vitae remedia largiatur, et praemia aeterna concedat.

[A88so] Devotionis nostrae tibi, Domine, quaesumus, hostia iugiter immoletur, quae et sacri peragat instituta mysterii, et salutare tuum nobis potenter operetur.

[A89am] Ecce Dominus noster cum virtute veniet, ut illuminet oculos servorum suorum.

[A90pc] Tuam, Domine, clementiam imploramus, ut haec divina subsidia, a vitiis expiatos, ad festa ventura nos praeparent.

[A91ai] Prope es tu, Domine, et omnes viae tuae veritas; initio cognovi de testimoniis tuis, quia in aeternum tu es.

[A92co] Indignos, quaesumus, Domine, nos famulos tuos, quos actionis propriae culpa contristat, Unigeniti tui adventu salutari laetifica.

[A93so] Suscipe, quaesumus, Domine, munera, quae de tuis offerimus collata beneficiis, et, quod nostrae devotioni concedis effici temporali, tuae nobis fiat praemium redemptionis aeternae.

[A94am] Iuste et pie vivamus in hoc saeculo, exspectantes beatam spem et adventum gloriae magni Dei.

[A95pc] Prosint nobis, quaesumus, Domine, frequentata mysteria, quibus nos, inter praetereuntia ambulantes, iam nunc instituis amare caelestia et inhaerere mansuris.

[A96ai] Ecce Dominus veniet cum splendore descendens visitare populum suum in pace, et constituere super eum vitam sempiternam.

[A97co] Praeveniat nos, omnipotens Deus, tua gratia semper atque subsequatur, ut, qui adventum Unigeniti tui summo cordis desiderio sustinemus, et praesentis vitae subsidia et futurae pariter consequamur.

[A98so] Placare, Domine, quaesumus, nostrae precibus humilitatis et hostiis, et, ubi nulla suppetunt suffragia meritorum, tuae nobis indulgentiae succurre praesidiis.

[A99am] Salvatorem exspectamus Dominum Iesum Christum, qui reformabit corpus humilitatis nostrae, configuratum corpori claritatis suae.

[A100pc] Repleti cibo spiritalis alimoniae, supplices te, Domine, deprecamur, ut, huius participatione mysterii, doceas nos terrena sapienter perpendere, et caelestibus inhaerere.

[A101ai] Rorate, caeli, desuper, et nubes pluant iustum; aperiatur terra et germinet Salvatorem.

[A102co] Gratiam tuam, quaesumus, Domine, mentibus nostris infunde, ut qui, Angelo nuntiante, Christi Filii tui incarnationem cognovimus, per passionem eius et crucem ad resurrectionis gloriam perducamur.

[A103so] Altari tuo, Domine, superposita munera Spiritus ille sanctificet, qui beatae Mariae viscera sua virtute replevit.

[A104am] Ecce Virgo concipiet, et pariet filium; et vocabitur nomen eius Emmanuel.

[A105pc] Sumpto pignore redemptionis aeternae, quaesumus, omnipotens Deus, ut quanto magis dies salutiferae festivitatis accedit, tanto devotius proficiamus ad Filii tui digne nativitatis mysterium celebrandum.

[A106ai] Laetentur caeli et exsultet terra, quia Dominus noster veniet, et pauperum suorum miserebitur.

[A107co] Deus, humanae conditor et redemptor naturae, qui Verbum tuum in utero perpetuae virginitatis carnem assumere voluisti, respice propitius ad preces nostras, ut Unigenitus tuus, nostra humanitate suscepta, nos divino suo consortio sociare dignetur.

[A108so] Ecclesiae tuae, Domine, dona sanctifica, et concede, ut, per haec veneranda mysteria, pane caelesti refici mereamur.

[A109am] Ecce veniet desideratus cunctis gentibus, et replebitur gloria domus Domini.

[A110pc] Divino munere satiati, quaesumus, omnipotens Deus, hoc desiderio potiamur, ut, a tuo accensi Spiritu, ante conspectum venientis Christi tui, velut clara luminaria fulgeamus.

[A111ai] Rex noster adveniet Christus, quem Ioannes praedicavit Agnum esse venturum.

[A112co] Concede, quaesumus, omnipotens Deus, ut, qui sub peccati iugo ex vetusta servitute deprimimur, exspectata Unigeniti tui nova nativitate liberemur.

[A113so] Sacrificium tibi, Domine, celebrandum tuo nomini nos reddat acceptos, ut ipsius aeternitatis mereamur esse consortes, qui mortalitatem nostram sua mortalitate curavit.

[A114am] Vocabunt nomen eius Emmanuel, quod est interpretatum Nobiscum-Deus.

[A115pc] Suscipiamus, Domine, misericordiam tuam in medio templi tui, et redemptionis nostrae ventura sollemnia congruis honoribus praecedamus.

[A116ai] Qui venturus est veniet et non tardabit, et iam non erit timor in finibus nostris, quoniam ipse est Salvator noster.

[A117co] Deus, qui splendorem gloriae tuae per sacrae Virginis partum mundo dignatus es revelare, tribue, quaesumus, ut tantae incarnationis mysterium et fidei integritate colamus, et devoto semper obsequio frequentemus.

[A118so] Propitius intuere munera, Domine, quaesumus, quae tuis altaribus exhibemus, ut, quod nostra fragilitate defertur, tua virtute sacretur.

[A119am] Visitabit nos Oriens ex alto, ad dirigendos pedes nostros in viam pacis.

[A120pc] Gratias de collatis muneribus referentes, fac nobis propitius, omnipotens Deus, quae ventura sunt desiderare praestanda, ut nativitatem Salvatoris nostri purificatis suscipiamus mentibus honorandam.

[A121ai] Egredietur virga de radice Iesse, et replebitur omnis terra gloria Domini, et videbit omnis caro salutare Dei.

[A122co] Deus, aeterna maiestas, cuius ineffabile Verbum, Angelo nuntiante, Virgo immaculata suscepit, et, domus divinitatis effecta, Sancti Spiritus luce repletur, quaesumus, ut nos, eius exemplo, voluntati tuae humiliter adhaerere valeamus.

[A123so] Intende, quaesumus, Domine, sacrificium singulare, ut, huius participatione mysterii, quae speranda credimus, exspectata sumamus.

[A124am] Dixit Angelus ad Mariam: Ecce concipies et paries filium, et vocabis nomen eius Iesum.

[A125pc] Quos munere caelesti reficis, Domine, divino tuere praesidio, ut, tuis mysteriis perfruentes, in vera facias pace gaudere.

[A126ai] Modo veniet Dominator Dominus, et vocabitur nomen eius Emmanuel, quia Nobiscum-Deus.

[A127co] Preces populi tui, quaesumus, Domine, clementer exaudi, ut, qui de Unigeniti tui in nostra carne adventu laetantur, cum venerit in sua maiestate, aeternae vitae praemium consequantur.

[A128so] Ecclesiae tuae, Domine, munera placatus assume, quae et misericors offerenda tribuisti, et in nostrae salutis potenter efficis transire mysterium.

[A129am] Beata quae credidisti, quoniam perficientur ea quae dicta sunt tibi a Domino.

[A130pc] Sit plebi tuae, Domine, continuata defensio divini participatio mysterii, ut, maiestati tuae plena devotione subiecta, salvationem mentis et corporis affluenter accipiat.

[A131ai] Attollite, portae, capita vestra, et elevamini, portae aeternales, et introibit rex gloriae.

[A132co] Deus, qui, hominem delapsum in mortem conspiciens, Unigeniti tui adventum redimere voluisti, praesta, quaesumus, ut qui humili eius incarnationem devotione fatentur, ipsius etiam Redemptoris consortia mereantur.

[A133so] In tua pietate confidentes, Domine, cum muneribus ad altaria veneranda concurrimus, ut, tua purificante nos gratia, iisdem quibus famulamur mysteriis emundemur.

[A134am] Magnificat anima mea Dominum, quia fecit mihi magna qui potens est.

[A135pc] Roboret nos, Domine, tui sacramenti perceptio, ut venienti Salvatori mereamur cum dignis operibus obviare, et beatitudinis praemia promereri.

[A136ai] Nascetur nobis parvulus, et vocabitur Deus, Fortis; in ipso benedicentur omnes tribus terrae.

[A137co] Omnipotens sempiterne Deus, nativitatem Filii tui secundum carnem propinquare cernentes, quaesumus, ut nobis indignis famulis tuis misericordiam praestet Verbum, quod ex Virgine Maria dignatum est caro fieri, et in nobis habitare Iesus Christus, Dominus noster.

[A138so] Haec oblatio, qua divini cultus nobis est indita plenitudo, sit tibi, Domine, perfecta placatio, ut nostri Redemptoris exordia purificatis mentibus celebremus.

[A139am] Ecce sto ad ostium et pulso: si quis audierit vocem meam, et aperuerit mihi ianuam, intrabo ad illum, et cenabo cum illo, et ipse mecum.

[A140pc] Caelesti munere satiatis, Domine, pacem tuam propitiatus indulge, ut Filio tuo dilectissimo venienti accensis lampadibus digni praestolemur occursum.

[A141ai] Ecce iam venit plenitudo temporis, in quo misit Deus Filium suum in terram.

[A142co] Festina, quaesumus, ne tardaveris, Domine Iesu, ut adventus tui consolationibus subleventur, qui in tua pietate confidunt. Qui vivis et regnas cum Deo Patre in unitate Spiritus Sancti, Deus, per omnia saecula saeculorum.

[A143so] Oblata tibi, Domine, munera benignus assume, ut eorum perceptione expiemur a peccatis, et adventus Filii tui gloriam puris mereamur mentibus praestolari.

[A144am] Benedictus Dominus Deus Israel, quia visitavit et fecit redemptionem plebis suae.

[A145pc] Da nobis, Domine, hoc dono tuo mirabili recreatis, ut, sicut adoranda Filii tui natalicia praevenimus, sic eius munera capiamus sempiterna gaudentes.

[N146ai] Hodie scietis, quia veniet Dominus, et salvabit nos, et mane videbitis gloriam eius.

[N147co] Deus, qui nos redemptionis nostrae annua exspectatione laetificas, praesta, ut Unigenitum tuum, quem laeti suscipimus Redemptorem, venientem quoque Iudicem securi videre mereamur Dominum nostrum, Iesum Christum.

[N148so] Tanto nos, Domine, quaesumus, promptiore servitio haec praecurrere concede sollemnia, quanto in his constare principium nostrae redemptionis ostendis.

[N149am] Revelabitur gloria Domini, et videbit omnis caro salutare Dei nostri.

[N150pc] Da nobis, quaesumus, Domine, Unigeniti Filii tui recensita nativitate vegetari, cuius caelesti mysterio pascimur et potamur.

[N151ai] Dominus dixit ad me: Filius meus es tu, ego hodie genui te.

[N152ai] Gaudeamus omnes in Domino, quia Salvator noster natus est in mundo. Hodie nobis de caelo pax vera descendit.

[N153co] Deus, qui hanc sacratissimam noctem veri luminis fecisti illustratione clarescere, da, quaesumus, ut, cuius in terra mysteria lucis agnovimus, eius quoque gaudiis perfruamur in caelo.

[N154so] Grata tibi sit, Domine, quaesumus, hodiernae festivitatis oblatio, ut, per haec sacrosancta commercia, in illius inveniamur forma, in quo tecum est nostra substantia.

[N155am] Verbum caro factum est, et vidimus gloriam eius.

[N156pc] Da nobis, quaesumus, Domine Deus noster, ut, qui nativitatem Redemptoris nostri frequentare gaudemus, dignis conversationibus ad eius mereamur pervenire consortium.

[N157ai] Lux fulgebit hodie super nos, quia natus est nobis Dominus; et vocabitur admirabilis, Deus, Princeps pacis, Pater futuri saeculi: cuius regni non erit finis.

[N158co] Da, quaesumus, omnipotens Deus, ut dum nova incarnati Verbi tui luce perfundimur, hoc in nostro resplendeat opere, quod per fidem fulget in mente.

[N159so] Munera nostra, quaesumus, Domine, nativitatis hodiernae mysteriis apta proveniant, ut sicut homo genitus idem praefulsit et Deus, sic nobis haec terrena substantia conferat quod divinum est.

[N160am] Exsulta, filia Sion, lauda, filia Ierusalem: ecce Rex tuus veniet sanctus et salvator mundi.

[N161pc] Da nobis, Domine, Filii tui nativitatem laeta devotione colentibus, huius arcana mysterii et plena fide cognoscere, et pleniore caritatis ardore diligere.

[N162ai] Puer natus est nobis, et filius datus est nobis, cuius imperium super humerum eius, et vocabitur nomen eius magni consilii Angelus.

[N163co] Deus, qui humanae substantiae dignitatem et mirabiliter condidisti, et mirabilius reformasti, da, quaesumus, nobis eius divinitatis esse consortes, qui humanitatis nostrae fieri dignatus est particeps.

[N164so] Oblatio tibi sit, Domine, hodiernae sollemnitatis accepta, qua et nostrae reconciliationis processit perfecta placatio, et divini cultus nobis est indita plenitudo.

[N165am] Viderunt omnes fines terrae salutare Dei nostri.

[N166pc] Praesta, misericors Deus, ut natus hodie Salvator mundi, sicut divinae nobis generationis est auctor, ita et immortalitatis sit ipse largitor.

[N167ai] Venerunt pastores festinantes, et invenerunt Mariam et Ioseph et Infantem positum in praesepio.

[N168co] Deus, qui praeclara nobis sanctae Familiae dignatus es exempla praebere, concede propitius, ut, domesticis virtutibus caritatisque vinculis illam sectantes, in laetitia domus tuae praemiis fruamur aeternis.

[N169so] Hostiam tibi placationis offerimus, Domine, suppliciter deprecantes, ut, Deiparae Virginis beatique Ioseph interveniente suffragio, familias nostras in tua gratia firmiter et pace constituas.

[N170am] Deus noster in terris visus est, et cum hominibus conversatus est.

[N171pc] Quos caelestibus reficis sacramentis, fac, clementissime Pater, sanctae Familiae exempla iugiter imitari, ut, post aerumnas saeculi, eius consortium consequamur aeternum.

[N172ai] Sic Deus dilexit mundum, ut Filium suum Unigenitum daret, ut omnis qui credit in eum non pereat, sed habeat vitam aeternam.

[N173co] Omnipotens et invisibilis Deus, qui tuae lucis adventu mundi tenebras effugasti, sereno vultu nos, quaesumus, intuere, ut magnificentiam nativitatis Unigeniti tui dignis praeconiis collaudemus.

[N174so] Suscipe, Domine, munera nostra, quibus exercentur commercia gloriosa, ut, offerentes quae dedisti, teipsum mereamur accipere.

[N175am] Per viscera misericordiae Dei nostri, visitavit nos Oriens ex alto.

[N176pc] Da, quaesumus, omnipotens Deus, ut mysteriorum virtute sanctorum iugiter vita nostra firmetur.

[N177ai] Dum medium silentium tenerent omnia, et nox in suo cursu medium iter haberet, omnipotens sermo tuus, Domine, de caelis a regalibus sedibus venit.

[N178co] Concede, quaesumus, omnipotens Deus, ut nos Unigeniti tui nova per carnem nativitas liberet, quos sub peccati iugo vetusta servitus tenet.

[N179so] Munera, quaesumus, Domine, tuae plebis propitiatus assume, ut, quae fidei pietate profitentur, sacramentis caelestibus apprehendant.

[N180am] De plenitudine eius nos omnes accepimus, et gratiam pro gratia.

[N181pc] Deus, qui nos sacramenti tui participatione contingis, virtutis eius effectus in nostris cordibus operare, ut suscipiendo muneri tuo per ipsum munus aptemur.

[N182ai] Puer natus est nobis, et filius datus est nobis, cuius imperium super humerum eius, et vocabitur nomen eius magni consilii Angelus.

[N183co] Omnipotens sempiterne Deus, qui in Filii tui nativitate tribuisti totius religionis initium perfectionemque constare, da nobis, quaesumus, in eius portione censeri, in quo totius salutis humanae summa consistit.

[N184so] Deus, auctor sincerae devotionis et pacis, da, quaesumus, ut et maiestatem tuam convenienter hoc munere veneremur, et sacri participatione mysterii fideliter sensibus uniamur.

[N185am] Misit Deus Filium suum Unigenitum in mundum, ut vivamus per eum.

[N186pc] Diversis plebs tua, Domine, gubernata subsidiis, et praesentia pietatis tuae remedia capiat et futura, ut, transeuntium rerum necessaria consolatione fovente, fiducialius ad aeterna contendat.

[N187ai] Salve, sancta Parens, enixa puerpera Regem, qui caelum terramque regit in saecula saeculorum.

[N188ai] Lux fulgebit hodie super nos, quia natus est nobis Dominus; et vocabitur admirabilis, Deus, Princeps pacis, Pater futuri saeculi: cuius regni non erit finis.

[N189co] Deus, qui salutis aeternae, beatae Mariae virginitate fecunda, humano generi praemia praestitisti, tribue, quaesumus, ut ipsam pro nobis intercedere sentiamus, per quam meruimus Filium tuum auctorem vitae suscipere.

[N190so] Deus, qui bona cuncta inchoas benignus et perficis, da nobis, de sollemnitate sanctae Dei Genetricis laetantibus, sicut de initiis tuae gratiae gloriamur ita de perfectione gaudere.

[N191am] Iesus Christus heri et hodie, ipse et in saecula.

[N192pc] Sumpsimus, Domine, laeti sacramenta caelestia: praesta, quaesumus, ut ad vitam nobis proficiant sempiternam, qui beatam semper Virginem Mariam Filii tui Genetricem et Ecclesiae Matrem profiteri gloriamur.

[N193ai] Dum medium silentium tenerent omnia, et nox in suo cursu medium iter haberet, omnipotens sermo tuus, Domine, de caelis a regalibus sedibus venit.

[N194co] Omnipotens sempiterne Deus, fidelium splendor animarum, dignare mundum gloria tua implere benignus, et cunctis populis appare per tui luminis claritatem.

[N195so] Oblata, Domine, munera Unigeniti tui nativitate sanctifica, qua nobis et via ostenditur veritatis, et regni caelestis vita promittitur.

[N196am] Omnibus qui receperunt eum, dedit eis potestatem filios Dei fieri.

[N197pc] Domine Deus noster, suppliciter te rogamus, ut, huius operatione mysterii, vitia nostra purgentur, et iusta desideria compleantur.

[N198ai] Surge, Ierusalem, et circumspice ad orientem et vide congregatos filios tuos a solis ortu usque ad occasum.

[N199co] Corda nostra, quaesumus, Domine, tuae maiestatis splendor illustret, quo mundi huius tenebras transire valeamus, et perveniamus ad patriam claritatis aeternae.

[N200so] Suscipe, quaesumus, Domine, munera nostra pro apparitione Unigeniti Filii tui et primitiis gentium dicata, ut et tibi celebretur laudatio et nobis fiat aeterna salvatio.

[N201am] Claritas Dei illuminavit civitatem sanctam Ierusalem et ambulabant gentes in lumine eius.

[N202pc] Sacra alimonia renovati, tuam, Domine, misericordiam deprecamur, ut semper in mentibus nostris tuae appareat stella iustitiae et noster in tua sit confessione thesaurus.

[N203ai] Ecce advenit Dominator Dominus; et regnum in manu eius et potestas et imperium.

[N204co] Deus, qui hodierna die Unigenitum tuum gentibus stella duce revelasti, concede propitius, ut, qui iam te ex fide cognovimus, usque ad contemplandam speciem tuae celsitudinis perducamur.

[N205so] Ecclesiae tuae, quaesumus, Domine, dona propitius intuere, quibus non iam aurum, thus et myrrha profertur, sed quod eisdem muneribus declaratur, immolatur et sumitur, Iesus Christus.

[N206am] Vidimus stellam eius in Oriente, et venimus cum muneribus adorare Dominum.

[N207pc] Caelesti lumine, quaesumus, Domine, semper et ubique nos praeveni, ut mysterium, cuius nos participes esse voluisti, et puro cernamus intuitu, et digno percipiamus affectu.

[N208ai] Dies sanctificatus illuxit nobis: venite, gentes, et adorate Dominum, quia descendit lux magna super terram.

[N209co] Da, quaesumus, Domine, populo tuo inviolabilem fidei firmitatem, ut, qui Unigenitum tuum in tua tecum gloria sempiternum in veritate nostri corporis natum de Matre Virgine confitentur, et a praesentibus liberentur adversis, et mansuris gaudiis inserantur.

[N210co] Deus, cuius Verbi aeternitas caeli faciem decoravit, et ex Maria Virgine carnis nostrae fragilitatem suscepit, quaesumus, ut qui splendor veritatis in nobis apparuit, pro mundi redemptione in plenitudine potestatis procedat.

[N211so] Suscipe, Domine, munera nostra, quibus exercentur commercia gloriosa, ut, offerentes quae dedisti, teipsum mereamur accipere.

[N212am] Vidimus gloriam eius, gloriam quasi Unigeniti a Patre, plenum gratiae et veritatis.

[N213pc] Da, quaesumus, omnipotens Deus, ut, mysteriorum virtute sanctorum, iugiter vita nostra firmetur.

[N214ai] Benedictus qui venit in nomine Domini: Deus Dominus et illuxit nobis.

[N215co] Deus, qui, per beatum sacrae Virginis partum, Filii tui carnem humanis fecisti praeiudiciis non teneri, praesta, quaesumus, ut, huius creaturae novitate suscepti, vetustatis antiquae contagiis exuamur.

[N216co] Deus, cuius Unigenitus in substantia nostrae carnis apparuit, praesta, quaesumus, ut per eum, quem similem nobis foris agnovimus, intus reformari mereamur.

[N217so] Munera, quaesumus, Domine, tuae plebis propitiatus assume, ut, quae fidei pietate profitentur, sacramentis caelestibus apprehendant.

[N218am] Propter nimiam caritatem suam, qua dilexit nos Deus, Filium suum misit in similitudinem carnis peccati.

[N219pc] Deus, qui nos sacramenti tui participatione contingis, virtutis eius effectus in nostris cordibus operare, ut suscipiendo muneri tuo per ipsum munus aptemur.

[N220ai] Populus qui ambulabat in tenebris, vidit lucem magnam; habitantibus in regione umbrae mortis, lux orta est eis.

[N221co] Concede nobis, omnipotens Deus, ut salutare tuum, quod ad redemptionem mundi luce nova caelorum processit, nostris semper innovandis cordibus oriatur.

[N222co] Deus, illuminator omnium gentium, da populis tuis perpetua pace gaudere, et illud cordibus nostris splendidum lumen infunde, quod patrum nostrorum mentibus aspersisti.

[N223so] Deus, auctor sincerae devotionis et pacis, da, quaesumus, ut et maiestatem tuam convenienter hoc munere veneremur, et sacri participatione mysterii fideliter sensibus uniamur.

[N224am] Vita manifestata est, quae erat apud Patrem, et apparuit nobis.

[N225pc] Diversis plebs tua, Domine, gubernata subsidiis, et praesentia pietatis tuae remedia capiat et futura, ut, transeuntium rerum necessaria consolatione fovente, fiducialius ad aeterna contendat.

[N226ai] In principio et ante saecula Deus erat Verbum, et ipse nasci dignatus est Salvator mundi.

[N227co] Deus, qui populo tuo, Unigeniti tui nativitate, redemptionis effectum mirabiliter inchoasti, ita, quaesumus, fidei famulis tuis tribue firmitatem, ut usque ad promissum gloriae praemium, ipso gubernante, perveniant.

[N228co] Deus, qui per Filium tuum aeternitatis tuae lumen cunctis gentibus suscitasti, da plebi tuae fulgorem plenum sui Redemptoris agnoscere, ut ad perpetuam claritatem per eius incrementa perveniat.

[N229so] Suscipe, Domine, munera nostra, quibus exercentur commercia gloriosa, ut, offerentes quae dedisti, teipsum mereamur accipere.

[N230am] Sic Deus dilexit mundum, ut Filium suum Unigenitum daret, ut omnis, qui credit in eum, non pereat, sed habeat vitam aeternam.

[N231pc] Da, quaesumus, omnipotens Deus, ut, mysteriorum virtute sanctorum, iugiter vita nostra firmetur.

[N232ai] Exortum est in tenebris lumen rectis corde: misericors et miserator et iustus Dominus.

[N233co] Fideles tuos, quaesumus, Domine, benignus illumina, et splendore gloriae tuae corda eorum semper accende, ut Salvatorem suum et incessanter agnoscant, et veraciter apprehendant.

[N234co] Praesta, quaesumus, omnipotens Deus, ut Salvatoris mundi, stella duce, manifestata nativitas, mentibus nostris reveletur semper et crescat.

[N235so] Munera, quaesumus, Domine, tuae plebis propitiatus assume, ut, quae fidei pietate profitentur, sacramentis caelestibus apprehendant.

[N236am] In hoc apparuit caritas Dei in nobis, quoniam Filium suum Unigenitum misit Deus in mundum, ut vivamus per eum.

[N237pc] Deus, qui nos sacramenti tui participatione contingis, virtutis eius effectus in nostris cordibus operare, ut suscipiendo muneri tuo per ipsum munus aptemur.

[N238ai] Misit Deus Filium suum, factum ex muliere, ut adoptionem filiorum reciperemus.

[N239co] Omnipotens sempiterne Deus, qui per adventum Unigeniti Filii tui nova luce radiare dignatus es, concede nobis, ut, sicut eum per Virginis partum in forma nostri corporis meruimus habere participem, ita et in eius regno gratiae mereamur esse consortes.

[N240co] Omnipotens sempiterne Deus, qui per Unigenitum tuum novam creaturam nos tibi esse fecisti, praesta, quaesumus, ut per gratiam tuam in illius inveniamur forma, in quo tecum est nostra substantia.

[N241so] Deus, auctor sincerae devotionis et pacis, da, quaesumus, ut et maiestatem tuam convenienter hoc munere veneremur, et sacri participatione mysterii fideliter sensibus uniamur.

[N242am] De plenitudine eius nos omnes accepimus, et gratiam pro gratia.

[N243pc] Diversis plebs tua, Domine, gubernata subsidiis, et praesentia pietatis tuae remedia capiat et futura, ut, transeuntium rerum necessaria consolatione fovente, fiducialius ad aeterna contendat.

[N244ai] Baptizato Domino, aperti sunt caeli, et sicut columba super eum Spiritus mansit, et vox Patris intonuit: Hic est Filius meus dilectus, in quo mihi bene complacui.

[N245co] Omnipotens sempiterne Deus, qui Christum, in Iordane flumine baptizatum, Spiritu Sancto super eum descendente, dilectum Filium tuum sollemniter declarasti, concede filiis adoptionis tuae, ex aqua et Spiritu Sancto renatis, ut in beneplacito tuo iugiter perseverent.

[N246co] Deus, cuius Unigenitus in substantia nostrae carnis apparuit, praesta, quaesumus, ut, per eum, quem similem nobis foris agnovimus, intus reformari mereamur.

[N247so] Suscipe munera, Domine, in dilecti Filii tui revelatione delata, ut fidelium tuorum oblatio in eius sacrificium transeat, qui mundi voluit peccata miseratus abluere.

[N248vd] Qui miris signasti mysteriis novum in Iordane lavacrum, ut, per vocem de caelo delapsam, habitare Verbum tuum inter homines crederetur; et, per Spiritum in columbae specie descendentem, Christus Servus tuus oleo perungi laetitiae ac mitti ad evangelizandum pauperibus nosceretur.

[N249am] Ecce de quo dicebat Ioannes: Ego vidi et testimonium perhibui, quia hic est Filius Dei.

[N250pc] Sacro munere satiati, clementiam tuam, Domine, suppliciter exoramus, ut, Unigenitum tuum fideliter audientes, filii tui vere nominemur et simus.

[Q251ai] Misereris omnium, Domine, et nihil odisti eorum quae fecisti, dissimulans peccata hominum propter paenitentiam et parcens illis, quia tu es Dominus Deus noster.

[Q252co] Concede nobis, Domine, praesidia militiae christianae sanctis inchoare ieiuniis, ut, contra spiritales nequitias pugnaturi, continentiae muniamur auxiliis. Benedictio et impositio cinerum

[Q253mn] Deum Patrem, fratres carissimi, suppliciter deprecemur, ut hos cineres, quos paenitentiae causa capitibus nostris imponimus, ubertate gratiae suae benedicere dignetur.

[Q254bn] Deus, qui humiliatione flecteris et satisfactione placaris, aurem tuae pietatis precibus nostris inclina, et super famulos tuos, horum cinerum aspersione contactos, gratiam tuae benedictionis effunde propitius, ut, quadragesimalem observantiam prosequentes, ad Filii tui paschale mysterium celebrandum purificatis mentibus pervenire mereantur.

[Q255bn] Deus, qui non mortem sed conversionem desideras peccatorum, preces nostras clementer exaudi, et hos cineres, quos capitibus nostris imponi decernimus benedicere pro tua pietate dignare, ut qui nos cinerem esse et in pulverem reversuros cognoscimus quadragesimalis exercitationis studio, peccatorum veniam et novitatem vitae, ad imaginem Filii tui resurgentis, consequi valeamus.

[Q256fr] Paenitemini, et credite Evangelio.

[Q257fr] Memento, homo, quia pulvis es, et in pulverem reverteris.

[Q258an] Immutemur habitu, in cinere et cilicio, ieiunemus, et ploremus ante Dominum, quia multum misericors est dimittere peccata nostra Deus noster.

[Q259an] Inter vestibulum et altare plorabunt sacerdotes ministri Domini, et dicent: Parce, Domine, parce populo tuo, et ne claudas ora canentium te, Domine.

[Q260an] Dele, Domine, iniquitatem meam.

[Q261rp] Emendemus in melius, quae ignoranter peccavimus, ne subito praeoccupati die mortis quaeramus spatium paenitentiae, et invenire non possimus. Attende, Domine, et miserere, quia peccavimus tibi. Adiuva nos, Deus salutaris noster, et propter honorem nominis tui, Domine, libera nos.

[Q262so] Sacrificium quadragesimalis initii sollemniter immolamus, te, Domine, deprecantes, ut per paenitentiae caritatisque labores a noxiis voluptatibus temperemus, et, a peccatis mundati, ad celebrandam Filii tui passionem mereamur esse devoti.

[Q263am] Qui meditabitur in lege Domini die ac nocte, dabit fructum suum in tempore suo.

[Q264pc] Percepta nobis, Domine, praebeant sacramenta subsidium, ut tibi grata sint nostra ieiunia, et nobis proficiant ad medelam.

[Q265sp] Super inclinantes se tuae maiestati, Deus, spiritum compunctionis propitius effunde, et praemia paenitentibus repromissa misericorditer consequi mereantur.

[Q266ai] Dum clamarem ad Dominum, exaudivit vocem meam ab his, qui appropinquant mihi. Iacta cogitatum tuum in Domino, et ipse te enutriet.

[Q267co] Actiones nostras, quaesumus, Domine, aspirando praeveni et adiuvando prosequere, ut cuncta nostra operatio a te semper incipiat, et per te coepta finiatur.

[Q268so] Hostias, quaesumus, Domine, propitius intende, quas sacris altaribus exhibemus, ut, nobis indulgentiam largiendo, tuo nomini dent honorem.

[Q269am] Cor mundum crea in me, Deus, et spiritum rectum innova in visceribus meis.

[Q270pc] Caelestis doni benedictione percepta, supplices te, Deus omnipotens, deprecamur, ut hoc idem nobis semper et indulgentiae causa sit et salutis.

[Q271sp] Qui populo tuo, omnipotens Deus, notas fecisti vias vitae aeternae, per eas ad te, lumen indeficiens, nos facias, quaesumus, pervenire.

[Q272ai] Audivit Dominus, et misertus est mihi, Dominus factus est adiutor meus.

[Q273co] Inchoata paenitentiae opera, quaesumus, Domine, benigno favore prosequere, ut observantiam, quam corporaliter exercemus, mentibus etiam valeamus implere sinceris.

[Q274so] Sacrificium, Domine, observantiae quadragesimalis offerimus, quod tibi, quaesumus, mentes nostras reddat acceptas, et continentiae promptioris nobis tribuat facultatem.

[Q275am] Vias tuas, Domine, demonstra nobis, et semitas tuas edoce nos.

[Q276pc] Quaesumus, omnipotens Deus, ut, huius participatione mysterii a delictis omnibus expiati, remediis tuae pietatis aptemur.

[Q277sp] De magnalibus tuis, Deus misericors, gratias iugiter referat plebs tua, et observationes antiquas peregrina recensendo ad perpetuam tui visionem pervenire mereatur.

[Q278ai] Exaudi nos, Domine, quoniam benigna est misericordia tua; secundum multitudinem miserationum tuarum respice nos, Domine.

[Q279co] Omnipotens sempiterne Deus, infirmitatem nostram propitius respice, atque ad protegendum nos dexteram tuae maiestatis extende.

[Q280so] Suscipe, quaesumus, Domine, sacrificium placationis et laudis, et praesta, ut, huius operatione mundati, beneplacitum tibi nostrae mentis offeramus affectum.

[Q281am] Misericordiam volo et non sacrificium, dicit Dominus; non enim veni vocare iustos, sed peccatores.

[Q282pc] Caelestis vitae munere vegetati, quaesumus, Domine, ut, quod est nobis in praesenti vita mysterium, fiat aeternitatis auxilium.

[Q283sp] Adesto, Domine, benignus populo tuo, qui sacra mysteria contigerit, ut nullis periculis affligatur, qui in te protectorem confidit.

[Q284ai] Invocabit me, et ego exaudiam eum; eripiam eum, et glorificabo eum, longitudine dierum adimplebo eum.

[Q285co] Concede nobis, omnipotens Deus, ut, per annua quadragesimalis exercitia sacramenti, et ad intellegendum Christi proficiamus arcanum, et effectus eius digna conversatione sectemur.

[Q286so] Fac nos, quaesumus, Domine, his muneribus offerendis convenienter aptari, quibus ipsius venerabilis sacramenti celebramus exordium.

[Q287vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum.Qui quadraginta diebus, terrenis abstinens alimentis, formam huius observantiae ieiunio dedicavit, et, omnes evertens antiqui serpentis insidias, fermentum malitiae nos docuit superare, ut, paschale mysterium dignis mentibus celebrantes, ad pascha demum perpetuum transeamus. Et ideo cum Angelorum atque Sanctorum turba hymnum laudis tibi canimus, sine fine dicentes: Sanctus.

[Q288am] Non in solo pane vivit homo, sed in omni verbo quod procedit de ore Dei.

[Q289am] Scapulis suis obumbrabit tibi Dominus, et sub pennis eius sperabis.

[Q290pc] Caelesti pane refecti, quo fides alitur, spes provehitur et caritas roboratur, quaesumus, Domine, ut ipsum, qui est panis vivus et verus, esurire discamus, et in omni verbo, quod procedit de ore tuo, vivere valeamus.

[Q291sp] Super populum tuum, Domine, quaesumus, benedictio copiosa descendat, ut spes in tribulatione succrescat, virtus in tentatione firmetur, aeterna redemptio tribuatur.

[Q292ai] Sicut oculi servorum in manibus dominorum suorum, ita oculi nostri ad Dominum Deum nostrum, donec misereatur nobis. Miserere nobis, Domine, miserere nobis.

[Q293co] Converte nos, Deus, salutaris noster, et, ut nobis opus quadragesimale proficiat, mentes nostras caelestibus instrue disciplinis.

[Q294so] Accepta tibi sit, Domine, nostrae devotionis oblatio, quae et conversationem nostram, te operante, sanctificet, et indulgentiam nobis tuae propitiationis obtineat.

[Q295am] Amen dico vobis, quod uni ex minimis meis fecistis, mihi fecistis, dicit Dominus: Venite, benedicti Patris mei, possidete paratum vobis regnum ab initio saeculi.

[Q296pc] Sentiamus, Domine, quaesumus, tui perceptione sacramenti, subsidium mentis et corporis, ut, in utroque salvati, de caelestis remedii plenitudine gloriemur.

[Q297sp] Mentem populi tui, quaesumus, Domine, lumine tuae claritatis illustra, ut videre possit, quae agenda sunt, et, quae recta sunt, agere valeat.

[Q298ai] Domine, refugium factus es nobis a generatione et progenie; a saeculo, et in saeculum tu es.

[Q299co] Respice, Domine, familiam tuam, et praesta, ut apud te mens nostra tuo desiderio fulgeat, quae se corporalium moderatione castigat.

[Q300so] Suscipe, creator omnipotens Deus, quae de tuae munificentiae largitate deferimus, et temporalia nobis collata praesidia ad vitam converte propitiatus aeternam.

[Q301am] Cum invocarem te, exaudisti me, Deus iustitiae meae, in tribulatione dilatasti me; miserere mihi, Domine, et exaudi orationem meam.

[Q302pc] His nobis, Domine, mysteriis conferatur, quo, terrena desideria mitigantes, discamus amare caelestia.

[Q303sp] Fideles tui, Deus, benedictione tua firmentur, sis eis in maerore solatium, in tribulatione patientia, in periculo praesidium.

[Q304ai] Reminiscere miserationum tuarum, Domine, et misericordiae tuae, quae a saeculo sunt. Ne umquam dominentur nobis inimici nostri; libera nos, Deus Israel, ex omnibus angustiis nostris.

[Q305co] Devotionem populi tui, quaesumus, Domine, benignus intende, ut, qui per abstinentiam temperantur in corpore, per fructum boni operis reficiantur in mente.

[Q306so] Offerimus tibi, Domine, quae dicanda tuo nomini tu dedisti, ut, sicut eadem nobis efficis sacramentum, ita fieri tribuas remedium sempiternum.

[Q307am] Laetentur omnes qui sperant in te, Domine, in aeternum exsultabunt et habitabis in eis.

[Q308pc] Deus, qui nos sacramentis tuis pascere non desistis, tribue, ut eorum nobis indulta refectio vitam, quaesumus, conferat sempiternam.

[Q309sp] Tuere, Domine, populum tuum, et ab omnibus peccatis clementer emunda, quia nulla ei nocebit adversitas, si nulla ei dominetur iniquitas.

[Q310ai] Verba mea auribus percipe, Domine, intellege clamorem meum. Intende voci orationis meae, Rex meus et Deus meus.

[Q311co] Largire nobis, quaesumus, Domine, semper spiritum cogitandi quae recta sunt, promptius et agendi, ut, qui sine te esse non possumus, secundum te vivere valeamus.

[Q312so] Supplicum votis, Domine, esto propitius, et, populi tui oblationibus precibusque susceptis, omnium nostrum ad te corda converte.

[Q313am] Omnis qui petit accipit, et qui quaerit invenit, et pulsanti aperietur.

[Q314pc] Quaesumus, Domine Deus noster, ut sacrosancta mysteria, quae pro reparationis nostrae munimine contulisti, et praesens nobis remedium esse facias et futurum.

[Q315sp] Adveniat, quaesumus, Domine, misericordia sperata supplicibus, et eisdem caelestis munificentia tribuatur, qua et recte poscenda cognoscant et postulata percipiant.

[Q316ai] De necessitatibus meis eripe me, Domine. Vide humilitatem meam et laborem meum, et dimitte omnia peccata mea.

[Q317co] Da, quaesumus, Domine, fidelibus tuis observationi paschali convenienter aptari, ut suscepta sollemniter castigatio corporalis cunctis ad fructum proficiat animarum.

[Q318so] Suscipe, Domine, propitiatus hostias, quibus et te placari voluisti, et nobis salutem potenti pietate restitui.

[Q319am] Vivo ego, dicit Dominus; nolo mortem peccatoris, sed magis ut convertatur et vivat.

[Q320pc] Tui nos, Domine, sacramenti refectio sancta restauret, et, a vetustate purgatos, in mysterii salutaris faciat transire consortium.

[Q321sp] Respice, Domine, propitius ad plebem tuam, ut quod eius observantia profitetur extrinsecus, interius operetur.

[Q322ai] Lex Domini irreprehensibilis, convertens animas; testimonium Domini fidele, sapientiam praestans parvulis.

[Q323co] Ad te corda nostra, Pater aeterne, converte, ut nos, unum necessarium semper quaerentes et opera caritatis exercentes, tuo cultui praestes esse dicatos.

[Q324so] Haec quae nos reparent, quaesumus, Domine, beata mysteria suo nos munere dignos efficiant.

[Q325am] Estote perfecti, sicut et Pater vester caelestis perfectus est, dicit Dominus.

[Q326pc] Perpetuo, Domine, favore prosequere, quos reficis divino mysterio, et, quos imbuisti caelestibus institutis, salutaribus comitare solaciis.

[Q327sp] Fideles tuos, Deus, benedictio desiderata confirmet, quae eos et a tua voluntate numquam faciat discrepare, et tuis semper indulgeat beneficiis gratulari.

[Q328ai] Tibi dixit cor meum quaesivi vultum tuum, vultum tuum, Domine, requiram. Ne avertas faciem tuam a me.

[Q329ai] Reminiscere miserationum tuarum, Domine, et misericordiae tuae, quae a saeculo sunt. Ne umquam dominentur nobis inimici nostri; libera nos, Deus Israel, ex omnibus angustiis nostris.

[Q330co] Deus, qui nobis dilectum Filium tuum audire praecepisti, verbo tuo interius nos pascere digneris, ut, spiritali purificato intuitu, gloriae tuae laetemur aspectu.

[Q331so] Haec hostia, Domine, quaesumus, emundet nostra delicta, et ad celebranda festa paschalia fidelium tuorum corpora mentesque sanctificet.

[Q332vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, propria morte praenuntiata discipulis, in monte sancto suam eis aperuit claritatem, ut per passionem, etiam lege prophetisque testantibus, ad gloriam resurrectionis perveniri constaret. Et ideo cum caelorum virtutibus in terris te iugiter celebramus, maiestati tuae sine fine clamantes: Sanctus.

[Q333am] Hic est Filius meus dilectus, in quo mihi bene complacui; ipsum audite.

[Q334pc] Percipientes, Domine, gloriosa mysteria, gratias tibi referre satagimus, quod, in terra positos, iam caelestium praestas esse participes.

[Q335sp] Benedic, Domine, fideles tuos benedictione perpetua, et fac eos Unigeniti tui Evangelio sic adhaerere, ut ad illam gloriam, cuius in se speciem Apostolis ostendit, et suspirare iugiter et feliciter valeant pervenire.

[Q336ai] Redime me, Domine, et miserere mei. Pes enim meus stetit in via recta, in ecclesiis benedicam Dominum.

[Q337co] Deus, qui ob animarum medelam castigare corpora praecepisti, concede, ut ab omnibus possimus abstinere peccatis, et corda nostra pietatis tuae valeant exercere mandata.

[Q338so] Preces nostras, Domine, propitiatus admitte, et a terrenis effice illecebris liberatos, quos caelestibus tribuis servire mysteriis.

[Q339am] Estote misericordes, sicut et Pater vester misericors est, dicit Dominus.

[Q340pc] Haec nos communio, Domine, purget a crimine, et caelestis gaudii faciat esse consortes.

[Q341sp] Confirma, Domine, quaesumus, tuorum corda fidelium, et gratiae tuae virtute corrobora, ut et in tua sint supplicatione devoti, et mutua dilectione sinceri.

[Q342ai] Illumina oculos meos, ne umquam obdormiam in morte, nequando dicat inimicus meus: Praevalui adversus eum.

[Q343co] Custodi, Domine, quaesumus, Ecclesiam tuam propitiatione perpetua, et quia sine te labitur humana mortalitas, tuis semper auxiliis et abstrahatur a noxiis, et ad salutaria dirigatur.

[Q344so] Sanctificationem tuam nobis, Domine, his mysteriis operare placatus, quae nos et a vitiis terrenis emundet, et ad caelestia dona perducat.

[Q345am] Narrabo omnia mirabilia tua. Laetabor et exsultabo in te, psallam nomini tuo, Altissime.

[Q346pc] Sacrae nobis, quaesumus, Domine, mensae refectio, et piae conversationis augmentum, et tuae propitiationis continuum praestet auxilium.

[Q347sp] Propitiare, Domine, supplicationibus tuorum fidelium, et animarum eorum medere languoribus, ut, remissione percepta, in tua semper benedictione laetentur.

[Q348ai] Ne derelinquas me, Domine Deus meus, ne discedas a me; intende in adiutorium meum, Domine, virtus salutis meae.

[Q349co] Conserva, Domine, familiam tuam bonis semper operibus eruditam, et sic praesentibus consolare praesidiis, ut propitius ad superna dona perducas.

[Q350so] Hostias, Domine, quas tibi offerimus, propitius intuere, et, per haec sancta commercia, vincula peccatorum nostrorum absolve.

[Q351am] Filius hominis non venit ministrari, sed ministrare, et dare animam suam redemptionem pro multis.

[Q352pc] Quaesumus, Domine Deus noster, ut, quod nobis ad immortalitatis pignus esse voluisti, ad salutis aeternae tribuas provenire suffragium.

[Q353sp] Praesta famulis tuis, Domine, abundantiam protectionis et gratiae, da salutem mentis et corporis, da plenitudinem fraternae caritatis et eos tibi semper fac esse devotos.

[Q354ai] Proba me, Deus, et cognosce semitas meas; vide si via iniquitatis in me est, et deduc me in via aeterna.

[Q355co] Deus, innocentiae restitutor et amator, dirige ad te tuorum corda servorum, ut, Spiritus tui fervore concepto, et in fide inveniantur stabiles, et in opere efficaces.

[Q356so] Praesenti sacrificio, quaesumus, Domine, observantiam nostram sanctifica, ut, quod quadragesimalis exercitatio profitetur exterius, interius operetur effectu.

[Q357am] Beati immaculati in via, qui ambulant in lege Domini.

[Q358pc] Haec in nobis sacrificia, Deus, et actione permaneant, et operatione firmentur.

[Q359sp] Adesto, Domine, famulis tuis, implorantibus gratiae tuae auxilium, ut protectionis tuae munimen et regimen obtineant.

[Q360ai] In te, Domine, speravi, non confundar in aeternum; educes me de laqueo quem absconderunt mihi, quoniam tu es protector meus.

[Q361co] Da, quaesumus, omnipotens Deus, ut, sacro nos purificante paenitentiae studio, sinceris mentibus ad sancta ventura facias pervenire.

[Q362so] Miseratio tua, Deus, ad haec peragenda mysteria, famulos tuos, quaesumus, et praeveniat competenter, et devota conversatione perducat.

[Q363am] Dilexit nos Deus, et misit Filium suum propitiationem pro peccatis nostris.

[Q364pc] Accepto, Domine, pignore salutis aeternae, fac nos, quaesumus, sic tendere congruenter, ut ad eam pervenire possimus.

[Q365sp] Da, quaesumus, Domine, populo tuo salutem mentis et corporis, ut, bonis operibus inhaerendo, tua semper mereatur protectione defendi.

[Q366ai] Miserator et misericors Dominus, patiens et multum misericors. Suavis Dominus universis, et miserationes eius super omnia opera eius.

[Q367co] Deus, qui nos gloriosis remediis in terris adhuc positos iam caelestium rerum facis esse consortes, tu, quaesumus, in ista qua vivimus nos vita guberna, ut ad illam, in qua ipse es, lucem perducas.

[Q368so] Per haec veniat, quaesumus, Domine, sacramenta nostrae redemptionis effectus, qui nos et ab humanis retrahat semper excessibus, et ad salutaria dona perducat.

[Q369am] Oportet te, fili, gaudere, quia frater tuus mortuus fuerat, et revixit; perierat, et inventus est.

[Q370pc] Sacramenti tui, Domine, divina perceptio penetralia nostri cordis infundat, et sui nos participes potenter efficiat.

[Q371sp] Pateant aures misericordiae tuae, Domine, precibus supplicantium, et, ut petentibus desiderata concedas, fac eos, quae tibi sunt placita postulare.

[Q372ai] Oculi mei semper ad Dominum, quia ipse evellet de laqueo pedes meos. Respice in me et miserere mei, quoniam unicus et pauper sum ego.

[Q373ai] Cum sanctificatus fuero in vobis, congregabo vos de universis terris; et effundam super vos aquam mundam, et mundabimini ab omnibus inquinamentis vestris, et dabo vobis spiritum novum, dicit Dominus.

[Q374co] Deus, omnium misericordiarum et totius bonitatis auctor, qui peccatorum remedia in ieiuniis, orationibus et eleemosynis demonstrasti, hanc humilitatis nostrae confessionem propitius intuere, ut, qui inclinamur conscientia nostra, tua semper misericordia sublevemur.

[Q375so] His sacrificiis, Domine, concede placatus, ut, qui propriis oramus absolvi delictis, fraterna dimittere studeamus.

[Q376vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, dum aquae sibi petiit potum a Samaritana praeberi, iam in ea fidei donum ipse creaverat, et ita eius fidem sitire dignatus est, ut ignem in illa divini amoris accenderet. Unde et nos tibi gratias agimus, et tuas virtutes cum Angelis praedicamus, dicentes: Sanctus.

[Q377am] Qui biberit aquam, quam ego dabo ei, dicit Dominus, fiet in eo fons aquae salientis in vitam aeternam.

[Q378am] Passer invenit sibi domum, et turtur nidum, ubi reponat pullos suos: altaria tua, Domine virtutum, Rex meus, et Deus meus! Beati qui habitant in domo tua, in saeculum saeculi laudabunt te.

[Q379pc] Sumentes pignus caelestis arcani, et in terra positi iam superno pane satiati, te, Domine, supplices deprecamur, ut, quod in nobis mysterio geritur, opere impleatur.

[Q380sp] Rege, Domine, quaesumus, tuorum corda fidelium, et servis tuis hanc gratiam largire propitius, ut in tui et proximi dilectione manentes plenitudinem mandatorum tuorum adimpleant.

[Q381ai] Concupiscit et deficit anima mea in atria Domini. Cor meum et caro mea exsultaverunt in Deum vivum.

[Q382co] Ecclesiam tuam, Domine, miseratio continuata mundet et muniat, et quia sine te non potest salva consistere, tuo semper munere gubernetur.

[Q383so] Munus quod tibi, Domine, nostrae servitutis offerimus, tu salutare nobis perfice sacramentum.

[Q384am] Laudate Dominum, omnes gentes, quoniam confirmata est super nos misericordia eius.

[Q385pc] Tui nobis, quaesumus, Domine, communio sacramenti et purificationem conferat, et tribuat unitatem.

[Q386sp] Tueatur, quaesumus, Domine, dextera tua populum deprecantem, et purificatum dignanter erudiat, ut consolatione praesenti ad futura bona proficiat.

[Q387ai] Ego clamavi, quoniam exaudisti me, Deus; inclina aurem tuam, et exaudi verba mea. Custodi me, Domine, ut pupillam oculi; sub umbra alarum tuarum protege me.

[Q388co] Gratia tua ne nos, quaesumus, Domine, derelinquat, quae et sacrae nos deditos faciat servituti, et tuam nobis opem semper acquirat.

[Q389so] Concede nobis, quaesumus, Domine, ut haec hostia salutaris nostrorum fiat purgatio delictorum, et tuae propitiatio potestatis.

[Q390am] Domine, quis habitabit in tabernaculo tuo? aut quis requiescet in monte sancto tuo? Qui ingreditur sine macula, et operatur iustitiam.

[Q391pc] Vivificet nos, quaesumus, Domine, huius participatio sancta mysterii, et pariter nobis expiationem tribuat et munimen.

[Q392sp] Populi tui, Deus, institutor et rector, peccata, quibus impugnatur, expelle, ut semper tibi placitus et tuo munimine sit securus.

[Q393ai] Gressus meos dirige secundum eloquium tuum, et non dominetur mei omnis iniustitia.

[Q394co] Praesta, quaesumus, Domine, ut, per quadragesimalem observantiam eruditi et tuo verbo nutriti, sancta continentia tibi simus toto corde devoti, et in oratione tua semper efficiamur concordes.

[Q395so] Suscipe, quaesumus, Domine, preces populi tui cum oblationibus hostiarum, et tua mysteria celebrantes ab omnibus nos defende periculis.

[Q396am] Notas mihi fecisti vias vitae, adimplebis me laetitia cum vultu tuo, Domine.

[Q397pc] Sanctificet nos, Domine, qua pasti sumus, mensa caelestis, et, a cunctis erroribus expiatos, supernis promissionibus reddat acceptos.

[Q398sp] Tibi placitam, Deus noster, populo tuo tribue voluntatem, quia tunc illi prospera cuncta praestabis cum tuis aptum feceris institutis.

[Q399ai] Salus populi ego sum, dicit Dominus. De quacumque tribulatione clamaverint ad me, exaudiam eos, et ero illorum Dominus in perpetuum.

[Q400co] Maiestatem tuam, Domine, suppliciter imploramus, ut, quanto magis dies salutiferae festivitatis accedit, tanto devotius ad eius celebrandum proficiamus paschale mysterium.

[Q401so] Ut tibi grata sint, Domine, munera populi tui, ab omni, quaesumus, eum contagio perversitatis emunda, nec falsis gaudiis inhaerere patiaris, quem ad veritatis tuae praemia venire promittis.

[Q402am] Tu mandasti mandata tua custodiri nimis: utinam dirigantur viae meae ad custodiendas iustificationes tuas.

[Q403pc] Quos reficis, Domine, sacramentis, attolle benignus auxiliis, ut tuae salvationis effectum et mysteriis capiamus et moribus.

[Q404sp] Clementiam tuam imploramus, Domine, in misericordia tua confidentes, ut, sicut nos ex te habemus esse quod sumus, sic per gratiam tuam et bene velle sumamus et bonum posse quod volumus.

[Q405ai] Non est similis tui in diis, Domine, quoniam magnus es tu et faciens mirabilia; tu es Deus solus.

[Q406co] Cordibus nostris, quaesumus, Domine, gratiam tuam benignus infunde, ut ab humanis semper retrahamur excessibus, et monitis inhaerere valeamus, te largiente, caelestibus.

[Q407so] Respice, quaesumus, Domine, propitius ad munera, quae sacramus, ut tibi grata reddantur, et nobis salutaria semper exsistant.

[Q408am] Diligere Deum ex toto corde, et proximum tamquam seipsum, maius est omnibus sacrificiis.

[Q409pc] Mentes nostras et corpora, Domine, quaesumus, operatio tuae virtutis infundat, ut, quod participatione sumpsimus, plena redemptione capiamus.

[Q410sp] Implorantes, Domine, misericordiam tuam, fideles tuos propitius intuere, ut, qui de tua pietate confidunt, tuae caritatis dona ubique diffundere valeant.

[Q411ai] Benedic, anima mea, Domino, et noli oblivisci omnes retributiones eius, qui propitiatur omnibus iniquitatibus tuis.

[Q412co] Observationis huius annua celebritate laetantes, quaesumus, Domine, ut, paschalibus sacramentis inhaerentes, plenis eorum effectibus gaudeamus.

[Q413so] Deus, de cuius gratia venit, ut ad mysteria tua purgatis sensibus accedamus, praesta, quaesumus, ut, in eorum traditione sollemniter honoranda, competens deferamus obsequium.

[Q414am] Publicanus, stans a longe, percutiebat pectus suum dicens: Deus, propitius esto mihi peccatori.

[Q415pc] Da nobis, quaesumus, misericors Deus, ut sancta tua, quibus incessanter explemur, sinceris tractemus obsequiis, et fideli semper mente sumamus.

[Q416sp] Praetende, Domine, fidelibus tuis dexteram caelestis auxilii, ut te toto corde perquirant, et quae digne postulant consequi mereantur.

[Q417ai] Laetare, Ierusalem, et conventum facite, omnes qui diligitis eam; gaudete cum laetitia, qui in tristitia fuistis, ut exsultetis, et satiemini ab uberibus consolationis vestrae.

[Q418co] Deus, qui per Verbum tuum humani generis reconciliationem mirabiliter operaris, praesta, quaesumus, ut populus christianus prompta devotione et alacri fide ad ventura sollemnia valeat festinare.

[Q419so] Remedii sempiterni munera, Domine, laetantes offerimus, suppliciter exorantes, ut eadem nos et fideliter venerari, et pro salute mundi congruenter exhibere perficias.

[Q420vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui genus humanum, in tenebris ambulans, ad fidei claritatem per mysterium incarnationis adduxit, et, qui servi peccati veteris nascebantur, per lavacrum regenerationis in filios adoptionis assumpsit. Propter quod caelestia tibi atque terrestria canticum novum concinunt adorando, et nos, cum omni exercitu Angelorum, proclamamus, sine fine dicentes: Sanctus.

[Q421am] Dominus linivit oculos meos: et abii, et lavi, et vidi, et credidi Deo.

[Q422am] Oportet te, fili, gaudere, quia frater tuus mortuus fuerat, et revixit; perierat, et inventus est.

[Q423am] Ierusalem, quae aedificatur ut civitas, cuius participatio eius in idipsum. Illuc enim ascenderunt tribus, tribus Domini, ad confitendum nomini tuo, Domine.

[Q424pc] Deus, qui illuminas omnem hominem venientem in hunc mundum, illumina, quaesumus, corda nostra gratiae tuae splendore, ut digna ac placita maiestati tuae cogitare semper, et te sincere diligere valeamus.

[Q425sp] Tuere, Domine, supplices tuos, sustenta fragiles, et inter tenebras mortalium ambulantes tua semper luce vivifica, atque a malis omnibus clementer ereptos, ad summa bona pervenire concede.

[Q426ai] Ego autem in Domino sperabo. Exsultabo, et laetabor in tua misericordia, quia respexisti humilitatem meam.

[Q427co] Deus, qui ineffabilibus mundum renovas sacramentis, praesta, quaesumus, ut Ecclesia tua et aeternis proficiat institutis, et temporalibus non destituatur auxiliis.

[Q428so] Dicatae tibi, Domine, quaesumus, capiamus oblationis effectum, ut, a terrenae vetustatis conversatione mundati, caelestis vitae profectibus innovemur.

[Q429am] Spiritum meum ponam in medio vestri, et faciam ut in praeceptis meis ambuletis, et iudicia mea custodiatis, et operemini, dicit Dominus.

[Q430pc] Sancta tua nos, Domine, quaesumus, et renovando vivificent, et sanctificando ad aeterna perducant.

[Q431sp] Plebem tuam, Domine, quaesumus, interius exteriusque restaura, ut quam corporeis non vis delectationibus impedire, spiritali facias vigere proposito.

[Q432ai] Sitientes, venite ad aquas, dicit Dominus; et qui non habetis pretium, venite, et bibite cum laetitia.

[Q433co] Exercitatio veneranda sanctae devotionis, Domine, tuorum fidelium corda disponat, ut et dignis mentibus suscipiant paschale mysterium, et salvationis tuae nuntient praeconium.

[Q434so] Offerimus tibi, Domine, munera quae dedisti, ut et creationis tuae circa mortalitatem nostram testificentur auxilium, et remedium nobis immortalitatis operentur.

[Q435am] Dominus regit me, et nihil mihi deerit; in loco pascuae ibi me collocavit, super aquam refectionis educavit me.

[Q436pc] Purifica, quaesumus, Domine, mentes nostras benignus, et renova caelestibus sacramentis, ut consequenter et corporum praesens pariter et futurum capiamus auxilium.

[Q437sp] Concede, misericors Deus, ut devotus tibi populus semper existat et de tua clementia, quod ei prosit, indesinenter obtineat.

[Q438ai] Ego vero orationem meam ad te, Domine; tempus beneplaciti, Deus. In multitudine misericordiae tuae exaudi me in veritate salutis tuae.

[Q439co] Deus, qui et iustis praemia meritorum et peccatoribus veniam per paenitentiam praebes, tuis supplicibus miserere, ut reatus nostri confessio indulgentiam valeat percipere delictorum.

[Q440so] Huius sacrificii potentia, Domine, quaesumus, et vetustatem nostram clementer abstergat, et novitatem nobis augeat et salutem.

[Q441am] Non misit Deus Filium suum in mundum, ut iudicet mundum, sed ut salvetur mundus per ipsum.

[Q442pc] Caelestia dona capientibus, quaesumus, Domine, non ad iudicium provenire patiaris, quae fidelibus tuis ad remedium providisti.

[Q443sp] Famuli tui, Domine, pietatis tuae protectione muniantur, ut bonum in hoc saeculo facientes ad te, summum bonum, perveniant.

[Q444ai] Laetetur cor quaerentium Dominum. Quaerite Dominum et confirmamini, quaerite faciem eius semper.

[Q445co] Clementiam tuam, Domine, supplici voto deposcimus, ut nos famulos tuos, paenitentia emendatos et bonis operibus eruditos, in mandatis tuis facias perseverare sinceros, et ad paschalia festa pervenire illaesos.

[Q446so] Concede, quaesumus, omnipotens Deus, ut huius sacrificii munus oblatum fragilitatem nostram ab omni malo purget semper et muniat.

[Q447am] Dabo legem meam in visceribus eorum, et in corde eorum scribam eam; et ero eis in Deum, et ipsi erunt mihi in populum, dicit Dominus.

[Q448pc] Purificent nos, quaesumus, Domine, sacramenta quae sumpsimus, et famulos tuos ab omni culpa liberos esse concede, ut, qui conscientiae reatu constringuntur, caelestis remedii plenitudine glorientur.

[Q449sp] Protector in te sperantium, Deus, benedic populum tuum, salva, tuere, dispone, ut, a peccatis liber, ab hoste securus, in tuo semper amore perseveret.

[Q450ai] Deus, in nomine tuo salvum me fac, et in virtute tua libera me. Deus, exaudi orationem meam, auribus percipe verba oris mei.

[Q451co] Deus, qui fragilitati nostrae congrua subsidia praeparasti, concede, quaesumus, ut suae reparationis effectum et cum exsultatione suscipiat, et pia conversatione recenseat.

[Q452so] Haec sacrificia nos, omnipotens Deus, potenti virtute mundatos, ad suum faciant puriores venire principium.

[Q453am] In Christo habemus redemptionem per sanguinem eius, remissionem peccatorum, secundum divitias gratiae eius.

[Q454pc] Praesta, quaesumus, Domine, ut, sicut de praeteritis ad nova transimus, ita, vetustate deposita, sanctificatis mentibus innovemur.

[Q455sp] Respice, Domine, super famulos tuos, et in tua misericordia confitentes caelesti protege benignus auxilio.

[Q456ai] Circumdederunt me gemitus mortis, dolores inferni circumdederunt me; et in tribulatione mea invocavi Dominum, et exaudivit de templo sancto suo vocem meam.

[Q457co] Dirigat corda nostra, quaesumus, Domine, tuae miserationis operatio, quia tibi sine te placere non possumus.

[Q458so] Oblationibus nostris, quaesumus, Domine, placare susceptis, et ad te nostras etiam rebelles compelle propitius voluntates.

[Q459am] Pretioso sanguine quasi Agni immaculati et incontaminati Christi redempti sumus.

[Q460pc] Tua nos, quaesumus, Domine, sancta purificent, et operatione sua tibi placitos esse perficiant.

[Q461sp] Tuere, Domine, plebem tuam, ad sacra ventura properantem et caelestis gratiae largitate prosequere, ut visibilibus adiuta solaciis ad invisibilia bona promptius incitetur.

[Q462ai] Iudica me, Deus, et discerne causam meam de gente non sancta; ab homine iniquo et doloso eripe me, quia tu es Deus meus et fortitudo mea.

[Q463co] Quaesumus, Domine Deus noster, ut in illa caritate, qua Filius tuus diligens mundum morti se tradidit, inveniamur ipsi, te opitulante, alacriter ambulantes.

[Q464so] Exaudi nos, omnipotens Deus, et famulos tuos, quos fidei christianae eruditionibus imbuisti, huius sacrificii tribuas operatione mundari.

[Q465vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Ipse enim verus homo Lazarum flevit amicum, et Deus aeternus e tumulo suscitavit, qui, humani generis miseratus, ad novam vitam sacris mysteriis nos adducit. Per quem maiestatem tuam adorat exercitus Angelorum, ante conspectum tuum in aeternitate laetantium. Cum quibus et nostras voces ut admitti iubeas, deprecamur, socia exsultatione dicentes: Sanctus.

[Q466am] Omnis qui vivit et credit in me, non morietur in aeternum, dicit Dominus.

[Q467am] Nemo te condemnavit, mulier? Nemo, Domine. Nec ego te condemnabo: iam amplius noli peccare.

[Q468am] Amen, amen dico vobis: Nisi granum frumenti cadens in terram mortuum fuerit, ipsum solum manet; si autem mortuum fuerit, multum fructum affert.

[Q469pc] Quaesumus, omnipotens Deus, ut inter eius membra semper numeremur, cuius Corpori communicamus et Sanguini.

[Q470sp] Benedic, Domine, plebem tuam, quae munus tuae miserationis exspectat, et concede, ut, quod, te inspirante, desiderat, te largiente percipiat.

[Q471ai] Miserere mihi, Domine, quoniam conculcavit me homo, tota die bellans tribulavit me.

[Q472co] Deus, per cuius ineffabilem gratiam omni benedictione ditamur, praesta nobis ita in novitatem a vetustate transire, ut regni caelestis gloriae praeparemur.

[Q473so] Concede nobis, Domine, quaesumus, ut, celebraturi sancta mysteria, tamquam paenitentiae corporalis fructum, laetam tibi exhibeamus mentium puritatem.

[Q474am] Nemo te condemnavit, mulier? Nemo, Domine. Nec ego te condemnabo: iam amplius noli peccare.

[Q475am] Ego sum lux mundi, dicit Dominus: qui sequitur me non ambulat in tenebris, sed habebit lumen vitae.

[Q476pc] Sacramentorum tuorum benedictione roborati, quaesumus, Domine, ut per haec semper emundemur a vitiis, et per sequelam Christi ad te festinanter gradiamur.

[Q477sp] Libera, Domine, quaesumus, a peccatis tibi populum supplicantem, ut in sancta conversatione vivens nullis affligatur adversis.

[Q478ai] Exspecta Dominum, viriliter age; et confortetur cor tuum, et sustine Dominum.

[Q479co] Da nobis, quaesumus, Domine, perseverantem in tua voluntate famulatum, ut in diebus nostris et merito et numero populus tibi serviens augeatur.

[Q480so] Hostias tibi, Domine, placationis offerimus, ut et delicta nostra miseratus absolvas, et nutantia corda tu dirigas.

[Q481am] Cum exaltatus fuero a terra, omnia traham ad meipsum, dicit Dominus.

[Q482pc] Da, quaesumus, omnipotens Deus, ut, quae divina sunt iugiter ambientes, donis semper mereamur caelestibus propinquare.

[Q483sp] Deus, qui sperantibus in te misereri potius eligis, quam irasci, da fidelibus tuis digne flere mala, quae fecerunt, ut tuae consolationis gratiam invenire mereantur.

[Q484ai] Liberator meus de gentibus iracundis. Ab insurgentibus in me exaltabis me, a viro iniquo eripies me, Domine.

[Q485co] Sanctificata per paenitentiam tuorum corda filiorum, Deus miserator, illustra, et, quibus praestas devotionis affectum, praebe supplicantibus pium benignus auditum.

[Q486so] Tibi, Domine, sacrificia dicata reddantur, quae sic ad honorem nominis tui deferenda tribuisti, ut eadem remedia fieri nostra praestares.

[Q487am] Transtulit nos Deus in regnum Filii dilectionis suae, in quo habemus redemptionem per sanguinem eius, remissionem peccatorum.

[Q488pc] Caelestem nobis, Domine, praebeant sumpta mysteria medicinam, ut et vitia nostri cordis expurgent, et sempiterna nos protectione confirment.

[Q489sp] Adesto supplicationibus populi tui, omnipotens Deus, et, quibus fiduciam sperandae pietatis indulges, consuetae misericordiae tribue benignus effectum.

[Q490ai] Novi Testamenti mediator est Christus, ut, morte intercedente, repromissionem accipiant, qui vocati sunt aeternae hereditatis.

[Q491co] Adesto, Domine, supplicibus tuis, et spem suam in tua misericordia collocantes tuere propitius, ut, a peccatorum labe mundati, in sancta conversatione permaneant, et promissionis tuae perficiantur heredes.

[Q492so] Sacrificiis praesentibus, quaesumus, Domine, placatus intende, ut et conversioni nostrae proficiant et totius mundi saluti.

[Q493am] Proprio Filio suo non pepercit Deus, sed pro nobis omnibus tradidit illum: cum illo omnia nobis donavit.

[Q494pc] Satiati munere salutari, tuam, Domine, misericordiam deprecamur, ut hoc eodem sacramento, quo nos temporaliter vegetas, efficias perpetuae vitae participes.

[Q495sp] Esto, quaesumus, Domine, propitius plebi tuae, ut, de die in diem, quae tibi non placent respuens, tuorum potius repleatur delectationibus mandatorum.

[Q496ai] Miserere mihi, Domine, quoniam tribulor; libera me et eripe me de manibus inimicorum meorum, et a persequentibus me. Domine, non confundar, quoniam invocavi te.

[Q497co] Absolve, quaesumus, Domine, tuorum delicta populorum, ut a peccatorum nexibus, quae pro nostra fragilitate contraximus, tua benignitate liberemur.

[Q498co] Deus, qui Ecclesiae tuae in hoc tempore tribuis benigne, beatam Mariam in passione Christi contemplanda devote imitari, da nobis, quaesumus, eiusdem Virginis intercessione, Unigenito Filio tuo firmius in dies adhaerere et ad plenitudinem gratiae eius demum pervenire.

[Q499so] Praesta nobis, misericors Deus, ut digne tuis servire semper altaribus mereamur, et eorum perpetua participatione salvari.

[Q500am] Iesus peccata nostra pertulit in corpore suo super lignum, ut, peccatis mortui, iustitiae vivamus; cuius livore sanati sumus.

[Q501pc] Sumpti sacrificii, Domine, perpetua nos tuitio non relinquat, et noxia semper a nobis cuncta depellat.

[Q502sp] Concede, quaesumus, omnipotens Deus, ut, famuli tui, qui protectionis tuae quaerunt gratiam, liberati a malis omnibus, secura tibi mente serviant.

[Q503ai] Domine, ne longe facias auxilium tuum a me, ad defensionem meam aspice; quia ego sum vermis et non homo, opprobrium hominum et abiectio plebis.

[Q504co] Deus, qui omnes in Christo renatos genus electum et regale sacerdotium fecisti, da nobis et velle et posse quod praecipis, ut populo ad aeternitatem vocato una sit fides cordium et pietas actionum.

[Q505so] Accepta tibi sint, Domine, quaesumus, nostri dona ieiunii, quae expiando nos tuae gratiae dignos efficiant et ad sempiterna promissa perducant.

[Q506am] Traditus est Christus, ut filios Dei, qui erant dispersi, congregaret in unum.

[Q507pc] Maiestatem tuam, Domine, suppliciter deprecamur, ut, sicut nos Corporis et Sanguinis sacrosancti pascis alimento, ita divinae naturae facias esse consortes.

[Q508sp] Miserere, Domine, deprecantis Ecclesiae tuae, et inclinantibus tibi sua corda propitiatus intende, ut, quos Unigeniti Filii tui morte redemisti, nec peccatis fieri permittas obnoxios, nec opprimi patiaris adversis.

[Q509an] Hosanna filio David: benedictus qui venit in nomine Domini. Rex Israel: Hosanna in excelsis.

[Q510mn] Fratres carissimi, postquam iam ab initio Quadragesimae corda nostra paenitentia et operibus caritatis praeparavimus, hodierna die congregamur, ut cum tota Ecclesia praeludamus paschale Domini nostri mysterium, eius nempe passionem atque resurrectionem, ad quod implendum ipse ingressus est civitatem suam Ierusalem. Quare cum omni fide et devotione memoriam agentes huius salutiferi ingressus, sequamur Dominum, ut, per gratiam consortes effecti crucis, partem habeamus resurrectionis et vitae.

[Q511bn] Omnipotens sempiterne Deus, hos palmites tua benedictione sanctifica, ut nos, qui Christum Regem exsultando prosequimur, per ipsum valeamus ad aeternam Ierusalem pervenire.

[Q512bn] Auge fidem in te sperantium, Deus, et supplicum preces clementer exaudi, ut, qui hodie Christo triumphanti palmites exhibemus, in ipso fructus tibi bonorum operum afferamus.

[Q513mn] Imitemur, fratres carissimi, turbas acclamantes Iesum, et procedamus in pace.

[Q514mn] Procedamus in pace. In nomine Christi. Amen.

[Q515an] Pueri Hebraeorum, portantes ramos olivarum, obviaverunt Domino, clamantes et dicentes: Hosanna in excelsis.

[Q516an] Pueri Hebraeorum vestimenta prosternebant in via, et clamabant dicentes: Hosanna filio David; benedictus, qui venit in nomine Domini.

[Q517hy] Gloria, laus et honor tibi sit, rex Christe redemptor, cui puerile decus prompsit Hosanna pium. Israel es tu rex, Davidis et inclita proles, nomine qui in Domini, rex benedicte, venis. Coetus in excelsis te laudat caelicus omnis, et mortalis homo, et cuncta creata simul. Plebs Hebrae a tibi cum palmis obvia venit; cum prece, voto, hymnis, adsumus ecce tibi. Hi tibi passuro solvebant munia laudis; nos tibi regnanti pangimus ecce melos. Hi placuere tibi, placeat devotio nostra: rex bone, rex clemens, cui bona cuncta placent.

[Q518rp] Ingrediente Domino in sanctam civitatem, Hebraeorum pueri, resurrectionem vitae pronuntiantes, * Cum ramis palmarum: Hosanna, clamabant, in excelsis. Cum audisset populus, quod Iesus veniret Hierosolymam, exierunt obviam ei.

[Q519ai] Ante sex dies sollemnis Paschae, quando venit Dominus in civitatem Ierusalem, occurrerunt ei pueri: et in manibus portabant ramos palmarum et clamabant voce magna, dicentes: * Hosanna in excelsis: Benedictus, qui venisti in multitudine misericordiae tuae. Attollite, portae, capita vestra, et elevamini, portae aeternales, et introibit rex gloriae. Quis est iste rex gloriae? Dominus virtutum ipse est rex gloriae. * Hosanna in excelsis: Benedictus, qui venisti in multitudine misericordiae tuae.

[Q520co] Omnipotens sempiterne Deus, qui humano generi, ad imitandum humilitatis exemplum, Salvatorem nostrum carnem sumere, et crucem subire fecisti, concede propitius, ut et patientiae ipsius habere documenta et resurrectionis consortia mereamur.

[Q521so] Per Unigeniti tui passionem placatio tua nobis, Domine, sit propinqua, quam, etsi nostris operibus non meremur, interveniente sacrificio singulari, tua percipiamus miseratione praeventi.

[Q522vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui pati pro impiis dignatus est innocens, et pro sceleratis indebite condemnari. Cuius mors delicta nostra detersit, et iustificationem nobis resurrectio comparavit. Unde et nos cum omnibus Angelis te laudamus, iucunda celebratione clamantes: Sanctus.

[Q523am] Pater, si non potest hic calix transire, nisi bibam illum, fiat voluntas tua.

[Q524pc] Sacro munere satiati, supplices te, Domine, deprecamur, ut, qui fecisti nos morte Filii tui sperare quod credimus, facias nos, eodem resurgente, pervenire quo tendimus.

[Q525sp] Respice, quaesumus, Domine, super hanc familiam tuam, pro qua Dominus noster Iesus Christus non dubitavit manibus tradi nocentium, et crucis subire tormentum.

[Q526ai] Iudica, Domine, nocentes me, expugna impugnantes me: apprehende arma et scutum, et exsurge in adiutorium meum, Domine, virtus salutis meae.

[Q527co] Da, quaesumus, omnipotens Deus, ut, qui ex nostra infirmitate deficimus, intercedente Unigeniti Filii tui passione, respiremus.

[Q528so] Respice, Domine, propitius sacra mysteria quae gerimus, et, quod ad nostra evacuanda praeiudicia misericors praevidisti, vitam nobis tribue fructificare perpetuam.

[Q529am] Non avertas faciem tuam a me; in quacumque die tribulor, inclina ad me aurem tuam; in quacumque die invocavero te, velociter exaudi me.

[Q530pc] Visita, quaesumus, Domine, plebem tuam, et corda sacris dicata mysteriis pietate tuere pervigili, ut remedia salutis aeternae, quae te miserante percipit, te protegente custodiat.

[Q531sp] Defensio tua, Domine, quaesumus, adsit humilibus, et iugiter protegat in tua misericordia confidentes, ut, ad festa paschalia celebranda, non solum observantiam corporalem, sed, quod est potius, habeant mentium puritatem.

[Q532ai] Ne tradideris me, Domine, in animas persequentium me: quoniam insurrexerunt in me testes iniqui, et mentita est iniquitas sibi.

[Q533co] Omnipotens sempiterne Deus, da nobis ita dominicae passionis sacramenta peragere, ut indulgentiam percipere mereamur.

[Q534so] Hostias familiae tuae, quaesumus, Domine, placatus intende, et, quam sacris muneribus facis esse participem, tribuas ad eorum plenitudinem pervenire.

[Q535am] Proprio Filio suo non pepercit Deus, sed pro nobis omnibus tradidit illum.

[Q536pc] Satiati munere salutari, tuam, Domine, misericordiam deprecamur, ut hoc eodem sacramento, quo nos voluisti temporaliter vegetari, perpetuae vitae facias esse participes.

[Q537sp] Tua misericordia, Deus, populum tibi subditum et ab omni subreptione vetustatis expurget, et capacem sanctae novitatis efficiat.

[Q538ai] In nomine Iesu omne genu flectatur, caelestium, terrestrium et infernorum: quia Dominus factus est oboediens usque ad mortem, mortem autem crucis: ideo Dominus Iesus Christus in gloria est Dei Patris.

[Q539co] Deus, qui pro nobis Filium tuum crucis patibulum subire voluisti, ut inimici a nobis expelleres potestatem, concede nobis famulis tuis, ut resurrectionis gratiam consequamur.

[Q540so] Suscipe, quaesumus, Domine, munus oblatum, et dignanter operare, ut, quod gerimus Filii tui mysterio passionis, piis effectibus consequamur.

[Q541am] Filius hominis non venit ministrari, sed ministrare, et dare animam suam redemptionem pro multis.

[Q542pc] Largire sensibus nostris, omnipotens Deus, ut per temporalem Filii tui mortem, quam mysteria veneranda testantur, vitam te nobis dedisse perpetuam confidamus.

[Q543sp] Da, quaesumus, Domine, fidelibus tuis et sine cessatione capere paschalia sacramenta, et desideranter exspectare dona ventura, ut, mysteriis quibus renati sunt permanentes, ad novam vitam his operibus perducantur.

[Q544ai] Iesus Christus fecit nos regnum et sacerdotes Deo et Patri suo: ipsi gloria et imperium in saecula saeculorum. Amen.

[Q545co] Deus, qui Unigenitum Filium tuum unxisti Spiritu Sancto Christumque Dominum constituisti, concede propitius, ut, eiusdem consecrationis participes effecti, testes Redemptionis inveniamur in mundo.

[Q546pm] Filii carissimi, annua redeunte memoria diei, qua Christus Dominus sacerdotium suum cum Apostolis nobisque communicavit, vultis olim factas promissiones coram Episcopo vestro et populo sancto Dei renovare? Volo.

[Q547pm] Vultis Domino Iesu arctius coniungi et conformari, vobismetipsis abrenuntiantes atque promissa confirmantes sacrorum officiorum, quae, Christi amore inducti, erga eius Ecclesiam, sacerdotalis vestrae ordinationis die, cum gaudio suscepistis? Volo.

[Q548pm] Vultis fideles esse dispensatores mysteriorum Dei per sanctam Eucharistiam ceterasque liturgicas actiones, atque sacrum docendi munus, Christum Caput atque Pastorem sectando, fideliter implere, non bonorum cupidi, sed animarum zelo tantum inducti? Volo.

[Q549mn] Vos autem, filii dilectissimi, pro presbyteris vestris orate, ut Dominus super eos bona sua abundanter effundat, quatenus fideles ministri Christi, Summi Sacerdotis, vos ad eum perducant, qui fons est salutis.

[Q550iv] Christe, audi nos. Christe, exaudi nos.

[Q551mn] Et pro me etiam orate, ut fidelis sim muneri apostolico humilitati meae commisso, et inter vos efficiar viva et perfectior in dies imago Christi Sacerdotis, Boni Pastoris, Magistri et omnium Servi.

[Q552iv] Christe, audi nos. Christe, exaudi nos.

[Q553iv] Dominus nos omnes in sua caritate custodiat, et ipse nos universos, pastores et oves, ad vitam perducat aeternam.

[Q554so] Huius sacrificii potentia, Domine, quaesumus, et vetustatem nostram clementer abstergat, et novitatem nobis augeat et salutem.

[Q555vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum tuum Sancti Spiritus unctione novi et aeterni testamenti constituisti Pontificem, et ineffabili dignatus es dispositione sancire, ut unicum eius sacerdotium in Ecclesia servaretur. Ipse enim non solum regali sacerdotio populum acquisitionis exornat, sed etiam fraterna homines eligit bonitate, ut sacri sui ministerii fiant manuum impositione participes. Qui sacrificium renovent, eius nomine, redemptionis humanae, tuis apparantes filiis paschale convivium, et plebem tuam sanctam caritate praeveniant, verbo nutriant, reficiant sacramentis. Qui, vitam pro te fratrumque salute tradentes, ad ipsius Christi nitantur imaginem conformari, et constanter tibi fidem amoremque testentur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[Q556am] Misericordias Domini in aeternum cantabo; in generationem et generationem annuntiabo veritatem tuam in ore meo.

[Q557pc] Supplices te rogamus, omnipotens Deus, ut, quos tuis reficis sacramentis, Christi bonus odor effici mereantur.

[T558ai] Nos autem gloriari oportet in cruce Domini nostri Iesu Christi, in quo est salus, vita et resurrectio nostra, per quem salvati et liberati sumus.

[T559co] Sacratissimam, Deus, frequentantibus Cenam, in qua Unigenitus tuus, morti se traditurus, novum in saecula sacrificium dilectionisque suae convivium Ecclesiae commendavit, da nobis, quaesumus, ut ex tanto mysterio plenitudinem caritatis hauriamus et vitae.

[T560an] Postquam surrexit Dominus a cena, misit aquam in pelvim, et coepit lavare pedes discipulorum: hoc exemplum reliquit eis.

[T561an] Dominus Iesus, postquam cenavit cum discipulis suis, lavit pedes eorum, et ait illis: Scitis quid fecerim vobis ego, Dominus et Magister? Exemplum dedi vobis, ut et vos ita faciatis.

[T562an] Domine, tu mihi lavas pedes? Respondit Iesus et dixit ei: Si non lavero tibi pedes, non habebis partem mecum. Venit ergo ad Simonem Petrum, et dixit ei Petrus: Domine. Quod ego facio, tu nescis modo: scies autem postea. Domine.

[T563an] Si ego, Dominus et Magister vester, lavi vobis pedes: quanto magis debetis alter alterius lavare pedes?

[T564an] In hoc cognoscent omnes, quia discipuli mei estis, si dilectionem habueritis ad invicem. Dixit Iesus discipulis suis.

[T565an] Mandatum novum do vobis, ut diligatis invicem, sicut dilexi vos, dicit Dominus.

[T566an] Maneant in vobis fides, spes, caritas, tria haec: maior autem horum est caritas. Nunc autem manent fides, spes, caritas, tria haec: maior horum est caritas.

[T567an] Ubi caritas est vera, Deus ibi est.

[T568hy] Congregavit nos in unum Christi amor. Exsultemus et in ipso iucundemur. Timeamus et amemus Deum vivum. Et ex corde diligamus nos sincero. Simul ergo cum in unum congregamur: Ne nos mente dividamur, caveamus. Cessent iurgia maligna, cessent lites. Et in medio nostri sit Christus Deus. Simul quoque cum beatis videamus Glorianter vultum tuum, Christe Deus: Gaudium, quod est immensum atque probum, Saecula per infinita saeculorum. Amen.

[T569so] Concede nobis, quaesumus, Domine, haec digne frequentare mysteria, quia, quoties huius hostiae commemoratio celebratur, opus nostrae redemptionis exercetur.

[T570pe] Te igitur, clementissime Pater, per Iesum Christum, Filium tuum, Dominum nostrum, supplices rogamus ac petimus, uti accepta habeas et benedicas haec dona, haec munera, haec sancta sacrificia illibata, in primis, quae tibi offerimus pro Ecclesia tua sancta catholica: quam pacificare, custodire, adunare et regere digneris toto orbe terrarum: una cum famulo tuo Papa nostro N. et Antistite nostro N. et omnibus orthodoxis atque catholicae et apostolicae fidei cultoribus. Memento, Domine, famulorum famularumque tuarum N. et N. et omnium circumstantium, quorum tibi fides cognita est et nota devotio, pro quibus tibi offerimus: vel qui tibi offerunt hoc sacrificium laudis, pro se suisque omnibus: pro redemptione animarum suarum, pro spe salutis et incolumitatis suae: tibique reddunt vota sua aeterno Deo, vivo et vero. Communicantes, et diem sacratissimum celebrantes, quo Dominus noster Iesus Christus pro nobis est traditus, sed et memoriam venerantes, in primis gloriosae semper Virginis Mariae, Genetricis eiusdem Dei et Domini nostri Iesu Christi: sed et beati Ioseph, eiusdem Virginis Sponsi, et beatorum Apostolorum ac Martyrum tuorum, Petri et Pauli, Andreae, (Iacobi, Ioannis, Thomae, Iacobi, Philippi, Bartholomaei, Matthaei, Simonis et Thaddaei: Lini, Cleti, Clementis, Xysti, Cornelii, Cypriani, Laurentii, Chrysogoni, Ioannis et Pauli, Cosmae et Damiani)et omnium Sanctorum tuorum; quorum meritis precibusque concedas, ut in omnibus protectionis tuae muniamur auxilio. Hanc igitur oblationem servitutis nostrae, sed et cunctae familiae tuae, quam tibi offerimus ob diem, in qua Dominus noster Iesus Christus tradidit discipulis suis Corporis et Sanguinis sui mysteria celebranda, quaesumus, Domine, ut placatus accipias: diesque nostros in tua pace disponas, atque ab aeterna damnatione nos eripi et in electorum tuorum iubeas grege numerari. Quam oblationem tu, Deus, in omnibus, quaesumus, benedictam, adscriptam, ratam, rationabilem, acceptabilemque facere digneris: ut nobis Corpus et Sanguis fiat dilectissimi Filii tui, Domini nostri Iesu Christi. Qui, pridie quam pro nostra omniumque salute pateretur, hoc est hodie, accepit panem in sanctas ac venerabiles manus suas, et elevatis oculis in caelum ad te Deum Patrem suum omnipotentem, tibi gratias agens benedixit, fregit, deditque discipulis suis, dicens: Accipite et manducate ex hoc omnes: Hoc est enim Corpus meum, quod pro vobis tradetur. Simili modo, postquam cenatum est, accipiens et hunc praeclarum calicem in sanctas ac venerabiles manus suas, item tibi gratias agens benedixit, deditque discipulis suis, dicens:Accipite et bibite ex eo omnes: Hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem. Mysterium fidei. Mortem tuam annuntiamus, Domine, et tuam resurrectionem confitemur, donec venias. Quotiescumque manducamus panem hunc et calicem bibimus, mortem tuam annuntiamus, Domine, donec venias. Salvator mundi, salva nos, qui per crucem et resurrectionem tuam liberasti nos. Unde et memores, Domine, nos servi tui, sed et plebs tua sancta, eiusdem Christi, Filii tui, Domini nostri, tam beatae passionis, necnon et ab inferis resurrectionis, sed et in caelos gloriosae ascensionis: offerimus praeclarae maiestati tuae de tuis donis ac datis hostiam puram, hostiam sanctam, hostiam immaculatam, Panem sanctum vitae aeternae et Calicem salutis perpetuae. Supra quae propitio ac sereno vultu respicere digneris: et accepta habere, sicuti accepta habere dignatus es munera pueri tui iusti Abel, et sacrificium Patriarchae nostri Abrahae, et quod tibi obtulit summus sacerdos tuus Melchisedech, sanctum sacrificium, immaculatam hostiam.Supplices te rogamus, omnipotens Deus: iube haec perferri per manus sancti Angeli tui in sublime altare tuum, in conspectu divinae maiestatis tuae; ut, quotquot ex hac altaris participatione sacrosanctum Filii tui Corpus et Sanguinem sumpserimus, omni benedictione caelesti et gratia repleamur. Memento etiam, Domine, famulorum famularumque tuarum N. et N., qui nos praecesserunt cum signo fidei, et dormiunt in somno pacis. Ipsis, Domine, et omnibus in Christo quiescentibus, locum refrigerii, lucis et pacis, ut indulgeas, deprecamur. Nobis quoque peccatoribus famulis tuis, de multitudine miserationum tuarum sperantibus, partem aliquam et societatem donare digneris cum tuis sanctis Apostolis et Martyribus: cum Ioanne, Stephano, Matthia, Barnaba, (Ignatio, Alexandro, Marcellino, Petro, Felicitate, Perpetua, Agatha, Lucia, Agnete, Caecilia, Anastasia)et omnibus Sanctis tuis: intra quorum nos consortium, non aestimator meriti, sed veniae, quaesumus, largitor admitte. Per quem haec omnia, Domine, semper bona creas, sanctificas, vivificas, benedicis, et praestas nobis. Per ipsum, et cum ipso, et in ipso, est tibi Deo Patri omnipotenti, in unitate Spiritus Sancti, omnis honor et gloria per omnia saecula saeculorum. Amen.

[T571am] Hoc Corpus, quod pro vobis tradetur: hic calix novi testamenti est in meo Sanguine, dicit Dominus; hoc facite, quotiescumque sumitis, in meam commemorationem.

[T572pc] Concede nobis, omnipotens Deus, ut, sicut Cena Filii tui reficimur temporali, ita satiari mereamur aeterna.

[T573or] Reminiscere miserationum tuarum, Domine, et famulos tuos aeterna protectione sanctifica, pro quibus Christus, Filius tuus, per suum cruorem instituit paschale mysterium.

[T574or] Deus, qui peccati veteris hereditariam mortem, in qua posteritatis genus omne successerat, Christi Filii tui, Domini nostri, passione solvisti, da, ut conformes eidem facti, sicut imaginem terreni hominis naturae necessitate portavimus, ita imaginem caelestis gratiae sanctificatione portemus.

[T575fr] Flectamus genua. Levate.

[T576mn] Oremus, dilectissimi nobis, pro Ecclesia sancta Dei, ut eam Deus et Dominus noster pacificare, adunare et custodire dignetur toto orbe terrarum, detque nobis, quietam et tranquillam vitam degentibus, glorificare Deum Patrem omnipotentem.

[T577or] Omnipotens sempiterne Deus, qui gloriam tuam omnibus in Christo gentibus revelasti: custodi opera misericordiae tuae, ut Ecclesia tua, toto orbe diffusa, stabili fide in confessione tui nominis perseveret.

[T578mn] Oremus et pro beatissimo Papa nostro N., ut Deus et Dominus noster, qui elegit eum in ordine episcopatus, salvum atque incolumem custodiat Ecclesiae suae sanctae, ad regendum populum sanctum Dei.

[T579or] Omnipotens sempiterne Deus, cuius iudicio universa fundantur, respice propitius ad preces nostras, et electum nobis Antistitem tua pietate conserva, ut christiana plebs, quae te gubernatur auctore, sub ipso Pontifice, fidei suae meritis augeatur.

[T580mn] Oremus et pro Episcopo nostro, pro omnibus Episcopis, presbyteris, diaconis Ecclesiae, et universa plebe fidelium.

[T581or] Omnipotens sempiterne Deus, cuius Spiritu totum corpus Ecclesiae sanctificatur et regitur, exaudi nos pro ministris tuis supplicantes, ut, gratiae tuae munere, ab omnibus tibi fideliter serviatur.

[T582mn] Oremus et pro catechumenis (nostris), ut Deus et Dominus noster adaperiat aures praecordiorum ipsorum ianuamque misericordiae, ut, per lavacrum regenerationis accepta remissione omnium peccatorum, et ipsi inveniantur in Christo Iesu Domino nostro.

[T583or] Omnipotens sempiterne Deus, qui Ecclesiam tuam nova semper prole fecundas, auge fidem et intellectum catechumenis (nostris), ut, renati fonte baptismatis, adoptionis tuae filiis aggregentur.

[T584mn] Oremus et pro universis fratribus in Christum credentibus, ut Deus et Dominus noster eos, veritatem facientes, in una Ecclesia sua congregare et custodire dignetur.

[T585or] Omnipotens sempiterne Deus, qui dispersa congregas et congregata conservas, ad gregem Filii tui placatus intende, ut, quos unum baptisma sacravit, eos et fidei iungat integritas et vinculum societ caritatis.

[T586mn] Oremus et pro Iudaeis, ut, ad quos prius locutus est Dominus Deus noster, eis tribuat in sui nominis amore et in sui foederis fidelitate proficere.

[T587or] Omnipotens sempiterne Deus, qui promissiones tuas Abrahae eiusque semini contulisti, Ecclesiae tuae preces clementer exaudi, ut populus acquisitionis prioris ad redemptionis mereatur plenitudinem pervenire.

[T588mn] Oremus et pro iis qui in Christum non credunt, ut, luce Sancti Spiritus illustrati, viam salutis et ipsi valeant introire.

[T589or] Omnipotens sempiterne Deus, fac ut qui Christum non confitentur, coram te sincero corde ambulantes, inveniant veritatem, nosque, mutuo proficientes semper amore et ad tuae vitae mysterium plenius percipiendum sollicitos, perfectiores effice tuae testes caritatis in mundo.

[T590mn] Oremus et pro iis qui Deum non agnoscunt, ut, quae recta sunt sincero corde sectantes, ad ipsum Deum pervenire mereantur.

[T591or] Omnipotens sempiterne Deus, qui cunctos homines condidisti, ut te semper desiderando quaererent et inveniendo quiescerent, praesta, quaesumus, ut inter noxia quaeque obstacula omnes, tuae signa pietatis et in te credentium testimonium bonorum operum percipientes, te solum verum Deum nostrique generis Patrem gaudeant confiteri.

[T592mn] Oremus et pro omnibus rempublicam moderantibus, ut Deus et Dominus noster mentes et corda eorum secundum voluntatem suam dirigat ad veram omnium pacem et libertatem.

[T593or] Omnipotens sempiterne Deus, in cuius manu sunt hominum corda et iura populorum, respice benignus ad eos, qui nos in potestate moderantur, ut ubique terrarum populorum prosperitas, pacis securitas et religionis libertas, te largiente, consistant.

[T594mn] Oremus, dilectissimi nobis, Deum Patrem omnipotentem, ut cunctis mundo purget erroribus, morbos auferat, famem depellat, aperiat carceres, vincula solvat, viatoribus securitatem, peregrinantibus reditum, infirmantibus sanitatem atque morientibus salutem indulgeat.

[T595or] Omnipotens sempiterne Deus, maestorum consolatio, laborantium fortitudo, perveniant ad te preces de quacumque tribulatione clamantium, ut omnes sibi in necessitatibus suis misericordiam tuam gaudeant affuisse.

[T596an] Ecce lignum Crucis, in quo salus mundi pependit. Venite, adoremus.

[T597an] Crucem tuam adoramus, Domine, et sanctam resurrectionem tuam laudamus et glorificamus: ecce enim propter lignum venit gaudium in universo mundo.

[T598an] Deus misereatur nostri, et benedicat nobis: illuminet vultum suum super nos, et misereatur nostri.

[T599hy] Popule meus, quid feci tibi? Aut in quo contristavi te? Responde mihi! Quia eduxi te de terra Aegypti: parasti Crucem Salvatori tuo. Hagios o Theos. Sanctus Deus. Hagios Ischyros. Sanctus Fortis. Hagios Athanatos, eleison himas. Sanctus Immortalis, miserere nobis. Quia eduxi te per desertum quadraginta annis, et manna cibavi te, et introduxi te in terram satis bonam: parasti Crucem Salvatori tuo. Hagios o Theos. Sanctus Deus. Hagios Ischyros. Sanctus Fortis. Hagios Athanatos, eleison himas. Sanctus Immortalis, miserere nobis. Quid ultra debui facere tibi, et non feci? Ego quidem plantavi te vineam electam meam speciosissimam: et tu facta es mihi nimis amara: aceto namque sitim meam potasti, et lancea perforasti latus Salvatori tuo. Hagios o Theos. Sanctus Deus. Hagios Ischyros. Sanctus Fortis. Hagios Athanatos, eleison himas. Sanctus Immortalis, miserere nobis.

[T600hy] Ego propter te flagellavi Aegyptum cum primogenitis suis: et tu me flagellatum tradidisti. Popule meus, quid feci tibi? Aut in quo contristavi te? Responde mihi! Ego eduxi te de Aegypto, demerso Pharaone in Mare Rubrum: et tu me tradidisti principibus sacerdotum. Ego ante te aperui mare: et tu aperuisti lancea latus meum. Ego ante te praeivi in columna nubis: et tu me duxisti ad praetorium Pilati. Ego te pavi manna per desertum: et tu me cecidisti alapis et flagellis. Ego te potavi aqua salutis de petra: et tu me potasti felle et aceto. Ego propter te Chananaeorum reges percussi: et tu percussisti arundine caput meum. Ego dedi tibi sceptrum regale: et tu dedisti capiti meo spineam coronam. Ego te exaltavi magna virtute: et tu me suspendisti in patibulo Crucis.

[T601hy] Crux fidelis, inter omnes arbor una nobilis, Nulla talem silva profert, flore, fronde, germine! Dulce lignum dulci clavo dulce pondus sustinens! Pange, lingua, gloriosi proelium certaminis, Et super crucis tropaeo dic triumphum nobilem, Qualiter Redemptor orbis immolatus vicerit. De parentis protoplasti fraude factor condolens, Quando pomi noxialis morte morsu corruit, Ipse lignum tunc notavit, damna ligni ut solveret. Hoc opus nostrae salutis ordo depoposcerat, Multiformis perditoris arte ut artem falleret, Et medelam ferret inde, hostis unde laeserat. Quando venit ergo sacri plenitudo temporis, Missus est ab arce Patris Natus, orbis conditor, Atque ventre virginali carne factus prodiit. Vagit infans inter arta conditus praesepia, Membra pannis involuta Virgo Mater alligat, Et manus pedesque et crura stricta cingit fascia. Lustra sex qui iam peracta tempus implens corporis, se volente, natus ad hoc, passioni deditus, agnus in crucis levatur immolandus stipite. En acetum, fel, arundo, sputa, clavi, lancea; Mite corpus perforatur, sanguis, unda profluit; Terra, pontus, astra, mundus quo lavantur flumine! Flecte ramos, arbor alta, tensa laxa viscera, Et rigor lentescat ille, quem dedit nativitas, Ut superni membra Regis miti tendas stipite. Sola digna tu fuisti ferre saecli pretium Atque portum praeparare nauta mundo naufrago, Quem sacer cruor perunxit fusus Agni corpore. Aequa Patri Filioque, inclito Paraclito, Sempiterna sit beatae Trinitati gloria; cuius alma nos redemit atque servat gratia. Amen.

[T602mn] Praeceptis salutaribus moniti, et divina institutione formati, audemus dicere:

[T603or] Pater noster, qui es in caelis: sanctificetur nomen tuum; adveniat regnum tuum; fiat voluntas tua, sicut in caelo, et in terra. Panem nostrum cotidianum da nobis hodie; et dimitte nobis debita nostra, sicut et nos dimittimus debitoribus nostris; et ne nos inducas in tentationem; sed libera nos a malo.

[T604or] Libera nos, quaesumus, Domine, ab omnibus malis, da propitius pacem in diebus nostris, ut, ope misericordiae tuae adiuti, et a peccato simus semper liberi et ab omni perturbatione securi: exspectantes beatam spem et adventum Salvatoris nostri Iesu Christi. Quia tuum est regnum, et potestas, et gloria in saecula.

[T605or] Perceptio Corporis tui, Domine Iesu Christe, non mihi proveniat in iudicium et condemnationem: sed pro tua pietate prosit mihi ad tutamentum mentis et corporis, et ad medelam percipiendam.

[T606fr] Ecce Agnus Dei, ecce qui tollit peccata mundi. Beati qui ad cenam Agni vocati sunt.

[T607or] Domine, non sum dignus, ut intres sub tectum meum, sed tantum dic verbo, et sanabitur anima mea.

[T608pc] Omnipotens sempiterne Deus, qui nos Christi tui beata morte et resurrectione reparasti, conserva in nobis opus misericordiae tuae, ut huius mysterii participatione perpetua devotione vivamus.

[T609sp] Super populum tuum, quaesumus, Domine, qui mortem Filii tui in spe suae resurrectionis recoluit, benedictio copiosa descendat, indulgentia veniat, consolatio tribuatur, fides sancta succrescat, redemptio sempiterna firmetur.

[P610mn] Fratres carissimi, hac sacratissima nocte, in qua Dominus noster Iesus Christus de morte transivit ad vitam, Ecclesia invitat filios dispersos per orbem terrarum, ut ad vigilandum et orandum conveniant. Si ita memoriam egerimus Paschatis Domini, audientes verbum et celebrantes mysteria eius, spem habebimus participandi triumphum eius de morte et vivendi cum ipso in Deo.

[P611bn] Oremus. Deus, qui per Filium tuum claritatis tuae ignem fidelibus contulisti, novum hunc ignem sanctifica, et concede nobis, ita per haec festa paschalia caelestibus desideriis inflammari, ut ad perpetuae claritatis puris mentibus valeamus festa pertingere.

[P612fr] Christus heri et hodie; Principium et Finis; Alpha et Omega. Ipsius sunt tempora et saecula. Ipsi gloria et imperium per universa aeternitatis saecula. Amen. Per sua sancta vulnera gloriosa custodiat et conservet nos Christus Dominus. Amen.

[P613fr] Lumen Christi gloriose resurgentis dissipet tenebras cordis et mentis.

[P614fr] Lumen Christi. Deo gratias.

[P615bn] Dominus sit in corde tuo et in labiis tuis, ut digne et competenter annunties suum paschale praeconium: in nomine Patris, et Filii, et Spiritus Sancti.

[P616pr] Exsultet iam angelica turba caelorum: exsultent divina mysteria: et pro tanti Regis victoria tuba insonet salutaris. Gaudeat et tellus tantis irradiata fulgoribus: et, aeterni Regis splendore illustrata, totius orbis se sentiat amisisse caliginem. Laetetur et mater Ecclesia, tanti luminis adornata fulgoribus: et magnis populorum vocibus haec aula resultet. Quapropter astantes vos, fratres carissimi, ad tam miram huius sancti luminis claritatem, una mecum, quaeso, Dei omnipotentis misericordiam invocate. Ut, qui me non meis meritis intra Levitarum numerum dignatus est aggregare, luminis sui claritatem infundens, cerei huius laudem implere perficiat.

[P617pr] Vere dignum et iustum est, invisibilem Deum Patrem omnipotentem Filiumque eius Unigenitum, Dominum nostrum Iesum Christum, toto cordis ac mentis affectu et vocis ministerio personare. Qui pro nobis aeterno Patri Adae debitum solvit, et veteris piaculi cautionem pio cruore detersit. Haec sunt enim festa paschalia, in quibus verus ille Agnus occiditur, cuius sanguine postes fidelium consecrantur. Haec nox est, in qua primum patres nostros, filios Israel eductos de Aegypto, Mare Rubrum sicco vestigio transire fecisti. Haec igitur nox est, quae peccatorum tenebras columnae illuminatione purgavit. Haec nox est, quae hodie per universum mundum in Christo credentes, a vitiis saeculi et caligine peccatorum segregatos, reddit gratiae, sociat sanctitati. Haec nox est, in qua, destructis vinculis mortis, Christus ab inferis victor ascendit. Nihil enim nobis nasci profuit, nisi redimi profuisset. O mira circa nos tuae pietatis dignatio! O inaestimabilis dilectio caritatis: ut servum redimeres, Filium tradidisti!O certe necessarium Adae peccatum, quod Christi morte deletum est! O felix culpa, quae talem ac tantum meruit habere Redemptorem! O vere beata nox, quae sola meruit scire tempus et horam, in qua Christus ab inferis resurrexit! Haec nox est, de qua scriptum est: Et nox sicut dies illuminabitur: et nox illuminatio mea in deliciis meis. Huius igitur sanctificatio noctis fugat scelera, culpas lavat: et reddit innocentiam lapsis et maestis laetitiam. Fugat odia, concordiam parat et curvat imperia. In huius igitur noctis gratia, suscipe, sancte Pater, laudis huius sacrificium vespertinum, quod tibi in hac cerei oblatione sollemni, per ministrorum manus de operibus apum, sacrosancta reddit Ecclesia. Sed iam columnae huius praeconia novimus, quam in honorem Dei rutilans ignis accendit. Qui, licet sit divisus in partes, mutuati tamen luminis detrimenta non novit. Alitur enim liquantibus ceris, quas in substantiam pretiosae huius lampadis apis mater eduxit. O vere beata nox, in qua terrenis caelestia, humanis divina iunguntur! Oramus ergo te, Domine, ut cereus iste in honorem tui nominis consecratus, ad noctis huius caliginem destruendam, indeficiens perseveret. Et in odorem suavitatis acceptus, supernis luminaribus misceatur. Flammas eius lucifer matutinus inveniat: Ille, inquam, lucifer, qui nescit occasum: Christus Filius tuus, qui, regressus ab inferis, humano generi serenus illuxit, et vivit et regnat in saecula saeculorum. Amen.

[P618mn] Vigiliam sollemniter ingressi, fratres carissimi, quieto corde nunc verbum Dei audiamus. Meditemur, quomodo Deus populum suum elapsis temporibus salvum fecerit, et novissime nobis Filium suum miserit Redemptorem. Oremus, ut Deus noster hoc paschale salvationis opus ad plenam redemptionem perficiat.

[P619or] Omnipotens sempiterne Deus, qui es in omnium operum tuorum dispensatione mirabilis, intellegant redempti tui, non fuisse excellentius, quod initio factus est mundus, quam quod in fine saeculorum Pascha nostrum immolatus est Christus.

[P620or] Deus, qui mirabiliter creasti hominem et mirabilius redemisti, da nobis, quaesumus, contra oblectamenta peccati mentis ratione persistere, ut mereamur ad aeterna gaudia pervenire.

[P621or] Deus, Pater summe fidelium, qui promissionis tuae filios diffusa adoptionis gratia in toto terrarum orbe multiplicas, et per paschale sacramentum Abraham puerum tuum universarum, sicut iurasti, gentium efficis patrem, da populis tuis digne ad gratiam tuae vocationis intrare.

[P622or] Deus, cuius antiqua miracula etiam nostris temporibus coruscare sentimus, dum, quod uni populo a persecutione Pharaonis liberando dexterae tuae potentia contulisti, id in salutem gentium per aquam regenerationis operaris, praesta, ut in Abrahae filios et in Israeliticam dignitatem totius mundi transeat plenitudo.

[P623or] Deus, qui primis temporibus impleta miracula novi testamenti luce reserasti, ut et Mare Rubrum forma sacri fontis exsisteret, et plebs a servitute liberata christiani populi sacramenta praeferret, da, ut omnes gentes, Israelis privilegium merito fidei consecutae, Spiritus tui participatione regenerentur.

[P624or] Omnipotens sempiterne Deus, multiplica in honorem nominis tui quod patrum fidei spopondisti, et promissionis filios sacra adoptione dilata, ut, quod priores sancti non dubitaverunt futurum, Ecclesia tam magna ex parte iam cognoscat impletum.

[P625or] Omnipotens sempiterne Deus, spes unica mundi, qui prophetarum tuorum praeconio praesentium temporum declarasti mysteria, auge populi tui vota placatus, quia in nullo fidelium nisi ex tua inspiratione proveniunt quarumlibet incrementa virtutum.

[P626or] Deus, qui Ecclesiam tuam semper gentium vocatione multiplicas, concede propitius, ut, quos aqua baptismatis abluis, continua protectione tuearis.

[P627or] Deus, incommutabilis virtus et lumen aeternum, respice propitius ad totius Ecclesiae sacramentum, et opus salutis humanae perpetuae dispositionis effectu tranquillius operare; totusque mundus experiatur et videat deiecta erigi, inveterata renovari et per ipsum Christum redire omnia in integrum, a quo sumpsere principium.

[P628or] Deus, qui nos ad celebrandum paschale sacramentum utriusque Testamenti paginis instruis, da nobis intellegere misericordiam tuam, ut ex perceptione praesentium munerum firma sit exspectatio futurorum.

[P629co] Deus, qui hanc sacratissimam noctem gloria dominicae resurrectionis illustras, excita in Ecclesia tua adoptionis spiritum, ut, corpore et mente renovati, puram tibi exhibeamus servitutem.

[P630mn] Precibus nostris, carissimi, fratrum nostrorum beatam spem unanimes adiuvemus, ut Pater omnipotens ad fontem regenerationis euntes omni misericordiae suae auxilio prosequatur.

[P631mn] Dei Patris omnipotentis gratiam, carissimi, super hunc fontem supplices invocemus, ut qui ex eo renascentur adoptionis filiis in Christo aggregentur.

[P632ls] Kyrie, eleison. Kyrie, eleison. Christe, eleison. Christe, eleison. Kyrie, eleison. Kyrie, eleison. Sancta Maria, Mater Dei, ora pro nobis. Sancte Michael, ora pro nobis. Sancti Angeli Dei, orate pro nobis. Sancte Ioannes Baptista, ora pro nobis. Sancte Ioseph, ora pro nobis. Sancti Petre et Paule, orate pro nobis. Sancte Andrea, ora pro nobis. Sancte Ioannes, ora pro nobis. Sancta Maria Magdalena, ora pro nobis. Sancte Stephane, ora pro nobis. Sancte Ignati Antiochene, ora pro nobis. Sancte Laurenti, ora pro nobis. Sanctae Perpetua et Felicitas, orate pro nobis. Sancta Agnes, ora pro nobis. Sancte Gregori, ora pro nobis. Sancte Augustine, ora pro nobis. Sancte Athanasi, ora pro nobis. Sancte Basili, ora pro nobis. Sancte Martine, ora pro nobis. Sancte Benedicte, ora pro nobis. Sancti Francisce et Dominice, orate pro nobis. Sancte Francisce (Xavier), ora pro nobis. Sancte Ioannes Maria (Vianney), ora pro nobis. Sancta Catharina (Senensis), ora pro nobis. Sancta Teresia a Iesu, ora pro nobis. Omnes Sancti et Sanctae Dei, orate pro nobis.Propitius esto, libera nos, Domine. Ab omni malo, libera nos, Domine. Ab omni peccato, libera nos, Domine. A morte perpetua, libera nos, Domine. Per incarnationem tuam, libera nos, Domine. Per mortem et resurrectionem tuam, libera nos, Domine. Per effusionem Spiritus Sancti, libera nos, Domine. Peccatores, te rogamus, audi nos. Ut hos electos per gratiam Baptismi regenerare digneris, te rogamus, audi nos. Ut hunc fontem, regenerandis tibi filiis, gratia tua sanctificare digneris, te rogamus, audi nos. Iesu, Fili Dei vivi, te rogamus, audi nos. Christe, audi nos. Christe, audi nos. Christe, exaudi nos. Christe, exaudi nos.

[P633or] Omnipotens sempiterne Deus, adesto magnae pietatis tuae sacramentis, et ad recreandos novos populos, quos tibi fons baptismatis parturit, spiritum adoptionis emitte, ut, quod nostrae humilitatis gerendum est mysterio, virtutis tuae impleatur effectu.

[P634bn] Deus, qui invisibili potentia per sacramentorum signa mirabilem operaris effectum, et creaturam aquae multis modis praeparasti, ut baptismi gratiam demonstraret; Deus, cuius Spiritus super aquas inter ipsa mundi primordia ferebatur, ut iam tunc virtutem sanctificandi aquarum natura conciperet; Deus, qui regenerationis speciem in ipsa diluvii effusione signasti, ut unius eiusdemque elementi mysterio et finis esset vitiis et origo virtutum; Deus, qui Abrahae filios per Mare Rubrum sicco vestigio transire fecisti, ut plebs, a Pharaonis servitute liberata, populum baptizatorum praefiguraret; Deus, cuius Filius, in aqua Iordanis a Ioanne baptizatus, Sancto Spiritu est inunctus, et, in cruce pendens, una cum sanguine aquam de latere suo produxit, ac, post resurrectionem suam, discipulis iussit: Ite, docete omnes gentes, baptizantes eos in nomine Patris, et Filii, et Spiritus Sancti: respice in faciem Ecclesiae tuae, eique dignare fontem baptismatis aperire. Sumat haec acqua Unigeniti tui gratiam de Spiritu Sancto, ut homo, ad imaginem tuam conditus, sacramento baptismatis a cunctis squaloribus vetustatis ablutus, in novam infantiam ex aqua et Spiritu Sancto resurgere mereatur. Descendat, quaesumus, Domine, in hanc plenitudinem fontis per Filium tuum virtus Spiritus Sancti, ut omnes, cum Christo consepulti per baptismum in mortem, ad vitam cum ipso resurgant.

[P635fr] Benedicite, fontes, Domino, laudate et superexaltate eum in saecula.

[P636mn] Dominum Deum nostrum, fratres carissimi, suppliciter exoremus, ut hanc creaturam aquae benedicere dignetur, super nos aspergendam in nostri memoriam baptismi. Ipse autem nos renovare dignetur, ut Spiritui, quem accepimus, fideles maneamus.

[P637bn] Domine Deus noster, populo tuo hac nocte sacratissima vigilanti adesto propitius: et nobis, mirabile nostrae creationis opus, sed et redemptionis nostrae mirabilius, memorantibus, hanc aquam benedicere tu dignare. Ipsam enim tu fecisti, ut et arva fecunditate donaret, et levamen corporibus nostris munditiamque praeberet. Aquam etiam tuae ministram misericordiae condidisti: nam per ipsam solvisti tui populi servitutem illiusque sitim in deserto sedasti; per ipsam novum foedus nuntiaverunt prophetae, quod eras cum hominibus initurus; per ipsam denique, quam Christus in Iordane sacravit, corruptam naturae nostrae substantiam in regenerationis lavacro renovasti. Sit igitur haec aqua nobis suscepti baptismatis memoria, et cum fratribus nostris, qui sunt in Paschate baptizati, gaudia nos tribuas sociare.

[P638mn] Per paschale mysterium, fratres carissimi, in baptismo consepulti sumus cum Christo, ut cum eo in novitate vitae ambulemus. Quapropter, quadragesimali observatione absoluta, sancti baptismatis promissiones renovemus, quibus olim Satanae et operibus eius abrenuntiavimus, et Deo in sancta Ecclesia catholica servire promisimus. Quapropter:

[P639pm] Abrenuntiatis Satanae? Abrenuntio. Et omnibus operibus eius? Abrenuntio. Et omnibus pompis eius? Abrenuntio. Abrenuntiatis peccato, ut in libertate filiorum Dei vivatis? Abrenuntio. Abrenuntiatis seductionibus iniquitatis, ne peccatum vobis dominetur? Abrenuntio. Abrenuntiatis Satanae, qui est auctor et princeps peccati? Abrenuntio. Creditis in Deum Patrem omnipotentem, creatorem caeli et terrae? Credo. Creditis in Iesum Christum, Filium eius unicum, Dominum nostrum, natum ex Maria Virgine, passum et sepultum, qui a mortuis resurrexit et sedet ad dexteram Patris? Credo. Creditis in Spiritum Sanctum, sanctam Ecclesiam catholicam, sanctorum communionem, remissionem peccatorum, carnis resurrectionem et vitam aeternam? Credo.

[P640or] Et Deus omnipotens, Pater Domini nostri Iesu Christi, qui nos regeneravit ex aqua et Spiritu Sancto, quique nobis dedit remissionem peccatorum, ipse nos custodiat gratia sua, in Christo Iesu Domino nostro, in vitam aeternam. Amen.

[P641an] Vidi aquam egredientem de templo, a latere dextro, alleluia; et omnes, ad quos pervenit aqua ista, salvi facti sunt et dicent: Alleluia, alleluia.

[P642so] Suscipe, quaesumus, Domine, preces populi tui cum oblationibus hostiarum, ut, paschalibus initiata mysteriis, ad aeternitatis nobis medelam, te operante, proficiant.

[P643am] Pascha nostrum immolatus est Christus; itaque epulemur in azymis sinceritatis et veritatis, alleluia.

[P644pc] Spiritum nobis, Domine, tuae caritatis infunde, ut, quos sacramentis paschalibus satiasti, tua facias pietate concordes.

[P645bs] Benedicat vos omnipotens Deus, hodierna interveniente sollemnitate paschali, et ab omni miseratus defendat incursione peccati. Et qui ad aeternam vitam in Unigeniti sui resurrectione vos reparat, vos praemiis immortalitatis adimpleat. Et qui, expletis passionis dominicae diebus, paschalis festi gaudia celebratis, ad ea festa, quae laetitiis peraguntur aeternis, ipso opitulante, exsultantibus animis veniatis. Benedicat vos omnipotens Deus, Pater, et Filius, et Spiritus Sanctus.

[P646fr] Ite, missa est, alleluia, alleluia. Deo gratias, alleluia, alleluia.

[P647ai] Resurrexi, et adhuc tecum sum, alleluia: posuisti super me manum tuam, alleluia: mirabilis facta est scientia tua, alleluia, alleluia.

[P648ai] Surrexit Dominus vere, alleluia. Ipsi gloria et imperium per universa aeternitatis saecula, alleluia, alleluia.

[P649co] Deus, qui hodierna die, per Unigenitum tuum, aeternitatis nobis aditum, devicta morte, reserasti, da nobis, quaesumus, ut, qui resurrectionis dominicae sollemnia colimus, per innovationem tui Spiritus in lumine vitae resurgamus.

[P650so] Sacrificia, Domine, paschalibus gaudiis exsultantes offerimus, quibus Ecclesia tua mirabiliter renascitur et nutritur.

[P651am] Pascha nostrum immolatus est Christus, alleluia; itaque epulemur in azymis sinceritatis et veritatis, alleluia, alleluia.

[P652pc] Perpetuo, Deus, Ecclesiam tuam pio favore tuere, ut, paschalibus renovata mysteriis, ad resurrectionis perveniat claritatem.

[P653fr] Ite, missa est, alleluia, alleluia. Deo gratias, alleluia, alleluia.

[P654ai] Introduxit vos Dominus in terram fluentem lac et mel; ut lex Domini sit semper in ore vestro, alleluia.

[P655ai] Resurrexit Dominus a mortuis, sicut dixerat; exsultemus et laetemur omnes, quoniam ipse regnat in aeternum, alleluia.

[P656co] Deus, qui Ecclesiam tuam nova semper prole multiplicas, concede famulis tuis, ut sacramentum vivendo teneant, quod fide perceperunt.

[P657so] Suscipe, quaesumus, Domine, munera tuorum propitius populorum, ut, confessione tui nominis et baptismate renovati, sempiternam beatitudinem consequantur.

[P658am] Christus resurgens ex mortuis iam non moritur, mors illi ultra non dominabitur, alleluia.

[P659pc] Exuberet, quaesumus, Domine, mentibus nostris paschalis gratia sacramenti, ut, quos viam fecisti perpetuae salutis intrare, donis tuis dignos efficias.

[P660ai] Aqua sapientiae potavit eos; firmabitur in illis, et non flectetur, exaltabit eos in aeternum, alleluia.

[P661co] Deus, qui paschalia nobis remedia contulisti, populum tuum caelesti dono prosequere, ut, perfectam libertatem assecutus, in caelis gaudeat, unde nunc in terris exsultat.

[P662so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdat, et ad aeterna dona perveniat.

[P663am] Si consurrexistis cum Christo, quae sursum sunt quaerite, ubi Christus est in dextera Dei sedens; quae sursum sunt sapite, alleluia.

[P664pc] Exaudi nos, omnipotens Deus, et familiae tuae corda, cui perfectam baptismatis gratiam contulisti, ad promerendam beatitudinem aptes aeternam.

[P665ai] Venite, benedicti Patris mei, percipite regnum, quod vobis paratum est ab origine mundi, alleluia.

[P666co] Deus, qui nos resurrectionis dominicae annua sollemnitate laetificas, concede propitius, ut, per temporalia festa quae agimus, pervenire ad gaudia aeterna mereamur.

[P667so] Suscipe, quaesumus, Domine, hostias redemptionis humanae, et salutem nobis mentis et corporis operare placatus.

[P668am] Cognoverunt discipuli Dominum Iesum in fractione panis, alleluia.

[P669pc] Ab omni nos, quaesumus, Domine, vetustate purgatos, sacramenti Filii tui veneranda perceptio in novam transferat creaturam.

[P670ai] Victricem manum tuam, Domine, laudaverunt pariter, quia sapientia aperuit os mutum, et linguas infantium fecit disertas, alleluia.

[P671co] Deus, qui diversitatem gentium in confessione tui nominis adunasti, da, ut renatis fonte baptismatis una sit fides mentium et pietas actionum.

[P672so] Hostias, quaesumus, Domine, placatus assume, quas et pro renatis gratanter deferimus, et pro acceleratione caelestis auxilii.

[P673am] Populus acquisitionis, annuntiate virtutes eius, qui vos de tenebris vocavit in admirabile lumen suum, alleluia.

[P674pc] Exaudi, Domine, preces nostras, ut redemptionis nostrae sacrosancta commercia et vitae nobis conferant praesentis auxilium, et gaudia sempiterna concilient.

[P675ai] Eduxit Dominus populum suum in spe, et inimicos eorum operuit mare, alleluia.

[P676co] Omnipotens sempiterne Deus, qui paschale sacramentum in reconciliationis humanae foedere contulisti, da mentibus nostris, ut, quod professione celebramus, imitemur effectu.

[P677so] Perfice, Domine, benignus in nobis paschalium munerum votiva commercia, ut a terrenis affectibus ad caeleste desiderium transferamur.

[P678am] Dixit Iesus discipulis suis: Venite, prandete. Et accepit panem, et dedit eis, alleluia.

[P679pc] Continua, quaesumus, Domine, quos salvasti pietate custodi, ut, qui Filii tui passione sunt redempti, eius resurrectione laetentur. Qui vivit et regnat in saecula saeculorum.

[P680ai] Eduxit Dominus populum suum in exsultatione, et electos suos in laetitia, alleluia.

[P681co] Deus, qui credentes in te populos gratiae tuae largitate multiplicas, ad electionem tuam propitius intuere, ut, qui sacramento baptismatis sunt renati, beata facias immortalitate vestiri.

[P682so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P683am] Omnes, qui in Christo baptizati estis, Christum induistis, alleluia.

[P684pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P685ai] Quasi modo geniti infantes, rationabile, sine dolo lac concupiscite, ut in eo crescatis in salutem, alleluia.

[P686ai] Accipite iucunditatem gloriae vestrae, gratias agentes Deo, qui vos ad caelestia regna vocavit, alleluia.

[P687co] Deus misericordiae sempiternae, qui in ipso paschalis festi recursu fidem sacratae tibi plebis accendis, auge gratiam quam dedisti, ut digna omnes intellegentia comprehendant, quo lavacro abluti, quo spiritu regenerati, quo sanguine sunt redempti.

[P688so] Suscipe, quaesumus, Domine, plebis tuae (et tuorum renatorum)oblationes, ut, confessione tui nominis et baptismate renovati, sempiternam beatitudinem consequantur.

[P689am] Mitte manum tuam, et cognosce loca clavorum, et noli esse incredulus, sed fidelis, alleluia.

[P690pc] Concede, quaesumus, omnipotens Deus, ut paschalis perceptio sacramenti continua in nostris mentibus perseveret.

[P691ai] Christus resurgens ex mortuis iam non moritur, mors illi ultra non dominabitur, alleluia.

[P692co] Fac, quaesumus, omnipotens Deus, ut, qui paschalibus remediis innovati, similitudinem terreni parentis evasimus, ad formam caelestis transferamur auctoris.

[P693so] Suscipe munera, Domine, quaesumus, exsultantis Ecclesiae, et cui causam tanti gaudii praestitisti, perpetuae fructum concede laetitiae.

[P694am] Stetit Iesus in medio discipulorum suorum, et dixit eis: Pax vobis, alleluia.

[P695pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P696ai] Gaudeamus et exsultemus et demus gloriam Deo, quoniam regnavit Dominus Deus noster omnipotens, alleluia.

[P697co] Fac nos, quaesumus, omnipotens Deus, Domini resurgentis praedicare virtutem, ut, cuius muneris pignus accepimus, manifesta dona comprehendere valeamus.

[P698so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P699am] Oportuit pati Christum, et resurgere a mortuis, et ita intrare in gloriam suam, alleluia.

[P700pc] Exaudi, Domine, preces nostras, ut redemptionis nostrae sacrosancta commercia et vitae nobis conferant praesentis auxilium et gaudia sempiterna concilient.

[P701ai] Confitebor tibi in populis, Domine, et narrabo nomen tuum fratribus meis, alleluia.

[P702co] Annua recolentes mysteria, quibus per renovatam originis dignitatem humana substantia spem resurrectionis accepit, clementiam tuam, Domine, suppliciter exoramus, ut, quod fide recolimus, perpetua dilectione capiamus.

[P703so] Deus, qui nos, per huius sacrificii veneranda commercia, unius summaeque divinitatis participes effecisti, praesta, quaesumus, ut, sicut tuam cognovimus veritatem, sic eam dignis moribus assequamur.

[P704am] Dicit Dominus: Ego elegi vos de mundo et posui vos ut eatis, et fructum afferatis, et fructus vester maneat, alleluia.

[P705pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P706ai] Deus, dum egredereris coram populo tuo, iter faciens eis, habitans in illis, terra mota est, caeli distillaverunt, alleluia.

[P707co] Deus, qui pro salute mundi sacrificium paschale effecisti, propitiare supplicationibus populi tui, ut interpellans pro nobis Christus Pontifex noster, nos per id quod nostri est similis reconciliet, per id quod tibi est aequalis absolvat.

[P708so] Ascendant ad te, Domine, preces nostrae cum oblationibus hostiarum, ut, tua dignatione mundati, sacramentis magnae pietatis aptemur.

[P709am] Ecce ego vobiscum sum omnibus diebus, usque ad consummationem saeculi, alleluia.

[P710pc] Omnipotens sempiterne Deus, qui ad aeternam vitam in Christi resurrectione nos reparas, fructus in nobis paschalis multiplica sacramenti, et fortitudinem cibi salutaris nostris infunde pectoribus.

[P711ai] Redemisti nos, Domine, in sanguine tuo, ex omni tribu, et lingua, et populo, et natione, et fecisti nos Deo nostro regnum et sacerdotes, alleluia.

[P712co] Deus, spes et lumen sincerum mentium, da cordibus nostris, te supplices deprecamur, et dignam tibi orationem persolvere, et te semper praeconiorum munere collaudare.

[P713so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdant, et ad aeterna dona perveniant.

[P714am] Traditus est Christus Dominus noster propter delicta nostra, et resurrexit propter iustificationem nostram, alleluia.

[P715pc] Continua, quaesumus, Domine, quos salvasti pietate custodi, ut, qui Filii tui passione sunt redempti, eius resurrectione laetentur. Qui vivit et regnat in saecula saeculorum.

[P716ai] Populus acquisitionis, annuntiate virtutes eius, qui vos de tenebris vocavit in admirabile lumen suum, alleluia.

[P717co] Depelle, Domine, conscriptum peccati lege chirographum, quod in nobis paschali mysterio per resurrectionem Christi Filii tui vacuasti.

[P718co] Deus, qui misericordiae ianuam fidelibus tuis per paschalia mysteria patere voluisti, respice in nos et miserere nostri, ut, qui voluntatis tuae viam, te donante, sequimur, a vitae numquam semitis deviemur.

[P719so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[P720am] Pater, quos dedisti mihi, volo ut ubi sum ego, et illi sint mecum, ut videant claritatem quam dedisti mihi, alleluia.

[P721pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[P722ai] Iubilate Deo, omnis terra, psalmum dicite nomini eius, date gloriam laudi eius, alleluia.

[P723co] Semper exsultet populus tuus, Deus, renovata animae iuventute, ut, qui nunc laetatur in adoptionis se gloriam restitutum, resurrectionis diem spe certae gratulationis exspectet.

[P724so] Suscipe munera, Domine, quaesumus, exsultantis Ecclesiae, et, cui causam tanti gaudii praestitisti, perpetuae fructum concede laetitiae.

[P725am] Cognoverunt discipuli Dominum Iesum in fractione panis, alleluia.

[P726am] Oportebat Christum pati, et resurgere a mortuis tertia die, et praedicari in nomine eius paenitentiam, et remissionem peccatorum in omnes gentes, alleluia.

[P727am] Dixit Iesus discipulis suis: Venite, prandete. Et accepit panem, et dedit eis, alleluia.

[P728pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P729ai] Surrexit pastor bonus, qui animam suam posuit pro ovibus suis, et pro grege suo mori dignatus est, alleluia.

[P730co] Concede, quaesumus, omnipotens Deus, ut, veterem cum suis rationibus hominem deponentes, illius conversatione vivamus, ad cuius nos substantiam paschalibus remediis transtulisti.

[P731so] Ascendant ad te, Domine, preces nostrae cum oblationibus hostiarum, ut, tua dignatione mundati, sacramentis magnae pietatis aptemur.

[P732am] Pacem relinquo vobis, pacem meam do vobis; non quomodo mundus dat, ego do vobis, dicit Dominus, alleluia.

[P733pc] Omnipotens sempiterne Deus, qui ad aeternam vitam in Christi resurrectione nos reparas, fructus in nobis paschalis multiplica sacramenti, et fortitudinem cibi salutaris nostris infunde pectoribus.

[P734ai] Laudem dicite Deo nostro, omnes qui timetis Deum, pusilli et magni, quia facta est salus, et virtus, et potestas Christi eius, alleluia.

[P735co] Deus, qui renatis ex aqua et Spiritu Sancto caelestis regni pandis introitum, auge super famulos tuos gratiam quam dedisti, ut, qui ab omnibus sunt purgati peccatis, nullis priventur tua pietate promissis.

[P736so] Suscipe munera, Domine, quaesumus, exsultantis Ecclesiae, et, cui causam tanti gaudii praestitisti, perpetuae fructum concede laetitiae.

[P737am] Si mortui sumus cum Christo, credimus quia simul etiam vivemus cum Christo, alleluia.

[P738pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P739ai] Repleatur os meum laude tua, ut possim cantare; gaudebunt labia mea, dum cantavero tibi, alleluia.

[P740co] Adesto, quaesumus, Domine, familiae tuae, et dignanter impende, ut, quibus fidei gratiam contulisti, in resurrectione Unigeniti tui portionem largiaris aeternam.

[P741so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P742am] Surrexit Dominus et illuxit nobis, quos redemit sanguine suo, alleluia.

[P743pc] Exaudi, Domine, preces nostras, ut redemptionis nostrae sacrosancta commercia et vitae nobis conferant praesentis auxilium et gaudia sempiterna concilient.

[P744ai] Cantemus Domino: gloriose enim magnificatus est. Fortitudo mea et laus mea Dominus, et factus est mihi in salutem, alleluia.

[P745co] Omnipotens sempiterne Deus, propensius his diebus tuam pietatem consequamur, quibus eam plenius te largiente cognovimus, ut, quos ab erroris caligine liberasti, veritatis tuae firmius inhaerere facias documentis.

[P746so] Deus, qui nos, per huius sacrificii veneranda commercia, unius summaeque divinitatis participes effecisti, praesta, quaesumus, ut, sicut tuam cognovimus veritatem, sic eam dignis moribus assequamur.

[P747am] Pro omnibus mortuus est Christus, ut et qui vivunt iam non sibi vivant, sed ei qui pro ipsis mortuus est et resurrexit, alleluia.

[P748pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P749ai] Dignus est Agnus, qui occisus est, accipere virtutem et divinitatem et sapientiam et fortitudinem et honorem, alleluia.

[P750co] Praesta, quaesumus, omnipotens Deus, ut, qui gratiam dominicae resurrectionis cognovimus, ipsi per amorem Spiritus in novitatem vitae resurgamus.

[P751so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[P752am] Crucifixus surrexit a mortuis, et redemit nos, alleluia.

[P753pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[P754ai] Consepulti estis Christo in baptismo, in quo et resurrexistis per fidem operationis Dei, qui suscitavit illum a mortuis, alleluia.

[P755co] Deus, qui credentes in te fonte baptismatis innovasti, hanc renatis in Christo concede custodiam, ut, omni erroris incursu devicto, gratiam tuae benedictionis fideliter servent.

[P756so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdant, et ad aeterna dona perveniant.

[P757am] Pater, pro eis rogo, ut ipsi in nobis unum sint, ut credat mundus quia tu me misisti, dicit Dominus, alleluia.

[P758pc] Continua, quaesumus, Domine, quos salvasti pietate custodi, ut, qui Filii tui passione sunt redempti, eius resurrectione laetentur. Qui vivit et regnat in saecula saeculorum.

[P759ai] Misericordia Domini plena est terra; verbo Domini caeli firmati sunt, alleluia.

[P760co] Omnipotens sempiterne Deus, deduc nos ad societatem caelestium gaudiorum, ut eo perveniat humilitas gregis, quo processit fortitudo pastoris.

[P761so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P762am] Surrexit Pastor bonus, qui animam suam posuit pro ovibus suis, et pro grege suo mori dignatus est, alleluia.

[P763pc] Gregem tuum, Pastor bone, placatus intende, et oves, quas pretioso Filii tui sanguine redemisti, in aeternis pascuis collocare digneris.

[P764ai] Christus resurgens ex mortuis iam non moritur, mors illi ultra non dominabitur, alleluia.

[P765co] Deus, lux perfecta beatorum, qui nobis tribuisti paschalia mysteria celebrare in terris, fac nos, quaesumus, de gratiae tuae plenitudine in aeterna saecula gaudere.

[P766so] Suscipe munera, Domine, quaesumus, exsultantis Ecclesiae, et cui causam tanti gaudii praestitisti, perpetuae fructum concede laetitiae.

[P767am] Stetit Iesus in medio discipulorum suorum, et dixit eis: Pax vobis, alleluia.

[P768pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P769ai] Gaudeamus et exsultemus et demus gloriam Deo, quoniam regnavit Dominus Deus noster omnipotens, alleluia.

[P770co] Praesta, quaesumus, omnipotens Deus, ut, qui resurrectionis dominicae mysteria colimus, redemptionis nostrae suscipere laetitiam mereamur.

[P771so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P772am] Oportuit pati Christum, et resurgere a mortuis, et ita intrare in gloriam suam, alleluia.

[P773pc] Exaudi, Domine, preces nostras, ut redemptionis nostrae sacrosancta commercia et vitae nobis conferant praesentis auxilium et gaudia sempiterna concilient.

[P774ai] Confitebor tibi in populis, Domine, et narrabo nomen tuum fratribus meis, alleluia.

[P775co] Deus, vita fidelium, gloria humilium, beatitudo iustorum, ad preces supplicum benignus intende, ut, qui promissa tuae sitiunt largitatis, de tua semper abundantia repleantur.

[P776so] Deus, qui nos, per huius sacrificii veneranda commercia, unius summaeque divinitatis participes effecisti, praesta, quaesumus, ut, sicut tuam cognovimus veritatem, sic eam dignis moribus assequamur.

[P777am] Dicit Dominus: Ego elegi vos de mundo et posui vos ut eatis, et fructum afferatis, et fructus vester maneat, alleluia.

[P778pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P779ai] Deus, dum egredereris coram populo tuo, iter faciens eis, habitans in illis, terra mota est, caeli distillaverunt, alleluia.

[P780co] Deus, qui humanam naturam supra primae originis reparas dignitatem, respice ad pietatis tuae ineffabile sacramentum, ut, quos regenerationis mysterio dignatus es innovare, in his dona tuae perpetuae gratiae benedictionisque conserves.

[P781so] Ascendant ad te, Domine, preces nostrae cum oblationibus hostiarum, ut, tua dignatione mundati, sacramentis magnae pietatis aptemur.

[P782am] Ecce ego vobiscum sum omnibus diebus, usque ad consummationem saeculi, alleluia.

[P783pc] Omnipotens sempiterne Deus, qui ad aeternam vitam in Christi resurrectione nos reparas, fructus in nobis paschalis multiplica sacramenti, et fortitudinem cibi salutaris nostris infunde pectoribus.

[P784ai] Redemisti nos, Domine, in sanguine tuo, ex omni tribu, et lingua, et populo, et natione, et fecisti nos Deo nostro regnum et sacerdotes, alleluia.

[P785co] Deus, qui et libertatis nostrae auctor es et salutis, exaudi supplicantium voces, et, quos sanguinis Filii tui effusione redemisti, fac, ut per te vivere et perpetua in te valeant incolumitate gaudere.

[P786so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdant, et ad aeterna dona perveniant.

[P787am] Traditus est Christus Dominus noster propter delicta nostra, et resurrexit propter iustificationem nostram, alleluia.

[P788pc] Continua, quaesumus, Domine, quos salvasti pietate custodi, ut, qui Filii tui passione sunt redempti, eius resurrectione laetentur. Qui vivit et regnat in saecula saeculorum.

[P789ai] Populus acquisitionis, annuntiate virtutes eius, qui vos de tenebris vocavit in admirabile lumen suum, alleluia.

[P790co] Deus, qui sollemnitate paschali caelestia mundo remedia benignus operaris, Ecclesiae tuae indulgentiam prosequere, ut observantia temporalis ad vitam proficiat sempiternam.

[P791so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[P792am] Pater, quos dedisti mihi, volo ut ubi sum ego, et illi sint mecum, ut videant claritatem quam dedisti mihi, alleluia.

[P793pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[P794ai] Cantate Domino canticum novum, quia mirabilia fecit Dominus; ante conspectum gentium revelavit iustitiam suam, alleluia.

[P795co] Omnipotens sempiterne Deus, semper in nobis paschale perfice sacramentum, ut, quos sacro baptismate dignatus es renovare, sub tuae protectionis auxilio multos fructus afferant, et ad aeternae vitae gaudia pervenire concedas.

[P796so] Deus, qui nos, per huius sacrificii veneranda commercia, unius summaeque divinitatis participes effecisti, praesta, quaesumus, ut, sicut tuam cognovimus veritatem, sic eam dignis moribus assequamur.

[P797am] Ego sum vitis vera et vos palmites, dicit Dominus; qui manet in me et ego in eo, hic fert fructum multum, alleluia.

[P798pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P799ai] Surrexit pastor bonus, qui animam suam posuit pro ovibus suis, et pro grege suo mori dignatus est, alleluia.

[P800co] Familiam tuam, quaesumus, Domine, dextera tua perpetuo circumdet auxilio, ut, Filii tui Unigeniti resurrectione, ab omni pravitate defensa, donis caelestibus prosequatur.

[P801so] Ascendant ad te, Domine, preces nostrae cum oblationibus hostiarum, ut, tua dignatione mundati, sacramentis magnae pietatis aptemur.

[P802am] Pacem relinquo vobis, pacem meam do vobis; non quomodo mundus dat, ego do vobis, dicit Dominus, alleluia.

[P803pc] Omnipotens sempiterne Deus, qui ad aeternam vitam in Christi resurrectione nos reparas, fructus in nobis paschalis multiplica sacramenti, et fortitudinem cibi salutaris nostris infunde pectoribus.

[P804ai] Laudem dicite Deo nostro, omnes qui timetis Deum, pusilli et magni, quia facta est salus, et virtus, et potestas Christi eius, alleluia.

[P805co] Deus, qui ad aeternam vitam in Christi resurrectione nos reparas, da populo tuo fidei speique constantiam, ut non dubitemus implenda, quae te novimus auctore promissa.

[P806so] Suscipe munera, Domine, quaesumus, exsultantis Ecclesiae, et, cui causam tanti gaudii praestitisti, perpetuae fructum concede laetitiae.

[P807am] Si mortui sumus cum Christo, credimus quia simul etiam vivemus cum Christo, alleluia.

[P808pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P809ai] Repleatur os meum laude tua, ut possim cantare; gaudebunt labia mea, dum cantavero tibi, alleluia.

[P810co] Deus, innocentiae restitutor et amator, dirige ad te tuorum corda famulorum, ut, quos de incredulitatis tenebris liberasti, numquam a tuae veritatis luce discedant.

[P811so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P812am] Surrexit Dominus et illuxit nobis, quos redemit sanguine suo, alleluia.

[P813pc] Exaudi, Domine, preces nostras, ut redemptionis nostrae sacrosancta commercia et vitae nobis conferant praesentis auxilium et gaudia sempiterna concilient.

[P814ai] Cantemus Domino: gloriose enim magnificatus est. Fortitudo mea et laus mea Dominus, et factus est mihi in salutem, alleluia.

[P815co] Deus, cuius gratia iusti ex impiis et beati efficimur ex miseris, adesto operibus tuis, adesto muneribus, ut quibus inest fidei iustificatio non desit perseverantiae fortitudo.

[P816so] Deus, qui nos, per huius sacrificii veneranda commercia, unius summaeque divinitatis participes effecisti, praesta, quaesumus, ut, sicut tuam cognovimus veritatem, sic eam dignis moribus assequamur.

[P817am] Pro omnibus mortuus est Christus, ut et qui vivunt iam non sibi vivant, sed ei qui pro ipsis mortuus est et resurrexit, alleluia.

[P818pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P819ai] Dignus est Agnus, qui occisus est, accipere virtutem et divinitatem et sapientiam et fortitudinem et honorem, alleluia.

[P820co] Tribue nobis, quaesumus, Domine, mysteriis paschalibus convenienter aptari, ut quae laetanter exsequimur perpetua virtute nos tueantur et salvent.

[P821so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[P822am] Crucifixus surrexit a mortuis, et redemit nos, alleluia.

[P823pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[P824ai] Consepulti estis Christo in baptismo, in quo et resurrexistis per fidem operationis Dei, qui suscitavit illum a mortuis, alleluia.

[P825co] Omnipotens aeterne Deus, qui nobis regeneratione baptismatis caelestem vitam conferre dignatus es, praesta, quaesumus, ut, quos immortalitatis efficis iustificando capaces, usque ad plenitudinem gloriae, te moderante, perveniant.

[P826so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdant, et ad aeterna dona perveniant.

[P827am] Pater, pro eis rogo, ut ipsi in nobis unum sint, ut credat mundus quia tu me misisti, dicit Dominus, alleluia.

[P828pc] Continua, quaesumus, Domine, quos salvasti pietate custodi, ut, qui Filii tui passione sunt redempti, eius resurrectione laetentur. Qui vivit et regnat in saecula saeculorum.

[P829ai] Vocem iucunditatis annuntiate, et audiatur, annuntiate usque ad extremum terrae: liberavit Dominus populum suum, alleluia.

[P830co] Fac nos, omnipotens Deus, hos laetitiae dies, quos in honorem Domini resurgentis exsequimur, affectu sedulo celebrare, ut quod recordatione percurrimus semper in opere teneamus.

[P831so] Ascendant ad te, Domine, preces nostrae cum oblationibus hostiarum, ut, tua dignatione mundati, sacramentis magnae pietatis aptemur.

[P832am] Si diligitis me, mandata mea servate, dicit Dominus. Et ego rogabo Patrem, et alium Paraclitum dabit vobis, ut maneat vobiscum in aeternum, alleluia.

[P833pc] Omnipotens sempiterne Deus, qui ad aeternam vitam in Christi resurrectione nos reparas, fructum in nobis paschalis multiplica sacramenti, et fortitudinem cibi salutaris nostris infunde pectoribus.

[P834ai] Christus resurgens ex mortuis iam non moritur, mors illi ultra non dominabitur, alleluia.

[P835co] Concede, misericors Deus, ut, quod paschalibus exsequimur institutis, fructiferum nobis omni tempore sentiamus.

[P836so] Suscipe munera, Domine, quaesumus, exsultantis Ecclesiae, et cui causam tanti gaudii praestitisti, perpetuae fructum concede laetitiae.

[P837am] Stetit Iesus in medio discipulorum suorum, et dixit eis: Pax vobis, alleluia.

[P838pc] Populum tuum, quaesumus, Domine, intuere benignus, et, quem aeternis dignatus es renovare mysteriis, ad incorruptibilem glorificandae carnis resurrectionem pervenire concede.

[P839ai] Gaudeamus et exsultemus et demus gloriam Deo, quoniam regnavit Dominus Deus noster omnipotens, alleluia.

[P840co] Praesta nobis, omnipotens et misericors Deus, ut in resurrectione Christi Filii tui percipiamus veraciter portionem.

[P841so] Concede, quaesumus, Domine, semper nos per haec mysteria paschalia gratulari, ut continua nostrae reparationis operatio perpetuae nobis fiat causa laetitiae.

[P842am] Oportuit pati Christum, et resurgere a mortuis, et ita intrare in gloriam suam, alleluia.

[P843pc] Exaudi, Domine, preces nostras, ut redemptionis nostrae sacrosancta commercia et vitae nobis conferant praesentis auxilium et gaudia sempiterna concilient.

[P844ai] Confitebor tibi in populis, Domine, et narrabo nomen tuum fratribus meis, alleluia.

[P845co] Annue nobis, quaesumus, Domine, ut, quemadmodum mysterio resurrectionis Filii tui sollemnia colimus, ita et in adventum eius gaudere cum Sanctis omnibus mereamur.

[P846so] Deus, qui nos, per huius sacrificii veneranda commercia, unius summaeque divinitatis participes effecisti, praesta, quaesumus, ut, sicut tuam cognovimus veritatem, sic eam dignis moribus assequamur.

[P847am] Dicit Dominus: Ego elegi vos de mundo et posui vos ut eatis, et fructum afferatis, et fructus vester maneat, alleluia.

[P848pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P849ai] Regna terrae cantate Deo, psallite Domino, qui ascendit super caelum caeli; magnificentia et virtus eius in nubibus, alleluia.

[P850co] Deus, cuius Filius hodie in caelos, Apostolis astantibus, ascendit, concede nobis, quaesumus, ut secundum eius promissionem et ille nobiscum semper in terris et nos cum eo in caelo vivere mereamur.

[P851so] Deus, cuius Unigenitus, Pontifex noster, semper vivens sedet ad dexteram tuam ad interpellandum pro nobis, concede nos adire cum fiducia ad thronum gratiae, ut misericordiam tuam consequamur.

[P852am] Christus, unam pro peccatis offerens hostiam, in sempiternum sedet in dextera Dei, alleluia.

[P853pc] Quae ex altari tuo, Domine, dona percepimus, accendant in cordibus nostris caelestis patriae desiderium, et quo praecursor pro nobis introivit Salvator, faciant nos, eius vestigia sectantes, contendere.

[P854ai] Viri Galilaei, quid admiramini aspicientes in caelum? Quemadmodum vidistis eum ascendentem in caelum, ita veniet, alleluia.

[P855co] Fac nos, omnipotens Deus, sanctis exsultare gaudiis, et pia gratiarum actione laetari, quia Christi Filii tui ascensio est nostra provectio, et quo processit gloria capitis, eo spes vocatur et corporis.

[P856co] Concede, quaesumus, omnipotens Deus, ut, qui hodierna die Unigenitum tuum Redemptorem nostrum ad caelos ascendisse credimus, ipsi quoque mente in caelestibus habitemus.

[P857so] Sacrificium, Domine, pro Filii tui supplices venerabili nunc ascensione deferimus: praesta, quaesumus, ut his commerciis sacrosanctis ad caelestia consurgamus.

[P858am] Ecce ego vobiscum sum omnibus diebus usque ad consummationem saeculi, alleluia.

[P859pc] Omnipotens sempiterne Deus, qui in terra constitutos divina tractare concedis, praesta, quaesumus, ut illuc tendat christianae devotionis affectus, quo tecum est nostra substantia.

[P860ai] Deus, dum egredereris coram populo tuo, iter faciens eis, habitans in illis, terra mota est, caeli distillaverunt, alleluia.

[P861co] Deus, qui populum tuum tuae fecisti redemptionis participem, concede nobis, quaesumus, ut de resurrectione dominica perpetuo gratulemur.

[P862so] Ascendant ad te, Domine, preces nostrae cum oblationibus hostiarum, ut, tua dignatione mundati, sacramentis magnae pietatis aptemur.

[P863am] Ecce ego vobiscum sum omnibus diebus, usque ad consummationem saeculi, alleluia.

[P864pc] Omnipotens sempiterne Deus, qui ad aeternam vitam in Christi resurrectione nos reparas, fructus in nobis paschalis multiplica sacramenti, et fortitudinem cibi salutaris nostris infunde pectoribus.

[P865ai] Redemisti nos, Domine, in sanguine tuo, ex omni tribu, et lingua, et populo, et natione, et fecisti nos Deo nostro regnum et sacerdotes, alleluia.

[P866co] Deus, qui ad aeternam vitam in Christi resurrectione nos reparas, erige nos ad consedentem in dextera tua nostrae salutis auctorem, ut, cum in maiestate sua Salvator noster advenerit, quos fecisti baptismo renasci, facias beata immortalitate vestiri.

[P867co] Exaudi, Domine, preces nostras, ut, quod tui Verbi sanctificatione promissum est, evangelico ubique compleatur effectu, et plenitudo adoptionis obtineat quod praedixit testificatio veritatis.

[P868so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdant, et ad aeterna dona perveniant.

[P869am] Traditus est Christus Dominus noster propter delicta nostra, et resurrexit propter iustificationem nostram, alleluia.

[P870pc] Continua, quaesumus, Domine, quos salvasti pietate custodi, ut, qui Filii tui passione sunt redempti, eius resurrectione laetentur.

[P871ai] Populus acquisitionis, annuntiate virtutes eius, qui vos de tenebris vocavit in admirabile lumen suum, alleluia.

[P872co] Deus, cuius Filius ad caelos ascendens Apostolis Sanctum Spiritum dignatus est polliceri, praesta, quaesumus, ut, sicut illi multifaria doctrinae caelestis munera perceperunt, ita nobis quoque spiritalia dona concedas.

[P873co] Mentes nostras, quaesumus, Domine, bonis operibus semper informa, ut, ad meliora iugiter contendentes, paschale mysterium studeamus habere perpetuum.

[P874so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[P875am] Pater, quos dedisti mihi, volo ut ubi sum ego, et illi sint mecum, ut videant claritatem quam dedisti mihi, alleluia.

[P876pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[P877ai] Exaudi, Domine, vocem meam, qua clamavi ad te. Tibi dixit cor meum, quaesivi vultum tuum, vultum tuum requiram; ne avertas faciem tuam a me, alleluia.

[P878co] Supplicationibus nostris, Domine, adesto propitius, ut, sicut humani generis Salvatorem tecum in tua credimus maiestate, ita eum usque ad consummationem saeculi manere nobiscum, sicut ipse promisit, sentiamus.

[P879so] Suscipe, Domine, fidelium preces cum oblationibus hostiarum, ut, per haec piae devotionis officia, ad caelestem gloriam transeamus.

[P880am] Rogo, Pater, ut sint unum, sicut et nos unum sumus, alleluia.

[P881pc] Exaudi nos, Deus, salutaris noster, ut per haec sacrosanta mysteria in totius Ecclesiae confidamus corpore faciendum, quod eius praecessit in capite.

[P882ai] Accipietis virtutem supervenientis Spiritus Sancti in vos, et eritis mihi testes usque ad ultimum terrae, alleluia.

[P883co] Adveniat nobis, quaesumus, Domine, virtus Spiritus Sancti, qua voluntatem tuam fideli mente retinere, et pia conversatione depromere valeamus.

[P884so] Sacrificia nos, Domine, immaculata purificent, et mentibus nostris supernae gratiae dent vigorem.

[P885am] Non vos relinquam orphanos, dicit Dominus: veniam ad vos iterum, et gaudebit cor vestrum, alleluia.

[P886pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[P887ai] Ego sum primus et novissimus; et vivus et fui mortuus, et ecce sum vivens in saecula saeculorum, alleluia.

[P888co] Praesta, quaesumus, omnipotens et misericors Deus, ut Spiritus Sanctus adveniens templum nos gloriae suae dignanter inhabitando perficiat.

[P889so] Suscipe, Domine, fidelium preces cum oblationibus hostiarum, ut, per haec piae devotionis officia, ad caelestem gloriam transeamus.

[P890am] Spiritus Sanctus, quem mittet Pater in nomine meo, ille vos docebit omnia, et suggeret vobis omnia quaecumque dixero vobis, dicit Dominus, alleluia.

[P891pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[P892ai] Omnes gentes, plaudite manibus, iubilate Deo in voce exsultationis, alleluia.

[P893co] Ecclesiae tuae, misericors Deus, concede propitius, ut, Sancto Spiritu congregata, toto sit corde tibi devota, et pura voluntate concordet.

[P894so] Suscipe, quaesumus, Domine, sacrificia tuis instituta praeceptis, et sacris mysteriis, quae debitae servitutis celebramus officio, sanctificationem tuae nobis redemptionis dignanter adimple.

[P895am] Cum venerit Paraclitus, quem ego mittam vobis, Spiritum veritatis qui a Patre procedit, ille testimonium perhibebit de me, et vos testimonium perhibebitis, dicit Dominus, alleluia.

[P896pc] Gratiam tuam nobis, Domine, semper accumulet divini participatio sacramenti, et, sua nos virtute mundando, tanti muneris capaces indesinenter efficiat.

[P897ai] Adeamus cum fiducia ad thronum gratiae, ut misericordiam consequamur, et gratiam inveniamus in auxilio opportuno, alleluia.

[P898co] Spiritus tuus, quaesumus, Domine, spiritalia nobis dona potenter infundat, ut det nobis mentem, quae tibi sit placita, et aptet nos tuae propitius voluntati.

[P899so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[P900am] Ego veritatem dico vobis, expedit vobis ut ego vadam; si enim non abiero, Paraclitus non veniet ad vos, dicit Dominus, alleluia.

[P901pc] Percepta mysteria, quaesumus, Domine, et eruditione nos instruant et participatione restaurent, ut ad spiritalia mereamur munera pervenire.

[P902ai] Dilexit nos Christus, et lavit nos a peccatis nostris in sanguine suo, et fecit nos regnum et sacerdotes Deo et Patri suo, alleluia.

[P903co] Deus, qui nobis aeternitatis aditum glorificatione Christi tui et Sancti Spiritus illuminatione reserasti, concede, quaesumus, ut, tanti doni particeps, devotio nostra proficiat, et ad fidei transferamur augmentum.

[P904so] Hostias populi tui, quaesumus, Domine, miseratus intende, et, ut tibi reddantur acceptae, conscientias nostras Sancti Spiritus emundet adventus.

[P905am] Cum venerit Spiritus veritatis, docebit vos omnem veritatem, dicit Dominus, alleluia.

[P906pc] Deus, cuius mysteriis mundamur et pascimur, tribue, quaesumus, ut eorum nobis indulta refectio vitam conferat sempiternam.

[P907ai] Erant discipuli perseverantes unanimiter in oratione, cum mulieribus et Maria Matre Iesu, et fratribus eius, alleluia.

[P908co] Praesta, quaesumus, omnipotens Deus, ut, qui paschalia festa peregimus, haec, te largiente, moribus et vita teneamus.

[P909so] Mentes nostras, quaesumus, Domine, Spiritus Sanctus adveniens divinis praeparet sacramentis, quia ipse est remissio omnium peccatorum.

[P910am] Spiritus Sanctus, ille me clarificabit, quia de meo accipiet, et annuntiabit vobis, dicit Dominus, alleluia.

[P911pc] Annue, Domine, nostris precibus miseratus, ut, sicut de praeteritis ad nova sumus sacramenta translati, ita, vetustate deposita, sanctificatis mentibus innovemur.

[P912ai] Caritas Dei diffusa est in cordibus nostris per inhabitantem Spiritum eius in nobis, alleluia.

[P913co] Omnipotens sempiterne Deus, qui paschale sacramentum quinquaginta dierum voluisti mysterio contineri, praesta, ut, gentium facta dispersione, divisiones linguarum ad unam confessionem tui nominis caelesti munere congregentur.

[P914co] Praesta, quaesumus, omnipotens Deus, ut claritatis tuae super nos splendor effulgeat, et lux tuae lucis corda eorum, qui per tuam gratiam sunt renati, Sancti Spiritus illustratione confirmet.

[P915so] Praesentia munera, quaesumus, Domine, Spiritus tui benedictione perfunde, ut per ipsa Ecclesiae tuae ea dilectio tribuatur, per quam salutaris mysterii toto mundo veritas enitescat.

[P916am] Ultimo festivitatis die, stabat Iesus et clamabat dicens: Si quis sitit, veniat ad me et bibat, alleluia.

[P917pc] Haec nobis, Domine, munera sumpta proficiant, ut illo iugiter Spiritu ferveamus, quem Apostolis tuis ineffabiliter infudisti.

[P918ai] Spiritus Domini replevit orbem terrarum, et hoc quod continet omnia scientiam habet vocis, alleluia.

[P919ai] Caritas Dei diffusa est in cordibus nostris per inhabitantem Spiritum eius in nobis, alleluia.

[P920co] Deus, qui sacramento festivitatis hodiernae universam Ecclesiam tuam in omni gente et natione sanctificas, in totam mundi latitudinem Spiritus Sancti dona defunde, et, quod inter ipsa evangelicae praedicationis exordia operata est divina dignatio, nunc quoque per credentium corda perfunde.

[P921so] Praesta, quaesumus, Domine, ut, secundum promissionem Filii tui, Spiritus Sanctus huius nobis sacrificii copiosius revelet arcanum, et omnem propitius reseret veritatem.

[P922vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus. Tu enim, sacramentum paschale consummans, quibus, per Unigeniti tui consortium, filios adoptionis esse tribuisti, hodie Spiritum Sanctum es largitus; qui, principio nascentis Ecclesiae, et cunctis gentibus scientiam indidit deitatis, et linguarum diversitatem in unius fidei confessione sociavit. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[P923am] Repleti sunt omnes Spiritu Sancto, loquentes magnalia Dei, alleluia.

[P924pc] Deus, qui Ecclesiae tuae caelestia dona largiris, custodi gratiam quam dedisti, ut Spiritus Sancti vigeat semper munus infusum, et ad aeternae redemptionis augmentum spiritalis esca proficiat.

[P925fr] Ite, missa est, alleluia, alleluia. Deo gratias, alleluia, alleluia.

[O926ai] In excelso throno vidi sedere virum, quem adorat multitudo Angelorum, psallentes in unum: Ecce cuius imperii nomen est in aeternum.

[O927co] Vota, quaesumus, Domine, supplicantis populi caelesti pietate prosequere, ut et quae agenda sunt videant, et ad implenda quae viderint convalescant.

[O928so] Grata tibi sit, quaesumus, Domine, tuae plebis oblatio, per quam et sanctificationem referat, et quae pie precatur obtineat.

[O929am] Domine, apud te est fons vitae, et in lumine tuo videbimus lumen.

[O930am] Ego veni, ut vitam habeant, et abundantius habeant, dicit Dominus.

[O931pc] Supplices te rogamus, omnipotens Deus, ut, quos tuis reficis sacramentis, tibi etiam placitis moribus dignanter deservire concedas.

[O932ai] Omnis terra adoret te, Deus, et psallat tibi; psalmum dicat nomini tuo, Altissime.

[O933co] Omnipotens sempiterne Deus, qui caelestia simul et terrena moderaris, supplicationes populi tui clementer exaudi, et pacem tuam nostris concede temporibus.

[O934so] Concede nobis, quaesumus, Domine, haec digne frequentare mysteria, quia, quoties huius hostiae commemoratio celebratur, opus nostrae redemptionis exercetur.

[O935am] Parasti in conspectu meo mensam, et calix meus inebrians quam praeclarus est!

[O936am] Nos cognovimus et credidimus caritati, quam Deus habet in nobis.

[O937pc] Spiritum nobis, Domine, tuae caritatis infunde, ut, quos uno caelesti pane satiasti, una facias pietate concordes.

[O938ai] Cantate Domino canticum novum, cantate Domino, omnis terra. Confessio et pulchritudo in conspectu eius, sanctitas et magnificentia in sanctificatione eius.

[O939co] Omnipotens sempiterne Deus, dirige actus nostros in beneplacito tuo, ut in nomine dilecti Filii tui mereamur bonis operibus abundare.

[O940so] Munera nostra, Domine, suscipe placatus, quae sanctificando nobis, quaesumus, salutaria fore concede.

[O941am] Accedite ad Dominum et illuminamini, et facies vestrae non confundentur.

[O942am] Ego sum lux mundi, dicit Dominus; qui sequitur me, non ambulat in tenebris, sed habebit lumen vitae.

[O943pc] Praesta nobis, quaesumus, omnipotens Deus, ut, vivificationis tuae gratiam consequentes, in tuo semper munere gloriemur.

[O944ai] Salvos nos fac, Domine Deus noster, et congrega nos de nationibus, ut confiteamur nomini sancto tuo, et gloriemur in laude tua.

[O945co] Concede nobis, Domine Deus noster, ut te tota mente veneremur, et omnes homines rationabili diligamus affectu.

[O946so] Altaribus tuis, Domine, munera nostrae servitutis inferimus, quae, placatus assumens, sacramentum nostrae redemptionis efficias.

[O947am] Illumina faciem tuam super servum tuum, et salvum me fac in tua misericordia. Domine, non confundar, quoniam invocavi te.

[O948am] Beati pauperes spiritu, quoniam ipsorum est regnum caelorum. Beati mites, quoniam ipsi possidebunt terram.

[O949pc] Redemptionis nostrae munere vegetati, quaesumus, Domine, ut hoc perpetuae salutis auxilio fides semper vera proficiat.

[O950ai] Venite, adoremus Deum, et procidamus ante Dominum, qui fecit nos; quia ipse est Dominus Deus noster.

[O951co] Familiam tuam, quaesumus, Domine, continua pietate custodi, ut, quae in sola spe gratiae caelestis innititur, tua semper protectione muniatur.

[O952so] Domine Deus noster, qui has potius creaturas ad fragilitatis nostrae subsidium condidisti, tribue, quaesumus, ut etiam aeternitatis nobis fiant sacramentum.

[O953am] Confiteantur Domino misericordiae eius, et mirabilia eius filiis hominum, quia satiavit animam inanem, et animam esurientem satiavit bonis.

[O954am] Beati qui lugent, quoniam ipsi consolabuntur. Beati qui esuriunt et sitiunt iustitiam, quoniam ipsi saturabuntur.

[O955pc] Deus, qui nos de uno pane et de uno calice participes esse voluisti, da nobis, quaesumus, ita vivere, ut, unum in Christo effecti, fructum afferamus pro mundi salute gaudentes.

[O956ai] Esto mihi in Deum protectorem, et in locum refugii, ut salvum me facias. Quoniam firmamentum meum et refugium meum es tu, et propter nomen tuum dux mihi eris, et enutries me.

[O957co] Deus, qui te in rectis et sinceris manere pectoribus asseris, da nobis tua gratia tales exsistere, in quibus habitare digneris.

[O958so] Haec nos oblatio, quaesumus, Domine, mundet et renovet, atque tuam exsequentibus voluntatem fiat causa remunerationis aeternae.

[O959am] Manducaverunt, et saturati sunt nimis, et desiderium eorum attulit eis Dominus; non sunt fraudati a desiderio suo.

[O960am] Sic Deus dilexit mundum, ut Filium suum Unigenitum daret, ut omnis qui credit in eum non pereat, sed habeat vitam aeternam.

[O961pc] Caelestibus, Domine, pasti deliciis, quaesumus, ut semper eadem, per quae veraciter vivimus, appetamus.

[O962ai] Domine, in tua misericordia speravi. Exsultavit cor meum in salutari tuo, cantabo Domino, qui bona tribuit mihi.

[O963co] Praesta, quaesumus, omnipotens Deus, ut, semper rationabilia meditantes, quae tibi sunt placita, et dictis exsequamur et factis.

[O964so] Mysteria tua, Domine, debitis servitiis exsequentes, supplices te rogamus, ut, quod ad honorem tuae maiestatis offerimus, nobis proficiat ad salutem.

[O965am] Narrabo omnia mirabilia tua. Laetabor et exsultabo in te, psallam nomini tuo, Altissime.

[O966am] Domine, ego credidi quia tu es Christus Filius Dei vivi, qui in hunc mundum venisti.

[O967pc] Praesta, quaesumus, omnipotens Deus, ut illius capiamus effectum, cuius per haec mysteria pignus accepimus.

[O968ai] Factus est Dominus protector meus, et eduxit me in latitudinem, salvum me fecit, quoniam voluit me.

[O969co] Da nobis, quaesumus, Domine, ut et mundi cursus pacifico nobis tuo ordine dirigatur, et Ecclesia tua tranquilla devotione laetetur.

[O970so] Deus, qui offerenda tuo nomini tribuis, et oblata devotioni nostrae servitutis ascribis, quaesumus clementiam tuam, ut, quod praestas unde sit meritum, proficere nobis largiaris ad praemium.

[O971am] Cantabo Domino, qui bona tribuit mihi, et psallam nomini Domini Altissimi.

[O972am] Ecce ego vobiscum sum omnibus diebus, usque ad consummationem saeculi, dicit Dominus.

[O973pc] Satiati munere salutari, tuam, Domine, misericordiam deprecamur, ut, hoc eodem quo nos temporaliter vegetas sacramento, perpetuae vitae participes benignus efficias.

[O974ai] Respice in me, et miserere mei, Domine, quoniam unicus et pauper sum ego. Vide humilitatem meam et laborem meum, et dimitte omnia peccata mea, Deus meus.

[O975co] Deus, cuius providentia in sui dispositione non fallitur, te supplices exoramus, ut noxia cuncta submoveas, et omnia nobis profutura concedas.

[O976so] In tua pietate confidentes, Domine, cum muneribus ad altaria veneranda concurrimus, ut, tua purificante nos gratia, iisdem quibus famulamur mysteriis emundemur.

[O977am] Ego clamavi, quoniam exaudisti me, Deus: inclina aurem tuam, et exaudi verba mea.

[O978am] Amen dico vobis, quidquid orantes petitis, credite quia accipietis, et fiet vobis, dicit Dominus.

[O979pc] Rege nos Spiritu tuo, quaesumus, Domine, quos pascis Filii tui Corpore et Sanguine, ut te, non solum verbo neque lingua, sed opere et veritate confitentes, intrare mereamur in regnum caelorum.

[O980ai] Dominus illuminatio mea, et salus mea, quem timebo? Dominus defensor vitae meae, a quo trepidabo? Qui tribulant me inimici mei, ipsi infirmati sunt.

[O981co] Deus, a quo bona cuncta procedunt, tuis largire supplicibus, ut cogitemus, te inspirante, quae recta sunt, et, te gubernante, eadem faciamus.

[O982so] Respice, Domine, quaesumus, nostram propitius servitutem, ut quod offerimus sit tibi munus acceptum, et nostrae caritatis augmentum.

[O983am] Dominus firmamentum meum, et refugium meum, et liberator meus. Deus meus adiutor meus.

[O984am] Deus caritas est, et qui manet in caritate in Deo manet et Deus in eo.

[O985pc] Tua nos, Domine, medicinalis operatio, et a nostris perversitatibus clementer expediat, et ad ea quae sunt recta perducat.

[O986ai] Exaudi, Domine, vocem meam, qua clamavi ad te. Adiutor meus esto, ne derelinquas me, neque despicias me, Deus salutaris meus.

[O987co] Deus, in te sperantium fortitudo, invocationibus nostris adesto propitius, et, quia sine te nihil potest mortalis infirmitas, gratiae tuae praesta semper auxilium, ut, in exsequendis mandatis tuis, et voluntate tibi et actione placeamus.

[O988so] Deus, qui humani generis utramque substantiam praesentium munerum et alimento vegetas et renovas sacramento, tribue, quaesumus, ut eorum et corporibus nostris subsidium non desit et mentibus.

[O989am] Unum petii a Domino, hoc requiram, ut inhabitem in domo Domini omnibus diebus vitae meae.

[O990am] Pater sancte, serva eos in nomine tuo, quos dedisti mihi, ut sint unum sicut et nos, dicit Dominus.

[O991pc] Haec tua, Domine, sumpta sacra communio, sicut fidelium in te unionem praesignat, sic in Ecclesia tua unitatis operetur effectum.

[O992ai] Dominus fortitudo plebis suae, et protector salutarium Christi sui est. Salvum fac populum tuum, Domine, et benedic hereditati tuae, et rege eos usque in saeculum.

[O993co] Sancti nominis tui, Domine, timorem pariter et amorem fac nos habere perpetuum, quia numquam tua gubernatione destituis, quos in soliditate tuae dilectionis instituis.

[O994so] Suscipe, Domine, sacrificium placationis et laudis, et praesta, ut, huius operatione mundati, beneplacitum tibi nostrae mentis offeramus affectum.

[O995am] Oculi omnium in te sperant, Domine, et tu das illis escam in tempore opportuno.

[O996am] Ego sum pastor bonus, et animam meam pono pro ovibus meis, dicit Dominus.

[O997pc] Sacri Corporis et Sanguinis pretiosi alimonia renovati, quaesumus, Domine, clementiam tuam, ut, quod gerimus devotione frequenti, certa redemptione capiamus.

[O998ai] Omnes gentes, plaudite manibus, iubilate Deo in voce exsultationis.

[O999co] Deus, qui, per adoptionem gratiae, lucis nos esse filios voluisti, praesta, quaesumus, ut errorum non involvamur tenebris, sed in splendore veritatis semper maneamus conspicui.

[O1000so] Deus, qui mysteriorum tuorum dignanter operaris effectus, praesta, quaesumus, ut sacris apta muneribus fiant nostra servitia.

[O1001am] Benedic, anima mea, Domino, et ea quae intra me sunt nomini sancto eius.

[O1002am] Pater, pro eis rogo, ut ipsi in nobis unum sint, ut credat mundus quia tu me misisti, dicit Dominus.

[O1003pc] Vivificet nos, quaesumus, Domine, divina quam obtulimus et sumpsimus hostia, ut, perpetua tibi caritate coniuncti, fructum qui semper maneat afferamus.

[O1004ai] Suscepimus, Deus, misericordiam tuam in medio templi tui. Secundum nomen tuum, Deus, ita et laus tua in fines terrae; iustitia plena est dextera tua.

[O1005co] Deus, qui in Filii tui humilitate iacentem mundum erexisti, fidelibus tuis sanctam concede laetitiam, ut, quos eripuisti a servitute peccati, gaudiis facias perfrui sempiternis.

[O1006so] Oblatio nos, Domine, tuo nomini dicata purificet, et de die in diem ad caelestis vitae transferat actionem.

[O1007am] Gustate et videte, quoniam suavis est Dominus; beatus vir, qui sperat in eo.

[O1008am] Venite ad me, omnes qui laboratis et onerati estis, et ego reficiam vos, dicit Dominus.

[O1009pc] Tantis, Domine, repleti muneribus, praesta, quaesumus, ut et salutaria dona capiamus, et a tua numquam laude cessemus.

[O1010ai] Ego autem cum iustitia apparebo in conspectu tuo; satiabor dum manifestabitur gloria tua.

[O1011co] Deus, qui errantibus, ut in viam possint redire, veritatis tuae lumen ostendis, da cunctis qui christiana professione censentur, et illa respuere, quae huic inimica sunt nomini, et ea quae sunt apta sectari.

[O1012so] Respice, Domine, munera supplicantis Ecclesiae, et pro credentium sanctificationis incremento sumenda concede.

[O1013am] Passer invenit sibi domum et turtur nidum, ubi reponat pullos suos. Altaria tua, Domine virtutum, Rex meus, et Deus meus! Beati qui habitant in domo tua, in saeculum saeculi laudabunt te.

[O1014am] Qui manducat meam carnem et bibit meum sanguinem, in me manet et ego in eo, dicit Dominus.

[O1015pc] Sumptis muneribus, quaesumus, Domine, ut, cum frequentatione mysterii, crescat nostrae salutis effectus.

[O1016ai] Ecce Deus adiuvat me, et Dominus susceptor est animae meae. Voluntarie sacrificabo tibi, et confitebor nomini tuo, Domine, quoniam bonum est.

[O1017co] Propitiare, Domine, famulis tuis, et clementer gratiae tuae super eos dona multiplica, ut, spe, fide et caritate ferventes, semper in mandatis tuis vigili custodia perseverent.

[O1018so] Deus, qui legalium differentiam hostiarum unius sacrificii perfectione sanxisti, accipe sacrificium a devotis tibi famulis, et pari benedictione, sicut munera Abel, sanctifica, ut, quod singuli obtulerunt ad maiestatis tuae honorem, cunctis proficiat ad salutem.

[O1019am] Memoriam fecit mirabilium suorum misericors et miserator Dominus; escam dedit timentibus se.

[O1020am] Ecce sto ad ostium et pulso, dicit Dominus: si quis audierit vocem meam, et aperuerit mihi ianuam, intrabo ad illum, et cenabo cum illo, et ipse mecum.

[O1021pc] Populo tuo, quaesumus, Domine, adesto propitius, et, quem mysteriis caelestibus imbuisti, fac ad novitatem vitae de vetustate transire.

[O1022ai] Deus in loco sancto suo; Deus qui inhabitare facit unanimes in domo, ipse dabit virtutem et fortitudinem plebi suae.

[O1023co] Protector in te sperantium, Deus, sine quo nihil est validum, nihil sanctum, multiplica super nos misericordiam tuam, ut, te rectore, te duce, sic bonis transeuntibus nunc utamur, ut iam possimus inhaerere mansuris.

[O1024so] Suscipe, quaesumus, Domine, munera, quae tibi de tua largitate deferimus, ut haec sacrosancta mysteria, gratiae tuae operante virtute, et praesentis vitae nos conversatione sanctificent, et ad gaudia sempiterna perducant.

[O1025am] Benedic, anima mea, Domino, et noli oblivisci omnes retributiones eius.

[O1026am] Beati misericordes, quoniam ipsi misericordiam consequentur. Beati mundo corde, quoniam ipsi Deum videbunt.

[O1027pc] Sumpsimus, Domine, divinum sacramentum, passionis Filii tui memoriale perpetuum; tribue, quaesumus, ut ad nostram salutem hoc munus proficiat, quod ineffabili nobis caritate ipse donavit.

[O1028ai] Deus, in adiutorium meum intende; Domine, ad adiuvandum me festina. Adiutor meus et liberator meus es tu; Domine, ne moreris.

[O1029co] Adesto, Domine, famulis tuis, et perpetuam benignitatem largire poscentibus, ut his, qui te auctorem et gubernatorem gloriantur habere, et creata restaures, et restaurata conserves.

[O1030so] Propitius, Domine, quaesumus, haec dona sanctifica, et, hostiae spiritalis oblatione suscepta, nosmetipsos tibi perfice munus aeternum.

[O1031am] Panem de caelo dedisti nobis, Domine, habentem omne delectamentum, et omnem saporem suavitatis.

[O1032am] Ego sum panis vitae, dicit Dominus. Qui venit ad me non esuriet, et qui credit in me non sitiet.

[O1033pc] Quos caelesti recreas munere, perpetuo, Domine, comitare praesidio, et, quos fovere non desinis, dignos fieri sempiterna redemptione concede.

[O1034ai] Respice, Domine, in testamentum tuum, et animas pauperum tuorum ne derelinquas in finem. Exsurge, Domine, et iudica causam tuam, et ne obliviscaris voces quaerentium te.

[O1035co] Omnipotens sempiterne Deus, quem, docente Spiritu Sancto, paterno nomine invocare praesumimus, perfice in cordibus nostris spiritum adoptionis filiorum, ut promissam hereditatem ingredi mereamur.

[O1036so] Ecclesiae tuae, Domine, munera placatus assume, quae et misericors offerenda tribuisti, et in nostrae salutis potenter efficis transire mysterium.

[O1037am] Lauda, Ierusalem, Dominum, qui adipe frumenti satiat te.

[O1038am] Panis, quem ego dedero, caro mea est pro saeculi vita, dicit Dominus.

[O1039pc] Sacramentorum tuorum, Domine, communio sumpta nos salvet, et in tuae veritatis luce confirmet.

[O1040ai] Protector noster, aspice, Deus, et respice in faciem Christi tui, quia melior est dies una in atriis tuis super millia.

[O1041co] Deus, qui diligentibus te bona invisibilia praeparasti, infunde cordibus nostris tui amoris affectum, ut, te in omnibus et super omnia diligentes, promissiones tuas, quae omne desiderium superant, consequamur.

[O1042so] Suscipe, Domine, munera nostra, quibus exercentur commercia gloriosa, ut, offerentes quae dedisti, teipsum mereamur accipere.

[O1043am] Apud Dominum misericordia, et copiosa apud eum redemptio.

[O1044am] Ego sum panis vivus, qui de caelo descendi, dicit Dominus: si quis manducaverit ex hoc pane, vivet in aeternum.

[O1045pc] Per haec sacramenta, Domine, Christi participes effecti, clementiam tuam humiliter imploramus, ut, eius imaginis conformes in terris, et eius consortes in caelis fieri mereamur.

[O1046ai] Inclina, Domine, aurem tuam ad me, et exaudi me. Salvum fac servum tuum, Deus meus, sperantem in te. Miserere mihi, Domine, quoniam ad te clamavi tota die.

[O1047co] Deus, qui fidelium mentes unius efficis voluntatis, da populis tuis id amare quod praecipis, id desiderare quod promittis, ut, inter mundanas varietates, ibi nostra fixa sint corda, ubi vera sunt gaudia.

[O1048so] Qui una semel hostia, Domine, adoptionis tibi populum acquisisti, unitatis et pacis in Ecclesia tua propitius nobis dona concedas.

[O1049am] De fructu operum tuorum, Domine, satiabitur terra, ut educas panem de terra, et vinum laetificet cor hominis.

[O1050am] Qui manducat meam carnem et bibit meum sanguinem, habet vitam aeternam, dicit Dominus; et ego resuscitabo eum in novissimo die.

[O1051pc] Plenum, quaesumus, Domine, in nobis remedium tuae miserationis operare, ac tales nos esse perfice propitius et sic foveri, ut tibi in omnibus placere valeamus.

[O1052ai] Miserere mihi, Domine, quoniam ad te clamavi tota die: quia tu, Domine, suavis ac mitis es, et copiosus in misericordia omnibus invocantibus te.

[O1053co] Deus virtutum, cuius est totum quod est optimum, insere pectoribus nostris tui nominis amorem, et praesta, ut in nobis, religionis augmento, quae sunt bona nutrias, ac, vigilanti studio, quae sunt nutrita custodias.

[O1054so]
Benedictionem nobis, Domine, conferat salutarem sacra semper oblatio, ut, quod agit mysterio, virtute perficiat.

[O1055am] Quam magna multitudo dulcedinis tuae, Domine, quam abscondisti timentibus te.

[O1056am] Beati pacifici, quoniam filii Dei vocabuntur. Beati qui persecutionem patiuntur propter iustitiam, quoniam ipsorum est regnum caelorum.

[O1057pc] Pane mensae caelestis refecti, te, Domine, deprecamur, ut hoc nutrimentum caritatis corda nostra confirmet, quatenus ad tibi ministrandum in fratribus excitemur.

[O1058ai] Iustus es, Domine, et rectum iudicium tuum; fac cum servo tuo secundum misericordiam tuam.

[O1059co] Deus, per quem nobis et redemptio venit et praestatur adoptio, filios dilectionis tuae benignus intende, ut in Christo credentibus et vera tribuatur libertas, et hereditas aeterna.

[O1060so] Deus, auctor sincerae devotionis et pacis, da, quaesumus, ut et maiestatem tuam convenienter hoc munere veneremur, et sacri participatione mysterii fideliter sensibus uniamur.

[O1061am] Quemadmodum desiderat cervus ad fontes aquarum, ita desiderat anima mea ad te, Deus: sitivit anima mea ad Deum fortem vivum.

[O1062am] Ego sum lux mundi, dicit Dominus; qui sequitur me, non ambulat in tenebris, sed habebit lumen vitae.

[O1063pc] Da fidelibus tuis, Domine, quos et verbi tui et caelestis sacramenti pabulo nutris et vivificas, ita dilecti Filii tui tantis muneribus proficere, ut eius vitae semper consortes effici mereamur.

[O1064ai] Da pacem, Domine, sustinentibus te, ut prophetae tui fideles inveniantur; exaudi preces servi tui, et plebis tuae Israel.

[O1065co] Respice nos, rerum omnium Deus creator et rector, et, ut tuae propitiationis sentiamus effectum, toto nos tribue tibi corde servire.

[O1066so] Propitiare, Domine, supplicationibus nostris, et has oblationes famulorum tuorum benignus assume, ut, quod singuli ad honorem tui nominis obtulerunt, cunctis proficiat ad salutem.

[O1067am] Quam pretiosa est misericordia tua, Deus! Filii hominum sub umbra alarum tuarum confugient.

[O1068am] Calix benedictionis, cui benedicimus, communicatio Sanguinis Christi est; et panis, quem frangimus, participatio Corporis Domini est.

[O1069pc] Mentes nostras et corpora possideat, quaesumus, Domine, doni caelestis operatio, ut non noster sensus in nobis, sed eius praeveniat semper effectus.

[O1070ai] Salus populi ego sum, dicit Dominus. De quacumque tribulatione clamaverint ad me, exaudiam eos, et ero illorum Dominus in perpetuum.

[O1071co] Deus, qui sacrae legis omnia constituta in tua et proximi dilectione posuisti, da nobis, ut, tua praecepta servantes, ad vitam mereamur pervenire perpetuam.

[O1072so] Munera, quaesumus, Domine, tuae plebis propitiatus assume, ut, quae fidei pietate profitentur, sacramentis caelestibus apprehendant.

[O1073am] Tu mandasti mandata tua custodiri nimis; utinam dirigantur viae meae ad custodiendas iustificationes tuas.

[O1074am] Ego sum pastor bonus, dicit Dominus; et cognosco oves meas, et cognoscunt me meae.

[O1075pc] Quos tuis, Domine, reficis sacramentis, continuis attolle benignus auxiliis, ut redemptionis effectum et mysteriis capiamus et moribus.

[O1076ai] Omnia, quae fecisti nobis, Domine, in vero iudicio fecisti, quia peccavimus tibi, et mandatis tuis non oboedivimus; sed da gloriam nomini tuo, et fac nobiscum secundum multitudinem misericordiae tuae.

[O1077co] Deus, qui omnipotentiam tuam parcendo maxime et miserando manifestas, multiplica super nos gratiam tuam, ut, ad tua promissa currentes, caelestium bonorum facias esse consortes.

[O1078so] Concede nobis, misericors Deus, ut haec nostra oblatio tibi sit accepta, et per eam nobis fons omnis benedictionis aperiatur.

[O1079am] Memento verbi tui servo tuo, Domine, in quo mihi spem dedisti; haec me consolata est in humilitate mea.

[O1080am] In hoc cognovimus caritatem Dei: quoniam ille animam suam pro nobis posuit; et nos debemus pro fratribus animas ponere.

[O1081pc] Sit nobis, Domine, reparatio mentis et corporis caeleste mysterium, ut simus eius in gloria coheredes, cui, mortem ipsius annuntiando, compatimur.

[O1082ai] In voluntate tua, Domine, universa sunt posita, et non est qui possit resistere voluntati tuae. Tu enim fecisti omnia, caelum et terram, et universa quae caeli ambitu continentur; Dominus universorum tu es.

[O1083co] Omnipotens sempiterne Deus, qui abundantia pietatis tuae et merita supplicum excedis et vota, effunde super nos misericordiam tuam, ut dimittas quae conscientia metuit, et adicias quod oratio non praesumit.

[O1084so] Suscipe, quaesumus, Domine, sacrificia tuis instituta praeceptis, et sacris mysteriis, quae debitae servitutis celebramus officio, sanctificationem tuae nobis redemptionis dignanter adimple.

[O1085am] Bonus est Dominus sperantibus in eum, animae quaerenti illum.

[O1086am] Unus panis et unum corpus multi sumus, omnes qui de uno pane et de uno calice participamus.

[O1087pc] Concede nobis, omnipotens Deus, ut de perceptis sacramentis inebriemur atque pascamur, quatenus in id quod sumimus transeamus.

[O1088ai] Si iniquitates observaveris, Domine, Domine, quis sustinebit? Quia apud te propitiatio est, Deus Israel.

[O1089co] Tua nos, quaesumus, Domine, gratia semper et praeveniat et sequatur, ac bonis operibus iugiter praestet esse intentos.

[O1090so] Suscipe, Domine, fidelium preces cum oblationibus hostiarum, ut, per haec piae devotionis officia, ad caelestem gloriam transeamus.

[O1091am] Divites eguerunt et esurierunt; quaerentes autem Dominum non minuentur omni bono.

[O1092am] Cum apparuerit Dominus, similes ei erimus, quoniam videbimus eum sicuti est.

[O1093pc] Maiestatem tuam, Domine, suppliciter deprecamur, ut, sicut nos Corporis et Sanguinis sacrosancti pascis alimento, ita divinae naturae facias esse consortes.

[O1094ai] Ego clamavi, quoniam exaudisti me, Deus; inclina aurem tuam, et exaudi verba mea. Custodi me, Domine, ut pupillam oculi; sub umbra alarum tuarum protege me.

[O1095co] Omnipotens sempiterne Deus, fac nos tibi semper et devotam gerere voluntatem, et maiestati tuae sincero corde servire.

[O1096so] Tribue nos, Domine, quaesumus, donis tuis libera mente servire, ut, tua purificante nos gratia, iisdem quibus famulamur mysteriis emundemur.

[O1097am] Ecce oculi Domini super timentes eum, et in eis qui sperant super misericordia eius; ut eruat a morte animas eorum, et alat eos in fame.

[O1098am] Filius hominis venit, ut daret animam suam redemptionem pro multis.

[O1099pc] Fac nos, quaesumus, Domine, caelestium rerum frequentatione proficere, ut et temporalibus beneficiis adiuvemur, et erudiamur aeternis.

[O1100ai] Laetetur cor quaerentium Dominum. Quaerite Dominum, et confirmamini, quaerite faciem eius semper.

[O1101co] Omnipotens sempiterne Deus, da nobis fidei, spei et caritatis augmentum, et, ut mereamur assequi quod promittis, fac nos amare quod praecipis.

[O1102so] Respice, quaesumus, Domine, munera quae tuae offerimus maiestati, ut, quod nostro servitio geritur, ad tuam gloriam potius dirigatur.

[O1103am] Laetabimur in salutari tuo, et in nomine Dei nostri magnificabimur.

[O1104am] Christus dilexit nos, et tradidit semetipsum pro nobis, oblationem Deo in odorem suavitatis.

[O1105pc] Perficiant in nobis, Domine, quaesumus, tua sacramenta quod continent, ut, quae nunc specie gerimus, rerum veritate capiamus.

[O1106ai] Ne derelinquas me, Domine Deus meus, ne discedas a me; intende in adiutorium meum, Domine, virtus salutis meae.

[O1107co] Omnipotens et misericors Deus, de cuius munere venit, ut tibi a fidelibus tuis digne et laudabiliter serviatur, tribue, quaesumus, nobis, ut ad promissiones tuas sine offensione curramus.

[O1108so] Fiat hoc sacrificium, Domine, oblatio tibi munda, et nobis misericordiae tuae sancta largitio.

[O1109am] Notas mihi fecisti vias vitae, adimplebis me laetitia cum vultu tuo, Domine.

[O1110am] Sicut misit me vivens Pater, et ego vivo propter Patrem, et qui manducat me, et ipse vivet propter me, dicit Dominus.

[O1111pc] Augeatur in nobis, quaesumus, Domine, tuae virtutis operatio, ut, refecti caelestibus sacramentis, ad eorum promissa capienda tuo munere praeparemur.

[O1112ai] Intret oratio mea in conspectu tuo; inclina aurem tuam ad precem meam, Domine.

[O1113co] Omnipotens et misericors Deus, universa nobis adversantia propitiatus exclude, ut, mente et corpore pariter expediti, quae tua sunt liberis mentibus exsequamur.

[O1114so] Sacrificiis praesentibus, Domine, quaesumus, intende placatus, ut, quod passionis Filii tui mysterio gerimus, pio consequamur affectu.

[O1115am] Dominus regit me, et nihil mihi deerit; in loco pascuae ibi me collocavit, super aquam refectionis educavit me.

[O1116am] Cognoverunt discipuli Dominum Iesum in fractione panis.

[O1117pc] Gratias tibi, Domine, referimus sacro munere vegetati, tuam clementiam implorantes, ut, per infusionem Spiritus tui, in quibus caelestis virtus introivit, sinceritatis gratia perseveret.

[O1118ai] Dicit Dominus: Ego cogito cogitationes pacis et non afflictionis; invocabitis me, et ego exaudiam vos, et reducam captivitatem vestram de cunctis locis.

[O1119co] Da nobis, quaesumus, Domine Deus noster, in tua semper devotione gaudere, quia perpetua est et plena felicitas, si bonorum omnium iugiter serviamus auctori.

[O1120so] Concede, quaesumus, Domine, ut oculis tuae maiestatis munus oblatum et gratiam nobis devotionis obtineat, et effectum beatae perennitatis acquirat.

[O1121am] Mihi autem adhaerere Deo bonum est, ponere in Domino Deo spem meam.

[O1122am] Amen dico vobis, quidquid orantes petitis, credite quia accipietis, et fiet vobis, dicit Dominus.

[O1123pc] Sumpsimus, Domine, sacri dona mysterii, humiliter deprecantes, ut, quae in sui commemorationem nos Filius tuus facere praecepit, in nostrae proficiant caritatis augmentum.

[O1124ai] Loquetur Dominus pacem in plebem suam, et super sanctos suos, et in eos qui convertuntur ad ipsum.

[O1125co] Excita, quaesumus, Domine, tuorum fidelium voluntates, ut, divini operis fructum propensius exsequentes, pietatis tuae remedia maiora percipiant.

[O1126so] Suscipe, Domine, sacra munera, quae tuo nomini iussisti dicanda, et, ut per ea tuae pietati reddamur accepti, fac nos tuis semper oboedire mandatis.

[O1127am] Laudate Dominum, omnes gentes, quoniam confirmata est super nos misericordia eius.

[O1128am] Ecce ego vobiscum sum omnibus diebus, usque ad consummationem saeculi, dicit Dominus.

[O1129pc] Quaesumus, omnipotens Deus, ut, quos divina tribuis participatione gaudere, a te numquam separari permittas.

[O1130ai] Benedictus sit Deus Pater, unigenitusque Dei Filius, Sanctus quoque Spiritus, quia fecit nobiscum misericordiam suam.

[O1131co] Deus Pater, qui, Verbum veritatis et Spiritum sanctificationis mittens in mundum, admirabile mysterium tuum hominibus declarasti, da nobis, in confessione verae fidei, aeternae gloriam Trinitatis agnoscere, et Unitatem adorare in potentia maiestatis.

[O1132so] Sanctifica, quaesumus, Domine Deus noster, per tui nominis invocationem, haec munera nostrae servitutis, et per ea nosmetipsos tibi perfice munus aeternum.

[O1133vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui cum Unigenito Filio tuo et Spiritu Sancto unus es Deus, unus es Dominus: non in unius singularitate personae, sed in unius Trinitate substantiae. Quod enim de tua gloria, revelante te, credimus, hoc de Filio tuo, hoc de Spiritu Sancto, sine discretione sentimus. Ut, in confessione verae sempiternaeque Deitatis, et in personis proprietas, et in essentia unitas, et in maiestate adoretur aequalitas. Quem laudant Angeli atque Archangeli, Cherubim quoque ac Seraphim, qui non cessant clamare cotidie, una voce dicentes: Sanctus.

[O1134am] Quoniam autem estis filii, misit Deus Spiritum Filii sui in corda vestra clamantem: Abba, Pater.

[O1135pc] Proficiat nobis ad salutem corporis et animae, Domine Deus noster, huius sacramenti susceptio, et sempiternae sanctae Trinitatis eiusdemque individuae Unitatis confessio.

[O1136ai] Cibavit eos ex adipe frumenti, et de petra melle saturavit eos.

[O1137co] Deus, qui nobis sub sacramento mirabili passionis tuae memoriam reliquisti, tribue, quaesumus, ita nos Corporis et Sanguinis tui sacra mysteria venerari, ut redemptionis tuae fructum in nobis iugiter sentiamus.

[O1138so] Ecclesiae tuae, quaesumus, Domine, unitatis et pacis propitius dona concede, quae sub oblatis muneribus mystice designantur.

[O1139am] Qui manducat meam carnem et bibit meum sanguinem, in me manet et ego in eo, dicit Dominus.

[O1140pc] Fac nos, quaesumus, Domine, divinitatis tuae sempiterna fruitione repleri, quam pretiosi Corporis et Sanguinis tui temporalis perceptio praefigurat.

[O1141ai] Cogitationes Cordis eius in generatione et generationem, ut eruat a morte animas eorum et alat eos in fame.

[O1142co] Concede, quaesumus, omnipotens Deus, ut qui, dilecti Filii tui Corde gloriantes, eius praecipua in nos beneficia recolimus caritatis, de illo donorum fonte caelesti supereffluentem gratiam mereamur accipere.

[O1143co] Deus, qui nobis in Corde Filii tui, nostris vulnerato peccatis, infinitos dilectionis thesauros misericorditer largiri dignaris, concede, quaesumus, ut, illi devotum pietatis nostrae praestantes obsequium, dignae quoque satisfactionis exhibeamus officium.

[O1144so] Respice, quaesumus, Domine, ad ineffabilem Cordis dilecti Filii tui caritatem, ut quod offerimus sit tibi munus acceptum et nostrorum expiatio delictorum.

[O1145vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, mira caritate, exaltatus in cruce, pro nobis tradidit semetipsum, atque de transfixo latere sanguinem fudit et aquam, ex quo manarent Ecclesiae sacramenta, ut omnes, ad Cor apertum Salvatoris attracti, iugiter haurirent e fontibus salutis in gaudio. Et ideo, cum Sanctis et Angelis universis, te collaudamus, sine fine dicentes: Sanctus.

[O1146am] Dicit Dominus: Si quis sitit, veniat ad me et bibat. Qui credit in me, flumina de ventre eius fluent aquae vivae.

[O1147am] Unus militum lancea latus eius aperuit, et continuo exivit sanguis et aqua.

[O1148pc] Sacramentum caritatis, Domine, sancta nos faciat dilectione fervere, qua, ad Filium tuum semper attracti, ipsum in fratribus agnoscere discamus.

[O1149ai] Dignus est Agnus, qui occisus est, accipere virtutem et divinitatem et sapientiam et fortitudinem et honorem. Ipsi gloria et imperium in saecula saeculorum.

[O1150co] Omnipotens sempiterne Deus, qui in dilecto Filio tuo, universorum Rege, omnia instaurare voluisti, concede propitius, ut tota creatura, a servitute liberata, tuae maiestati deserviat ac te sine fine collaudet.

[O1151so] Hostiam tibi, Domine, humanae reconciliationis offerentes, suppliciter deprecamur, ut ipse Filius tuus cunctis gentibus unitatis et pacis dona concedat.

[O1152vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum Filium tuum, Dominum nostrum Iesum Christum, Sacerdotem aeternum et universorum Regem, oleo exsultationis unxisti: ut, seipsum in ara crucis hostiam immaculatam et pacificam offerens, redemptionis humanae sacramenta perageret: et, suo subiectis imperio omnibus creaturis, aeternum et universale regnum immensae tuae traderet maiestati: regnum veritatis et vitae; regnum sanctitatis et gratiae; regnum iustitiae, amoris et pacis. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[O1153am] Sedebit Dominus Rex in aeternum; Dominus benedicet populo suo in pace.

[O1154pc] Immortalitatis alimoniam consecuti, quaesumus, Domine, ut, qui Christi Regis universorum gloriamur oboedire mandatis, cum ipso in caelesti regno sine fine vivere valeamus.

[M1155fr] In nomine Patris, et Filii, et Spiritus Sancti.

[M1156fr] Gratia Domini nostri Iesu Christi, et caritas Dei, et communicatio Sancti Spiritus sit cum omnibus vobis.

[M1157fr] Gratia vobis et pax a Deo Patre nostro et Domino Iesu Christo.

[M1158fr] Dominus vobiscum.

[M1159fr] Pax vobis.

[M1160mn] Fratres, agnoscamus peccata nostra, ut apti simus ad sacra mysteria celebranda.

[M1161fr] Confiteor Deo omnipotenti et vobis, fratres, quia peccavi nimis cogitatione, verbo, opere et omissione: mea culpa, mea culpa, mea maxima culpa. Ideo precor beatam Mariam semper Virginem, omnes Angelos et Sanctos, et vos, fratres, orare pro me ad Dominum Deum nostrum.

[M1162or] Misereatur nostri omnipotens Deus et, dimissis peccatis nostris, perducat nos ad vitam aeternam.

[M1163fr] Miserere nostri, Domine.

[M1164fr] Quia peccavimus tibi.

[M1165fr] Ostende nobis, Domine, misericordiam tuam.

[M1166fr] Et salutare tuum da nobis.

[M1167fr] Qui missus es sanare contritos corde: Kyrie, eleison. Qui peccatores vocare venisti: Christe, eleison. Qui ad dexteram Patris sedes, ad interpellandum pro nobis:

[M1168hy] Gloria in excelsis Deo et in terra pax hominibus bonae voluntatis. Laudamus te, benedicimus te, adoramus te, glorificamus te, gratias agimus tibi propter magnam gloriam tuam, Domine Deus, Rex caelestis, Deus Pater omnipotens. Domine Fili Unigenite, Iesu Christe, Domine Deus, Agnus Dei, Filius Patris, qui tollis peccata mundi, miserere nobis; qui tollis peccata mundi, suscipe deprecationem nostram. Qui sedes ad dexteram Patris, miserere nobis. Quoniam tu solus Sanctus, tu solus Dominus, tu solus Altissimus, Iesu Christe, cum Sancto Spiritu: in gloria Dei Patris. Amen.

[M1169fr] Verbum Domini. Deo gratias.

[M1170fr] Iube, domne, benedicere.

[M1171bn] Dominus sit in corde tuo et in labiis tuis: ut digne et competenter annunties Evangelium suum: in nomine Patris, et Filii et Spiritus Sancti.

[M1172fr] Munda cor meum ac labia mea, omnipotens Deus, ut sanctum Evangelium tuum digne valeam nuntiare.

[M1173fr] Lectio sancti Evangelii secundum Gloria tibi, Domine.

[M1174fr] Verbum Domini. Laus tibi, Christe.

[M1175fr] Per evangelica dicta deleantur nostra delicta.

[M1176fr] Credo in unum Deum, Patrem omnipotentem, factorem caeli et terrae, visibilium omnium et invisibilium. Et in unum Dominum Iesum Christum, Filium Dei Unigenitum, et ex Patre natum ante omnia saecula. Deum de Deo, lumen de lumine, Deum verum de Deo vero, genitum, non factum, consubstantialem Patri: per quem omnia facta sunt. Qui propter nos homines et propter nostram salutem descendit de caelis. Et incarnatus est de Spiritu Sancto ex Maria Virgine, et homo factus est. Crucifixus etiam pro nobis sub Pontio Pilato; passus et sepultus est, et resurrexit tertia die, secundum Scripturas, et ascendit in caelum, sedet ad dexteram Patris. Et iterum venturus est cum gloria, iudicare vivos et mortuos, cuius regni non erit finis. Et in Spiritum Sanctum, Dominum et vivificantem: qui ex Patre Filioque procedit. Qui cum Patre et Filio simul adoratur et conglorificatur: qui locutus est per prophetas. Et unam, sanctam, catholicam et apostolicam Ecclesiam. Confiteor unum baptisma in remissionem peccatorum. Et exspecto resurrectionem mortuorum, et vitam venturi saeculi. Amen.

[M1177fr] Credo in unum Deum Patrem omnipotentem, Creatorem caeli et terrae, et in Iesum Christum, Filium eius unicum, Dominum nostrum, qui conceptus est de Spiritu Sancto, natus ex Maria Virgine, passus sub Pontio Pilato, crucifixus, mortuus, et sepultus, descendit ad inferos, tertia die resurrexit a mortuis, ascendit ad caelos, sedet ad dexteram Dei Patris omnipotentis, inde venturus est iudicare vivos et mortuos. Credo in Spiritum Sanctum, sanctam Ecclesiam catholicam, sanctorum communionem, remissionem peccatorum, carnis resurrectionem, vitam aeternam. Amen.

[M1178bn] Benedictus es, Domine, Deus universi, quia de tua largitate accepimus panem, quem tibi offerimus, fructum terrae et operis manuum hominum: ex quo nobis fiet panis vitae.

[M1179fr] Benedictus Deus in saecula.

[M1180fr] Per huius aquae et vini mysterium eius efficiamur divinitatis consortes, qui humanitatis nostrae fieri dignatus est particeps.

[M1181bn] Benedictus es, Domine, Deus universi, quia de tua largitate accepimus vinum, quod tibi offerimus, fructum vitis et operis manuum hominum, ex quo nobis fiet potus spiritalis.

[M1182fr] Benedictus Deus in saecula.

[M1183fr] In spiritu humilitatis et in animo contrito suscipiamur a te, Domine; et sic fiat sacrificium nostrum in conspectu tuo hodie, ut placeat tibi, Domine Deus.

[M1184fr] Lava me, Domine, ab iniquitate mea, et a peccato meo munda me.

[M1185mn] Orate, fratres: ut meum ac vestrum sacrificium acceptabile fiat apud Deum Patrem omnipotentem.

[M1186fr] Suscipiat Dominus sacrificium de manibus tuis ad laudem et gloriam nominis sui, ad utilitatem quoque nostram totiusque Ecclesiae suae sanctae.

[M1187vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, primo adventu in humilitate carnis assumptae, dispositionis antiquae munus implevit, nobisque salutis perpetuae tramitem reseravit: ut, cum secundo venerit in suae gloria maiestatis, manifesto demum munere capiamus, quod vigilantes nunc audemus exspectare promissum. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1188vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quem praedixerunt cunctorum praeconia prophetarum, Virgo Mater ineffabili dilectione sustinuit, Ioannes cecinit affuturum et adesse monstravit. Qui suae nativitatis mysterium tribuit nos praevenire gaudentes, ut et in oratione pervigiles et in suis inveniat laudibus exsultantes. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1189vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia per incarnati Verbi mysterium nova mentis nostrae oculis lux tuae claritatis infulsit: ut, dum visibiliter Deum cognoscimus, per hunc in invisibilium amorem rapiamur. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1190vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, in huius venerandi festivitate mysterii, invisibilis in suis, visibilis in nostris apparuit, et ante tempora genitus esse coepit in tempore; ut, in se erigens cuncta deiecta, in integrum restitueret universa, et hominem perditum ad caelestia regna revocaret. Unde et nos, cum omnibus Angelis te laudamus, iucunda celebratione clamantes: Sanctus.

[M1191vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Per quem hodie commercium nostrae reparationis effulsit, quia, dum nostra fragilitas a tuo Verbo suscipitur, humana mortalitas non solum in perpetuum transit honorem, sed nos quoque, mirando consortio, reddit aeternos. Et ideo, choris angelicis sociati, te laudamus in gaudio confitentes: Sanctus.

[M1192vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia ipsum in Christo salutis nostrae mysterium hodie ad lumen gentium revelasti, et, cum in substantia nostrae mortalitatis apparuit, nova nos immortalitatis eius gloria reparasti. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1193vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quia fidelibus tuis dignanter concedis quotannis paschalia sacramenta in gaudio purificatis mentibus exspectare: ut, pietatis officia et opera caritatis propensius exsequentes, frequentatione mysteriorum, quibus renati sunt, ad gratiae filiorum plenitudinem perducantur. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1194vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui filiis tuis ad reparandam mentium puritatem, tempus praecipuum salubriter statuisti, quo, mente ab inordinatis affectibus expedita, sic incumberent transituris ut rebus potius perpetuis inhaererent. Et ideo, cum Sanctis et Angelis universis, te collaudamus, sine fine dicentes: Sanctus.

[M1195vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui nos per abstinentiam tibi gratias referre voluisti, ut ipsa et nos peccatores ab insolentia mitigaret, et, egentium proficiens alimento, imitatores tuae benignitatis efficeret. Et ideo, cum innumeris Angelis, una te magnificamus laudis voce dicentes: Sanctus.

[M1196vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui corporali ieiunio vitia comprimis, mentem elevas, virtutem largiris et praemia: per Christum Dominum nostrum. Per quem maiestatem tuam laudant Angeli, adorant Dominationes, tremunt Potestates. Caeli caelorumque Virtutes, ac beata Seraphim, socia exsultatione concelebrant. Cum quibus et nostras voces ut admitti iubeas, deprecamur, supplici confessione dicentes: Sanctus.

[M1197vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia per Filii tui salutiferam passionem sensum confitendae tuae maiestatis totus mundus accepit, dum ineffabili crucis potentia iudicium mundi et potestas emicat Crucifixi. Unde et nos, Domine, cum Angelis et Sanctis universis, tibi confitemur, in exsultatione dicentes: Sanctus.

[M1198vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Cuius salutiferae passionis et gloriosae resurrectionis dies appropinquare noscuntur, quibus et de antiqui hostis superbia triumphatur, et nostrae redemptionis recolitur sacramentum. Per quem maiestatem tuam adorat exercitus Angelorum, ante conspectum tuum in aeternitate laetantium. Cum quibus et nostras voces ut admitti iubeas, deprecamur, socia exsultatione dicentes: Sanctus.

[M1199vd] Vere dignum et iustum est, aequum et salutare: Te quidem, Domine, omni tempore confiteri, sed in hac potissimum nocte (die)gloriosius praedicare, (sed in hoc potissimum gloriosus praedicare,)cum Pascha nostrum immolatus est Christus. Ipse enim verus est Agnus qui abstulit peccata mundi. Qui mortem nostram moriendo destruxit, et vitam resurgendo reparavit. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1200vd] Vere dignum et iustum est, aequum et salutare: Te quidem, Domine, omni tempore confiteri, sed in hoc potissimum gloriosius praedicare, cum Pascha nostrum immolatus est Christus. Per quem in aeternam vitam filii lucis oriuntur, et regni caelestis atria fidelibus reserantur. Quia mors nostra est eius morte redempta, et in eius resurrectione vita omnium resurrexit. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1201vd] Vere dignum et iustum est, aequum et salutare: Te quidem, Domine, omni tempore confiteri, sed in hoc potissimum gloriosius praedicare, cum Pascha nostrum immolatus est Christus. Qui se pro nobis offerre non desinit, nosque apud te perenni advocatione defendit; qui immolatus iam non moritur, sed semper vivit occisus. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1202vd] Vere dignum et iustum est, aequum et salutare: Te quidem, Domine, omni tempore confiteri, sed in hoc potissimum gloriosius praedicare, cum Pascha nostrum immolatus est Christus. Quia, vetustate destructa, renovantur universa deiecta, et vitae nobis in Christo reparatur integritas. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1203vd] Vere dignum et iustum est, aequum et salutare: Te quidem, Domine, omni tempore confiteri, sed in hoc potissimum gloriosius praedicare, cum Pascha nostrum immolatus est Christus. Qui, oblatione corporis sui, antiqua sacrificia in crucis veritate perfecit, et, seipsum tibi pro nostra salute commendans, idem sacerdos, altare et agnus exhibuit. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1204vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia Dominus Iesus, Rex gloriae, peccati triumphator et mortis, mirantibus Angelis, ascendit (hodie)summa caelorum, Mediator Dei et hominum, Iudex mundi Dominusque virtutum; non ut a nostra humilitate discederet, sed ut illuc confideremus, sua membra, nos subsequi quo ipse, caput nostrum principiumque, praecessit. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1205vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui post resurrectionem suam omnibus discipulis suis manifestus apparuit, et ipsis cernentibus est elevatus in caelum, ut nos divinitatis suae tribueret esse participes. Quapropter, profusis paschalibus gaudiis, totus in orbe terrarum mundus exsultat. Sed et supernae virtutes atque angelicae potestates hymnum gloriae tuae concinunt, sine fine dicentes: Sanctus.

[M1206vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Cuius hoc mirificum fuit opus per paschale mysterium, ut de peccato et mortis iugo ad hanc gloriam vocaremur, qua nunc genus electum, regale sacerdotium, gens sancta et acquisitionis populus diceremur, et tuas annuntiaremus ubique virtutes, qui nos de tenebris ad tuum admirabile lumen vocasti. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1207vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, humanis miseratus erroribus, de Virgine nasci dignatus est. Qui, crucem passus, a perpetua morte nos liberavit et, a mortuis resurgens, vitam nobis donavit aeternam. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1208vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Ad cuius immensam gloriam pertinere cognoscimus ut mortalibus tua deitate succurreres; sed et nobis provideres de ipsa mortalitate nostra remedium, et perditos quosque unde perierant, inde salvares, per Christum Dominum nostrum. Per quem maiestatem tuam adorat exercitus Angelorum, ante conspectum tuum in aeternitate laetantium. Cum quibus et nostras voces ut admitti iubeas, deprecamur, socia exsultatione dicentes: Sanctus.

[M1209vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Ipse enim nascendo vetustatem hominum renovavit, patiendo delevit nostra peccata, aeternae vitae aditum praestitit a mortuis resurgendo, ad te Patrem ascendendo caelestes ianuas reseravit. Et ideo, cum Angelorum atque Sanctorum turba, hymnum laudis tibi canimus, sine fine dicentes: Sanctus.

[M1210vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui omnia mundi elementa fecisti, et vices disposuisti temporum variari; hominem vero formasti ad imaginem tuam, et rerum ei subiecisti universa miracula, ut vicario munere dominaretur omnibus quae creasti, et in operum tuorum magnalibus iugiter te laudaret, per Christum Dominum nostrum. Unde et nos cum omnibus Angelis te laudamus, iucunda celebratione clamantes: Sanctus.

[M1211vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: In quo vivimus, movemur et sumus, atque in hoc corpore constituti non solum pietatis tuae cotidianos experimur effectus, sed aeternitatis etiam pignora iam tenemus. Primitias enim Spiritus habentes, per quem suscitasti Iesum a mortuis, paschale mysterium speramus nobis esse perpetuum. Unde et nos cum omnibus Angelis te laudamus, iucunda celebratione clamantes: Sanctus.

[M1212vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia sic mundum misericorditer dilexisti, ut ipsum nobis mitteres Redemptorem, quem absque peccato in nostra voluisti similitudine conversari, ut amares in nobis quod diligebas in Filio, cuius oboedientia sumus ad tua dona reparati, quae per inoboedientiam amiseramus peccando. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[M1213vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia filios, quos longe peccati crimen abstulerat, per sanguinem Filii tui Spiritusque virtute, in unum ad te denuo congregare voluisti: ut plebs, de unitate Trinitatis adunata, in tuae laudem sapientiae multiformis Christi corpus templumque Spiritus nosceretur Ecclesia. Et ideo, choris angelicis sociati, te laudamus in gaudio confitentes: Sanctus.

[M1214vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, verus aeternusque Sacerdos, formam sacrificii perennis instituens, hostiam tibi se primus obtulit salutarem, et nos, in sui memoriam, praecepit offerre. Cuius carnem pro nobis immolatam dum sumimus, roboramur, et fusum pro nobis sanguinem dum potamus, abluimur. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1215vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui cum Apostolis suis in novissima cena convescens, salutiferam crucis memoriam prosecuturus in saecula, Agnum sine macula se tibi obtulit, perfectae laudis munus acceptum. Quo venerabili mysterio fideles tuos alendo sanctificas, ut humanum genus, quod continet unus orbis, una fides illuminet, caritas una coniungat. Ad mensam igitur accedimus tam mirabilis sacramenti, ut, gratiae tuae suavitate perfusi, ad caelestis formae imaginem transeamus. Propter quod caelestia tibi atque terrestria canticum novum concinunt adorando, et nos cum omni exercitu Angelorum proclamamus, sine fine dicentes: Sanctus.

[M1216vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Et te in ... beatae Mariae semper Virginis collaudare, benedicere et praedicare. Quae et Unigenitum tuum Sancti Spiritus obumbratione concepit, et, virginitatis gloria permanente, lumen aeternum mundo effudit, Iesum Christum Dominum nostrum. Per quem maiestatem tuam laudant Angeli, adorant Dominationes, tremunt Potestates. Caeli caelorumque Virtutes, ac beata Seraphim, socia exsultatione concelebrant. Cum quibus et nostras voces ut admitti iubeas, deprecamur, supplici confessione dicentes: Sanctus.

[M1217vd] Vere dignum et iustum est, aequum et salutare, in omnium Sanctorum provectu te mirabilem confiteri, et potissimum, beatae Virginis Mariae memoriam recolentes, clementiam tuam ipsius grato magnificare praeconio. Vere namque in omnes terrae fines magna fecisti, ac tuam in saecula prorogasti misericordiae largitatem, cum, ancillae tuae humilitatem aspiciens, per eam dedisti humanae salutis auctorem, Filium tuum, Iesum Christum, Dominum nostrum. Per quem maiestatem tuam adorat exercitus Angelorum, ante conspectum tuum in aeternitate laetantium. Cum quibus et nostras voces ut admitti iubeas, deprecamur, socia exsultatione dicentes: Sanctus.

[M1218vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui gregem tuum, Pastor aeterne, non deseris, sed per beatos Apostolos continua protectione custodis, ut iisdem rectoribus gubernetur, quos Filii tui vicarios eidem contulisti praeesse pastores. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1219vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quoniam Ecclesiam tuam in apostolicis tribuisti consistere fundamentis, ut signum sanctitatis tuae in terris maneret ipsa perpetuum, et caelestia praeberet cunctis hominibus documenta. Quapropter nunc et usque in saeculum cum omni militia Angelorum devota tibi mente concinimus, clamantes atque dicentes: Sanctus.

[M1220vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui in Sanctorum concilio celebraris, et eorum coronando merita tua dona coronas. Qui nobis eorum conversatione largiris exemplum, et communione consortium, et intercessione subsidium; ut, tantis testibus confirmati, ad propositum certamen curramus invicti et immarcescibilem cum eis coronam gloriae consequamur, per Christum Dominum nostrum. Et ideo cum Angelis et Archangelis, cumque multiplici congregatione Sanctorum, hymnum laudis tibi canimus, sine fine dicentes: Sanctus.

[M1221vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Tu enim Sanctorum tuorum confessione mirabili Ecclesiam tuam nova semper virtute fecundas, nobisque certissima praebes tuae dilectionis indicia. Sed etiam, ad mysteria salutis implenda, et ipsorum insigni incitamur exemplo et pia intercessione perpetuo commendamur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[M1222vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quoniam beati martyris N. pro confessione nominis tui, ad imitationem Christi, sanguis effusus tua mirabilia manifestat, quibus perficis in fragilitate virtutem, et vires infirmas ad testimonium roboras, per Christum Dominum nostrum. Et ideo, cum caelorum Virtutibus, in terris te iugiter celebramus, maiestati tuae sine fine clamantes: Sanctus.

[M1223vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quoniam tu magnificaris in tuorum laude Sanctorum, et quidquid ad eorum pertinet passionem, tuae sunt opera miranda potentiae: qui huius fidei tribuis clementer ardorem, qui suggeris perseverantiae firmitatem, qui largiris in agone victoriam, per Christum Dominum nostrum. Propter quod caelestia tibi atque terrestria canticum novum concinunt adorando, et nos cum omni exercitu Angelorum proclamamus, sine fine dicentes: Sanctus.

[M1224vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quia sic tribuis Ecclesiam tuam sancti N. festivitate gaudere, ut eam exemplo piae conversationis corrobores, verbo praedicationis erudias, grataque tibi supplicatione tuearis. Et ideo, cum Angelorum atque Sanctorum turba, hymnum laudis tibi canimus, sine fine dicentes: Sanctus.

[M1225vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: In Sanctis enim, qui Christo se dedicaverunt propter regnum caelorum, tuam decet providentiam celebrare mirabilem, qua humanam substantiam et ad primae originis revocas sanctitatem, et perducis ad experienda dona, quae in novo saeculo sunt habenda. Et ideo, cum Sanctis et Angelis universis, te collaudamus, sine fine dicentes: Sanctus.

[M1226vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. In quo omnia instaurare tibi complacuit, et de plenitudine eius nos omnes accipere tribuisti. Cum enim in forma Dei esset, exinanivit semetipsum, ac per sanguinem crucis suae pacificavit universa; unde exaltatus est super omnia et omnibus obtemperantibus sibi factus est causa salutis aeternae. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1227vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui bonitate hominem condidisti, ac iustitia damnatum misericordia redemisti: per Christum Dominum nostrum. Per quem maiestatem tuam laudant Angeli, adorant Dominationes, tremunt Potestates. Caeli caelorumque Virtutes, ac beata Seraphim, socia exsultatione concelebrant. Cum quibus et nostras voces ut admitti iubeas, deprecamur, supplici confessione dicentes: Sanctus.

[M1228vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui per Filium dilectionis tuae, sicut conditor generis es humani, ita benignissimus reformator. Unde merito tibi cunctae serviunt creaturae, te redempti rite collaudant universi, et uno Sancti tui te corde benedicunt. Quapropter et nos cum omnibus te Angelis celebramus, iucunda semper confessione dicentes: Sanctus.

[M1229vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia, cum nostra laude non egeas, tuum tamen est donum quod tibi grates rependamus, nam te non augent nostra praeconia, sed nobis proficiunt ad salutem, per Christum Dominum nostrum. Et ideo, choris angelicis sociati, te laudamus in gaudio confitentes: Sanctus.

[M1230vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Cuius mortem in caritate celebramus, resurrectionem fide vivida confitemur, adventum in gloria spe firmissima praestolamur. Et ideo, cum Sanctis et Angelis universis, te collaudamus, sine fine dicentes: Sanctus.

[M1231vd] Vere dignum et iustum est, aequum et salutare, nos tibi, sancte Pater, semper et ubique gratias agere per Filium dilectionis tuae Iesum Christum, Verbum tuum per quod cuncta fecisti: quem misisti nobis Salvatorem et Redemptorem, incarnatum de Spiritu Sancto et ex Virgine natum. Qui voluntatem tuam adimplens et populum tibi sanctum acquirens extendit manus cum pateretur, ut mortem solveret et resurrectionem manifestaret. Et ideo cum Angelis et omnibus Sanctis gloriam tuam praedicamus, una voce dicentes: Sanctus.

[M1232vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. In quo nobis spes beatae resurrectionis effulsit, ut, quos contristat certa moriendi condicio, eosdem consoletur futurae immortalitatis promissio. Tuis enim fidelibus, Domine, vita mutatur, non tollitur, et, dissoluta terrestris huius incolatus domo, aeterna in caelis habitatio comparatur. Et ideo cum Angelis et Archangelis, cum Thronis et Dominationibus, cumque omni militia caelestis exercitus, hymnum gloriae tuae canimus, sine fine dicentes: Sanctus.

[M1233vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Ipse enim mortem unus accepit, ne omnes nos moreremur; immo unus mori dignatus est, ut omnes tibi perpetuo viveremus. Et ideo, choris angelicis sociati, te laudamus in gaudio confitentes: Sanctus.

[M1234vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum: Qui est salus mundi, vita hominum, resurrectio mortuorum. Per quem maiestatem tuam adorat exercitus Angelorum, ante conspectum tuum in aeternitate laetantium. Cum quibus et nostras voces ut admitti iubeas, deprecamur, socia exsultatione dicentes: Sanctus.

[M1235vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Cuius imperio nascimur, cuius arbitrio regimur, cuius praecepto in terra, de qua sumpti sumus, peccati lege absolvimur. Et, qui per mortem Filii tui redempti sumus, ad ipsius resurrectionis gloriam tuo nutu excitamur. Et ideo, cum Angelorum atque Sanctorum turba, hymnum laudis tibi canimus, sine fine dicentes: Sanctus.

[M1236vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia, etsi nostri est meriti quod perimus, tuae tamen est pietatis et gratiae quod, pro peccato morte consumpti, per Christi victoriam redempti, cum ipso revocamur ad vitam. Et ideo, cum caelorum Virtutibus, in terris te iugiter celebramus, maiestati tuae sine fine clamantes: Sanctus.

[M1237pe] Te igitur, clementissime Pater, per Iesum Christum, Filium tuum, Dominum nostrum, supplices rogamus ac petimus, uti accepta habeas et benedicas haec dona, haec munera, haec sancta sacrificia illibata, in primis, quae tibi offerimus pro Ecclesia tua sancta catholica: quam pacificare, custodire, adunare et regere digneris toto orbe terrarum: una cum famulo tuo Papa nostro N. et Antistite nostro N. et omnibus orthodoxis atque catholicae et apostolicae fidei cultoribus.

[M1238pe] Memento, Domine, famulorum famularumque tuarum N. et N. et omnium circumstantium, quorum tibi fides cognita est et nota devotio, pro quibus tibi offerimus: vel qui tibi offerunt hoc sacrificium laudis, pro se suisque omnibus: pro redemptione animarum suarum, pro spe salutis et incolumitatis suae: tibique reddunt vota sua aeterno Deo, vivo et vero.

[M1239pe] Communicantes, et memoriam venerantes, in primis gloriosae semper Virginis Mariae, Genetricis Dei et Domini nostri Iesu Christi: sed et beati Ioseph, eiusdem Virginis Sponsi, et beatorum Apostolorum ac Martyrum tuorum, Petri et Pauli, Andreae, (Iacobi, Ioannis, Thomae, Iacobi, Philippi, Bartholomaei, Matthaei, Simonis et Thaddaei: Lini, Cleti, Clementis, Xysti, Cornelii, Cypriani, Laurentii, Chrysogoni, Ioannis et Pauli, Cosmae et Damiani)et omnium Sanctorum tuorum; quorum meritis precibusque concedas, ut in omnibus protectionis tuae muniamur auxilio. (Per Christum Dominum nostrum. Amen.)

[M1240pe] Communicantes, et (noctem sacratissimam)diem sacratissimum celebrantes, (qua)quo beatae Mariae intemerata virginitas huic mundo edidit Salvatorem: sed et memoriam venerantes, in primis eiusdem gloriosae semper Virginis Mariae, Genetricis eiusdem Dei et Domini nostri Iesu Christi:

[M1241pe] Communicantes, et diem sacratissimum celebrantes, quo Unigenitus tuus, in tua tecum gloria coaeternus, in veritate carnis nostrae visibiliter corporalis apparuit: sed et memoriam venerantes, in primis gloriosae semper Virginis Mariae, Genetricis eiusdem Dei et Domini nostri Iesu Christi:

[M1242pe] Communicantes, et (noctem sacratissimam)diem sacratissimum celebrantes Resurrectionis Domini nostri Iesu Christi secundum carnem: sed et memoriam venerantes, in primis gloriosae semper Virginis Mariae, Genetricis eiusdem Dei et Domini nostri Iesu Christi:

[M1243pe] Communicantes, et diem sacratissimum celebrantes, quo Dominus noster, unigenitus Filius tuus, unitam sibi fragilitatis nostrae substantiam in gloriae tuae dextera collocavit: sed et memoriam venerantes, in primis gloriosae semper Virginis Mariae, Genetricis eiusdem Dei et Domini nostri Iesu Christi:

[M1244pe] Communicantes, et diem sacratissimum Pentecostes celebrantes, quo Spiritus Sanctus Apostolis in igneis linguis apparuit: sed et memoriam venerantes, in primis gloriosae semper Virginis Mariae, Genetricis Dei et Domini nostri Iesu Christi:

[M1245pe] Hanc igitur oblationem servitutis nostrae, sed et cunctae familiae tuae, quaesumus, Domine, ut placatus accipias: diesque nostros in tua pace disponas, atque ab aeterna damnatione nos eripi et in electorum tuorum iubeas grege numerari. (Per Christum Dominum nostrum. Amen.)

[M1246pe] Hanc igitur oblationem servitutis nostrae, sed et cunctae familiae tuae, quam tibi offerimus pro his quoque, quos regenerare dignatus es ex aqua et Spiritu Sancto, tribuens eis remissionem omnium peccatorum, quaesumus, Domine, ut placatus accipias: diesque nostros in tua pace disponas, atque ab aeterna damnatione nos eripi et in electorum tuorum iubeas grege numerari. (Per Christum Dominum nostrum. Amen.)

[M1247pe] Quam oblationem tu, Deus, in omnibus, quaesumus, benedictam, adscriptam, ratam, rationabilem, acceptabilemque facere digneris: ut nobis Corpus et Sanguis fiat dilectissimi Filii tui, Domini nostri Iesu Christi.

[M1248pe] Qui, pridie quam pateretur, accepit panem in sanctas ac venerabiles manus suas, et elevatis oculis in caelum ad te Deum Patrem suum omnipotentem, tibi gratias agens benedixit, fregit, deditque discipulis suis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1249pe] Simili modo, postquam cenatum est, accipiens et hunc praeclarum calicem in sanctas ac venerabiles manus suas, item tibi gratias agens benedixit, deditque discipulis suis, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1250pe] Unde et memores, Domine, nos servi tui, sed et plebs tua sancta, eiusdem Christi, Filii tui, Domini nostri, tam beatae passionis, necnon et ab inferis resurrectionis, sed et in caelos gloriosae ascensionis: offerimus praeclarae maiestati tuae de tuis donis ac datis hostiam puram, hostiam sanctam, hostiam immaculatam, Panem sanctum vitae aeternae et Calicem salutis perpetuae.

[M1251pe] Supra quae propitio ac sereno vultu respicere digneris: et accepta habere, sicuti accepta habere dignatus es munera pueri tui iusti Abel, et sacrificium Patriarchae nostri Abrahae, et quod tibi obtulit summus sacerdos tuus Melchisedech, sanctum sacrificium, immaculatam hostiam.

[M1252pe] Supplices te rogamus, omnipotens Deus: iube haec perferri per manus sancti Angeli tui in sublime altare tuum, in conspectu divinae maiestatis tuae; ut, quotquot ex hac altaris participatione sacrosanctum Filii tui Corpus et Sanguinem sumpserimus, omni benedictione caelesti et gratia repleamur. (Per Christum Dominum nostrum. Amen.)

[M1253pe] Memento etiam, Domine, famulorum famularumque tuarum N. et N., qui nos praecesserunt cum signo fidei, et dormiunt in somno pacis. Ipsis, Domine, et omnibus in Christo quiescentibus, locum refrigerii, lucis et pacis, ut indulgeas, deprecamur. (Per Christum Dominum nostrum. Amen.)

[M1254pe] Nobis quoque peccatoribus famulis tuis, de multitudine miserationum tuarum sperantibus, partem aliquam et societatem donare digneris cum tuis sanctis Apostolis et Martyribus: cum Ioanne, Stephano, Matthia, Barnaba, (Ignatio, Alexandro, Marcellino, Petro, Felicitate, Perpetua, Agatha, Lucia, Agnete, Caecilia, Anastasia)et omnibus Sanctis tuis: intra quorum nos consortium, non aestimator meriti, sed veniae, quaesumus, largitor admitte. Per Christum Dominum nostrum.

[M1255pe] Per quem haec omnia, Domine, semper bona creas, sanctificas, vivificas, benedicis, et praestas nobis.

[M1256vd] Vere dignum et iustum est, aequum et salutare, nos tibi, sancte Pater, semper et ubique gratias agere per Filium dilectionis tuae Iesum Christum, Verbum tuum per quod cuncta fecisti: quem misisti nobis Salvatorem et Redemptorem, incarnatum de Spiritu Sancto et ex Virgine natum. Qui voluntatem tuam adimplens et populum tibi sanctum acquirens extendit manus cum pateretur, ut mortem solveret et resurrectionem manifestaret. Et ideo cum Angelis et omnibus Sanctis gloriam tuam praedicamus, una voce dicentes: Sanctus.

[M1257pe] Vere Sanctus es, Domine, fons omnis sanctitatis.

[M1258pe] Haec ergo dona, quaesumus, Spiritus tui rore sanctifica, ut nobis Corpus et Sanguis fiant Domini nostri Iesu Christi.

[M1259pe] Qui cum Passioni voluntarie traderetur, accepit panem et gratias agens fregit, deditque discipulis suis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1260pe] Simili modo, postquam cenatum est, accipiens et calicem iterum tibi gratias agens dedit discipulis suis, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1261pe] Memores igitur mortis et resurrectionis eius, tibi, Domine, panem vitae et calicem salutis offerimus, gratias agentes quia nos dignos habuisti astare coram te et tibi ministrare. Et supplices deprecamur ut Corporis et Sanguinis Christi participes a Spiritu Sancto congregemur in unum. Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. et universo clero.

[M1262pe] Memento famuli tui (famulae tuae)N., quem (quam)(hodie)ad te ex hoc mundo vocasti. Concede, ut, qui (quae)complantatus (complantata)fuit similitudini mortis Filii tui, simul fiat et resurrectionis ipsius.

[M1263pe] Memento etiam fratrum nostrorum, qui in spe resurrectionis dormierunt, omniumque in tua miseratione defunctorum, et eos in lumen vultus tui admitte. Omnium nostrum, quaesumus, miserere, ut cum beata Dei Genetrice Virgine Maria, beatis Apostolis et omnibus Sanctis, qui tibi a saeculo placuerunt, aeternae vitae mereamur esse consortes, et te laudemus et glorificemus per Filium tuum Iesum Christum.

[M1264pe] Vere Sanctus es, Domine, et merito te laudat omnis a te condita creatura, quia per Filium tuum, Dominum nostrum Iesum Christum, Spiritus Sancti operante virtute, vivificas et sanctificas universa, et populum tibi congregare non desinis, ut a solis ortu usque ad occasum oblatio munda offeratur nomini tuo.

[M1265pe] Supplices ergo te, Domine, deprecamur, ut haec munera, quae tibi sacranda detulimus, eodem Spiritu sanctificare digneris, ut Corpus et Sanguis fiant Filii tui Domini nostri Iesu Christi, cuius mandato haec mysteria celebramus.

[M1266pe] Ipse enim in qua nocte tradebatur accepit panem et tibi gratias agens benedixit, fregit, deditque discipulis suis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1267pe] Simili modo, postquam cenatum est, accipiens calicem, et tibi gratias agens benedixit, deditque discipulis suis, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1268pe] Memores igitur, Domine, eiusdem Filii tui salutiferae passionis necnon mirabilis resurrectionis et ascensionis in caelum, sed et praestolantes alterum eius adventum, offerimus tibi, gratias referentes, hoc sacrificium vivum et sanctum. Respice, quaesumus, in oblationem Ecclesiae tuae et, agnoscens Hostiam, cuius voluisti immolatione placari, concede, ut qui Corpore et Sanguine Filii tui reficimur, Spiritu eius Sancto repleti, unum corpus et unus spiritus inveniamur in Christo. Ipse nos tibi perficiat munus aeternum, ut cum electis tuis hereditatem consequi valeamus, in primis cum beatissima Virgine, Dei Genetrice, Maria, cum beatis Apostolis tuis et gloriosis Martyribus (cum Sancto N.)et omnibus Sanctis, quorum intercessione perpetuo apud te confidimus adiuvari. Haec Hostia nostrae reconciliationis proficiat, quaesumus, Domine, ad totius mundi pacem atque salutem. Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali ordine et universo clero et omni populo acquisitionis tuae. Votis huius familiae, quam tibi astare voluisti, adesto propitius. Omnes filios tuos ubique dispersos tibi, clemens Pater, miseratus coniunge. Fratres nostros defunctos et omnes qui, tibi placentes, ex hoc saeculo transierunt, in regnum tuum benignus admitte, ubi fore speramus, ut simul gloria tua perenniter satiemur, per Christum Dominum nostrum, per quem mundo bona cuncta largiris.

[M1269pe] Memento famuli tui (famulae tuae)N., quem (quam)(hodie)ad te ex hoc mundo vocasti. Concede, ut, qui (quae)complantatus (complantata)fuit similitudini mortis Filii tui, simul fiat et resurrectionis ipsius, quando mortuos suscitabit in carne de terra et corpus humilitatis nostrae configurabit corpori claritatis suae. Sed et fratres nostros defunctos, et omnes qui, tibi placentes, ex hoc saeculo transierunt, in regnum tuum benignus admitte, ubi fore speramus, ut simul gloria tua perenniter satiemur, quando omnem lacrimam absterges ab oculis nostris, quia te, sicuti es, Deum nostrum videntes, tibi similes erimus cuncta per saecula, et te sine fine laudabimus, per Christum Dominum nostrum, per quem mundo bona cuncta largiris.

[M1270vd] Vere dignum est tibi gratias agere, vere iustum est te glorificare, Pater sancte, quia unus es Deus vivus et verus, qui es ante saecula et permanes in aeternum, inaccessibilem lucem inhabitans; sed et qui unus bonus atque fons vitae cuncta fecisti, ut creaturas tuas benedictionibus adimpleres multasque laetificares tui luminis claritate. Et ideo coram te innumerae astant turbae angelorum, qui die ac nocte serviunt tibi et, vultus tui gloriam contemplantes, te incessanter glorificant. Cum quibus et nos et, per nostram vocem, omnis quae sub caelo est creatura nomen tuum in exsultatione confitemur, canentes: Sanctus.

[M1271pe] Confitemur tibi, Pater sancte, quia magnus es et omnia opera tua in sapientia et caritate fecisti. Hominem ad tuam imaginem condidisti, eique commisisti mundi curam universi, ut, tibi soli Creatori serviens, creaturis omnibus imperaret. Et cum amicitiam tuam, non oboediens, amisisset, non eum dereliquisti in mortis imperio. Omnibus enim misericorditer subvenisti, ut te quaerentes invenirent. Sed et foedera pluries hominibus obtulisti eosque per prophetas erudisti in exspectatione salutis. Et sic, Pater sancte, mundum dilexisti, ut, completa plenitudine temporum, Unigenitum tuum nobis mitteres Salvatorem. Qui, incarnatus de Spiritu Sancto et natus ex Maria Virgine, in nostra condicionis forma est conversatus per omnia absque peccato; salutem evangelizavit pauperibus, redemptionem captivis, maestis corde laetitiam. Ut tuam vero dispensationem impleret, in mortem tradidit semetipsum ac, resurgens a mortuis, mortem destruxit vitamque renovavit. Et, ut non amplius nobismetipsis viveremus, sed sibi qui pro nobis mortuus est atque surrexit, a te, Pater, misit Spiritum Sanctum primitias credentibus, qui, opus suum in mundo perficiens, omnem sanctificationem compleret.

[M1272pe] Quaesumus igitur, Domine, ut idem Spiritus Sanctus haec munera sanctificare dignetur, ut Corpus et Sanguis fiant Domini nostri Iesu Christi ad hoc magnum mysterium celebrandum, quod ipse nobis reliquit in foedus aeternum.

[M1273pe] Ipse enim, cum hora venisset ut glorificaretur a te, Pater sancte, ac dilexisset suos qui erant in mundo, in finem dilexit eos: et cenantibus illis accepit panem, benedixit ac fregit, deditque discipulis suis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1274pe] Simili modo accipiens calicem, ex genimine vitis repletum, gratias egit, deditque discipulis suis, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1275pe] Unde et nos, Domine, redemptionis nostrae memoriale nunc celebrantes, mortem Christi eiusque descensum ad inferos recolimus, eius resurrectionem et ascensionem ad tuam dexteram profitemur, et, exspectantes ipsius adventum in gloria, offerimus tibi eius Corpus et Sanguinem, sacrificium tibi acceptabile et toti mundo salutare. Respice, Domine, in Hostiam, quam Ecclesiae tuae ipse parasti, et concede benignus omnibus qui ex hoc uno pane participabunt et calice, ut, in unum corpus a Sancto Spiritu congregati, in Christo hostia viva perficiantur, ad laudem gloriae tuae. Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum ordinis universi, sed et totius cleri, et offerentium, et circumstantium, et cuncti populi tui, et omnium, qui te quaerunt corde sincero. Memento etiam illorum, qui obierunt in pace Christi tui, et omnium defunctorum, quorum fidem tu solus cognovisti. Nobis omnibus, filiis tuis, clemens Pater, concede, ut caelestem hereditatem consequi valeamus cum beata Virgine, Dei Genetrice, Maria, cum Apostolis et Sanctis tuis in regno tuo, ubi cum universa creatura, a corruptione peccati et mortis liberata, te glorificemus per Christum Dominum nostrum, per quem mundo bona cuncta largiris.

[M1276mn] Praeceptis salutaribus moniti, et divina institutione formati, audemus dicere:

[M1277or] Pater noster, qui es in caelis: sanctificetur nomen tuum; adveniat regnum tuum; fiat voluntas tua, sicut in caelo, et in terra. Panem nostrum cotidianum da nobis hodie; et dimitte nobis debita nostra, sicut et nos dimittimus debitoribus nostris; et ne nos inducas in tentationem; sed libera nos a malo.

[M1278or] Libera nos, quaesumus, Domine, ab omnibus malis, da propitius pacem in diebus nostris, ut, ope misericordiae tuae adiuti, et a peccato simus semper liberi et ab omni perturbatione securi: exspectantes beatam spem et adventum Salvatoris nostri Iesu Christi. Quia tuum est regnum, et potestas, et gloria in saecula.

[M1279or] Domine Iesu Christe, qui dixisti Apostolis tuis: Pacem relinquo vobis, pacem meam do vobis: ne respicias peccata nostra, sed fidem Ecclesiae tuae; eamque secundum voluntatem tuam pacificare et coadunare digneris. Qui vivis et regnas in saecula saeculorum.

[M1280fr] Pax Domini sit semper vobiscum. Et cum spiritu tuo.

[M1281mn] Offerte vobis pacem.

[M1282or] Haec commixtio Corporis et Sanguinis Domini nostri Iesu Christi fiat accipientibus nobis in vitam aeternam.

[M1283fr] Agnus Dei, qui tollis peccata mundi: miserere nobis. Agnus Dei, qui tollis peccata mundi: miserere nobis. Agnus Dei, qui tollis peccata mundi: dona nobis pacem.

[M1284or] Domine Iesu Christe, Fili Dei vivi, qui ex voluntate Patris, cooperante Spiritu Sancto, per mortem tuam mundum vivificasti: libera me per hoc sacrosanctum Corpus et Sanguinem tuum ab omnibus iniquitatibus meis et universis malis: et fac me tuis semper inhaerere mandatis, et a te numquam separari permittas.

[M1285or] Perceptio Corporis et Sanguinis tui, Domine Iesu Christe, non mihi proveniat in iudicium et condemnationem: sed pro tua pietate prosit mihi ad tutamentum mentis et corporis, et ad medelam percipiendam.

[M1286fr] Ecce Agnus Dei, ecce qui tollit peccata mundi. Beati qui ad cenam Agni vocati sunt.

[M1287or] Domine, non sum dignus, ut intres sub tectum meum, sed tantum dic verbo, et sanabitur anima mea.

[M1288fr] Corpus Christi custodiat me in vitam aeternam. Sanguis Christi custodiat me in vitam aeternam.

[M1289fr] Corpus Christi. Amen.

[M1290or] Quod ore sumpsimus, Domine, pura mente capiamus, et de munere temporali fiat nobis remedium sempiternum.

[M1291bn] Benedicat vos omnipotens Deus, Pater, et Filius, et Spiritus Sanctus.

[M1292fr] Sit nomen Domini benedictum. Ex hoc nunc et usque in saeculum. Adiutorium nostrum in nomine Domini, Qui fecit caelum et terram.

[M1293fr] Ite, missa est. Deo gratias.

[M1294fr] Inclinate vos ad benedictionem.

[M1295bs] Omnipotens et misericors Deus, cuius Unigeniti adventum et praeteritum creditis, et futurum exspectatis, eiusdem adventus vos illustratione sanctificet et sua benedictione locupletet. In praesentis vitae stadio reddat vos in fide stabiles, spe gaudentes, et in caritate efficaces. Ut, qui de adventu Redemptoris nostri secundum carnem devota mente laetamini, in secundo, cum in maiestate sua venerit, praemiis aeternae vitae ditemini.

[M1296bs] Deus infinitae bonitatis, qui incarnatione Filii sui mundi tenebras effugavit, et eius gloriosa nativitate hanc noctem (diem)sacratissimam irradiavit, effuget a vobis tenebras vitiorum, et irradiet corda vestra luce virtutum. Quique eius salutiferae nativitatis gaudium magnum pastoribus ab Angelo voluit nuntiari, ipse mentes vestras suo gaudio impleat, et vos Evangelii sui nuntios efficiat. Et, qui per eius incarnationem terrena caelestibus sociavit, dono vos suae pacis et bonae repleat voluntatis, et vos faciat Ecclesiae consortes esse caelestis.

[M1297bs] Deus, fons et origo totius benedictionis, gratiam vobis concedat, benedictionis suae largitatem infundat, atque per totum annum vos salvos et incolumes protegat. Custodiat fidei vobis integritatem, tribuat spei longanimitatem, perseverantem usque ad finem cum sancta patientia caritatem. Dies et actus vestros in sua pace disponat, preces hic et ubique exaudiat, et ad vitam aeternam feliciter vos perducat.

[M1298bs] Deus, qui vos de tenebris vocavit in admirabile lumen suum, suam vobis benedictionem benignus infundat, et corda vestra fide, spe et caritate stabiliat. Et quia Christum sequimini confidenter, qui hodie mundo apparuit lux relucens in tenebris, faciat et vos lucem esse fratribus vestris. Quatenus, peregrinatione peracta, perveniatis ad eum, quem magi stella praevia quaesierunt, et gaudio magno, lucem de luce, Christum Dominum invenerunt.

[M1299bs] Deus, Pater misericordiarum, qui Unigeniti sui passione tribuit vobis caritatis exemplum, praestet ut, per servitium Dei et hominum, percipiatis suae benedictionis ineffabile donum. Ut ab eo sempiternae vitae munus obtineatis, per cuius temporalem mortem, aeternam vos evadere creditis. Quatenus, cuius humilitatis sequimini documenta, eius resurrectionis possideatis consortia.

[M1300bs] Deus, qui per resurrectionem Unigeniti sui dignatus est vobis bonum redemptionis adoptionisque conferre, sua benedictione vos tribuat congaudere. Et quo redimente percepistis donum perpetuae libertatis, eo largiente hereditatis aeternae consortes effici valeatis. Et cui resurrexistis in baptismate iam credendo, adiungi mereamini in patria caelesti nunc recte vivendo.

[M1301bs] Benedicat vos omnipotens Deus, cuius Unigenitus hodierna die caelorum alta penetravit, et vobis, ubi est ipse, ascendendi aditum reseravit. Concedat ut, sicut Christus post resurrectionem suam visus est discipulis manifestus, ita vobis in iudicium veniens appareat pro aeternitate placatus. Et qui eum consedere Patri in sua creditis maiestate, ipsum usque in finem saeculi vobiscum permanere secundum eius promissionem laeti valeatis experire.

[M1302bs] Deus, Pater luminum, qui discipulorum mentes Spiritus Paracliti infusione dignatus est illustrare, sua vos faciat benedictione gaudere, et perpetuo donis eiusdem Spiritus abundare. Ignis ille, qui super discipulos mirandus apparuit, corda vestra ab omni malo potenter expurget, et sui luminis infusione perlustret. Quique dignatus est in unius fidei confessione diversitatem adunare linguarum, in eadem fide perseverare vos faciat, et per illam a spe ad speciem pervenire concedat.

[M1303bs] Benedicat vobis Dominus, et custodiat vos. Illuminet faciem suam super vos, et misereatur vestri. Convertat vultum suum ad vos, et donet vobis suam pacem.

[M1304bs] Pax Dei, quae exsuperat omnem sensum, custodiat corda vestra et intellegentias vestras in scientia et caritate Dei, et Filii sui, Domini nostri Iesu Christi.

[M1305bs] Omnipotens Deus sua vos clementia benedicat, et sensum in vobis sapientiae salutaris infundat. Fidei documentis vos semper enutriat, et in sanctis operibus, ut perseveretis, efficiat. Gressus vestros ad se convertat, et viam vobis pacis et caritatis ostendat.

[M1306bs] Deus totius consolationis dies vestros in sua pace disponat, et suae vobis benedictionis dona concedat. Ab omni semper perturbatione vos liberet, et corda vestra in suo amore confirmet. Quatenus donis spei, fidei et caritatis divites, et praesentem vitam transigatis in opere efficaces, et possitis ad aeternam pervenire felices.

[M1307bs] Omnipotens Deus universa a vobis adversa semper excludat, et suae super vos benedictionis dona propitiatus infundat. Corda vestra efficiat divinis intenta eloquiis, ut repleri possint gaudiis sempiternis. Quatenus, quae bona et recta intellegentes, viam mandatorum Dei inveniamini semper currentes, et civium supernorum efficiamini coheredes.

[M1308bs] Benedicat vos Deus omni benedictione caelesti, sanctosque vos et puros in conspectu suo semper efficiat; divitias gloriae suae in vos abundanter effundat, verbis veritatis instruat, Evangelio salutis erudiat, et caritate fraterna semper locupletet.

[M1309bs] Deus, qui per beatae Mariae Virginis partum genus humanum sua voluit benignitate redimere, sua vos dignetur benedictione ditare. Eiusque semper et ubique patrocinia sentiatis, per quam auctorem vitae suscipere meruistis. Et qui hodierna die devotis mentibus convenistis, spiritalium gaudiorum caelestiumque praemiorum vobiscum munera reportetis.

[M1310bs] Benedicat vos omnipotens Deus, qui in beati Petri confessione vos saluberrima stabilivit, et per eam in Ecclesiae soliditate fidei fundavit. Et quos beati Pauli instruxit indefessa praedicatione, suo semper exemplo doceat Christo fratres lucrifacere. Ut Petrus clave, Paulus verbo, ope intercessionis uterque in illam patriam nos certent inducere, ad quam meruerunt illi, alter cruce, alter gladio, feliciter pervenire.

[M1311bs] Deus, qui vos in apostolicis tribuit consistere fundamentis, benedicere vobis dignetur beatorum Apostolorum N. et N. (beati Apostoli N.)meritis intercedentibus gloriosis. Et apostolicis praesidiis vos pro cunctis faciat testes veritatis, qui vos eorum munerari documentis voluit et exemplis. Ut eorum intercessione ad aeternae patriae hereditatem pervenire possitis, per quorum doctrinam fidei firmitatem possidetis.

[M1312bs] Deus, gloria et exsultatio Sanctorum, benedicat vos benedictione perpetua, qui vobis tribuit eximiis suffragiis roborari. Eorum intercessione a praesentibus malis liberati, et exemplis sanctae conversationis instructi, in servitio Dei fratrumque inveniamini semper intenti. Quatenus cum iis omnibus valeatis illius patriae vos gaudia possidere, in qua filios suos supernis coniungi civibus in pace perpetua sancta laetatur Ecclesia.

[M1313bs] Deus, Dominus caeli et terrae, qui vos hodie ad huius domus dedicationem adunavit, ipse vos caelesti benedictione faciat abundare. Concedatque vobis fieri templum suum et habitaculum Spiritus Sancti, qui omnes filios dispersos voluit in Filio suo congregari. Quatenus feliciter emundati, habitatorem Deum in vobismetipsis possitis habere, et aeternae beatitudinis hereditatem cum omnibus Sanctis possidere.

[M1314bs] Benedicat vos Deus totius consolationis, qui hominem ineffabili bonitate creavit, et in resurrectione Unigeniti sui spem credentibus resurgendi concessit. Nobis, qui vivimus, veniam tribuat pro peccatis, et omnibus defunctis locum concedat lucis et pacis. Ut omnes cum Christo sine fine feliciter vivamus, quem resurrexisse a mortuis veraciter credimus.

[M1315bn] Et benedictio Dei omnipotentis, Patris, et Filii, et Spiritus Sancti, descendat super vos et maneat semper. Amen.

[M1316sp] Esto, Domine, propitius plebi tuae, et temporali consolatione non deseras, quam vis ad aeterna contendere.

[M1317sp] Da, quaesumus, Domine, populis christianis, et quae profitentur agnoscere, et caeleste munus diligere, quod frequentant.

[M1318sp] Plebs tua, Domine, quaesumus, benedictionis sanctae munus accipiat, per quod et noxia quaeque declinet, et optata reperiat.

[M1319sp] Populum tuum, Domine, quaesumus, ad te toto corde converte, quia, quos defendis etiam delinquentes, maiore pietate tueris sincera mente devotos.

[M1320sp] Familiam tuam, quaesumus, Domine, propitiatus illustra, ut, beneplacitis inhaerendo, cuncta quae bona sunt mereatur exercere.

[M1321sp] Largire, quaesumus, Domine, fidelibus tuis indulgentiam placatus et pacem, ut pariter ab omnibus mundentur offensis, et secura tibi mente deserviant.

[M1322sp] Subiectum tibi populum, quaesumus, Domine, propitiatio caelestis amplificet, et tuis semper faciat servire mandatis.

[M1323sp] Propitiare populo tuo, Deus, ut, ab omni malo liberatus, et toto tibi corde deserviat, et sub tua semper protectione consistat.

[M1324sp] Familia tua, Deus, et de celebratis mysteriis suae redemptionis iugiter collaetetur, et eius dona perseveranter acquirat.

[M1325sp] Domine Deus, de abundantia misericordiarum tuarum famulos praesta locupletes, praesta securos, ut, confirmati benedictionibus tuis, in omni gratiarum actione semper abundent, teque perpetua exsultatione benedicant.

[M1326sp] Familiam tuam, quaesumus, Domine, continua pietate custodi, ut a cunctis adversitatibus, te protegente, sit libera, et in bonis actibus tuo nomini sit devota.

[M1327sp] Fideles tuos, quaesumus, Domine, corpore pariter et mente purifica, ut, tua inspiratione compuncti, noxias delectationes vitare praevaleant, atque tua semper suavitate pascantur.

[M1328sp] Adsit, Domine, fidelibus tuis sacrae benedictionis effectus, qui mentes omnium spiritali vegetatione disponat, ut ad opera sua exercenda virtute caritatis tuae roborentur.

[M1329sp] Auxilium tuum, Domine, nomini tuo subdita poscunt corda fidelium, ut quia sine te nihil possunt implere quod iustum est, tua misericordia largiente, et quae recta sunt apprehendant et omnia sibi profutura percipiant.

[M1330sp] Succurre, Domine, quaesumus, populo fideli deprecanti et opem tribue benignus fragilitati humanae, ut sincera tibi mente devotus et praesentis vitae remediis gaudeat et futurae.

[M1331sp] Respice, Domine, propitius familiam tuam et perpetuam largire misericordiam supplicanti; ut sine qua nihil potest a te dignum prorsus efficere, per eam salutaria tua praecepta mereatur implere.

[M1332sp] Gratiam caelestem, Domine, super fideles tuos multiplica: quorum laudent te ora, laudet anima, laudet et vita, et quia tui muneris est quod sumus, tuum sit omne quod vivemus.

[M1333sp] Populum tuum, Domine, quaesumus, caelestibus instrue disciplinis, ut, omnia vitando quae mala sunt et bona cuncta sectando, non indignationem tuam, sed iugiter misericordiam consequatur.

[M1334sp] Adesto, Domine, supplicibus tuis, et spem suam in tua misericordia collocantes tuere propitius, ut in sancta conversatione fideles permaneant et, consequentes sufficientiam temporalem, promissionis tuae perficiantur heredes in aeternum.

[M1335sp] Tuae largire pietatis gratiam, Domine, populo tuo supplicanti, ut qui te factore conditus, te est reparatus auctore, te iugiter operante salvetur.

[M1336sp] Proficiat, quaesumus, Domine, fidelis populus tuae pietatis instinctu et, salubri compunctione motus, gratanter quae praecipis exsequatur, ut quae promittis accipiat.

[M1337sp] Moveat pietatem tuam, quaesumus, Domine, fragilitas plebis tibi devotae et misericordiam tuam supplicatio fidelis obtineat, ut quod meritis non praesumit, indulgentiae tuae largitate percipiat.

[M1338sp] Ad defensionem filiorum, Domine, quaesumus, dexteram tuae maiestatis extende et paternae voluntati oboedientes perpetua pietatis tuae protectione muniantur.

[M1339sp] Respice, Domine, familiae tuae preces et opem tribue suppliciter imploranti, ut congruis subsidiis roboratus in confessione tui nominis perseveret.

[M1340sp] Conserva, Domine, quaesumus, familiam tuam et misericordiarum tuarum propitius ubertatem concede, ut caelestibus eruditionibus multiplicetur et donis.

[M1341sp] Laetetur, Domine, quaesumus, populus fidelis dextera tua sublevatus et christiana conversatione proficiens, et praesentibus gaudeat bonis et futuris.

[M1342sp] Exsultet, Domine, populus christianus de magnorum Filii tui glorificatione membrorum, et in quorum est celebritate tibi devotus, partem acquirat in eorum sorte perpetua, atque de tua gloria semper congaudeat.

[M1343sp] Plebis tuae, quaesumus, Domine, ad te semper corda converte, et quam tantis facis patrociniis adiuvari, perpetuis non desinas gubernare praesidiis.

[M1344vd] Vere dignum et iustum est nos tibi semper gratias agere. Domine, sancte Pater, omnipotens aeterne Deus: Qui ad abundantiorem vitam habendam nos incitare non desinis, et, cum sis dives in misericordia, veniam offerre perseveras ac peccatores invitas ad tuae solum indulgentiae fidendum. A nobis autem, qui foedus tuum toties violavimus, numquam aversus, humanam familiam per Iesum Filium tuum, Redemptorem nostrum, novo caritatis vinculo tam arcte tibi iunxisti, ut nullo modo possit dissolvi. Nunc quidem tempus gratiae et reconciliationis populo tuo praebes, eique ad te animum convertenti in Christo Iesu sperare concedis cunctisque hominibus tribuis deservire, dum plenius Spiritui Sancto se concredit. Et ideo, admiratione perfusi, tui amoris virtutem extollimus nostrumque de salute gaudium profitentes, cum innumeris caelestium turbis hymnum concinimus, sine fine dicentes: Sanctus.

[M1345pe] Vere Sanctus es, Domine, qui ab origine mundi semper operaris ut, sicut Sanctus es ipse, sanctus fiat homo.

[M1346pe] Respice, quaesumus, munera populi tui et super ea Spiritus tui virtutem effunde ut Corpus et Sanguis fiant dilecti Filii tui, Iesu Christi, in quo et nos filii tui sumus. Quamvis vero olim perditi tibi appropinquare nequiremus, summo nos amore dilexisti: Filius enim tuus, qui solus est Iustus, morti tradidit seipsum, ligno crucis pro nobis non dedignatus affigi. Sed antequam brachia eius inter caelum et terram extenta efficerentur tui foederis indelebile signum, ipse cum discipulis suis Pascha voluit celebrare.

[M1347pe] Convescens autem, accepit panem et tibi gratias agens benedixit, fregit et dedit illis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1348pe] Similiter, postquam cenatum est, sciens se omnia in seipso reconciliaturum per sanguinem suum in cruce fundendum, accepit calicem, genimine vitis repletum, et iterum tibi gratias agens discipulis suis tradidit, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1349pe] Memores igitur Filii tui Iesu Christi, qui Pascha nostrum est et pax nostra certissima, mortem eius et resurrectionem ab inferis celebramus atque, beatum eius adventum praestolantes, offerimus tibi, qui fidelis et misericors es Deus, hostiam, quae homines tecum reconciliat. Respice, benignus, clementissime Pater, quos tibi coniungis Filii tui sacrificio, ac praesta ut, Spiritus Sancti virtute, ex hoc uno pane et calice participes, in unum corpus congregentur in Christo, a quo omnis auferatur divisio. In communione mentis et cordis nos semper servare digneris una cum Papa nostro N. et Episcopo nostro N. Adiuva nos, ut simul adventum regni tui praestolemus usque ad horam qua tibi adstabimus, sancti inter sanctos in sede caelesti, cum beata Virgine Dei Genetrice Maria, beatis Apostolis et omnibus Sanctis atque fratribus nostris defunctis, quos tuae misericordiae suppliciter commendamus. Tum vero, a corruptionis vulnere tandem liberati et nova plene constituti creatura, gaudentes tibi canemus gratiarum actionem Christi tui, in aeternum viventis.

[M1350vd] Vere dignum et iustum est nos tibi gratias agere atque laudes persolvere, Deus Pater omnipotens, pro omnibus, quae in hoc mundo operaris, per Dominum nostrum Iesum Christum. Cum enim genus humanum dissensione sit atque discordia divisum, experiendo tamen cognovimus te animos flectere, ut sint ad reconciliationem parati. Per Spiritum namque tuum permoves hominum corda, ut inimici iterum in colloquia veniant, adversarii manus coniungant, populi sibi obviam quaerant venire. Tua operante virtute fit etiam, Domine, ut odium vincatur amore, ultio cedat indulgentiae, discordia in mutuam dilectionem convertatur. Quapropter cum choris caelestibus gratias tibi indesinenter agentes maiestati tuae in terris sine fine clamamus: Sanctus.

[M1351pe] Te igitur, Pater omnipotens, benedicimus per Iesum Christum Filium tuum, qui in tuo nomine venit. Ipse est pro hominibus Verbum salutis, manus, quam peccatoribus porrigis, via, qua pax tua nobis praebetur. Cum nosmetipsos a te, Domine, propter peccata nostra avertissemus, ad reconciliationem nos reduxisti, ut ad te tandem conversi nos invicem diligeremus per Filium tuum, quem in mortem pro nobis tradidisti.

[M1352pe] Et nunc reconciliationem a Christo nobis allatam celebrantes, te deprecamur: Spiritus tui effusione haec dona sanctifica, ut fiant Corpus et Sanguis Filii tui, cuius mandatum implemus haec celebrantes mysteria.

[M1353pe] Ipse enim, vitam cum esset daturus, ut nos liberaret, discumbens accepit panem in manus suas et tibi gratias agens benedixit, fregit deditque discipulis suis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1354pe] Simili modo vespere illo accepit calicem benedictionis in manus suas, tuam confitens misericordiam deditque discipulis suis, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1355pe] Memoriam igitur agentes Filii tui mortis et resurrectionis, qui hoc pignus dilectionis suae nobis reliquit, tibi quod nobis tribuisti offerimus perfectae reconciliationis sacrificium. Pater sancte, supplices deprecamur, ut nos quoque acceptos habeas cum Filio tuo et in hoc salutari convivio eiusdem Spiritum nobis praestare digneris, qui omnia auferat quae nos invicem alienant. Ipse Ecclesiam tuam inter homines signum efficiat unitatis pacisque tuae instrumentum, et nos in communione conservet cum Papa nostro N. et Antistite nostro N. et cunctis Episcopis et universo populo tuo. Quemadmodum nunc ad mensam Filii tui nos congregasti, ita nos collige cum gloriosa Dei Genetrice Virgine Maria, beatis Apostolis tuis et omnibus Sanctis, cum fratribus nostris, atque hominibus cuiusvis stirpis et sermonis in tua amicitia defunctis, ad perpetuae unitatis convivium, in caelis novis et terra nova, ubi plenitudo pacis tuae refulget, in Christo Iesu Domino nostro.

[M1356vd] Vere dignum et iustum est tibi gratias agere tibique gloriae et laudis hymnum canere, Domine, Pater infinitae bonitatis. Quia verbo Evangelii Filii tui, ex omnibus populis, linguis et nationibus unam Ecclesiam collegisti, per quam, Spiritus tui virtute vivificatam, omnes homines in unum congregare non desinis. Ipsa tuae dilectionis testamentum manifestans, spem beatam regni incessanter largitur ac veluti signum tuae fidelitatis resplendet quam in Christo Iesu Domino nostro, in aeternum promisisti. Et ideo, cum omnibus caelorum Virtutibus, in terris te iugiter celebramus, cum universa Ecclesia una voce dicentes: Sanctus.

[M1357pe] Vere Sanctus es et glorificandus, amator hominum Deus, qui semper illis ades in itinere vitae. Vere benedictus Filius tuus, qui praesens est in medio nostri cum ab eius amore congregamur, et sicut olim pro discipulis nobis Scripturas aperit et panem frangit.

[M1358pe] Rogamus ergo te, Pater clementissime, ut Spiritum Sanctum tuum emittas, qui haec dona panis et vini sanctificet, ut nobis Corpus et Sanguis fiant Domini nostri Iesu Christi.

[M1359pe] Qui pridie quam pateretur, in supremae nocte Cenae, accepit panem et benedixit ac fregit, deditque discipulis suis, dicens: Accipite et manducate ex hoc omnes: hoc est enim Corpus meum, quod pro vobis tradetur.

[M1360pe] Simili modo, postquam cenatum est accipiens et calicem, tibi gratias egit, deditque discipulis suis, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Hoc facite in meam commemorationem.

[M1361pe] Unde et nos, Pater sancte, memores Christi Filii tui Salvatoris nostri, quem per passionem et mortem crucis ad resurrectionis gloriam perduxisti et ad dexteram tuam sedere fecisti, opus tuae caritatis annuntiamus, donec ipse veniat, tibique panem vitae et calicem benedictionis offerimus. In oblationem Ecclesiae tuae, in qua paschale Christi sacrificium nobis traditum exhibemus, respice propitius, et concede, ut virtute Spiritus caritatis tuae, inter Filii tui membra, cuius Corpori communicamus et Sanguini, nunc et in diem aeternitatis numeremur.

[M1362pe] Ecclesiam tuam, Domine, (quae est N.), lumine renova Evangelii. Vinculum unitatis confirma inter fideles et pastores plebis tuae, una cum Papa nostro N. et Episcopo nostro N. et universo ordine episcopali, ut populus tuus, hoc in mundo discordiis lacerato, unitatis et concordiae propheticum signum eluceat. Aperi oculos nostros ut necessitates fratrum agnoscamus; verba et opera nobis inspira, ad laborantes et oneratos confortandos; fac nos sincere ipsis inservire, Christi exemplo eiusque mandato. Ecclesia tua vivum testimonium exsistat veritatis et libertatis, pacis atque iustitiae, ut omnes homines in spem novam erigantur.

[M1363pe] Memento fratrum nostrorum (N. et N.), qui in pace Christi tui dormierunt omniumque defunctorum, quorum fidem tu solus cognovisti: eos ad lumen vultus tui fruendum admitte et in resurrectione dona eis vitae plenitudinem. Concede nos quoque, terrena exacta peregrinatione, ad aeternam pervenire mansionem, ubi tecum semper vivemus et cum beata Virgine Dei Genetrice Maria, cum Apostolis et martyribus, (cum Sancto N.)Sanctisque omnibus communicantes, te laudabimus et magnificabimus per Iesum Christum, Filium tuum.

[M1364vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, mundi creator et fons omnis vitae: Qui opera sapientiae tuae numquam derelinquis, sed in medio nostri adhuc providus operaris. In manu potenti et brachio extento populum tuum Israel per desertum duxisti; nunc autem Ecclesiam tuam in mundo peregrinantem, Spiritus Sancti virtute semper comitaris, eamque per temporis semitas in gaudium aeternum regni tui conducis, per Christum Dominum nostrum. Unde et nos cum Angelis et Sanctis hymnum gloriae tuae canimus, sine fine dicentes: Sanctus.

[M1365pe] Ad mensam ergo tuam convocatos, Domine, nos in unitate confirma: ut, una cum Papa nostro N. et Episcopo nostro N., cum omnibus Episcopis, presbyteris, diaconis et universo populo tuo, in fide ac spe per semitas tuas ambulantes, gaudium et fiduciam in mundum effundere valeamus.

[M1366vd] Vere dignum et iustum est, aequum et salutare, nos tibi semper et ubique gratias agere, sancte Pater, Domine caeli et terrae, per Christum Dominum nostrum. Quia per Verbum tuum mundum creasti et universa in aequitate moderaris. Ipsum, caro factum, nobis mediatorem dedisti, qui verba tua nobis est locutus et ad sui sequelam nos vocavit; ille via est quae nos ad te ducit, veritas quae nos liberat, vita quae gaudio nos replet. Per Filium tuum homines, quos ad gloriam tui nominis fecisti, sanguine crucis eius redemptos et Spiritus sigillo signatos in unam colligis familiam. Quapropter nunc et usque in saeculum, omnibus cum Angelis gloriam tuam praedicamus, iucunda celebratione clamantes: Sanctus.

[M1367pe] Huius participatione mysterii, omnipotens Pater, nos Spiritu vivifica et imagini Filii tui conformes fieri concede atque in vinculo communionis confirma una cum Papa nostro N., et Episcopo nostro N. cum ceteris Episcopis, cum presbyteris et diaconis et universo populo tuo. Fac ut omnes Ecclesiae fideles, temporum signa lumine fidei perscrutantes, in servitium Evangelii cohaerenter se impendere valeant. Ad cunctorum hominum necessitates redde nos intentos ut luctus eorum et angores, gaudium et spem participantes, nuntium salutis illis fideliter afferamus et cum eis in viam regni tui progrediamur.

[M1368vd] Vere dignum et iustum est, aequum et salutare, nos tibi semper et ubique gratias agere, Pater misericordiarum et Deus fidelis: Quia Iesum Christum Filium tuum, Dominum ac redemptorem nobis dedisti. Semper ille misericordem se ostendit erga parvulos et pauperes, infirmos et peccatores atque proximum se fecit oppressis et afflictis. Verbo et opere mundo nuntiavit te esse Patrem omniumque filiorum tuorum curam habere. Et ideo cum Angelis et Sanctis universis te collaudamus et benedicimus hymnumque gloriae tuae canimus, sine fine dicentes: Sanctus.

[M1369pe] Ecclesiam tuam, Domine, in fide et caritate perficere digneris, una cum Papa nostro N., et Episcopo nostro N., et cunctis Episcopis, presbyteris et diaconis, et omni populo acquisitionis tuae. Aperi oculos nostros ut necessitates fratrum agnoscamus; verba et opera nobis inspira, ad laborantes et oneratos confortandos; fac nos sincere ipsis inservire, Christi exemplo eiusque mandato. Ecclesia tua vivum testimonium exsistat veritatis et libertatis, pacis atque iustitiae, ut omnes homines in spem novam erigantur.

[S1370ai] Sapientiam Sanctorum narrent populi, et laudes eorum nuntiet Ecclesia; nomina autem eorum vivent in saeculum saeculi.

[S1371co] Deus, qui Ecclesiam tuam beatorum episcoporum Basilii et Gregorii exemplis et doctrinis dignatus es illustrare, concede, quaesumus, ut tuam discamus in humilitate veritatem et eam in caritate fideliter operemur.

[S1372so] Suscipe, quaesumus, Domine, hoc sacrificium populi tui, ut, quod tibi in honore beatorum Basilii et Gregorii offertur ad gloriam, nobis tribuas ad salutem perpetuam.

[S1373am] Nos praedicamus Christum crucifixum, Christum, Dei virtutem et Dei sapientiam.

[S1374pc] Mensa caelestis, omnipotens Deus, in omnibus festivitatem beatorum Basilii et Gregorii celebrantibus supernas vires firmet et augeat, ut et fidei donum integrum custodiamus, et per ostensum salutis tramitem ambulemus.

[S1375ai] In nomine Iesu omne genu flectatur, caelestium, terrestrium et infernorum; et omnis lingua confiteatur quia Dominus Iesus Christus in gloria est Dei Patris.

[S1376co] Deus, qui salutem humani generis in Verbi tui incarnatione fundasti, da populis tuis misericordiam quam deposcunt, ut sciant omnes non esse, quam Unigeniti tui, nomen aliud invocandum.

[S1377so] Largitatis tuae munera deferentes, quaesumus, Domine, ut sicut Christo usque ad mortem oboedienti salutiferum nomen dedisti, ita nobis eius virtute muniri concede.

[S1378am] Domine, Dominus noster, quam admirabile est nomen tuum in universa terra!

[S1379pc] Hostia sumpta, Domine, quam Christi nomen honorantes tuae obtulimus maiestati, gratiam tuam, quaesumus, nobis infundat uberrime, ut et nostra in caelis esse scripta nomina gaudeamus.

[S1380co] Deus, qui beatum Raimundum presbyterum insignis in peccatores et in captivos misericordiae virtute decorasti, eius nobis intercessione concede, ut, a peccati servitute soluti, quae tibi sunt placita liberis mentibus exsequamur.

[S1381co] Praesta, quaesumus, omnipotens Deus, ut divinitatem Filii tui, quam beatus Hilarius episcopus constanter asseruit, et convenienter intellegere valeamus, et veraciter profiteri.

[S1382ai] Iustus ut palma florebit, sicut cedrus Libani multiplicabitur, plantatus in domo Domini, in atriis domus Dei nostri.

[S1383co] Deus, qui beato Antonio abbati tribuisti mira tibi in deserto conversatione servire, eius nobis interventione concede, ut, abnegantes nosmetipsos, te iugiter super omnia diligamus.

[S1384so] Accepta tibi sint, Domine, quaesumus, munera nostrae servitutis, pro beati Antonii commemoratione altari tuo proposita, et concede, ut, a terrenis impedimentis absoluti, te solo divites efficiamur.

[S1385am] Si vis perfectus esse, vade, vende quae habes, et da pauperibus, et sequere me, dicit Dominus.

[S1386pc] Sacramentis tuis, Domine, salubriter enutritos, cunctas fac nos semper insidias inimici superare, qui beato Antonio dedisti contra potestates tenebrarum claras referre victorias.

[S1387co] Deus, tuorum gloria sacerdotum, praesta, quaesumus, ut, beati Fabiani martyris tui interveniente suffragio, eiusdem proficiamus fidei consortio dignoque servitio.

[S1388co] Praesta nobis, quaesumus, Domine, spiritum fortitudinis, ut, glorioso exemplo beati Sebastiani martyris tui edocti, tibi magis quam hominibus oboedire discamus.

[S1389co] Omnipotens sempiterne Deus, qui infirma mundi eligis, ut fortia quaeque confundas, concede propitius, ut, qui beatae Agnetis martyris tuae natalicia celebramus, eius in fide constantiam subsequamur.

[S1390co] Omnipotens sempiterne Deus, tuum in nobis Spiritum clementer infunde, ut corda nostra ea dilectione valida potiantur, per quam sanctus martyr Vincentius omnia corporis tormenta devicit.

[S1391co] Deus, qui ad animarum salutem beatum Franciscum episcopum omnibus omnia factum esse voluisti, concede propitius, ut, eius exemplo, tuae mansuetudinem caritatis in fratrum servitio semper ostendamus.

[S1392so] Per hanc salutarem hostiam quam offerimus tibi, Domine, cor nostrum divino illo Sancti Spiritus igne succende, quo mitissimum beati Francisci animum mirabiliter inflammasti.

[S1393pc] Concede, quaesumus, omnipotens Deus, ut, per sacramenta quae sumpsimus, beati Francisci caritatem et mansuetudinem imitantes in terris, gloriam quoque consequamur in caelis.

[S1394ai] Scio cui credidi, et certus sum quia potens est depositum meum servare in illum diem, iustus iudex.

[S1395co] Deus, qui universum mundum beati Pauli apostoli praedicatione docuisti, da nobis, quaesumus, ut, cuius conversionem hodie celebramus, per eius ad te exempla gradientes, tuae simus mundo testes veritatis.

[S1396so] Illo nos, quaesumus, Domine, divina tractantes, fidei lumine Spiritus perfundat, quo beatum Paulum apostolum ad gloriae tuae propagationem iugiter collustravit.

[S1397am] In fide vivo Filii Dei, qui dilexit me, et tradidit semetipsum pro me.

[S1398pc] Sacramenta quae sumpsimus, Domine Deus noster, in nobis foveant caritatis ardorem, quo beatus apostolus Paulus vehementer accensus, omnium pertulit sollicitudinem Ecclesiarum.

[S1399ai] Annuntiate inter gentes gloriam eius, in omnibus populis mirabilia eius, quoniam magnus Dominus et laudabilis nimis.

[S1400co] Deus, qui beatos Timotheum et Titum apostolicis virtutibus decorasti, utriusque intercessione concede, ut, iuste et pie viventes in hoc saeculo, ad caelestem mereamur patriam pervenire.

[S1401so] Suscipe, quaesumus, Domine, munera populi tui, pro beatorum tuorum Timothei et Titi festivitate delata, et sincero nos corde perfice benignus acceptos.

[S1402am] Euntes in mundum universum, praedicate Evangelium: ego vobiscum sum omnibus diebus, dicit Dominus.

[S1403pc] Sacramenta quae sumpsimus, Domine Deus noster, illam nobis fidem innutriant, quam et apostolica docuit praedicatio, et beatorum Timothei et Titi sollicitudo custodivit.

[S1404co] Pietati tuae, quaesumus, Domine, nos beata virgo Angela commendare non desinat, ut, eius caritatis et prudentiae documenta sectantes, tuam valeamus doctrinam custodire et moribus profiteri.

[S1405co] Deus, qui beatum Thomam sanctitatis zelo ac sacrae doctrinae studio conspicuum effecisti, da nobis, quaesumus, et quae docuit intellectu conspicere, et quae gessit imitatione complere. Per Dominum.

[S1406co] Deus, qui beatum Ioannem presbyterum adulescentium patrem et magistrum excitasti, concede, quaesumus, ut, eodem caritatis igne succensi, animas quaerere tibique soli servire valeamus.

[S1407an] Ecce Dominus noster cum virtute veniet, ut illuminet oculos servorum suorum, alleluia.

[S1408mn] Fratres carissimi: Ante dies quadraginta celebravimus cum gaudio festum Nativitatis Domini. Hodie vero occurrit dies ille beatus, quo Iesus a Maria et Ioseph praesentatus est in templo, exterius quidem legem implens, rerum veritate autem occurrens populo suo credenti. Spiritu Sancto impulsi, in templum venerunt beati illi senes et cognoverunt Dominum eodem Spiritu illuminati, et confessi sunt eum in exsultatione. Ita et nos, congregati in unum per Spiritum Sanctum, procedamus ad domum Dei obviam Christo. Inveniemus eum et cognoscemus in fractione panis, donec veniat manifestus in gloria.

[S1409bn] Deus, omnis luminis fons et origo, qui iusto Simeoni Lumen ad revelationem gentium hodie demonstrasti, te supplices deprecamur, ut hos cereos sanctificare tua benedictione digneris, tuae plebis vota suscipiens, quae ad tui nominis laudem eos gestatura concurrit, quatenus per virtutum semitam ad lucem indeficientem pervenire mereatur.

[S1410bn] Deus, lumen verum, aeternae lucis propagator et auctor, cordibus infunde fidelium perpetui luminis claritatem, ut, quicumque in templo sancto tuo splendore praesentium luminum adornantur, ad lumen gloriae tuae feliciter valeant pervenire.

[S1411fr] Procedamus in pace ad occurrendum Domino. In nomine Christi. Amen.

[S1412an] Lumen ad revelationem gentium, et gloriam plebis tuae Israel.

[S1413rp] Nunc dimittis servum tuum, Domine, secundum verbum tuum in pace. Quia viderunt oculi mei salutare tuum. Quod parasti ante faciem omnium populorum.

[S1414an] Adorna thalamum tuum, Sion, et suscipe Regem Christum: amplectere Mariam, quae est caelestis porta: ipsa enim portat Regem gloriae novi luminis: subsistit Virgo, adducens manibus Filium ante luciferum genitum: quem accipiens Simeon in ulnas suas, praedicavit populis, Dominum eum esse vitae et mortis, et Salvatorem mundi.

[S1415ai] Suscepimus, Deus, misericordiam tuam in medio templi tui. Secundum nomen tuum, Deus, ita et laus tua in fines terrae; iustitia plena est dextera tua.

[S1416co] Omnipotens sempiterne Deus, maiestatem tuam supplices exoramus, ut, sicut Unigenitus Filius tuus hodierna die cum nostrae carnis substantia in templo est praesentatus, ita nos facias purificatis tibi mentibus praesentari.

[S1417so] Gratum tibi sit, Domine, quaesumus, exsultantis Ecclesiae munus oblatum, qui Unigenitum Filium tuum voluisti Agnum immaculatum tibi offerri pro saeculi vita.

[S1418vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Quia coaeternus hodie in templo tuus Filius praesentatus gloria Israel et lumen gentium a Spiritu declaratur. Unde et nos, Salutari tuo in gaudiis occurrentes, cum Angelis et Sanctis te laudamus, sine fine dicentes: Sanctus.

[S1419am] Viderunt oculi mei salutare tuum, quod parasti ante faciem omnium populorum.

[S1420pc] Per haec sancta quae sumpsimus, Domine, perfice in nobis gratiam tuam, qui exspectationem Simeonis implesti, ut, sicut ille mortem non vidit nisi prius Christum suscipere mereretur, ita et nos, in occursum Domini procedentes, vitam obtineamus aeternam.

[S1421co] Exaudi, Domine, populum tuum, cum beati Blasii martyris patrocinio supplicantem, ut et temporalis vitae nos tribuas pace gaudere, et aeternae reperire subsidium.

[S1422co] Deus, qui ad multas illuminandas gentes beatum Ansgarium episcopum mittere voluisti, eius nobis intercessione concede, ut in tuae veritatis luce iugiter ambulemus.

[S1423co] Indulgentiam nobis, quaesumus, Domine, beata Agatha virgo et martyr imploret, quae tibi grata semper exstitit et virtute martyrii et merito castitatis.

[S1424co] Deus, omnium fortitudo sanctorum, qui beatos martyres Paulum eiusque socios per crucem ad vitam vocare dignatus es, praesta, quaesumus, ut, eorum intercessione, fidem quam profitemur usque ad mortem fortiter teneamus.

[S1425co] Deus, Pater misericordiarum, qui beatum Hieronymum adiutorem et patrem orphanis providisti, eius nobis intercessione concede, ut spiritum adoptionis, quo filii tui nominamur et sumus, fideliter custodiamus.

[S1426co] Deus, qui beatam Iosephinam a servitute abiecta ad dignitatem filiae tuae et Christi sponsae adduxisti, da nobis, quaesumus, eius exemplo, Dominum Iesum crucifixum constanti dilectione prosequi et in caritate ad misericordiam propensos perseverare.

[S1427co] Beatae Scholasticae virginis memoriam recolentes, quaesumus, Domine, ut, eius exemplo, tibi intemerata caritate serviamus et felices obtineamus tuae dilectionis effectus.

[S1428co] Concede, misericors Deus, fragilitati nostrae praesidium, ut, qui immaculatae Dei Genetricis memoriam agimus, intercessionis eius auxilio, a nostris iniquitatibus resurgamus.

[S1429ai] Isti sunt viri sancti facti amici Dei, divinae veritatis praeconio gloriosi.

[S1430co] Deus, qui per beatos fratres Cyrillum et Methodium Slavoniae gentes illuminasti, da cordibus nostris tuae doctrinae verba percipere, nosque perfice populum in vera fide et recta confessione concordem.

[S1431so] Respice, Domine, munera quae in commemoratione beatorum Cyrilli et Methodii maiestati tuae deferimus, et praesta, ut signum fiant humanitatis novae in dilectione caritatis tibi reconciliatae.

[S1432am] Profecti sunt discipuli Evangelium praedicantes, Domino cooperante et sermonem confirmante, sequentibus signis.

[S1433pc] Deus, cunctarum Pater gentium, qui nos de uno pane et uno Spiritu participes efficis ac aeterni heredes convivii, in hac festivitate beatorum Cyrilli et Methodii benignus concede, ut tuorum multitudo filiorum, in eadem fide perseverans, unanimis regnum iustitiae et pacis aedificet.

[S1434co] Beatorum fratrum, Domine, pietatem nobis benignus infunde, qua et Dei Genetricem sunt devotissime venerati, et tuum ad te populum provexerunt.

[S1435co] Concede nos, quaesumus, omnipotens Deus, beati Petri episcopi monita et exempla sectari, ut, Christo nihil praeponentes et Ecclesiae tuae servitio semper intenti, ad aeternae lucis gaudia perducamur.

[S1436ai] Dicit Dominus Simoni Petro: Ego rogavi pro te, ut non deficiat fides tua, et tu aliquando conversus confirma fratres tuos.

[S1437co] Praesta, quaesumus, omnipotens Deus, ut nullis nos permittas perturbationibus concuti, quos in apostolicae confessionis petra solidasti.

[S1438so] Ecclesiae tuae, quaesumus, Domine, preces et hostias benignus admitte, ut, beato Petro pastore, ad aeternam perveniat hereditatem, quo docente fidei tenet integritatem.

[S1439am] Dixit Petrus ad Iesum: Tu es Christus, Filius Dei vivi. Respondit Iesus: Tu es Petrus, et super hanc petram aedificabo Ecclesiam meam.

[S1440pc] Deus, qui nos, beati Petri apostoli festivitatem celebrantes, Christi Corporis et Sanguinis communione vegetasti, praesta, quaesumus, ut hoc redemptionis commercium sit sacramentum nobis unitatis et pacis.

[S1441co] Deus universae creaturae, qui beatum Polycarpum episcopum in numerum martyrum dignatus es aggregare, eius nobis intercessione concede, ut, cum illo partem calicis Christi capientes, per Spiritum Sanctum in vitam resurgamus aeternam.

[S1442co] Deus omnipotens, cui servire regnare est, concede nobis, beati Casimiri intercedente suffragio, tibi in sanctitate et iustitia perpetuo famulari.

[S1443ai] Gaudent in caelis animae Sanctorum, qui Christi vestigia sunt secuti; et quia pro eius amore sanguinem suum fuderunt, ideo cum Christo exsultant sine fine.

[S1444co] Deus, cuius urgente caritate beatae martyres Perpetua et Felicitas tormentum mortis, contempto persecutore, vicerunt, da nobis, quaesumus, earum precibus, ut in tua semper dilectione crescamus.

[S1445so] Hodiernum, Domine, sacrificium laetanter offerimus, quo, beatarum Perpetuae et Felicitatis caelestem victoriam recensentes, et tua magnalia praedicamus, et nos acquisisse gaudemus suffragia gloriosa.

[S1446am] In mortem tradimur propter Iesum, ut et vita Iesu manifestetur in carne nostra mortali.

[S1447pc] Sumentes, Domine, gaudia sempiterna de participatione sacramenti, et de memoria beatarum Perpetuae et Felicitatis suppliciter deprecamur, ut, quae sedula servitute, donante te, gerimus, dignis sensibus tuo munere capiamus.

[S1448co] Deus, qui beatum Ioannem misericordiae spiritu perfudisti, da, quaesumus, ut, caritatis opera exercentes, inter electos in regno tuo inveniri mereamur.

[S1449co] Deus, qui nobis in beata Francisca singulare dedisti coniugalis et monasticae conversationis exemplar, fac nos tibi perseveranter deservire, ut in omnibus vitae adiunctis te conspicere et sequi valeamus.

[S1450co] Deus, qui ad praedicandam Hiberniae populis gloriam tuam beatum Patricium episcopum providisti, eius meritis et intercessione concede, ut, qui christiano nomine gloriantur, tua mirabilia hominibus iugiter annuntient.

[S1451co] Deus, qui Ecclesiam tuam per beatum Cyrillum episcopum ad mysteria salutis profundius attingenda mirabiliter adduxisti, da nobis, eius intercessione, Filium tuum ita agnoscere, ut vitam abundantius habeamus.

[S1452ai] Ecce fidelis servus et prudens, quem constituit Dominus super familiam suam.

[S1453co] Praesta, quaesumus, omnipotens Deus, ut humanae salutis mysteria, cuius primordia beati Ioseph fideli custodiae commisisti, Ecclesia tua, ipso intercedente, iugiter servet implenda.

[S1454so] Quaesumus, Domine, ut, sicut beatus Ioseph Unigenito tuo, nato de Maria Virgine, pia devotione deserviit, ita et nos mundo corde tuis altaribus mereamur ministrare.

[S1455vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Et te in sollemnitate beati Ioseph debitis magnificare praeconiis, benedicere et praedicare. Qui et vir iustus, a te Deiparae Virgini Sponsus est datus, et fidelis servus ac prudens, super Familiam tuam est constitutus, ut Unigenitum tuum, Sancti Spiritus obumbratione conceptum, paterna vice custodiret, Iesum Christum Dominum nostrum. Per quem maiestatem tuam laudant Angeli, adorant Dominationes, tremunt Potestates. Caeli caelorumque Virtutes, ac beata Seraphim, socia exsultatione concelebrant. Cum quibus et nostras voces ut admitti iubeas, deprecamur, supplici confessione dicentes: Sanctus.

[S1456am] Euge, serve bone et fidelis: intra in gaudium Domini tui.

[S1457pc] Familiam tuam, quaesumus, Domine, quam de beati Ioseph sollemnitate laetantem ex huius altaris alimonia satiasti, perpetua protectione defende, et tua in ea propitiatus dona custodi.

[S1458co] Deus, qui Ecclesiam tuam beati Turibii episcopi apostolico curis zeloque veritatis auxisti, concede, ut populus tibi sacratus fidei et sanctitatis nova semper incrementa suscipiat.

[S1459ai] Dominus ingrediens mundum dixit: Ecce venio ut faciam, Deus, voluntatem tuam.

[S1460co] Deus, qui Verbum tuum in utero Virginis Mariae veritatem carnis humanae suscipere voluisti, concede, quaesumus, ut, qui Redemptorem nostrum Deum et hominem confitemur, ipsius etiam divinae naturae mereamur esse consortes.

[S1461so] Ecclesiae tuae munus, omnipotens Deus, dignare suscipere, ut, quae in Unigeniti tui incarnatione primordia sua constare cognoscit, ipsius gaudeat hac sollemnitate celebrare mysteria.

[S1462vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quem inter homines et propter homines nasciturum, Spiritus Sancti obumbrante virtute, a caelesti nuntio Virgo fidenter audivit et immaculatis visceribus amanter portavit, ut et promissiones filiis Israel perficeret veritas, et gentium exspectatio pateret ineffabiliter adimplenda. Per quem maiestatem tuam adorat exercitus Angelorum, ante conspectum tuum in aeternitate laetantium. Cum quibus et nostras voces ut admitti iubeas, deprecamur, socia exsultatione dicentes: Sanctus.

[S1463am] Ecce Virgo concipiet et pariet Filium, et vocabitur nomen eius Emmanuel.

[S1464pc] In mentibus nostris, quaesumus, Domine, verae fidei sacramenta confirma, ut, qui conceptum de Virgine Deum verum et hominem confitemur, per eius salutiferae resurrectionis potentiam, ad aeternam mereamur pervenire laetitiam.

[S1465co] Deus, humilium celsitudo, qui beatum Franciscum sanctorum tuorum gloria sublimasti, tribue, quaesumus, ut, eius meritis et exemplo, promissa humilibus praemia feliciter consequamur.

[S1466co] Exaudi, quaesumus, Domine, preces nostras, quas in beati Isidori commemoratione deferimus, ut Ecclesia tua eius intercessionibus adiuvetur, cuius caelestibus instruitur disciplinis.

[S1467co] Deus, qui beatum Vincentium presbyterum ministrum praedicationis evangelicae suscitasti, praesta, quaesumus, ut, quem venturum iudicem nuntiavit in terris, beati videamus regnantem in caelis.

[S1468co] Deus, qui ad christianam iuventutem educandam beatum Ioannem Baptistam elegisti, excita in Ecclesia tua institutores, qui humanae et christianae iuvenum disciplinae toto corde sese devoveant.

[S1469co] Deus, pro cuius honore beatus episcopus Stanislaus gladiis persecutorum occubuit, praesta, quaesumus, ut fortes in fide usque ad mortem perseverare valeamus.

[S1470co] Da nobis, quaesumus, omnipotens Deus, adversa mundi invicta mentis constantia tolerare, qui beatum Martinum papam et martyrem nec minis terreri nec poenis passus es superari.

[S1471co] Deus, qui beato Anselmo episcopo dedisti alta sapientiae tuae quaerere et docere, fac ita fidem tuam intellectui nostro subvenire, ut cordi dulce sapiant quae nobis credenda mandasti.

[S1472co] Magnificantes, Domine, potentiam tuam, supplices exoramus, ut, sicut beatus Georgius dominicae fuit passionis imitator, ita sit fragilitatis nostrae promptus adiutor.

[S1473co] Deus, qui beatum Adalbertum episcopum zelo animarum succensum martyrio coronasti, eius interveniente suffragio concede, ut nec pastoribus oboedientia gregis nec gregi desit cura pastorum.

[S1474co] Deus, qui beatum Fidelem, amore tuo succensum, in fidei propagatione martyrii palma decorare dignatus es, ipso interveniente, concede, ut, in caritate fundati, cum illo resurrectionis Christi virtutem cognoscere mereamur.

[S1475ai] Euntes in mundum universum, praedicate Evangelium omni creaturae, alleluia.

[S1476co] Deus, qui beatum Marcum evangelistam tuum evangelicae praedicationis gratia sublimasti, tribue, quaesumus, eius nos eruditione ita proficere, ut vestigia Christi fideliter sequamur.

[S1477so] Gloriam beati Marci venerantes, tibi, Domine, hostias laudis offerimus, teque suppliciter deprecamur, ut evangelica praedicatio in Ecclesia tua iugiter perseveret.

[S1478am] Ecce ego vobiscum sum omnibus diebus usque ad consummationem saeculi, dicit Dominus, alleluia.

[S1479pc] Praesta, quaesumus, omnipotens Deus, ut, quod de sancto altari tuo accepimus, nos sanctificet, et in fide Evangelii, quod beatus Marcus praedicavit, fortes efficiat.

[S1480co] Deus, qui ad dilatandam Ecclesiam tuam beatum Petrum martyrio coronasti, da nobis, in his paschalibus gaudiis, ita Christi mortui et resurgentis mysteria frequentare, ut novitatis vitae testes esse mereamur.

[S1481co] Deus, qui gressus beati Ludovici Mariae, presbyteri, in viam salutis et dilectionis Christi, beata Virgine comitante, dirigere voluisti, da ut, eius exemplo, tui amoris mysteria meditantes Ecclesiam tuam aedificare indefesse studeamus.

[S1482co] Omnipotens aeterne Deus, qui sanctum Ludovicum Mariam presbyterum plenae Christo Filio tuo deditionis per eius beatae Matris manus eximium testem et magistrum effecisti, concede nobis, ut, eandem spiritalem viam sectantes, regnum tuum iugiter extendere valeamus.

[S1483ai] Haec est virgo sapiens, et una de numero prudentum, quae obviam Christo cum lampade accensa exiit, alleluia.

[S1484co] Deus, qui beatam Catharinam in contemplatione dominicae passionis et in Ecclesiae tuae servitio divino amore flagrare fecisti, ipsius intercessione concede, ut populus tuus, Christi mysterio sociatus, in eius gloriae revelatione semper exsultet.

[S1485so] Suscipe, Domine, quam in beatae Catharinae commemoratione offerimus hostiam salutarem, ut, illius monitis eruditi, tibi vero Deo ferventius gratias agere valeamus.

[S1486am] Si in luce ambulamus, sicut Deus est in luce, societatem habemus ad invicem, et sanguis Iesu Christi, Filii eius, emundat nos ab omni peccato, alleluia.

[S1487pc] Aeternitatem nobis, Domine, conferat, qua pasti sumus, mensa caelestis, quae beatae Catharinae vitam etiam aluit temporalem.

[S1488co] Deus, qui in Ecclesia tua beatum Pium papam ad fidem tuendam ac te dignius colendum providus excitasti, da nobis, ipso intercedente, vivida fide ac fructuosa caritate mysteriorum tuorum esse participes.

[S1489ai]
Beatus omnis qui timet Dominum, qui ambulat in viis eius. Labores manuum tuarum manducabis, beatus es, et bene tibi erit, alleluia.

[S1490co] Rerum conditor, Deus, qui legem laboris humano generi statuisti, concede propitius, ut, beati Ioseph exemplo et patrocinio, opera perficiamus quae praecipis, et praemia consequamur quae promittis.

[S1491so] Fons totius misericordiae, Deus, respice ad munera nostra, quae in commemoratione beati Ioseph maiestati tuae deferimus, et concede propitius, ut oblata dona fiant praesidia supplicantium.

[S1492am] Omne quodcumque facitis in verbo aut in opere, omnia in nomine Domini, gratias agentes Deo, alleluia.

[S1493pc] Caelestibus, Domine, pasti deliciis, supplices te rogamus, ut, exemplo beati Ioseph, caritatis tuae in cordibus nostris testimonia gerentes, perpetuae pacis fructu iugiter perfruamur.

[S1494ai] In medio Ecclesiae aperuit os eius, et implevit eum Dominus spiritu sapientiae et intellectus, stolam gloriae induit eum, alleluia.

[S1495co] Omnipotens sempiterne Deus, qui beatum Athanasium episcopum divinitatis Filii tui propugnatorem eximium suscitasti, concede propitius, ut, eius doctrina et protectione gaudentes, in tui cognitione et amore sine intermissione crescamus.

[S1496so] Respice, Domine, munera quae tibi in commemoratione beati Athanasii perhibemus, eiusque fidem profitentibus illibatam tuae testificatio veritatis prosit ad salutem.

[S1497am] Fundamentum aliud nemo potest ponere, praeter id quod positum est, quod est Christus Iesus,

[S1498pc] Da nobis, quaesumus, omnipotens Deus, ut Unigeniti tui vera divinitas, quam cum beato Athanasio firmiter confitemur, per hoc sacramentum vivificet nos semper et muniat.

[S1499ai] Isti sunt viri sancti, quos elegit Dominus in caritate non ficta, et dedit illis gloriam sempiternam, alleluia.

[S1500co] Deus, qui nos annua apostolorum Philippi et Iacobi festivitate laetificas, da nobis, ipsorum precibus, in Unigeniti tui passione et resurrectione consortium, ut ad perpetuam tui visionem pervenire mereamur.

[S1501so] Suscipe, Domine, munera quae pro apostolorum Philippi et Iacobi festivitate deferimus, et immaculatam nobis religionem mundamque largire.

[S1502am] Domine, ostende nobis Patrem, et sufficit nobis. Philippe, qui videt me, videt et Patrem meum, alleluia.

[S1503pc] Purifica, quaesumus, Domine, mentes nostras per haec sancta quae sumpsimus, ut, cum apostolis Philippo et Iacobo te in Filio contemplantes, vitam habere mereamur aeternam.

[S1504co] Praesta, quaesumus, omnipotens Deus, ut, qui gloriosos martyres Nereum et Achilleum fortes in sua confessione cognovimus, pios apud te in nostra intercessione sentiamus.

[S1505co] Laetetur Ecclesia tua, Deus, beati Pancratii martyris confisa suffragiis, atque, eius precibus gloriosis, et devota permaneat, et secura consistat.

[S1506co] Deus, qui Genetricem Filii tui Matrem quoque nostram constituisti, concede nobis, ut, in paenitentia et oratione pro mundi salute perseverantes, in dies valeamus regnum Christi efficacius promovere.

[S1507ai] Non vos me elegistis, dicit Dominus, sed ego elegi vos, ut eatis, et fructum afferatis, et fructus vester maneat (T.P. alleluia).

[S1508co] Deus, qui beatum Matthiam Apostolorum collegio sociasti, eius nobis interventione concede, ut, dilectionis tuae sorte gaudentes, cum electis numerari mereamur.

[S1509so] Ecclesiae tuae, Domine, munera pro festo beati Matthiae reverenter oblata suscipias, et per ea nos gratiae tuae virtute confirma.

[S1510am] Hoc est praeceptum meum, ut diligatis invicem, sicut dilexi vos, dicit Dominus (T.P. alleluia).

[S1511pc] Familiam tuam, Domine, divinis ne cesses replere muneribus, ut, beato Matthia pro nobis intercedente, in partem sortis sanctorum in lumine nos digneris accipere.

[S1512co] Deus, fidelium remunerator animarum, qui hunc diem beati Ioannis papae martyrio consecrasti, exaudi preces populi tui, et praesta, ut, qui eius merita veneramur, fidei constantiam imitemur.

[S1513co] Deus, qui beato Bernardino presbytero sancti nominis Iesu amorem eximium tribuisti, eius meritis precibusque concede, ut spiritus nos semper tuae dilectionis accendat.

[S1514co] Omnipotens aeterne Deus, qui beatos Christophorum, presbyterum, et socios Christo Regi usque ad martyrium fideles effecisti, eorum intercessione nobis concede, ut, in verae fidei perseverantes confessione amoris tui mandatis semper inhaerere valeamus.

[S1515co] Largire nobis, quaesumus, Domine, sapientiam crucis et fortitudinem quibus beatam Ritam ditare dignatus es, ut, in tribulatione cum Christo patientes, paschali eius mysterio intimius participare valeamus.

[S1516co] Deus, qui Ecclesiam tuam beati Bedae presbyteri eruditione clarificas, famulis tuis concede propitius et eius semper illustrari sapientia, et meritis adiuvari.

[S1517co] Da Ecclesiae tuae, quaesumus, Domine, spiritum fortitudinis zelumque iustitiae, quibus beatum Gregorium papam clarescere voluisti, ut, iniquitatem reprobans, quaecumque recta sunt libera exerceat caritate.

[S1518co] Deus, virginitatis amator, qui beatam Mariam Magdalenam virginem, tuo amore succensam, donis caelestibus decorasti, da ut, quam hodie veneramur, eius puritatis caritatisque imitemur exempla.

[S1519ai] Caritas Dei diffusa est in cordibus nostris, per inhabitantem Spiritum eius in nobis (T.P. alleluia).

[S1520co] Deus, qui fideles tibi servos sanctitatis gloria sublimare non desistis, concede propitius, ut illo nos igne Spiritus Sanctus inflammet, quo beati Philippi cor mirabiliter penetravit.

[S1521so] Hostiam tibi laudis offerentes, quaesumus, Domine, ut, beati Philippi exemplo, ad tui nominis gloriam proximique servitium hilares nos semper praestemus.

[S1522am] Sicut dilexit me Pater, et ego dilexi vos, dicit Dominus; manete in dilectione mea (T.P. alleluia).

[S1523pc] Caelestibus, Domine, pasti deliciis, quaesumus, ut, beati Philippi imitatione, semper eadem, per quae veraciter vivimus, appetamus.

[S1524co] Deus, qui beati Augustini episcopi praedicatione Anglorum gentes ad Evangelium perduxisti, tribue, quaesumus, ut eius laborum fructus in Ecclesia tua perenni fecunditate persistant.

[S1525ai] Venite, audite, et narrabo, omnes qui timetis Deum, quanta fecit Dominus animae meae (T.P. alleluia).

[S1526co] Omnipotens sempiterne Deus, qui beatam Virginem Mariam, Filium tuum gestantem, ad visitandam Elisabeth inspirasti, praesta, quaesumus, ut, afflanti Spiritui obsequentes, cum ipsa te semper magnificare possimus.

[S1527so] Maiestati tuae, Domine, hoc nostrum gratum sit sacrificium salutare, sicut beatissimae Unigeniti tui Matris habuisti acceptabilem caritatem. Per Christum.

[S1528am] Beatam me dicent omnes generationes, quia fecit mihi magna qui potens est, et sanctum nomen eius (T.P. alleluia).

[S1529pc] Magnificet te, Deus, Ecclesia tua qui tuis fecisti magna fidelibus, et, quem latentem beatus Ioannes cum exsultatione praesensit, eundem semper viventem cum laetitia in hoc percipiat sacramento.

[S1530ai] Exsultabit cor meum in salutari tuo, cantabo Domino, qui bona tribuit mihi.

[S1531co] Deus, qui in Corde beatae Mariae Virginis dignum Sancti Spiritus habitaculum praeparasti, concede propitius, ut, eiusdem Virginis intercessione, tuae gloriae templum inveniri mereamur.

[S1532so] Preces, Domine, tuorum respice oblationesque fidelium in beatae Mariae Dei Genetricis commemoratione delatas, ut tibi gratae sint, et nobis conferant tuae propitiationis auxilium.

[S1533am] Maria conservabat omnia verba haec, conferens in corde suo.

[S1534pc] Redemptionis aeternae participes effecti, quaesumus, Domine, ut, qui Genetricis Filii tui memoriam agimus, et de gratiae tuae plenitudine gloriemur, et salvationis continuum sentiamus augmentum.

[S1535ai]
Narraverunt mihi iniqui fabulationes, sed non ut lex tua: ego autem loquebar de testimoniis tuis in conspectu regum, et non confundebar (T.P. alleluia).

[S1536co] Deus, qui per stultitiam crucis eminentem Iesu Christi scientiam beatum Iustinum martyrem mirabiliter docuisti, eius nobis intercessione concede, ut, errorum circumventione depulsa, fidei firmitatem consequamur.

[S1537so] Concede nobis, quaesumus, Domine, haec digne frequentare mysteria, quae beatus Iustinus strenua virtute defendit.

[S1538am] Non iudicavi me scire aliquid inter vos, nisi Iesum Christum, et hunc crucifixum (T.P. alleluia).

[S1539pc] Caelesti alimonia refecti, supplices te, Domine, deprecamur, ut, beati Iustini martyris monitis obsequentes, de acceptis donis semper in gratiarum actione maneamus.

[S1540co] Deus, qui nos sanctorum martyrum Marcellini et Petri confessione gloriosa circumdas et protegis, praesta nobis ex eorum imitatione proficere, et oratione fulciri.

[S1541ai] Tamquam aurum in fornace probavit electos Dominus, et quasi holocausti hostiam accepit illos; et in tempore erit respectus illorum: quoniam donum et pax erit electis Dei (T.P. alleluia).

[S1542co] Deus, qui sanguinem martyrum semen christianorum esse fecisti, concede propitius, ut tuae ager Ecclesiae, beatorum Caroli eiusque sociorum cruore rigatus, in amplam tibi messem iugiter fecundetur.

[S1543so] Hostias tibi, Domine, offerimus, suppliciter exorantes, ut, sicut beatis martyribus magis mori quam peccare tribuisti, ita nos facias, tibi soli deditos, altari tuo ministrare.

[S1544am] Pretiosa in conspectu Domini; mors sanctorum eius (T.P. alleluia).

[S1545pc] Sumpsimus, Domine, divina sacramenta, sanctorum martyrum tuorum victoriam recolentes: quaesumus, ut, quae ipsis ad perferenda supplicia contulerunt, ea nobis inter adversa praebeant fidei caritatisque constantiam.

[S1546co] Sanctus martyr, Domine, Bonifatius pro nobis interventor exsistat, ut fidem, quam ore docuit et sanguine consignavit, firmiter teneamus, et operibus profiteamur confidenter.

[S1547co] Deus, qui beatum Norbertum episcopum Ecclesiae tuae oratione ac pastorali zelo ministrum eximium effecisti, praesta, quaesumus, ut, eius interveniente suffragio, fidelium grex pastores iuxta cor tuum et salutaria pascua semper inveniat.

[S1548co] Cordibus nostris, quaesumus, Domine, Spiritum Sanctum benignus infunde, cuius afflatu beatus Ephraem diaconus in tuis mysteriis decantandis exsultavit, eiusque virtute tibi soli deserviit.

[S1549ai] Beatus iste sanctus, qui annumerari meruit inter Apostolos: erat enim vir bonus, et plenus Spiritu Sancto et fide (T.P. alleluia).

[S1550co] Deus, qui beatum Barnabam, plenum fide et Spiritu Sancto, ad gentium conversionem segregare praecepisti, concede, ut Evangelium Christi, quod strenue praedicavit, ore et opere fideliter nuntietur.

[S1551so] Oblata munera, quaesumus, Domine, tua benedictione sanctifica, quae, te donante, nos flamma tuae dilectionis accendant, per quam beatus Barnabas lumen Evangelii gentibus apportavit.

[S1552am] Iam non dicam vos servos, quia servus nescit quid faciat Dominus eius. Vos autem dixi amicos, quia omnia quaecumque audivi a Patre meo, nota feci vobis (T.P. alleluia).

[S1553pc] Aeternae pignus vitae capientes, te, Domine, humiliter imploramus, ut, quod pro beati Barnabae apostoli memoria in imagine gerimus sacramenti, manifesta perceptione sumamus.

[S1554co] Omnipotens sempiterne Deus, qui populo tuo beatum Antonium praedicatorem insignem dedisti, atque in necessitatibus intercessorem, concede, ut, eius auxilio, christianae vitae documenta sectantes, in omnibus adversitatibus te subvenientem sentiamus.

[S1555co] Deus, qui per beatum Romualdum in Ecclesia tua eremiticam vitam renovasti, concede, ut, nosmetipsos abnegantes et Christum sequentes, feliciter ad caelestia regna mereamur ascendere.

[S1556ai] Innocens manibus et mundo corde ascendet in montem Domini, et stabit in loco sancto eius.

[S1557co] Deus, caelestium auctor donorum, qui in beato Aloisio miram vitae innocentiam cum paenitentia sociasti, eius meritis et intercessione concede, ut, innocentem non secuti, paenitentem imitemur.

[S1558so] Caelesti convivio fac nos, Domine, exemplo beati Aloisii, nuptiali veste semper indutos accumbere, ut ex huius participatione mysterii gratia tua divites efficiamur.

[S1559am] Panem caeli dedit eis, panem Angelorum manducavit homo.

[S1560pc] Angelorum esca nutritos, fac nos, Domine, pura tibi conversatione servire, et, eius quem hodie colimus exemplo, in gratiarum semper actione manere.

[S1561co] Deus, qui beatum Paulinum episcopum paupertatis amore et pastorali sollicitudine clarescere voluisti, concede propitius, ut, cuius merita celebramus, caritatis imitemur exempla.

[S1562co] Deus, qui verae fidei formam in martyrio consummasti, concede propitius, ut, beatorum Ioannis et Thomae intercessione roborati, fidem, quam ore profitemur, testimonio vitae confirmemus.

[S1563ai] Hic erit magnus coram Domino, et Spiritu Sancto replebitur adhuc ex utero matris suae, et multi in nativitate eius gaudebunt.

[S1564co] Praesta, quaesumus, omnipotens Deus, ut familia tua per viam salutis incedat, et, beati Ioannis Praecursoris hortamenta sectando, ad eum quem praedixit, secura perveniat, Dominum nostrum Iesum Christum.

[S1565so] Munera populi tui, Domine, propitius intende, in beati Ioannis Baptistae sollemnitate delata, et praesta, ut, quae mysterio gerimus, debitae servitutis actione sectemur.

[S1566am] Benedictus Dominus Deus Israel, quia visitavit et fecit redemptionem plebis suae.

[S1567pc] Sacris dapibus satiatos, beati Ioannis Baptistae nos, Domine, praeclara comitetur oratio, et, quem Agnum nostra ablaturum crimina nuntiavit, ipsum Filium tuum poscat nobis fore placatum.

[S1568ai] Fuit homo missus a Deo, cui nomen erat Ioannes. Hic venit, ut testimonium perhiberet de lumine, parare Domino plebem perfectam.

[S1569co] Deus, qui beatum Ioannem Baptistam suscitasti, ut perfectam plebem Christo Domino praepararet, da populis tuis spiritalium gratiam gaudiorum, et omnium fidelium mentes dirige in viam salutis et pacis.

[S1570so] Tua, Domine, muneribus altaria cumulamus, illius nativitatem honore debito celebrantes, qui Salvatorem mundi et cecinit affuturum, et adesse monstravit.

[S1571vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. In cuius Praecursore beato Ioanne tuam magnificentiam collaudamus, quem inter natos mulierum honore praecipuo consecrasti. Qui cum nascendo multa gaudia praestitisset, et nondum editus exsultasset ad humanae salutis adventum, ipse solus omnium prophetarum Agnum redemptionis ostendit. Sed et sanctificandis etiam aquae fluentis ipsum baptismatis lavit auctorem, et meruit fuso sanguine supremum illi testimonium exhibere. Et ideo, cum caelorum virtutibus, in terris te iugiter praedicamus, maiestati tuae sine fine clamantes: Sanctus.

[S1572am] Per viscera misericordiae Dei nostri, visitavit nos Oriens ex alto.

[S1573pc] Caelestis Agni convivio refecti, quaesumus, Domine, ut Ecclesia tua, sumens de beati Ioannis Baptistae generatione laetitiam, quem ille praenuntiavit venturum, suae regenerationis cognoscat auctorem.

[S1574co] Deus, qui beatum Cyrillum episcopum divinae maternitatis beatissimae Virginis Mariae assertorem invictum effecisti, concede, ut, qui vere eam Genetricem Dei credimus, per incarnationem Christi Filii tui salvemur.

[S1575ai] Lex veritatis fuit in ore eius et iniquitas non est inventa in labiis eius; in pace et in aequitate ambulavit mecum, et multos avertit ab iniquitate.

[S1576co] Deus, qui beato Irenaeo episcopo tribuisti, ut veritatem doctrinae pacemque Ecclesiae feliciter confirmaret, concede, quaesumus, eius intercessione, ut nos, fide et caritate renovati, ad unitatem concordiamque fovendam semper simus intenti.

[S1577so] Gloriam tibi, Domine, conferat sacrificium, quod in natali beati Irenaei tibi laetanter offerimus, et praebeat nobis diligere veritatem, ut et inviolatam Ecclesiae fidem teneamus, et stabilem unitatem.

[S1578am] Manete in me, et ego in vobis, dicit Dominus. Qui manet in me et ego in eo, hic fert fructum multum.

[S1579pc] Per haec sacra mysteria, quaesumus, Domine, da nobis fidei miseratus augmentum, ut, quae beatum Irenaeum episcopum usque ad mortem retenta glorificat, nos etiam iustificet veraciter hanc sequentes.

[S1580ai] Petrus apostolus et Paulus doctor gentium, ipsi nos docuerunt legem tuam, Domine.

[S1581co] Da nobis, quaesumus, Domine Deus noster, beatorum apostolorum Petri et Pauli intercessionibus sublevari, ut, per quos Ecclesiae tuae superni muneris rudimenta donasti, per eos subsidia perpetuae salutis impendas.

[S1582so] Munera, Domine, tuis altaribus adhibemus, de beatorum apostolorum Petri et Pauli sollemnitatibus gloriantes, ut quantum sumus de nostro merito formidantes, tantum de tua benignitate gloriemur salvandi.

[S1583am] Simon Ioannis, diligis me plus his? Domine, tu omnia nosti; tu scis, Domine, quia amo te.

[S1584pc] Caelestibus sacramentis, quaesumus, Domine, fideles tuos corrobora, quos Apostolorum doctrina illuminasti. Per Christum.

[S1585ai] Isti sunt qui, viventes in carne, plantaverunt Ecclesiam sanguine suo: calicem Domini biberunt, et amici Dei facti sunt.

[S1586co] Deus, qui huius diei venerandam sanctamque laetitiam in apostolorum Petri et Pauli sollemnitate tribuisti, da Ecclesiae tuae eorum in omnibus sequi praeceptum, per quos religionis sumpsit exordium.

[S1587so] Hostiam, Domine, quam nomini tuo exhibemus sacrandam, apostolica prosequatur oratio, nosque tibi reddat in sacrificio celebrando devotos.

[S1588vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus. Quia nos beati apostoli Petrus et Paulus tua dispositione laetificant: hic princeps fidei confitendae, ille intellegendae clarus assertor; hic reliquiis Israel instituens Ecclesiam primitivam, ille magister et doctor gentium vocandarum. Sic diverso consilio unam Christi familiam congregantes, par mundo venerabile, una corona sociavit. Et ideo cum Sanctis et Angelis universis te collaudamus, sine fine dicentes: Sanctus.

[S1589am] Dixit Petrus ad Iesum: Tu es Christus, Filius Dei vivi. Respondit Iesus: Tu es Petrus, et super hanc petram aedificabo Ecclesiam meam.

[S1590pc] Da nobis, Domine, hoc sacramento refectis, ita in Ecclesia conversari, ut, perseverantes in fractione panis Apostolorumque doctrina, cor unum simus et anima una, tua caritate firmati.

[S1591co] Deus, qui Romanae Ecclesiae copiosa primordia martyrum sanguine consecrasti, concede, quaesumus, ut firma virtute de tanti agone certaminis solidemur, et pia semper victoria gaudeamus.

[S1592ai] Deus meus es tu, et confitebor tibi: Deus meus es tu, et exaltabo te; confitebor tibi, quoniam factus es mihi in salutem.

[S1593co] Da nobis, omnipotens Deus, beati Thomae apostoli festivitate gloriari, ut eius semper et patrociniis sublevemur, et vitam credentes habeamus in nomine eius, quem ipse Dominum agnovit, Iesum Christum Filium tuum.

[S1594so] Debitum tibi, Domine, nostrae reddimus servitutis, suppliciter exorantes, ut in nobis tua munera tuearis, qui in confessione beati Thomae apostoli laudis tibi hostias immolamus.

[S1595am] Mitte manum tuam, et cognosce loca clavorum: et noli esse incredulus, sed fidelis.

[S1596pc] Deus, cuius Unigeniti Corpus in hoc veraciter suscipimus sacramento, praesta, quaesumus, ut, quem Dominum Deumque nostrum cum apostolo Thoma fide cognoscimus, ipsum opere quoque profiteamur et vita.

[S1597co] Deus, auctor pacis et amator caritatis, qui beatam Elisabeth mira dissidentes componendi gratia decorasti, da nobis, eius intercessione, pacis opera exercere, ut filii Dei nominari possimus.

[S1598co] Da nobis, Domine, ut supereminentem Iesu Christi scientiam spiritu Pauli apostoli prosequamur, qua beatus Antonius Maria eruditus verbum salutis in Ecclesia tua iugiter praedicavit.

[S1599co] Deus, innocentiae auctor et castitatis amator, qui famulae tuae Mariae iuvenili aetate martyrii gratiam contulisti, da nobis, quaesumus, eius intercessione, in tuis mandatis constantiam, qui dedisti certanti virgini coronam.

[S1600co] Deus, qui per sanctorum martyrum Augustini et sociorum confessionem Ecclesiam tuam mirabili dispensatione roborasti, concede, ut populus tuus, missioni sibi creditae fidelis, et incrementa libertatis accipiat et veritatem coram mundo testificetur.

[S1601ai] Fuit vir vitae venerabilis, gratia Benedictus et nomine, qui relicta domo rebusque patris, soli Deo placere cupiens, sanctae conversationis habitum quaesivit.

[S1602co] Deus, qui beatum Benedictum abbatem in schola divini servitii praeclarum constituisti magistrum, tribue, quaesumus, ut, amori tuo nihil praeponentes, viam mandatorum tuorum dilatato corde curramus.

[S1603so] Haec sancta, Domine, quae in beati Benedicti celebritate deferimus, respice benignus, et praesta, ut nos, eius exemplis te quaerentes, unitatis in tuo servitio pacisque dona consequi mereamur.

[S1604am] Fidelis servus et prudens, quem constituit Dominus super familiam suam, ut det illis in tempore tritici mensuram.

[S1605pc] Accepto pignore vitae aeternae, te, Domine, suppliciter deprecamur, ut, beati Benedicti monitis obsequentes, operi tuo fideliter serviamus, et fratres ferventi diligamus caritate.

[S1606co] Deus, qui beatum Henricum, gratiae tuae ubertate praeventum, e terreni cura regiminis ad superna mirabiliter erexisti, eius nobis intercessione largire, ut inter mundanas varietates puris ad te mentibus festinemus.

[S1607co] Deus, qui sanctum Camillum presbyterum caritatis in infirmos singulari gratia decorasti, eius meritis, spiritum nobis tuae dilectionis infunde, ut, tibi in fratribus servientes, ad te, hora exitus nostri, securi transire possimus.

[S1608co] Da, quaesumus, omnipotens Deus, ut, beati Bonaventurae episcopi natalicia celebrantes, et ipsius proficiamus eruditione praeclara, et caritatis ardorem iugiter aemulemur.

[S1609co] Adiuvet nos, quaesumus, Domine, gloriosae Virginis Mariae intercessio veneranda, ut, eius muniti praesidiis, ad montem, qui Christus est, pervenire valeamus.

[S1610co] Dirige fideles tuos, Domine, in viam salutis aeternae, quam beatus Apollinaris episcopus doctrina et martyrio monstravit, et fac nos, eodem intercedente, sic in mandatis tuis perseverare, ut cum ipso coronari mereamur.

[S1611co] Deus, qui pro nominis tui gloria et animarum salute beato Laurentio presbytero spiritum consilii et fortitudinis contulisti, da nobis, in eodem spiritu, et agenda cognoscere, et cognita, eius intercessione, perficere.

[S1612ai] Dixit Dominus Mariae Magdalenae: Vade ad fratres meos, et dic eis: Ascendo ad Patrem meum et Patrem vestrum, Deum meum et Deum vestrum.

[S1613co] Deus, cuius Unigenitus Mariae Magdalenae ante omnes gaudium nuntiandum paschale commisit, praesta, quaesumus, ut, eius intercessione et exemplo, Christum viventem praedicemus, et in gloria tua regnantem videamus.

[S1614so] Suscipe, Domine, munera in beatae Mariae Magdalenae commemoratione exhibita, cuius caritatis obsequium Unigenitus Filius tuus clementer suscepit impensum.

[S1615am] Caritas Christi urget nos, ut et qui vivunt iam non sibi vivant, sed ei qui pro ipsis mortuus est et resurrexit.

[S1616pc] Mysteriorum tuorum, Domine, sancta perceptio perseverantem illum nobis amorem infundat, quo beata Maria Magdalena Christo magistro suo indesinenter adhaesit.

[S1617co] Deus, qui beatam Birgittam per varias vitae semitas duxisti eamque sapientiam crucis in contemplatione passionis Filii tui mirabiliter docuisti, concede nobis, ut, digne in tua vocatione ambulantes, te in omnibus quaerere valeamus.

[S1618co] Deus, qui sanctum Sarbelium, presbyterum, ad singularem pugnam eremi vocasti et omni genere pietatis imbuisti, concede nobis, quaesumus, ut imitatores dominicae passionis effecti regno eius mereamur esse consortes.

[S1619ai] Ambulans Iesus iuxta mare Galilaeae, vidit Iacobum Zebedaei et Ioannem fratrem eius, reficientes retia sua, et vocavit eos.

[S1620co] Omnipotens sempiterne Deus, qui Apostolorum tuorum primitias beati Iacobi sanguine dedicasti, da, quaesumus, Ecclesiae tuae ipsius confessione firmari, et iugiter patrociniis confoveri.

[S1621so] Munda nos, Domine, passionis Filii tui baptismate salutari, ut in festo beati Iacobi, quem primum inter Apostolos calicis eius participem esse voluisti, beneplacitum tibi sacrificium offeramus.

[S1622am] Calicem Domini biberunt, et amici Dei facti sunt.

[S1623pc] Beati apostoli Iacobi, quaesumus, Domine, intercessione nos adiuva, pro cuius festivitate percepimus tua sancta laetantes.

[S1624ai] Laudemus Ioachim et Annam in generatione sua, quia benedictionem omnium gentium dedit illis Dominus.

[S1625co] Domine, Deus patrum nostrorum, qui beatis Ioachim et Annae hanc gratiam contulisti ut ex eis incarnati Filii tui Mater nasceretur, utriusque precibus concede, ut salutem tuo promissam populo consequamur.

[S1626so] Suscipe, quaesumus, Domine, munera nostrae devotionis, et praesta, ut eiusdem benedictionis, quam Abrahae et eius semini promisisti, mereamur esse participes.

[S1627am] Acceperunt benedictionem a Domino, et misericordiam a Deo salutari suo.

[S1628pc] Deus, qui Unigenitum tuum ex hominibus nasci voluisti, ut homines ex te mirabili mysterio renascerentur, quaesumus, ut, quos filiorum pane satiasti, adoptionis spiritu benignitate tua sanctifices.

[S1629ai] Intravit Iesus in quoddam castellum, et mulier quaedam Martha nomine excepit illum in domum suam.

[S1630co] Omnipotens sempiterne Deus, cuius Filius in domo beatae Marthae dignatus est hospitari, da, quaesumus, ut, eiusdem intercessione, Christo in fratribus nostris fideliter ministrantes, in aede caelesti a te recipi mereamur.

[S1631so] In beata Martha te, Domine, mirabilem praedicantes, maiestatem tuam suppliciter exoramus, ut, sicut eius tibi gratum exstitit caritatis obsequium, sic nostrae servitutis accepta reddantur officia.

[S1632am] Dixit Martha ad Iesum: Tu es Christus, Filius Dei vivi, qui in hunc mundum venisti.

[S1633pc] Corporis et Sanguinis Unigeniti tui sacra perceptio, Domine, ab omnibus nos caducis rebus avertat, ut, exemplo beatae Marthae, valeamus tibi et sincera in terris caritate proficere, et tui perpetua in caelis visione gaudere.

[S1634co] Deus, qui beatum Petrum Chrysologum episcopum Verbi tui incarnati praeconem egregium effecisti, eius nobis intercessione concede, ut tuae salutis mysteria et iugiter scrutemur in corde, et fideliter significemus in opere.

[S1635ai] In nomine Iesu omne genu flectatur, caelestium, terrestrium et infernorum; et omnis lingua confiteatur quia Dominus Iesus Christus in gloria est Dei Patris.

[S1636co] Deus, qui ad maiorem tui nominis gloriam propagandam beatum Ignatium in Ecclesia tua suscitasti, concede, ut, eius auxilio et imitatione certantes in terris, coronari cum ipso mereamur in caelis.

[S1637so] Placeant, Domine Deus, oblationes in celebratione beati Ignatii tibi delatae, et praesta, ut sacrosancta mysteria, in quibus omnis sanctitatis fontem constituisti, nos quoque in veritate sanctificent.

[S1638am] Dicit Dominus: Ignem veni mittere in terram, et quid volo, nisi ut accendatur?

[S1639pc] Laudis hostia, Domine, quam pro beato Ignatio gratias agentes obtulimus, ad perpetuam nos maiestatis tuae laudationem perducat.

[S1640co] Deus, qui in Ecclesia tua nova semper instauras exempla virtutum, da nobis in zelo animarum beati Alfonsi Mariae episcopi ita vestigiis adhaerere, ut eius in caelis assequamur et praemia.

[S1641so] Caelesti, Domine, Spiritus igne corda nostra clementer exure, qui beato Alfonso Mariae tribuisti et haec mysteria celebrare, et per eadem hostiam tibi sanctam seipsum exhibere.

[S1642pc] Deus, qui beatum Alfonsum Mariam fidelem dispensatorem et praeconem tanti mysterii providisti, concede, ut fideles tui illud frequenter percipiant, et, percipiendo, te sine fine collaudent.

[S1643co] Fac nos, Domine Deus, in asserenda Filii tui divinitate, beati Eusebii episcopi constantiam imitari, ut, fidem servantes quam ipse docuit, eiusdem Filii tui vitae participes esse mereamur.

[S1644co] Deus, qui beatum Petrum Iulianum erga sacra mysteria Corporis et Sanguinis Filii tui dilectione decorasti mirifica, concede propitius, ut, quam ille ex hoc divino percepit pinguedinem, eandem et nos percipere mereamur.

[S1645co] Omnipotens et misericors Deus, qui beatum Ioannem Mariam presbyterum pastorali studio mirabilem effecisti, da, quaesumus, ut, eius exemplo et intercessione, fratres in caritate Christo lucremur, et cum eis aeternam gloriam consequi valeamus.

[S1646co] Famulorum tuorum, quaesumus, Domine, delictis ignosce, ut, qui tibi placere de nostris actibus non valemus, Genetricis Filii tui intercessione salvemur.

[S1647ai] In splendenti nube Spiritus Sanctus visus est, paterna vox audita est: Hic est Filius meus dilectus, in quo mihi bene complacui: ipsum audite.

[S1648co] Deus, qui fidei sacramenta in Unigeniti tui gloriosa Transfiguratione patrum testimonio roborasti, et adoptionem filiorum perfectam mirabiliter praesignasti, concede nobis famulis tuis, ut, ipsius dilecti Filii tui vocem audientes, eiusdem coheredes effici mereamur.

[S1649so] Oblata munera, quaesumus, Domine, gloriosa Unigeniti tui Transfiguratione sanctifica, nosque a peccatorum maculis, splendoribus ipsius illustrationis, emunda.

[S1650vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui coram electis testibus suam gloriam revelavit, et communem illam cum ceteris corporis formam maximo splendore perfudit, ut de cordibus discipulorum crucis scandalum tolleretur, et in totius Ecclesiae corpore declararet implendum quod eius mirabiliter praefulsit in capite. Et ideo cum caelorum virtutibus in terris te iugiter celebramus, maiestati tuae sine fine clamantes: Sanctus.

[S1651am] Cum Christus apparuerit, similes ei erimus, quoniam videbimus eum sicuti est.

[S1652pc] Caelestia, quaesumus, Domine, alimenta quae sumpsimus in eius nos transforment imaginem, cuius claritatem gloriosa Transfiguratione manifestare voluisti.

[S1653co] Quaesumus, omnipotens Deus, ut nos, virtute Spiritus Sancti, et ad credendum dociles et ad confitendum fortes efficias, qui beato Xysto eiusque sociis propter verbum tuum et testimonium Iesu animas suas ponere tribuisti.

[S1654co] Deus, qui beato Caietano presbytero apostolicam vivendi formam imitari tribuisti, eius nobis exemplo et intercessione concede in te semper confidere, et regnum tuum indesinenter quaerere.

[S1655ai] In medio Ecclesiae aperuit os eius, et implevit eum Dominus spiritu sapientiae et intellectus: stolam gloriae induit eum.

[S1656co] Adiuvet Ecclesiam tuam, Domine, beatus Dominicus meritis et doctrinis, atque pro nobis efficiatur piissimus interventor, qui tuae veritatis exstitit praedicator eximius.

[S1657so] Preces, quas tibi, Domine, offerimus, intercedente beato Dominico, clementer intende, et, huius sacrificii virtute potenti, propugnatores fidei gratiae tuae protectione confirma.

[S1658am] Fidelis servus et prudens, quem constituit Dominus super familiam suam, ut det illis in tempore tritici mensuram.

[S1659pc] Caelestis, Domine, virtutem sacramenti, quo in beati commemoratione Dominici pasti sumus, percipiat Ecclesia tua plenae devotionis affectu, et cuius praedicatione floruit, eius intercessione iuvetur.

[S1660co] Deus patrum nostrorum, qui beatam Teresiam Benedictam martyrem ad cognitionem Filii tui crucifixi eiusque imitationem usque ad mortem perduxisti, ipsa intercedente, concede, ut omnes homines Christum Salvatorem agnoscant et per eum ad perpetuam tui visionem adveniant.

[S1661ai] Hic est beatus Laurentius, qui pro ope Ecclesiae semetipsum tradidit: propterea meruit martyrii passionem, ut laetus ascenderet ad Dominum Iesum Christum.

[S1662co] Deus, cuius caritatis ardore beatus Laurentius servitio claruit fidelis et martyrio gloriosus, fac nos amare quod amavit, et opere exercere quod docuit.

[S1663so] Suscipe propitius, Domine, munera in beati Laurentii celebritate laetanter oblata, et ad nostrae salutis auxilium provenire concede.

[S1664am] Qui mihi ministrat, me sequatur; et ubi sum ego, illic et minister meus erit, dicit Dominus.

[S1665pc] Sacro munere satiati, supplices te, Domine, deprecamur, ut, quod in festivitate beati Laurentii debitae servitutis praestamus obsequium, salvationis tuae sentiamus augmentum.

[S1666co] Deus, qui beatam Claram ad paupertatis amorem misericorditer adduxisti, eius nobis intercessione concede, ut, in paupertate spiritus Christum sequentes, ad tui contemplationem in caelesti regno pervenire mereamur.

[S1667co] Deus, qui beatam Ioannam Franciscam per varias vitae semitas praeclaris meritis illustrasti, ipsius nobis intercessione concede, ut, in vocatione nostra fideliter ambulantes, lucis exempla iugiter ostendamus.

[S1668co] Patientia pretiosa iustorum tuae nobis, Domine, quaesumus, affectum dilectionis accumulet, et in cordibus nostris sacrae fidei semper exerceat firmitatem.

[S1669ai] Venite, benedicti Patris mei, dicit Dominus. Amen dico vobis: quamdiu fecistis uni de his fratribus meis minimis, mihi fecistis.

[S1670co] Deus, qui sanctum Maximilianum Mariam, presbyterum et martyrem, amore Virginis Immaculatae succensum, animarum zelo et proximi dilectione replevisti, concede propitius, ut, eo intercedente, pro tua gloria in servitio hominum strenue laborantes, usque ad mortem Filio tuo conformari valeamus.

[S1671so] Munera nostra tibi, Domine, exhibemus, suppliciter exorantes, ut sancti Maximiliani Mariae exemplo, vitam nostram tibi discamus offerre.

[S1672am] Maiorem caritatem nemo habet, ut animam suam ponat quis pro amicis suis, dicit Dominus.

[S1673pc] Quaesumus, Domine, ut refecti Corpore et Sanguine Filii tui, eo caritatis igne accendamur, quem ex hoc convivio sanctus Maximilianus Maria accepit.

[S1674ai] Gloriosa dicta sunt de te, Maria, quae hodie exaltata es super choros Angelorum, et in aeternum cum Christo triumphas.

[S1675co] Deus, qui beatam Virginem Mariam, eius humilitatem respiciens, ad hanc gratiam evexisti, ut Unigenitus tuus ex ipsa secundum carnem nasceretur, et hodierna die superexcellenti gloria coronasti, eius nobis precibus concede, ut, redemptionis tuae mysterio salvati, a te exaltari mereamur.

[S1676so] Suscipe, quaesumus, Domine, sacrificium placationis et laudis, quod in sanctae Dei Genetricis Assumptione celebramus, ut ad veniam nos obtinendam perducat, et in perpetua gratiarum constituat actione.

[S1677am] Beata viscera Mariae Virginis, quae portaverunt aeterni Patris Filium.

[S1678pc] Mensae caelestis participes effecti, imploramus clementiam tuam, Domine Deus noster, ut, qui Assumptionem Dei Genetricis colimus, a cunctis malis imminentibus liberemur.

[S1679ai] Signum magnum apparuit in caelo: mulier amicta sole, et luna sub pedibus eius, et in capite eius corona stellarum duodecim.

[S1680ai] Gaudeamus omnes in Domino, diem festum celebrantes sub honore Mariae Virginis, de cuius Assumptione gaudent Angeli, et collaudant Filium Dei.

[S1681co] Omnipotens sempiterne Deus, qui immaculatam Virginem Mariam, Filii tui Genetricem, corpore et anima ad caelestem gloriam assumpsisti, concede, quaesumus, ut, ad superna semper intenti, ipsius gloriae mereamur esse consortes.

[S1682so] Ascendat ad te, Domine, nostrae devotionis oblatio, et, beatissima Virgine Maria in caelum assumpta intercedente, corda nostra, caritatis igne succensa, ad te iugiter aspirent.

[S1683vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quoniam Virgo Deipara hodie in caelos assumpta est, Ecclesiae tuae consummandae initium et imago, ac populo peregrinanti certae spei et solacii documentum; corruptionem enim sepulcri eam videre merito noluisti, quae Filium tuum, vitae omnis auctorem, ineffabiliter de se genuit incarnatum. Et ideo, choris angelicis sociati, te laudamus, in gaudio confitentes: Sanctus.

[S1684am] Beatam me dicent omnes generationes, quia fecit mihi magna qui potens est.

[S1685pc] Sumptis, Domine, salutaribus sacramentis, da, quaesumus, ut, intercessione beatae Mariae Virginis in caelum assumptae, ad resurrectionis gloriam perducamur.

[S1686co] Concede, quaesumus, Ecclesiae tuae, omnipotens Deus, ut beatum Stephanum, quem regnantem in terris propagatorem habuit, propugnatorem habere mereatur gloriosum in caelis.

[S1687co] Deus, qui beatum Ioannem presbyterum ad annuntiandum investigabiles Christi divitias mirabiliter elegisti, da nobis, eius exemplis et monitis, ut, in tua scientia crescentes, secundum Evangelii lumen fideliter conversemur.

[S1688ai] Replevit beatum Bernardum Dominus spiritu intellegentiae, et ipse fluenta doctrinae ministravit populo Dei.

[S1689co] Deus, qui beatum Bernardum abbatem, zelo domus tuae succensum, in Ecclesia tua lucere simul et ardere fecisti, eius nobis intercessione concede, ut, eodem spiritu ferventes, tamquam filii lucis iugiter ambulemus.

[S1690so] Maiestati tuae, Domine, unitatis et pacis offerimus sacramentum, sancti Bernardi abbatis memoriam recolentes, qui, verbo et opere praeclarus, Ecclesiae tuae ordinis concordiam strenue procuravit.

[S1691am] Sicut dilexit me Pater, et ego dilexi vos, dicit Dominus; manete in dilectione mea.

[S1692pc] Cibus, quem sumpsimus, Domine, in celebratione beati Bernardi, suum in nobis operetur effectum, ut, eius exemplis roborati et monitis eruditi, Verbi tui incarnati rapiamur amore.

[S1693co] Deus, qui, ad tuendam catholicam fidem et universa in Christo instauranda, beatum Pium papam caelesti sapientia et apostolica fortitudine replevisti, concede propitius, ut, eius instituta et exempla sectantes, praemia consequamur aeterna.

[S1694so] Oblationibus nostris, Domine, benigne susceptis, da, quaesumus, ut haec divina mysteria, beati Pii papae monita secuti, sinceris tractemus obsequiis, et fideli mente sumamus.

[S1695pc] Memoriam beati Pii papae celebrantes, quaesumus, Domine Deus noster, ut, virtute mensae caelestis, constantes efficiamur in fide, et in tua simus caritate concordes.

[S1696ai] Astitit Regina a dextris tuis in vestitu deaurato, circumdata varietate.

[S1697co] Deus, qui Filii tui Genetricem nostram constituisti Matrem atque Reginam, concede propitius, ut, ipsius intercessione suffulti, tuorum in regno caelesti consequamur gloriam filiorum.

[S1698so] Memoriam recolentes beatae Virginis Mariae, tibi, Domine, munera nostra offerimus, deprecantes, ut eius nobis succurrat humanitas, qui tibi oblationem seipsum in cruce obtulit immaculatam.

[S1699am] Beata es, quae credidisti, quoniam perficientur ea, quae dicta sunt tibi a Domino.

[S1700pc] Sumptis, Domine, sacramentis caelestibus, te supplices deprecamur, ut, qui beatae Virginis Mariae memoriam venerando recolimus, aeterni convivii mereamur esse participes.

[S1701co] Deus, qui beatam Rosam, tuo amore succensam, mundum relinquere et tibi soli in austeritate paenitentiae vacare fecisti, da nobis, eius intercessione, ut, vias vitae sectantes in terris, torrente deliciarum tuarum perfruamur in caelis.

[S1702ai] Annuntiate de die in diem salutare Dei, annuntiate inter gentes gloriam eius.

[S1703co] Robora in nobis, Domine, fidem, qua Filio tuo beatus Bartholomaeus apostolus sincero animo adhaesit, et praesta, ut, ipso deprecante, Ecclesia tua cunctis gentibus salutis fiat sacramentum.

[S1704so] Beati apostoli Bartholomaei festivitatem, Domine, recensentes, quaesumus, ut eius intercessione tua capiamus auxilia, in cuius honorem tibi laudis hostias immolamus.

[S1705am] Ego dispono vobis, sicut disposuit mihi Pater meus, regnum, ut edatis et bibatis super mensam meam in regno meo, dicit Dominus.

[S1706pc] Sumpsimus, Domine, pignus salutis aeternae, festivitatem beati Bartholomaei apostoli celebrantes, quod sit nobis, quaesumus, vitae praesentis auxilium pariter et futurae.

[S1707co] Deus, qui beatum Ludovicum e terreni regiminis cura ad caelestis regni gloriam transtulisti, eius, quaesumus, intercessione concede, ut, per munera temporalia quae gerimus, regnum tuum quaeramus aeternum.

[S1708co] Deus, qui beatum Iosephum presbyterum tanta caritate et patientia decorasti, ut pueris erudiendis omnique virtute exornandis constanter incumberet, concede, quaesumus, ut, quem sapientiae praeceptorem colimus, veritatis cooperatorem iugiter imitemur.

[S1709co] Deus, maerentium consolator, qui beatae Monicae pias lacrimas in conversione filii sui Augustini misericorditer suscepisti, da nobis, utriusque interventu, peccata nostra deplorare, et gratiae tuae indulgentiam invenire.

[S1710ai] In medio Ecclesiae aperuit os eius, et implevit eum Dominus spiritu sapientiae et intellectus, stolam gloriae induit eum.

[S1711co] Innova, quaesumus, Domine, in Ecclesia tua spiritum, quo beatum Augustinum episcopum imbuisti, ut, eodem nos repleti, te solum verae fontem sapientiae sitiamus, et superni amoris quaeramus auctorem.

[S1712so] Salutis nostrae memoriale celebrantes, clementiam tuam, Domine, suppliciter exoramus, ut hoc sacramentum pietatis fiat nobis signum unitatis et vinculum caritatis.

[S1713am] Dicit Dominus: Magister vester unus est, Christus. Omnes autem vos fratres estis.

[S1714pc] Sanctificet nos, quaesumus, Domine, mensae Christi participatio, ut, eius membra effecti, simus quod accepimus.

[S1715ai] Loquebar, Domine, de testimoniis tuis in conspectu regum, et non confundebar, et meditabar in mandatis tuis, quae dilexi nimis.

[S1716co] Deus, qui beatum Ioannem Baptistam et nascentis et morientis Filii tui Praecursorem esse voluisti, concede, ut, sicut ille veritatis et iustitiae martyr occubuit, ita et nos pro tuae confessione doctrinae strenue certemus.

[S1717so] Da nobis, Domine, per haec munera quae tibi offerimus, illam tuarum rectitudinem semitarum, quam beatus Ioannes, vox in deserto clamantis, edocuit, et, fuso sanguine, magna virtute signavit.

[S1718vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. In cuius Praecursore beato Ioanne tuam magnificentiam collaudamus, quem inter natos mulierum honore praecipuo consecrasti. Qui cum nascendo multa gaudia praestitisset, et nondum editus exsultasset ad humanae salutis adventum, ipse solus omnium prophetarum Agnum redemptionis ostendit. Sed et sanctificandis etiam aquae fluentis ipsum baptismatis lavit auctorem, et meruit fuso sanguine supremum illi testimonium exhibere. Et ideo, cum caelorum Virtutibus, in terris te iugiter praedicamus, maiestati tuae sine fine clamantes: Sanctus.

[S1719am] Respondit Ioannes: Illum oportet crescere, me autem minui.

[S1720pc] Concede nobis, Domine, beati Ioannis Baptistae natale recensentibus, ut et salutaria sacramenta quae sumpsimus significata veneremur, et in nobis potius edita gaudeamus.

[S1721ai] Beatus Gregorius, in cathedra Petri sublimatus, semper speciem Domini quaerebat, atque in sollemnitate illius amoris habitabat.

[S1722co] Deus, qui populis tuis indulgentia consulis et amore dominaris, da spiritum sapientiae, intercedente beato Gregorio papa, quibus dedisti regimen disciplinae, ut de profectu sanctarum ovium fiant gaudia aeterna pastorum.

[S1723so] Annue nobis, quaesumus, Domine, ut, in celebratione beati Gregorii, haec nobis prosit oblatio, quam immolando totius mundi tribuisti relaxari delicta.

[S1724am] Fidelis servus et prudens, quem constituit Dominus super familiam suam, ut det illis in tempore tritici mensuram.

[S1725pc] Quos Christo reficis pane vivo, eosdem edoce, Domine, Christo magistro, ut in festivitate beati Gregorii tuam discant veritatem, et eam in caritate operentur.

[S1726ai] Cum iucunditate Nativitatem beatae Mariae Virginis celebremus, ex qua ortus est sol iustitiae, Christus Deus noster.

[S1727co] Famulis tuis, quaesumus, Domine, caelestis gratiae munus impertire, ut, quibus beatae Virginis partus exstitit salutis exordium, Nativitatis eius festivitas pacis tribuat incrementum.

[S1728so] Nativitatem beatae Virginis Mariae cum gaudio recolentes, tibi, Domine, munera nostra deferimus, et supplices deprecamur, ut Filii tui nobis succurrat humanitas, qui ex eadem Virgine carnem dignatus est suscipere.

[S1729am] Ecce Virgo pariet Filium, qui salvum faciet populum suum a peccatis eorum.

[S1730pc] Exsultet Ecclesia tua, Domine, quam sacris mysteriis refecisti, de beatae Mariae Virginis Nativitate congaudens, quae universo mundo spes fuit et aurora salutis.

[S1731co] Deus, qui beatum Petrum servorum servum effecisti eumque mira in eis iuvandis caritate et patientia roborasti, eius nobis intercessione concede, ut, quae Iesu Christi sunt, quaerentes, proximos opere et veritate diligamus.

[S1732ai] Benedicta es tu, Virgo Maria, a Domino Deo excelso prae omnibus mulieribus super terram; quia nomen tuum ita magnificavit, ut non recedat laus tua de ore hominum.

[S1733co] Concede, quaesumus, omnipotens Deus, ut cunctis gloriosum beatae Mariae Virginis nomen celebrantibus misericordiae tuae beneficia ipsa procuret.

[S1734so] Intercessio, quaesumus, Domine, beatae Mariae semper Virginis munera nostra commendet, nosque in eius nominis veneratione tuae maiestati reddat acceptos.

[S1735am] Beatam me dicent omnes generationes, quia ancillam humilem respexit Deus.

[S1736pc] Benedictionis tuae, Domine, intercedente Dei Genetrice Maria, gratiam consequamur, ut, cuius venerandum nomen celebramus, eius in omnibus necessitatibus auxilium percipiamus.

[S1737ai] Qui docti fuerint, fulgebunt quasi splendor firmamenti, et qui ad iustitiam erudiunt multos, quasi stellae in perpetuas aeternitates.

[S1738co] Deus, in te sperantium fortitudo, qui beatum Ioannem Chrysostomum episcopum mira eloquentia et tribulationis experimento clarescere voluisti, da nobis, quaesumus, ut, eius doctrinis eruditi, invictae patientiae roboremur exemplo.

[S1739so] Sacrificium tibi placeat, Deus, in commemoratione beati Ioannis Chrysostomi libenter exhibitum, quo monente, nos etiam totos tibi reddimus collaudantes.

[S1740am] Nos praedicamus Christum crucifixum, Christum, Dei virtutem et Dei sapientiam.

[S1741pc] Concede, misericors Deus, ut mysteria, quae pro beati Ioannis Chrysostomi commemoratione sumpsimus, nos in tua caritate confirment, et tuae fideles confessores veritatis efficiant.

[S1742ai] Nos autem gloriari oportet in cruce Domini nostri Iesu Christi, in quo est salus, vita et resurrectio nostra, per quem salvati et liberati sumus.

[S1743co] Deus, qui Unigenitum tuum crucem subire voluisti, ut salvum faceret genus humanum, praesta, quaesumus, ut, cuius mysterium in terra cognovimus, eius redemptionis praemia in caelo consequi mereamur.

[S1744so] Haec oblatio, Domine, quaesumus, ab omnibus nos purget offensis, quae in ara crucis totius mundi tulit offensam.

[S1745vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens, aeterne Deus: Qui salutem humani generis in ligno crucis constituisti, ut unde mors oriebatur, inde vita resurgeret; et, qui in ligno vincebat, in ligno quoque vinceretur: per Christum Dominum nostrum. Per quem maiestatem tuam laudant Angeli, adorant Dominationes, tremunt Potestates. Caeli caelorumque Virtutes, ac beata Seraphim, socia exsultatione concelebrant. Cum quibus et nostras voces ut admitti iubeas, deprecamur, supplici confessione dicentes: Sanctus.

[S1746am] Ego si exaltatus fuero a terra, omnes traham ad meipsum, dicit Dominus.

[S1747pc] Refectione tua sancta enutriti, Domine Iesu Christe, supplices deprecamur, ut, quos per lignum crucis vivificae redemisti, ad resurrectionis gloriam perducas.

[S1748ai] Dixit Simeon ad Mariam: Ecce, positus est hic in ruinam et in resurrectionem multorum in Israel, et in signum cui contradicetur; et tuam ipsius animam pertransibit gladius.

[S1749co] Deus, qui Filio tuo in cruce exaltato compatientem Matrem astare voluisti, da Ecclesiae tuae, ut, Christi passionis cum ipsa consors effecta, eiusdem resurrectionis particeps esse mereatur.

[S1750so] Suscipe, misericors Deus, ad tui nominis laudem preces hostiasque in veneratione beatae Mariae Virginis exhibitas, quam, stantem iuxta crucem Iesu, clementer nobis Matrem piissimam providisti.

[S1751am] Communicantes Christi passionibus, gaudete, ut et in revelatione gloriae eius gaudeatis exsultantes.

[S1752pc] Sumptis, Domine, sacramentis redemptionis aeternae, supplices deprecamur, ut, compassionem beatae Mariae Virginis recolentes, ea in nobis pro Ecclesia adimpleamus, quae desunt Christi passionum.

[S1753co] Deus, qui populo tuo beatos Cornelium et Cyprianum sedulos pastores et invictos martyres praestitisti, concede ut, eorum intercessione, fide et constantia roboremur, et pro Ecclesiae unitate operam tribuamus impense.

[S1754so] Suscipe, quaesumus, Domine, munera populi tui pro martyrum tuorum passionibus dicata sanctorum, et quae beatis Cornelio et Cypriano in persecutione fortitudinem ministrarunt, nobis quoque praebeant inter adversa constantiam.

[S1755pc] Per haec mysteria quae sumpsimus, Domine, supplices exoramus, ut, beatorum martyrum Cornelii et Cypriani exemplo, spiritus tui fortitudine confirmati, evangelicae veritati possimus testimonium perhibere.

[S1756co] Deus, qui ad tuae fidem Ecclesiae vindicandam beatum Robertum episcopum mira eruditione et virtute decorasti, eius intercessione concede, ut populus tuus eiusdem fidei semper integritate laetetur.

[S1757co] Deus, qui nos concedis beati Ianuarii martyris memoriam venerari, da nobis in aeterna beatitudine de eius societate gaudere.

[S1758ai] Sanguis sanctorum martyrum pro Christo effusus est in terris; ideo adepti sunt praemia sempiterna.

[S1759co] Deus, qui filios adoptionis in toto orbe terrarum multiplicare dignatus es, et sanguinem beatorum martyrum Andreae et sociorum uberrimum semen christianorum effecisti, concede, ut eorum muniamur auxilio et iugiter proficiamus exemplo.

[S1760so] Oblata populi tui respice propitius, omnipotens Deus, et beatorum martyrum intercessione concede, nos ipsos sacrificium tibi acceptabile in totius effici mundi salutem.

[S1761am] Omnis qui confitebitur me coram hominibus, confitebor et ego eum coram Patre meo, qui est in caelis, dicit Dominus.

[S1762pc] Fortium esca enutriti, in celebratione beatorum martyrum, te, Domine, suppliciter exoramus, ut, Christo fideliter inhaerentes, in Ecclesia ad salutem omnium operemur.

[S1763ai] Euntes, docete omnes gentes, baptizantes eos, et docentes eos servare omnia quaecumque mandavi vobis, dicit Dominus.

[S1764co] Deus, qui ineffabili misericordia beatum Matthaeum ex publicano Apostolum es dignatus eligere, da nobis, eius exemplo et intercessione suffultis, ut, te sequentes, tibi firmiter adhaerere mereamur.

[S1765so] Memoriam beati Matthaei recensentes, preces et hostias tibi, Domine, deferimus, suppliciter exorantes, ut Ecclesiam tuam benignus aspicias, cuius fidem Apostolorum praedicationibus nutrivisti.

[S1766am] Non veni vocare iustos, sed peccatores, dicit Dominus.

[S1767pc] Salutaris gaudii participes, Domine, quo laetus Salvatorem in domo sua convivam beatus Matthaeus excepit, da, ut cibo semper reficiamur illius, qui non iustos sed peccatores vocare venit ad salutem.

[S1768co] Magnificet te, Domine, sanctorum tuorum Cosmae et Damiani veneranda memoria, quia et illis gloriam sempiternam, et opem nobis ineffabili providentia contulisti.

[S1769so] In tuorum, Domine, pretiosa morte iustorum, sacrificium illud offerimus, de quo martyrium sumpsit omne principium.

[S1770pc] Conserva in nobis, Domine, munus tuum, et quod, te donante, pro commemoratione beatorum martyrum Cosmae et Damiani percepimus, salutem nobis praestet et pacem.

[S1771ai] Spiritus Domini super me: propter quod unxit me, evangelizare pauperibus misit me, sanare contritos corde.

[S1772co] Deus, qui ad salutem pauperum et cleri institutionem beatum Vincentium presbyterum virtutibus apostolicis imbuisti, praesta, quaesumus, ut, eodem spiritu ferventes, et amemus quod amavit, et quod docuit operemur.

[S1773so] Deus, qui beato Vincentio divina celebranti mysteria tribuisti quod tractabat imitari, concede, ut, huius sacrificii virtute, ipsi quoque in oblationem tibi acceptabilem transeamus.

[S1774am] Confiteantur Domino misericordiae eius, et mirabilia eius filiis hominum: quia satiavit animam inanem, et animam esurientem satiavit bonis.

[S1775pc] Caelestibus, Domine, refecti sacramentis, supplices deprecamur, ut ad imitandum Filium tuum pauperibus evangelizantem, sicut exemplis beati Vincentii provocamur, ita et patrociniis adiuvemur.

[S1776co] Deus, qui beatum martyrem Venceslaum caelesti regno terrenum postponere docuisti, eius precibus concede, ut, nosmetipsos abnegantes, tibi toto corde adhaerere valeamus.

[S1777co] Beatorum martyrum tuorum Laurentii et sociorum, quaesumus, Domine Deus, patientiam in servitio tui et proximi nobis concede, quia in regno tuo sunt beati, qui persecutionem patiuntur propter iustitiam.

[S1778ai] Benedicite Dominum, omnes Angeli eius, potentes virtute, qui facitis verbum eius, ad audiendam vocem sermonum eius.

[S1779co] Deus, qui miro ordine Angelorum ministeria hominumque dispensas, concede propitius, ut, a quibus tibi ministrantibus in caelo semper assistitur, ab his in terra vita nostra muniatur.

[S1780so] Hostias tibi, Domine, laudis offerimus, suppliciter deprecantes, ut easdem, angelico ministerio in conspectum tuae maiestatis delatas, et placatus accipias, et ad salutem nostram provenire concedas.

[S1781vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Et in Archangelis Angelisque tuis tua praeconia non tacere, quia ad excellentiam tuam recurrit et gloriam quod angelica creatura tibi probabilis honoretur: et, cum illa sit amplo decore dignissima, tu quam sis immensus et super omnia praeferendus ostenderis, per Christum Dominum nostrum. Per quem multitudo Angelorum tuam celebrat maiestatem, quibus adorantes in exsultatione coniungimur, una cum eis laudis voce clamantes: Sanctus.

[S1782am] Confitebor tibi, Domine, in toto corde meo, in conspectu Angelorum psallam tibi.

[S1783pc] Pane caelesti refecti, supplices te, Domine, deprecamur, ut, eius fortitudine roborati, sub Angelorum tuorum fideli custodia, fortes, salutis progrediamur in via.

[S1784ai] Beatus vir, qui meditabitur in lege Domini die ac nocte: dabit fructum suum in tempore suo.

[S1785co] Deus, qui beato Hieronymo presbytero suavem et vivum Scripturae Sacrae affectum tribuisti, da, ut populus tuus verbo tuo uberius alatur, et in eo fontem vitae inveniat.

[S1786so] Tribue, nobis, Domine, ut, exemplo beati Hieronymi, verbum tuum meditati, ad salutarem hostiam maiestati tuae offerendam promptius accedamus.

[S1787am] Domine Deus, inventi sunt sermones tuos, et comedi eos; et factum est mihi verbum tuum in gaudium et in laetitiam cordis mei.

[S1788pc] Sancta tua quae sumpsimus, Domine, de beati Hieronymi celebritate laetantes, tuorum excitent corda fidelium, ut, sacris intenta doctrinis, intellegant quod sequantur, et sequendo vitam obtineant sempiternam.

[S1789ai] Circumduxit eam Dominus et docuit; et custodivit quasi pupillam oculi sui. Sicut aquila expandit alas suas, et assumpsit eam, atque portavit in humeris suis. Dominus solus dux eius fuit.

[S1790co] Deus, qui regnum tuum humilibus parvulisque disponis, fac nos beatae Teresiae tramitem prosequi confidenter, ut, eius intercessione, gloria tua nobis reveletur aeterna.

[S1791so] In beata Teresia te, Domine, mirabilem praedicantes, maiestatem tuam suppliciter exoramus, ut, sicut eius tibi grata sunt merita, sic nostrae servitutis accepta reddantur officia.

[S1792am] Dicit Dominus: Nisi conversi fueritis, et efficiamini sicut parvuli, non intrabitis in regnum caelorum.

[S1793pc] Sacramenta quae sumpsimus, Domine, illius in nobis vim amoris accendant, quo beata Teresia se tibi addixit, tuamque cupiit miserationem pro omnibus impetrare.

[S1794ai] Benedicite, omnes Angeli Domini, Dominum, hymnum dicite, et superexaltate eum in saecula.

[S1795co] Deus, qui ineffabili providentia sanctos Angelos tuos ad nostram custodiam mittere dignaris, largire supplicibus tuis et eorum semper protectione defendi, et aeterna societate gaudere.

[S1796so] Suscipe, Domine, munera, quae pro sanctorum Angelorum tuorum veneratione deferimus, et concede propitius, ut, perpetuis eorum praesidiis, a praesentibus periculis liberemur, et ad vitam feliciter perveniamus aeternam.

[S1797vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Et in Archangelis Angelisque tuis tua praeconia non tacere, quia ad excellentiam tuam recurrit et gloriam quod angelica creatura tibi probabilis honoretur: et, cum illa sit amplo decore dignissima, tu quam sis immensus et super omnia praeferendus ostenderis, per Christum Dominum nostrum. Per quem multitudo Angelorum tuam celebrat maiestatem, quibus adorantes in exsultatione coniungimur, una cum eis laudis voce clamantes: Sanctus.

[S1798am] In conspectu Angelorum psallam tibi, Deus meus.

[S1799pc] Quos tantis, Domine, in vitam aeternam dignaris pascere sacramentis, angelico ministerio dirige in viam salutis et pacis.

[S1800ai] Vir Dei Franciscus reliquit domum suam, dimisit hereditatem suam, inops et pauper factus est; Dominus autem assumpsit eum.

[S1801co] Deus, qui beato Francisco paupertate et humilitate Christo configurari tribuisti, concede, ut, per illius semitas gradientes, Filium tuum sequi et tibi coniungi laeta valeamus caritate.

[S1802so] Munera tibi, Domine, offerentes, quaesumus, ut ad mysterium crucis celebrandum convenienter aptemur, cui beatus Franciscus tam ardenter adhaesit.

[S1803am] Beati pauperes spiritu, quoniam ipsorum est regnum caelorum.

[S1804pc] Da nobis, quaesumus, Domine, per haec sancta quae sumpsimus, ut, beati Francisci caritatem zelumque apostolicum imitantes, tuae dilectionis effectus percipiamus et in salutem omnium effundamus.

[S1805co] Deus, qui sanctum Brunonem ad serviendum tibi in solitudine vocasti, eius nobis intercessione concede, ut, per huius mundi varietates, tibi iugiter vacemus.

[S1806ai] Ave, Maria, gratia plena, Dominus tecum: benedicta tu in mulieribus, et benedictus fructus ventris tui.

[S1807co] Gratiam tuam, quaesumus, Domine, mentibus nostris infunde, ut, qui, Angelo nuntiante, Christi Filii tui incarnationem cognovimus, beata Maria Virgine intercedente, per passionem eius et crucem ad resurrectionis gloriam perducamur.

[S1808so] Fac nos, quaesumus, Domine, his muneribus oblatis convenienter aptari, et Unigeniti tui mysteria ita recolere, ut eius digni promissionibus effici mereamur.

[S1809am] Ecce concipies in utero, et paries filium, et vocabis nomen eius Iesum.

[S1810pc] Quaesumus, Domine Deus noster, ut, qui in hoc sacramento Filii tui mortem et resurrectionem annuntiamus, eius socii passionum effecti, consolationis etiam ac gloriae mereamur esse participes.

[S1811co] Deus, qui beatum Dionysium eiusque socios ad praedicandam gentibus gloriam tuam misisti, eosque virtute constantiae in passione roborasti, tribue nobis, quaesumus, ex eorum imitatione prospera mundi despicere, et nulla eius adversa formidare.

[S1812co] Bonorum omnium largitor, Deus, qui per beatum Ioannem presbyterum populis Evangelium nuntiari fecisti, eius intercessione concede, ut fides vera semper et ubique proficiat.

[S1813co] Deus, qui beatum Callistum papam, ad Ecclesiae servitium et pietatem erga christifideles defunctos suscitasti, eius fidei testimonio, quaesumus, nos robora, ut a servitute corruptionis erepti, incorruptibilem hereditatem consequi mereamur.

[S1814ai] Quemadmodum desiderat cervus ad fontes aquarum, ita desiderat anima mea ad te, Deus. Sitivit anima mea ad Deum fortem vivum.

[S1815co] Deus, qui per Spiritum tuum beatam Teresiam suscitasti, ut requirendae perfectionis semitam Ecclesiae manifestaret, da nobis et caelestis eius doctrinae pabulo semper nutriri, et verae sanctitatis desiderio accendi.

[S1816so] Munera nostra, Domine, tuae sint accepta maiestati, cui beatae Teresiae tantopere placuit devotionis obsequium.

[S1817am] Misericordias Domini in aeternum cantabo; in generationem et generationem annuntiabo veritatem tuam in ore meo.

[S1818pc] Subdita tibi familia, Domine Deus noster, quam caelesti pane satiasti, fac ut, exemplo beatae Teresiae, misericordias tuas in aeternum cantare laetetur.

[S1819co] Concede, quaesumus, omnipotens Deus, ut veneranda nobis beatae Hedvigis intercessio tribuat caeleste subsidium, cuius vita mirabilis omnibus humilitatis praestat exemplum.

[S1820co] Effunde super nos, quaesumus, Domine, spiritum, quo beatam Margaritam Mariam singulariter ditasti, ut scire valeamus supereminentem scientiae caritatem Christi, et impleamur in omnem plenitudinem tuam.

[S1821ai] Christo confixus sum cruci; vivo autem, iam non ego: vivit vero in me Christus; in fide vivo Filii Dei, qui dilexit me, et tradidit semetipsum pro me.

[S1822co] Omnipotens sempiterne Deus, qui sanctorum martyrum confessionibus Ecclesiae tuae sacrum corpus exornas, concede, quaesumus, ut hodierna gloria passionis, sicut beato Ignatio magnificentiam tribuit sempiternam, ita nobis perpetuum munimen operetur.

[S1823so] Grata tibi sit, Domine, nostrae devotionis oblatio, qui beatum Ignatium, frumentum Christi, per martyrii passionem panem mundum suscepisti.

[S1824am] Frumentum Christi sum: dentibus bestiarum molar, ut panis mundus inveniar.

[S1825pc] Reficiat nos, Domine, panis caelestis, quem in beati Ignatii natali suscepimus, ac tribuat nos nomine et opere esse christianos.

[S1826ai] Quam pulchri super montes pedes annuntiantis et praedicantis pacem, annuntiantis bonum, praedicantis salutem!

[S1827co] Domine Deus, qui beatum Lucam elegisti, ut praedicatione et scriptis mysterium tuae in pauperes dilectionis revelaret, concede, ut, qui tuo iam nomine gloriantur, cor unum et anima una esse perseverent, et omnes gentes tuam mereantur videre salutem.

[S1828so] Donis caelestibus, da nobis, quaesumus, Domine, libera tibi mente servire, ut munera, quae in festivitate beati Lucae deferimus, et medelam nobis operentur et gloriam.

[S1829am] Misit Dominus discipulos, qui nuntiarent civitatibus: Appropinquavit in vos regnum Dei.

[S1830pc] Praesta, quaesumus, omnipotens Deus, ut, quod de sancto altari tuo accepimus, nos sanctificet, et in fide Evangelii, quod beatus Lucas praedicavit, fortes efficiat.

[S1831co] Deus, qui spem beatam regni aeterni sanctorum Ioannis et Isaac eorumque sociorum opere et sanguinis effusione manifestare voluisti, concede propitius, ut, eorum intercessione, fides christianorum in dies firmetur.

[S1832ai] Non iudicavi me scire aliquid inter vos, nisi Iesum Christum, et hunc crucifixum.

[S1833co] Impetret nobis, Domine, gratiam tuam beatus presbyter Paulus, qui unico crucem amore dilexit, ut, eius exemplo vividius incitati, crucem nostram fortiter amplectamur.

[S1834so] Respice quas offerimus hostias, omnipotens Deus, in commemoratione beati Pauli, et praesta, ut, qui dominicae passionis mysteria celebramus, imitemur quod agimus.

[S1835am] Nos praedicamus Christum crucifixum, Christum, Dei virtutem et Dei sapientiam.

[S1836pc] Deus, qui crucis mysterium in beato Paulo mirabiliter illustrasti, concede propitius, ut, ex hoc sacrificio roborati, Christo fideles haereamus, et in Ecclesia ad salutem omnium operemur.

[S1837co] Deus, qui, ad populum fidelem in angustiis confortandum, beatum Ioannem suscitasti, praesta, quaesumus, ut nos in tuae protectionis securitate constituas, et Ecclesiam tuam perpetua pace custodias.

[S1838co] Deus, qui in evangelizandis populis beatum Antonium Mariam episcopum mira caritate et patientia roborasti, eius nobis intercessione concede, ut, quae tua sunt quaerentes, enixe in Christo lucrandis fratribus incumbamus.

[S1839ai] Isti sunt viri sancti, quos elegit Dominus in caritate non ficta, et dedit illis gloriam sempiternam.

[S1840co] Deus, qui nos per beatos Apostolos ad agnitionem tui nominis venire tribuisti, intercedentibus sanctis Simone et Iuda, concede propitius, ut semper augeatur Ecclesia incrementis in te credentium populorum.

[S1841so] Gloriam, Domine, sanctorum apostolorum Simonis et Iudae perpetuam venerantes, quaesumus, ut vota nostra suscipias et ad sacra mysteria celebranda nos digne perducas.

[S1842am] Si quis diligit me, sermonem meum servabit, dicit Dominus; et Pater meus diliget eum, et ad eum veniemus, et mansionem apud eum faciemus.

[S1843pc] Perceptis, Domine, sacramentis, supplices in Spiritu Sancto deprecamur, ut, quae pro apostolorum Simonis et Iudae veneranda gerimus passione, nos in tua dilectione conservent.

[S1844ai] Gaudeamus omnes in Domino, diem festum celebrantes sub honore Sanctorum omnium, de quorum sollemnitate gaudent Angeli, et collaudant Filium Dei.

[S1845co] Omnipotens sempiterne Deus, qui nos omnium Sanctorum tuorum merita sub una tribuisti celebritate venerari, quaesumus, ut desideratam nobis tuae propitiationis abundantiam, multiplicatis intercessoribus, largiaris.

[S1846so] Grata tibi sint, Domine, munera, quae pro cunctorum offerimus honore Sanctorum, et concede, ut, quos iam credimus de sua immortalitate securos, sentiamus de nostra salute sollicitos.

[S1847vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Nobis enim hodie civitatem tuam tribuis celebrare, quae mater nostra est, caelestisque Ierusalem, ubi iam te in aeternum fratrum nostrorum corona collaudat. Ad quam peregrini, per fidem accedentes, alacriter festinamus, congaudentes de Ecclesiae sublimium glorificatione membrorum, qua simul fragilitati nostrae adiumenta et exempla concedis. Et ideo, cum ipsorum Angelorumque frequentia, una te magnificamus, laudis voce clamantes: Sanctus.

[S1848am] Beati mundo corde, quoniam ipsi Deum videbunt; beati pacifici, quoniam filii Dei vocabuntur; beati qui persecutionem patiuntur propter iustitiam, quoniam ipsorum est regnum caelorum.

[S1849pc] Mirabilem te, Deus, et unum Sanctum in omnibus Sanctis tuis adorantes, tuam gratiam imploramus, qua, sanctificationem in tui amoris plenitudine consummantes, ex hac mensa peregrinantium ad caelestis patriae convivium transeamus.

[S1850ai] Sicut Iesus mortuus est et resurrexit, ita et Deus eos qui dormierunt per Iesum adducet cum eo. Et sicut in Adam omnes moriuntur, ita et in Christo omnes vivificabuntur.

[S1851co] Preces nostras, quaesumus, Domine, benignus exaudi, ut, dum attollitur nostra fides in Filio tuo a mortuis suscitato, in famulorum tuorum praestolanda resurrectione spes quoque nostra firmetur.

[S1852so] Nostris, Domine, propitiare muneribus, ut famuli tui defuncti assumantur in gloriam cum Filio tuo, cuius magno pietatis iungimur sacramento.

[S1853am] Ego sum resurrectio et vita, dicit Dominus. Qui credit in me, etiam si mortuus fuerit, vivet; et omnis, qui vivit et credit in me, non morietur in aeternum.

[S1854pc] Praesta, quaesumus, Domine, ut famuli tui defuncti in mansionem lucis transeant et pacis, pro quibus paschale celebravimus sacramentum.

[S1855ai] Requiem aeternam dona eis, Domine, et lux perpetua luceat eis.

[S1856co] Deus, gloria fidelium et vita iustorum, cuius Filii morte et resurrectione redempti sumus, propitiare famulis tuis defunctis, ut, qui resurrectionis nostrae mysterium agnoverunt, aeternae beatitudinis gaudia percipere mereantur.

[S1857so] Omnipotens et misericors Deus, his sacrificiis ablue, quaesumus, famulos tuos defunctos a peccatis eorum in sanguine Christi, ut, quos mundasti aqua baptismatis, indesinenter purifices indulgentia pietatis.

[S1858am] Lux aeterna luceat eis, Domine, cum Sanctis tuis in aeternum, quia pius es.

[S1859pc] Sumpto sacramento Unigeniti tui, qui pro nobis immolatus resurrexit in gloria, te, Domine, suppliciter exoramus pro famulis tuis defunctis, ut, paschalibus mysteriis mundati, futurae resurrectionis munere glorientur.

[S1860ai] Deus, qui suscitavit Iesum a mortuis, vivificabit et mortalia corpora nostra, propter inhabitantem Spiritum eius in nobis.

[S1861co] Deus, qui Unigenitum tuum, devicta morte, ad caelestia transire fecisti, concede famulis tuis defunctis, ut, huius vitae mortalitate devicta, te conditorem et redemptorem possint perpetuo contemplari.

[S1862so] Pro omnibus famulis tuis in Christo dormientibus hostiam, Domine, suscipe benignus oblatam, ut, per hoc sacrificium singulare vinculis mortis exuti, vitam mereantur aeternam.

[S1863am] Salvatorem exspectamus Dominum Iesum Christum, qui reformabit corpus humilitatis nostrae configuratum corpori claritatis suae.

[S1864pc] Multiplica, Domine, his sacrificiis susceptis, super famulos tuos defunctos misericordiam tuam, et, quibus donasti baptismi gratiam, da eis aeternorum plenitudinem gaudiorum.

[S1865co] Deus, qui beatum Martinum per humilitatis iter ad caelestem gloriam perduxisti, tribue nobis eius ita nunc persequi exempla praeclara, ut exaltari cum ipso mereamur in caelis.

[S1866co] Custodi, quaesumus, Domine, in populo tuo spiritum, quo beatum Carolum episcopum implevisti, ut Ecclesia indesinenter renovetur, et, Christi se imagini conformans, ipsius vultum mundo valeat ostendere.

[S1867so] Intende munera, Domine, altaribus tuis pro beati Caroli commemoratione proposita, et huius sacrificii virtute concede, ut, sicut illum pastoralis officii vigilantia et praeclaris virtutum meritis sublimasti, ita nos facias sinceris operum fructibus abundare.

[S1868pc] Praestent nobis, quaesumus, Domine, sacra mysteria quae sumpsimus eam animi fortitudinem, quae beatum Carolum reddidit in ministerio fidelem et in caritate ferventem.

[S1869ai] Vidi civitatem sanctam, Ierusalem novam, descendentem de caelo a Deo, paratam sicut sponsam ornatam viro suo.

[S1870ai] Ecce tabernaculum Dei cum hominibus! Et habitabit cum eis, et ipsi populus eius erunt, et ipse Deus cum eis erit eorum Deus.

[S1871co] Deus, qui de vivis et electis lapidibus aeternum habitaculum tuae praeparas maiestati, multiplica in Ecclesia tua spiritum gratiae, quem dedisti, ut fidelis tibi populus in caelestis aedificationem Ierusalem semper accrescat.

[S1872co] Deus, qui populum tuum Ecclesiam vocare dignatus es, da, ut plebs in nomine tuo congregata te timeat, te diligat, te sequatur et ad caelestia promissa, te ducente, perveniat.

[S1873so] Suscipe, quaesumus, Domine, munus oblatum, et poscentibus concede, ut hic sacramentorum virtus et votorum obtineatur effectus.

[S1874vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui domum orationis munificus inhabitare dignaris, ut, gratia tua perpetuis fovente subsidiis, templum Spiritus Sancti ipse nos perficias, acceptabilis vitae splendore coruscans. Sed et visibilibus aedificiis adumbratam, Christi sponsam Ecclesiam perenni operatione sanctificas, ut, innumerabili prole mater exsultans, in gloriam tuam collocetur in caelis. Et ideo, cum Sanctis et Angelis universis, te collaudamus, sine fine dicentes: Sanctus.

[S1875am] Tamquam lapides vivi superaedificamini, domus spiritalis, sacerdotium sanctum.

[S1876pc] Deus, qui nobis supernam Ierusalem per temporale Ecclesiae tuae signum adumbrare voluisti, da, quaesumus, ut, huius participatione sacramenti, nos tuae gratiae templum efficias, et habitationem gloriae tuae ingredi concedas.

[S1877ai] Statuit ei Dominus testamentum pacis, et principem fecit eum, ut sit illi sacerdotii dignitas in aeternum.

[S1878co] Deus, qui adversus Ecclesiam tuam, in apostolicae petrae soliditate fundatam, portas inferi numquam praevalere permittis, da ei, quaesumus, ut, intercedente beato Leone papa, in tua veritate consistens, pace continua muniatur.

[S1879so] Oblatis muneribus, quaesumus, Domine, Ecclesiam tuam benignus illumina, ut et gregis tui proficiat ubique successus, et grati fiant nomini tuo, te gubernante, pastores.

[S1880co] Dixit Petrus ad Iesum: Tu es Christus, Filius Dei vivi. Respondit Iesus: Tu es Petrus, et super hanc petram aedificabo Ecclesiam meam.

[S1881pc] Refectione sancta enutritam guberna, quaesumus, Domine, tuam placatus Ecclesiam, ut, potenti moderatione directa, et incrementa libertatis accipiat, et in religionis integritate persistat.

[S1882ai] Suscitabo mihi sacerdotem fidelem, qui iuxta cor meum et animam meam faciet, dicit Dominus.

[S1883co] Deus, qui in beato Martino episcopo sive per vitam sive per mortem magnificatus es, innova gratiae tuae mirabilia in cordibus nostris, ut neque mors neque vita separare nos possit a caritate tua.

[S1884so] Sanctifica, quaesumus, Domine Deus, haec munera, quae in honorem sancti Martini laetanter offerimus, ut per ea vita nostra inter adversa et prospera semper dirigatur.

[S1885am] Amen dico vobis, quamdiu fecistis uni ex his fratribus meis minimis, mihi fecistis, dicit Dominus.

[S1886pc] Da nobis, Domine, unitatis sacramento refectis, perfectam in omnibus cum tua voluntate concordiam, ut, sicut beatus Martinus totum se tibi subiecit, ita et nos esse tui veraciter gloriemur.

[S1887ai] Propter testamentum Domini et leges paternas, Sancti Dei perstiterunt in amore fraternitatis: Quia unus fuit semper spiritus in eis, et una fides.

[S1888co] Excita, quaesumus, Domine, in Ecclesia tua Spiritum, quo repletus beatus Iosaphat animam suam pro ovibus posuit, ut, eo intercedente, nos quoque eodem Spiritu roborati, animam nostram pro fratribus ponere non vereamur.

[S1889so] Clementissime Deus, munera haec tua benedictione perfunde, et nos in tua fide confirma, quam sanctus Iosaphat effuso sanguine asseruit.

[S1890am] Qui perdiderit animam suam propter me, dicit Dominus, inveniet eam in aeternum.

[S1891pc] Spiritum, Domine, fortitudinis et pacis haec nobis tribuat mensa caelestis, ut, sancti Iosaphat exemplo, vitam nostram ad honorem et unitatem Ecclesiae libenter impendamus.

[S1892co] Deus, qui beatum Albertum episcopum in humana sapientia cum divina fide componenda magnum effecisti, da nobis, quaesumus, ita eius magisterii inhaerere doctrinis, ut per scientiarum progressus ad profundiorem tui cognitionem et amorem perveniamus.

[S1893co] Deus, qui beatam Margaritam eximia in pauperes caritate mirabilem effecisti, da, ut, eius intercessione et exemplo, imaginem bonitatis tuae inter homines referamus.

[S1894co] Deus, qui iucundam tibi mansionem in corde beatae Gertrudis virginis praeparasti, ipsius intercessione, cordis nostri tenebras clementer illustra, ut te in nobis praesentem et operantem laetanter experiamur.

[S1895co] Deus, qui beatae Elisabeth tribuisti in pauperibus Christum cognoscere ac venerari, da nobis, eius intercessione, egenis et tribulatis iugi caritate servire.

[S1896ai] Constitues eos principes super omnem terram; memores erunt nominis tui in omni generatione et generationem: propterea populi confitebuntur tibi in aeternum et in saeculum saeculi.

[S1897co] Ecclesiam tuam, Domine, apostolicis defende praesidiis, ut, per quos initium divinae cognitionis accepit, per eos usque in finem saeculi capiat gratiae caelestis augmentum.

[S1898so] Servitutis nostrae tibi, Domine, munus offerentes, tuam deprecamur clementiam, ut tradita nobis apostolorum Petri et Pauli ministerio veritas in cordibus nostris illibata perseveret.

[S1899am] Domine, verba vitae aeternae habes, et nos credidimus quia tu es Christus Filius Dei.

[S1900pc] Populus tuus, quaesumus, Domine, caelesti pane refectus, apostolorum Petri et Pauli commemoratione laetetur, quorum donasti patrocinio gubernari.

[S1901co] Sanctissimae venerantibus Virginis Mariae memoriam gloriosam, ipsius nobis, quaesumus, Domine, intercessione concede, ut de plenitudine gratiae tuae nos quoque mereamur accipere.

[S1902co] Deus, qui nos annua beatae Caeciliae celebritate laetificas, praesta, quaesumus, ut ea, quae de ancilla tua devote tradita sunt, exempla nobis praebeant imitanda et Christi Filii tui in servis eius praedicent mirabilia.

[S1903co] Omnipotens sempiterne Deus, qui in omnium sanctorum tuorum es virtute mirabilis, da nobis in beati Clementis annua commemoratione laetari, qui, Filii tui sacerdos et martyr, quod mysterio gessit, testimonio comprobavit, et, quod praedicavit ore, confirmavit exemplo.

[S1904co] Deus, qui in beato Columbano evangelizandi munus et monasticae vitae studium mirabiliter coniunxisti, praesta, quaesumus, ut, eius intercessione et exemplo, te super omnia quaerere et credentium populum augere studeamus.

[S1905ai] Nobis absit gloriari nisi in cruce Domini nostri Iesu Christi. Verbum enim crucis nobis, qui salvi facti sumus, virtus Dei est.

[S1906co] Deus, omnis paternitatis fons et origo, qui beatos martyres Andream et socios eius Cruci Filii tui usque ad sanguinis effusionem fideles effecisti, eorum intercessione concede, ut amorem tuum inter fratres propagantes filii tui nominari et esse valeamus. Per Dominum.

[S1907so] Suscipe, sancte Pater, munera quae offerimus, passionem venerantes sanctorum martyrum, ut inter adversa vitae nostrae, fideles tibi semper inveniri mereamur et hostiam tibi acceptabilem nosmetipsos exhibere.

[S1908am] Beati qui persecutionem patiuntur propter iustitiam, quoniam ipsorum est regnum caelorum.

[S1909pc] Unius panis alimonia refecti, in commemoratione sanctorum martyrum, te, Domine, suppliciter deprecamur, ut, in tua dilectione unanimes manentes, patientiae praemium mereamur consequi aeternum.

[S1910co] Omnipotens sempiterne Deus, qui populo tuo beatam Catharinam virginem et invictam martyrem praestitisti, concede, ut, eius intercessione, fide et constantia roboremur, et pro Ecclesiae unitate operam tribuamus impense.

[S1911ai] Dominus secus mare Galilaeae vidit duos fratres, Petrum et Andream, et vocavit eos: Venite post me, faciam vos fieri piscatores hominum.

[S1912co] Maiestatem tuam, Domine, suppliciter exoramus, ut, sicut Ecclesiae tuae beatus Andreas apostolus exstitit praedicator et rector, ita apud te sit pro nobis perpetuus intercessor.

[S1913so] Concede nobis, omnipotens Deus, ut his muneribus, quae in beati Andreae festivitate deferimus, et tibi placeamus exhibitis, et vivificemur acceptis.

[S1914am] Dixit Andreas Simoni fratri suo: Invenimus Messiam, qui dicitur Christus. Et adduxit eum ad Iesum.

[S1915pc] Roboret nos, Domine, sacramenti tui communio, ut, exemplo beati Andreae apostoli, Christi mortificationem ferentes, cum ipso vivere mereamur in gloria.

[S1916ai] Confitebor tibi in populis, Domine, et narrabo nomen tuum fratribus mei.

[S1917co] Deus, qui beati Francisci praedicatione multos tibi populos acquisisti, da, ut fidelium animi eodem fidei zelo ferveant, et uberrima ubique prole Ecclesia sancta laetetur.

[S1918so] Suscipe, Domine, munera, quae tibi in beati Francisci commemoratione deferimus, et praesta, ut, sicut ille desiderio salutis hominum ad terras longinquas est progressus, ita et nos, testimonium Evangelio efficaciter perhibentes, ad te cum fratribus properare festinemus.

[S1919am] Quod dico vobis in tenebris, dicite in lumine, dicit Dominus, et quod in aure auditis, praedicate super tecta.

[S1920pc] Mysteria tua, Deus, eum in nobis accendant caritatis ardorem, quo beatus Franciscus pro animarum salute flagravit, ut, vocatione nostra dignius ambulantes, promissum bonis operariis praemium cum eo consequamur.

[S1921co] Praesta nobis, quaesumus, Domine, beati Ioannis presbyteri precibus adiuvari, ut vera fides, quam ille excellenter docuit, sit semper lux et fortitudo nostra.

[S1922co] Misericordiam tuam, Domine, supplices imploramus, et, beati Nicolai episcopi interveniente suffragio, nos in omnibus custodi periculis, ut via salutis nobis pateat expedita.

[S1923ai] In medio Ecclesiae aperuit os eius, et implevit eum Dominus spiritu sapientiae et intellectus; stolam gloriae induit eum.

[S1924co] Deus, qui beatum Ambrosium episcopum catholicae fidei doctorem et apostolicae fortitudinis exemplum effecisti, excita in Ecclesia tua viros secundum cor tuum, qui eam fortiter et sapienter gubernent.

[S1925so] Illa nos, quaesumus, Domine, divina tractantes, Spiritus Sanctus fidei luce perfundat, qua beatum Ambrosium ad gloriae tuae propagationem iugiter collustravit.

[S1926am] Qui meditabitur in lege Domini die ac nocte, dabit fructum suum in tempore suo.

[S1927pc] Huius sacramenti, Domine, virtute roboratos, fac nos beati Ambrosii documentis ita proficere, ut, viriliter per tuas semitas festinantes, ad aeterni suavitatem convivii praeparemur.

[S1928ai] Gaudens gaudebo in Domino, et exsultabit anima mea in Deo meo; quia induit me vestimentis salutis, et indumento iustitiae circumdedit me, quasi sponsam ornatam monilibus suis.

[S1929co] Deus, qui per immaculatam Virginis Conceptionem dignum Filio tuo habitaculum praeparasti, quaesumus, ut, qui ex morte eiusdem Filii tui praevisa, eam ab omni labe praeservasti, nos quoque mundos, eius intercessione, ad te pervenire concedas.

[S1930so] Salutarem hostiam, quam in sollemnitate immaculatae Conceptionis beatae Virginis Mariae tibi, Domine, offerimus, suscipe dignanter, et praesta, ut, sicut illam tua gratia praeveniente ab omni labe profitemur immunem, ita, eius intercessione, a culpis omnibus liberemur.

[S1931vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui beatissimam Virginem Mariam ab omni originalis culpae labe praeservasti, ut in ea, gratiae tuae plenitudine ditata, dignam Filio tuo Genetricem praeparares, et Sponsae eius Ecclesiae, sine ruga vel macula formosae, signares exordium. Filium enim erat purissima Virgo datura, qui crimina nostra Agnus innocens aboleret; et ipsam prae omnibus tuo populo disponebas advocatam gratiae et sanctitatis exemplar. Et ideo, choris angelicis sociati, te laudamus in gaudio confitentes: Sanctus.

[S1932am] Gloriosa dicta sunt de te, Maria, quia ex te ortus est sol iustitiae, Christus Deus noster.

[S1933pc] Sacramenta quae sumpsimus, Domine Deus noster, illius in nobis culpae vulnera reparent, a qua immaculatam beatae Mariae Conceptionem singulariter praeservasti.

[S1934co] Praesta, quaesumus, Domine, ut martyrum tuorum iugiter merita celebremus, quorum exstitit beatus Damasus papa cultor et amator.

[S1935co] Intercessio nos, quaesumus, Domine, sanctae Luciae virginis et martyris gloriosa confoveat, ut eius natalicia et temporaliter frequentemus, et conspiciamus aeterna.

[S1936ai] Mihi autem absit gloriari, nisi in cruce Domini nostri Iesu Christi, per quem mihi mundus crucifixus est, et ego mundo.

[S1937co] Deus, qui beatum Ioannem presbyterum perfectae sui abnegationis et crucis amatorem eximium effecisti, concede ut, eius imitationi iugiter inhaerentes, ad contemplationem gloriae tuae perveniamus aeternam.

[S1938so] Respice quas offerimus hostias, omnipotens Deus, in commemoratione beati Ioannis, et praesta, ut, qui dominicae passionis mysteria celebramus, imitemur quod agimus.

[S1939am] Qui vult venire post me, abneget semetipsum, et tollat crucem suam, et sequatur me, dicit Dominus.

[S1940pc] Deus, qui crucis mysterium in beato Ioanne mirabiliter illustrasti, concede propitius, ut, ex hoc sacrificio roborati, Christo fideles haereamus, et in Ecclesia ad salutem omnium operemur.

[S1941co] Deus, qui ad tuendam catholicam fidem virtute et doctrina beatum Petrum presbyterum roborasti, eius intercessione concede, ut, qui veritatem quaerunt, te Deum gaudenter inveniant, et in tua confessione populus credentium perseveret.

[S1942co] Da, quaesumus, omnipotens Deus, ut, exemplo beati Ioannis presbyteri, in sanctorum scientia procedamus, atque, misericordiam omnibus exhibentes, apud te indulgentiam consequamur.

[S1943ai] Apertae sunt ianuae caeli beato Stephano, qui in numero Martyrum inventus est primus, et ideo triumphat in caelis coronatus.

[S1944co] Da nobis, quaesumus, Domine, imitari quod colimus, ut discamus et inimicos diligere, quia eius natalicia celebramus, qui novit etiam pro persecutoribus exorare.

[S1945so] Munera, quaesumus, Domine, tibi sint hodiernae devotionis accepta, quae beati Stephani martyris commemoratio gloriosa depromit.

[S1946am] Lapidabant Stephanum, invocantem et dicentem: Domine Iesu, suscipe spiritum meum.

[S1947pc] Gratias agimus, Domine, multiplicatis circa nos miserationibus tuis, qui et Filii tui nativitate nos salvas, et beati martyris Stephani celebratione laetificas.

[S1948ai] Iste est Ioannes, qui supra pectus Domini in cena recubuit: beatus Apostolus, cui revelata sunt secreta caelestia, et verba vitae in toto terrarum orbe diffudit.

[S1949ai] In medio Ecclesiae aperuit os eius, et implevit eum Dominus spiritu sapientiae et intellectus; stolam gloriae induit eum.

[S1950co] Deus, qui per beatum apostolum Ioannem Verbi tui nobis arcana reserasti, praesta, quaesumus, ut, quod ille nostris auribus excellenter infudit, intellegentiae competentis eruditione capiamus.

[S1951so] Munera, quaesumus, Domine, oblata sanctifica, et praesta, ut ex huius cenae convivio aeterni Verbi secreta hauriamus, quae ex eodem fonte apostolo tuo Ioanni revelasti.

[S1952am] Verbum caro factum est, et habitavit in nobis. Et de plenitudine eius nos omnes accepimus.

[S1953pc] Praesta, quaesumus, omnipotens Deus, ut Verbum caro factum, quod beatus Ioannes apostolus praedicavit, per hoc mysterium quod celebravimus habitet semper in nobis.

[S1954ai] Innocentes pro Christo infantes occisi sunt, ipsum sequuntur Agnum sine macula, et dicunt semper: Gloria tibi, Domine.

[S1955co] Deus, cuius hodierna die praeconium Innocentes martyres non loquendo sed moriendo confessi sunt, da, quaesumus, ut fidem tuam, quam lingua nostra loquitur, etiam moribus vita fateatur.

[S1956so] Suscipe, Domine, quaesumus, devotorum munera famulorum, et eos tuis purifica servientes pietate mysteriis, quibus etiam iustificas ignorantes.

[S1957am] Hi empti sunt ex hominibus, primitiae Deo et Agno; hi sequuntur Agnum quocumque ierit.

[S1958pc] Salvationis abundantiam tribue, Domine, fidelibus in eorum festivitate tua sancta sumentibus, qui, Filium tuum humana necdum voce profitentes, caelesti sunt gratia pro eius nativitate coronati.

[S1959co] Deus, qui beato Thomae martyri pro iustitia magno animo vitam profundere tribuisti, da nobis, eius intercessione, nostram pro Christo vitam in hoc saeculo abnegare, ut eam in caelo invenire possimus.

[S1960co] Auxiliare, Domine, populo tuo, beati Silvestri papae intercessione suffulto, ut, praesentem vitam sub tua gubernatione transcurrens, mereatur feliciter invenire perpetuam.

[C1961ai] Mirabilis, Deus, de sanctuario tuo! Deus Israel ipse tribuet virtutem et fortitudinem plebi suae. Benedictus Deus! (T.P. alleluia).

[C1962co] Deus, qui nobis per singulos annos huius sancti templi tui consecrationis reparas diem, exaudi preces populi tui, et praesta, ut fiat hic tibi semper purum servitium et nobis plena redemptio.

[C1963so] Memores diei quo domum tuam, Domine, gloria dignatus es ac sanctitate replere, nosmetipsos, quaesumus, fac hostias tibi semper acceptas.

[C1964vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quia in domo visibili quam nobis exstruere concessisti, ubi familiae in hoc loco ad te peregrinanti favere non desinis, mysterium tuae nobiscum communionis mire figuras et operaris: hic enim tibi templum illud quod nos sumus aedificas, et Ecclesiam per orbem diffusam in dominici compagem corporis facis augeri, in pacis visione complendam, caelesti civitate Ierusalem. Et ideo, cum multitudine ordinum beatorum, in templo gloriae tuae, te collaudamus, benedicimus et magnificamus, dicentes: Sanctus.

[C1965am] Templum Dei estis, et Spiritus Dei habitat in vobis. Templum Dei sanctum est, quod estis vos (T.P. alleluia).

[C1966pc] Benedictionis tuae, quaesumus, Domine, plebs tibi sacra fructus reportet et gaudium, ut, quod in huius festivitatis die corporali servitio exhibuit, spiritaliter se retulisse cognoscat.

[C1967bs] Deus, Dominus caeli et terrae, qui vos hodie ad huius domus dedicationis memoriam adunavit, ipse vos caelesti benedictione faciat abundare. Concedatque vobis fieri templum suum et habitaculum Spiritus Sancti, qui omnes filios dispersos voluit in Filio suo congregari. Quatenus feliciter emundati, habitatorem Deum in vobismetipsis possitis habere, et aeternae beatitudinis hereditatem cum omnibus Sanctis possidere.

[C1968ai] Vidi civitatem sanctam, Ierusalem novam, descendentem de caelo a Deo, paratam sicut sponsam ornatam viro suo (T.P. alleluia).

[C1969ai] Ecce tabernaculum Dei cum hominibus! Et habitabit cum eis, et ipsi populus eius erunt, et ipse Deus cum eis erit eorum Deus (T.P. alleluia).

[C1970co] Deus, qui de vivis et electis lapidibus aeternum habitaculum tuae praeparas maiestati, multiplica super Ecclesiam tuam gratiam, quam dedisti, ut fidelis tibi populus in caelestis aedificationem Ierusalem semper accrescat. Per Dominum.

[C1071co] Deus, qui Ecclesiam tuam sponsam vocare dignatus es, da, ut plebs nomini tuo inserviens te timeat, te diligat, te sequatur et ad caelestia promissa, te ducente, perveniat. Per Dominum.

[C1972so] Suscipe, quaesumus, Domine, munus oblatum, et poscentibus concede, ut hic sacramentorum virtus et votorum obtineatur effectus.

[C1973vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui domum orationis munificus inhabitare dignaris, ut, gratia tua perpetuis fovente subsidiis, templum Spiritus Sancti ipse nos perficias, acceptabilis vitae splendore coruscans. Sed et visibilibus aedificiis adumbratam, Christi sponsam Ecclesiam perenni operatione sanctificas, ut, innumerabili prole mater exsultans, in gloriam tuam collocetur in caelis. Et ideo, cum Sanctis et Angelis universis, te collaudamus, sine fine dicentes: Sanctus.

[C1974am] Tamquam lapides vivi superaedificamini, domus spiritalis, sacerdotium sanctum (T.P. alleluia).

[C1975am] Domus mea, domus orationis vocabitur, dicit Dominus: in ea omnis qui petit, accipit; et qui quaerit, invenit; et pulsanti aperietur (T.P. alleluia).

[C1976pc] Deus, qui nobis supernam Ierusalem per temporale Ecclesiae tuae signum adumbrare voluisti, da, quaesumus, ut, huius participatione sacramenti, nos tuae gratiae templum efficias, et habitationem gloriae tuae ingredi concedas.

[C1977ai] Salve, sancta parens, enixa puerpera Regem, qui caelum terramque regit in saecula saeculorum.

[C1978co] Concede nos famulos tuos, quaesumus, Domine Deus, perpetua mentis et corporis sanitate gaudere, et, gloriosa beatae Mariae semper Virginis intercessione, a praesenti liberari tristitia, et aeterna perfrui laetitia.

[C1979so] Suscipe, quaesumus, Domine, preces populi tui cum oblationibus hostiarum, ut, intercedente beata Maria, Filii tui Genetrice, nullius sit irritum votum, nullius sit vacua postulatio.

[C1980am] Beata viscera Mariae Virginis, quae portaverunt aeterni Patris Filium.

[C1981pc] Sumentes, Domine, caelestia sacramenta, quaesumus clementiam tuam, ut, qui de beatae Virginis Mariae commemoratione laetamur, eiusdem Virginis imitatione, redemptionis nostrae mysterio digne valeamus famulari.

[C1982ai] Beata es, Virgo Maria, quae omnium portasti creatorem; genuisti qui te fecit, et in aeternum permanes Virgo.

[C1983co] Concede, misericors Deus, fragilitati nostrae praesidium, ut, qui sanctae Dei Genetricis memoriam agimus, intercessionis eius auxilio a nostris iniquitatibus resurgamus.

[C1984so] Genetricis Filii tui memoriam venerantes, quaesumus, Domine, ut sacrificii huius oblatio nosmetipsos, gratia tua largiente, tibi perficiat munus aeternum.

[C1985am] Fecit mihi magna, qui potens est, et sanctum nomen eius.

[C1986pc] Redemptionis aeternae participes effecti, quaesumus, Domine, ut, qui Genetricis Filii tui memoriam agimus, et de gratiae tuae plenitudine gloriemur, et salvationis continuum sentiamus augmentum.

[C1987ai] Benedicta es tu, Virgo Maria, a Domino Deo excelso prae omnibus mulieribus super terram; quia nomen tuum ita magnificavit, ut non recedat laus tua de ore hominum.

[C1988co] Sanctissimae venerantibus Virginis Mariae memoriam gloriosam, ipsius nobis, quaesumus, Domine, intercessione concede, ut de plenitudine gratiae tuae nos quoque mereamur accipere.

[C1989so] Laudis tibi, Domine, hostias offerimus, de Genetricis Filii tui commemoratione laetantes; praesta, quaesumus, ut per haec sacrosancta commercia ad redemptionis aeternae proficiamus augmentum.

[C1990am] Beatam me dicent omnes generationes, quia ancillam humilem respexit Deus.

[C1991pc] Refecti, Domine, caelestibus alimoniis, te supplices exoramus, ut Filium tuum, ex alma Virgine natum, quem sacramento suscepimus, confiteamur verbis et moribus teneamus. Qui vivit et regnat in saecula saeculorum.

[C1992ai] Vultum tuum deprecabuntur omnes divites plebis: adducentur Regi virgines post eam: proximae eius adducentur tibi in laetitia et exsultatione.

[C1993co] Famulorum tuorum, quaesumus, Domine, delicta ignosce, ut, qui tibi placere de actibus nostris non valemus, Genetricis Filii tui Domini nostri intercessione salvemur. Qui tecum.

[C1994so] Suscipe, Domine, munera quae tibi offerimus, et praesta, ut corda nostra, Sancti Spiritus luce irradiata, exemplo beatae Virginis Mariae, tua semper valeant perquirere et conservare.

[C1995am] Laudate Dominum Deum nostrum, quia in Maria ancilla sua adimplevit misericordiam suam, quam promisit domui Israel.

[C1996pc] Sumptis, Domine, salutis et fidei sacramentis, supplices te deprecamur, ut, beatam Virginem Mariam devote recolentes, supernae caritatis cum ipsa participes fieri mereamur.

[C1997ai] Ave, Maria, gratia plena, Dominus tecum: benedicta tu in mulieribus, et benedictus fructus ventris tui.

[C1998co] Deus, qui beatam Virginem Mariam, inter humiles et pauperes praecellentem, Matrem Salvatoris elegisti, praesta, quaesumus, ut, eius exempla sectantes, tibi sincerae fidei praestemus obsequium et in te totam spem salutis collocemus.

[C1999so]
Suscipe, Domine, haec nostrae devotionis munera, et praesta, ut, qui Filii tui immensae caritatis opus recolimus, in tui et proximi dilectione beatae Mariae Virginis confirmemur exemplo.

[C2000am] Gloriosa dicta sunt de te, Virgo Maria, quia fecit tibi magna, qui potens est.

[C2001pc] Concede, Domine, Ecclesiae tuae, ut, huius sacramenti virtute roborata, semitas Evangelii alacriter percurrat, donec beatam pacis visionem attingat, qua Virgo Maria, humilis ancilla tua, iam fruitur in aeternum gloriosa.

[C2002ai] Virga Iesse floruit: Virgo Deum et hominem genuit; pacem Deus reddidit, in se reconcilians ima summis.

[C2003co] Adiuvet nos, quaesumus, Domine, beatae Mariae semper Virginis intercessio veneranda, et a cunctis periculis absolutos in tua faciat pace gaudere.

[C2004so] Munera tibi placationis et laudis offerimus, Domine, humiliter deprecantes, ut, beatae Mariae Virginis sequentes exempla, nosmetipsos exhibeamus hostiam sanctam, tibi placentem.

[C2005am] Diffusa est gratia in labiis tuis: propterea benedixit te Deus in aeternum.

[C2006pc] Caelesti alimonia nutritos, fac nos, Domine, exemplo beatae Virginis Mariae, pura tibi conversatione servire, et cum ipsa te sinceris laudibus magnificare.

[C2007ai] Ait Maria: Exsultavit spiritus meus in Deo salutari meo; quia respexit Dominus humilitatem ancillae suae.

[C2008co] Deus, qui virginalem aulam beatae Mariae, in qua Verbum tuum habitaret, eligere dignatus es, da, quaesumus, ut, eius nos defensione munitos, iucundos facias interesse eius commemorationi.

[C2009so] Accepta sint tibi, Domine, munera populi tui, in commemoratione beatae Mariae oblata, quae tibi virginitate placuit et humilitate concepit Filium tuum Dominum nostrum. Qui vivit et regnat in saecula saeculorum.

[C2010am] Maria conservabat omnia verba haec, conferens in corde suo.

[C2011pc] Spiritualis alimoniae participes effecti, quaesumus, Domine Deus noster, ut, beatam Virginem Mariam assidue imitantes, et Ecclesiae servitio semper inveniamur intenti et tui experiamur gaudia famulatus.

[C2012ai] Felix es, sacra Virgo Maria, et omni laude dignissima: quia ex te ortus est sol iustitiae, Christus Deus noster, per quem salvati et redempti sumus.

[C2013co] Concede, quaesumus, omnipotens Deus, ut fideles tui, qui sub sanctissimae Virginis Mariae patrocinio laetantur, eius pia intercessione a cunctis malis liberentur in terris, et ad gaudia aeterna pervenire mereantur in caelis.

[C2014so] Preces, Domine, tuorum respice oblationesque fidelium, in beatae Mariae Dei Genetricis commemoratione delatas, ut et tibi gratae sint, et nobis conferant tuae propitiationis auxilium.

[C2015am] Respexit Dominus humilitatem ancillae suae, ecce enim beatam me dicent omnes generationes.

[C2016pc] Salutaribus refecti sacramentis, supplices te, Domine, deprecamur, ut, qui memoriam beatae Virginis Dei Genetricis Mariae venerando egimus, redemptionis tuae fructum perpetuo experiri mereamur.

[C2017ai] Rorate, caeli, desuper, et nubes pluant iustum; aperiatur terra, et germinet Salvatorem.

[C2018ai] Angelus ad Mariam ait: Invenisti gratiam apud Deum; Ecce concipies et paries filium, et vocabitur Altissimi Filius.

[C2019co] Deus, qui de beatae Mariae Virginis utero Verbum tuum, Angelo nuntiante, carnem suscipere voluisti, praesta supplicibus tuis, ut, qui vere eam Dei Genetricem credimus, eius apud te intercessionibus adiuvemur.

[C2020co] Deus, qui promissa Patribus adimplens beatam Virginem Mariam elegisti, ut Mater fieret Salvatoris, concede nobis illius exempla sectari, cuius humilitas tibi placuit, et oboedientia nobis profuit.

[C2021so] Accipe, Domine, haec munera, et tua virtute in sacramentum salutis converte, in quo, cessantibus figuralibus Patrum hostiis, verus Agnus offertur, Iesus Christus Filius tuus, ex intacta Virgine ineffabiliter natus.

[C2022am] Ecce Virgo concipiet, et pariet filium, et vocabitur nomen eius Emmanuel.

[C2023pc] Mysteria quae sumpsimus, Domine Deus noster, misericordiam tuam in nobis semper ostendant, ut Filii tui incarnatione salvemur, qui Genetricis eius commemorationem fideli mente celebramus.

[C2024ai] Genuit puerpera Regem, cui nomen aeternum, et gaudia matris habens cum virginitatis honore: nec primam similem visa est, nec habere sequentem.

[C2025ai] Virgo Dei Genetrix, quem totus non capit orbis, in tua se clausit viscera factus homo.

[C2026co] Deus, qui salutis aeternae, beatae Mariae virginitate fecunda, humano generi praemia praestitisti, tribue, quaesumus, ut ipsam pro nobis intercedere sentiamus, per quam meruimus Filium tuum auctorem vitae suscipere, Dominum nostrum Iesum Christum, Filium tuum.

[C2027co] Deus, cuius Verbum ab aeterno genitum ex Virginis utero procedere voluisti, concede, quaesumus, ut, beata Maria intercedente, splendore praesentiae suae nostras illuminet tenebras, ac de sua plenitudine donet nobis laetitiam et pacem. Qui tecum.

[C2028so] Beata tempora celebrantes, quae per temporalem Unigeniti tui nativitatem et partum Mariae Virginis consecrasti, haec oblatio, quaesumus, Domine, nos sanctificet, atque in illo tribuat renasci.

[C2029am] Beata viscera Mariae Virginis, quae portaverunt aeterni Patris Filium.

[C2030pc] Incarnati Verbi tui Corpore et Sanguine refecti, quaesumus, Domine, ut haec divina mysteria, quae in commemoratione beatae Virginis Mariae laetanter accepimus, eiusdem Filii tui divinitatis participes nos semper efficiant.

[C2031ai] Convertisti, Domine, planctum meum in gaudium mihi, et circumdedisti me laetitia, alleluia.

[C2032co] Deus, qui, per resurrectionem Filii tui Domini nostri Iesu Christi, mundum laetificare dignatus es, praesta, quaesumus, ut, per eius Genetricem Virginem Mariam, perpetuae capiamus gaudia vitae.

[C2033so] Suscipe, sancte Pater, oblationem humilitatis nostrae, quam tibi laeti exhibemus, commemorationem beatae Mariae Virginis celebrantes, et praesta, ut nobis, sacrificio Christi sociatis, temporalis fiat consolatio et aeterna salvatio.

[C2034am] Laetare, Virgo Mater, quia surrexit Christus de sepulcro, alleluia.

[C2035pc] Paschalibus sacramentis refecti, quaesumus, Domine, ut, qui Genetricis Filii tui memoriam recolimus, vitam Iesu in carne nostra mortali manifestemus.

[C2036ai] Gaudent in caelis animae Sanctorum, qui Christi vestigia sunt secuti; et quia pro eius amore sanguinem suum fuderunt, ideo cum Christo exsultant sine fine.

[C2037ai] Viri sancti gloriosum sanguinem fuderunt pro Domino, amaverunt Christum in vita sua, imitati sunt eum in morte sua: et ideo coronas triumphales meruerunt.

[C2038co] Praesta, Domine, precibus nostris cum exsultatione proventum, ut sanctorum martyrum N. et N., quorum diem passionis annua devotione recolimus, etiam fidei constantiam subsequamur.

[C2039so] Suscipe, sancte Pater, munera quae in sanctorum martyrum commemoratione deferimus, et nobis famulis tuis concede, ut in confessione tui nominis inveniri stabiles mereamur.

[C2040am] Vos estis qui permansistis mecum in tentationibus meis, et ego dispono vobis regnum, dicit Dominus, ut edatis et bibatis super mensam meam in regno meo.

[C2041am] Ecce merces Sanctorum copiosa est apud Deum: ipsi vero mortui sunt pro Christo, et vivent in aeternum.

[C2042pc] Deus, qui crucis mysterium in sanctis martyribus tuis mirabiliter illustrasti, concede propitius, ut, ex hoc sacrificio roborati, Christo fideliter haereamus, et in Ecclesia ad salutem omnium operemur.

[C2043ai] Multae tribulationes iustorum, et de his omnibus liberavit eos Dominus. Dominus custodit omnia ossa eorum, unum ex his non conteretur.

[C2044ai] Isti sunt, qui venerunt ex magna tribulatione, et laverunt stolas suas in sanguine Agni. Tradiderunt corpora sua propter Deum ad supplicia: et meruerunt habere coronas perpetuas.

[C2045co] Omnipotens sempiterne Deus, qui sanctis N. et N. pro Christo pati donasti, nostrae quoque fragilitati divinum praetende subsidium, ut sicut illi pro te mori non dubitarunt, ita nos fortes in tua confessione vivere valeamus.

[C2046so] Fiat tibi, quaesumus, Domine, hostia sacranda placabilis pretiosi celebritate martyrii, quae et peccata nostra purificet, et tuorum tibi vota conciliet famulorum.

[C2047am] Maiorem caritatem nemo habet, ut animam suam ponat quis pro amicis suis, dicit Dominus.

[C2048am] Dico autem vobis amicis meis: Ne terreamini ab his, qui vos persequuntur.

[C2049pc] Pane caelesti nutritos et in Christo unum corpus effectos, da nos, quaesumus, Domine, ab eius caritate numquam separari et, sanctorum martyrum tuorum N. et N. exemplo, propter eum qui dilexit nos omnia fortiter superare.

[C2050ai] Salus iustorum a Domino, et protector eorum est in tempore tribulationis.

[C2051ai] Tamquam aurum in fornace probavit electos Dominus, et quasi holocausti hostiam accepit illos; et in tempore erit respectus illorum: quoniam donum et pax erit electis Dei.

[C2052co] Fraterna nos, Domine, martyrum tuorum corona laetificet, quae et fidei nostrae praebeat incrementa virtutum, et multiplici nos suffragio consoletur.

[C2053co] Beatorum martyrum N. et N., quaesumus, Domine, tibi nos oratio grata commendet, et in tuae veritatis professione confirmet.

[C2054so] Suscipe, quaesumus, Domine, munera populi tui pro martyrum tuorum passionibus dicata sanctorum, et, quae beatis N. et N. in persecutione fortitudinem ministrarunt, nobis quoque praebeant inter adversa constantiam.

[C2055am] Qui perdiderit animam suam propter me et Evangelium, salvam faciet eam, dicit Dominus.

[C2056am] Si coram hominibus tormenta passi sunt, spes electorum est immortalis in aeternum.

[C2057pc] Conserva in nobis, Domine, munus tuum, et quod, te donante, pro festivitate beatorum martyrum N. et N. percepimus, et salutem nobis praestet et pacem.

[C2058ai] Clamaverunt iusti, et Dominus exaudivit eos, et ex omnibus tribulationibus eorum liberavit eos.

[C2059ai] Propter testamentum Domini et leges paternas, Sancti Dei perstiterunt in amore fraternitatis: quia unus fuit semper spiritus in eis, et una fides.

[C2060co] Deus, qui nos annua sanctorum N. et N. festivitate laetificas, concede propitius, ut, quorum natalicia colimus, virtutem quoque passionis imitemur.

[C2061co] Deus, qui sanctis N. et N. ad hanc gloriam veniendi copiosam munus gratiae contulisti, da famulis tuis, martyrum intercedentibus meritis, veniam peccatorum, et concede, ut ab omnibus adversitatibus liberentur.

[C2062so] Hostias tibi, Domine, pro commemoratione beatorum N. et N. offerimus, suppliciter deprecantes, ut, sicut illis praebuisti sacrae fidei claritatem, sic nobis indulgentiam largiaris et pacem.

[C2063am] In mortem tradimur propter Iesum, ut et vita Iesu manifestetur in carne nostra mortali.

[C2064am] Nolite timere eos qui corpus occidunt, animam autem non possunt occidere, dicit Dominus.

[C2065pc] Concede nobis, Domine, per haec sacramenta caelestia, gratiam in beatorum martyrum N. et N. celebritate multiplicem, ut de tanti agone certaminis discamus et firma solidari patientia, et pia exsultare victoria.

[C2066ai] Sanguis sanctorum martyrum pro Christo effusus est in terris; ideo adepti sunt praemia sempiterna.

[C2067ai] Iustorum animae in manu Dei sunt: et non tanget illos tormentum malitiae. Visi sunt oculis insipientium mori: illi autem sunt in pace.

[C2068co] Da nobis, quaesumus, Domine, fidei miseratus augmentum, ut, quae sanctos martyres tuos N. et N. usque ad sanguinem retenta glorificat, nos etiam iustificet, veraciter hanc sequentes.

[C2069so] Sacrificiis praesentibus, Domine, quaesumus, intende placatus, ut, quod passionis Filii tui mysterio gerimus, beatorum N. et N. exemplis, pio consequamur affectu.

[C2070so] Haec hostia, Domine, quam in beatorum N. et N. triumpho deferimus, corda nostra tui amoris igne iugiter inflammet, et ad promissa perseverantibus praemia disponat.

[C2071am] Neque mors, neque vita, neque creatura aliqua poterit nos separare a caritate Christi.

[C2072am] Vestri capilli capitis omnes numerati sunt; nolite timere: multis passeribus meliores estis vos.

[C2073pc] Pasti, Domine, pretioso Corpore et Sanguine Unigeniti Filii tui, in commemoratione beatorum martyrum tuorum N. et N., nobis perseveranti caritate in te manere, de te vivere, et ad te moveri concedas.

[C2074ai] Iste sanctus pro lege Dei sui certavit usque ad mortem, et a verbis impiorum non timuit; fundatus enim erat supra firmam petram.

[C2075ai] Certamen forte dedit illi Dominus, ut vincere sciret, quoniam omnium potentior est sapientia.

[C2076co] Omnipotens et misericors Deus, qui martyrem tuum beatum N. passionis suae tormenta superare fecisti, concede, ut, qui eius triumphi diem celebramus, insuperabiles tua protectione ab hostis insidiis maneamus.

[C2077so] Oblata munera, quaesumus, Domine, tua benedictione sanctifica, quae, te donante, nos illa flamma tuae dilectionis accendat, per quam sanctus N. tormenta sui corporis universa devicit.

[C2078so] Accepta tibi sint, quaesumus, Domine, munera, quae in commemoratione beati martyris tui N. deferimus, ut eo maiestati tuae sint placita, sicut illius effusio sanguinis apud te exstitit pretiosa.

[C2079am] Qui vult venire post me, abneget semetipsum, et tollat crucem suam, et sequatur me, dicit Dominus.

[C2080am] Qui perdiderit animam suam propter me, dicit Dominus, inveniet eam in aeternum.

[C2081pc] Praestent nobis, quaesumus, Domine, sacra mysteria quae sumpsimus eam animi fortitudinem, quae beatum N. martyrem tuum reddidit in tuo servitio fidelem et in passione victorem.

[C2082ai] Hic est vere martyr, qui pro Christi nomine sanguinem suum fudit, qui minas iudicum non timuit, sed ad caelestia regna pervenit.

[C2083ai] Omnia detrimentum fecit ad cognoscendum Christum, et communionem passionum illius, conformans se morti eius.

[C2084co] Omnipotens sempiterne Deus, qui beato N. usque ad mortem pro iustitia certare tribuisti, fac nos, eius intercessione, pro amore tuo omnia adversa tolerare et ad te, qui solus es vita, tota virtute properare.

[C2085so] Clementissime Deus, munera haec tua benedictione perfunde et nos in fide confirma, quam beatus N. effuso sanguine asseruit.

[C2086so] Hostias tibi, Domine, pro commemoratione beati martyris tui N. offerimus, quem a Christi corporis unitate nulla tentatio separavit.

[C2087am] Ego sum vitis vera et vos palmites, dicit Dominus; qui manet in me et ego in eo, hic fert fructum multum.

[C2088am] Qui sequitur me, non ambulat in tenebris, sed habebit lumen vitae, dicit Dominus.

[C2089pc] Sacris, Domine, recreati mysteriis, quaesumus, ut, miram beati N. constantiam aemulantes, patientiae praemium consequi mereamur aeternum.

[C2090ai] Venite, benedicti Patris mei, percipite regnum, quod vobis paratum est ab origine mundi, alleluia.

[C2091ai] Isti, qui amicti sunt stolis albis, hi sunt qui venerunt ex magna tribulatione, et laverunt stolas suas in sanguine Agni, alleluia.

[C2092co] Quaesumus, omnipotens Deus, ut nos, virtute Spiritus Sancti, et ad credendum dociles et ad confitendum fortes efficias, qui beatis martyribus N. et N. propter verbum tuum et testimonium Iesu animas ponere tribuisti.

[C2093co] Deus, a quo constantiam fides, et virtutem sumit infirmitas, tribue nobis, martyrum N. et N. exemplo et precibus, in Unigeniti tui passione et resurrectione consortium, ut cum eis apud te gaudium perfectum consequamur.

[C2094so] In tuorum, Domine, pretiosa morte iustorum, sacrificium illud offerimus, de quo martyrium sumpsit omne principium.

[C2095am] Vincenti dabo edere de ligno vitae, quod est in paradiso Dei mei, alleluia.

[C2096am] Gaudete, iusti, in Domino; rectis decet collaudatio, alleluia.

[C2097pc] Beatorum martyrum N. et N. caelestem victoriam divino convivio celebrantes, te, Domine, deposcimus, ut panem vitae hic edentes des vincere, et vincentes des edere de ligno vitae in paradiso.

[C2098ai] Isti sunt Sancti qui vicerunt propter sanguinem Agni, et non dilexerunt animas suas usque ad mortem; propterea cum Christo regnant in aeternum, alleluia.

[C2099ai] Gaudete, Sancti, ante conspectum Agni; paratum est vobis regnum ab origine mundi, alleluia.

[C2100co] Laetificet nos, quaesumus, Domine, beatorum martyrum tuorum N. et N. gloriosa festivitas, quos, Unigeniti tui passionem et resurrectionem voce libera confitentes, pretiosum sanguinem gloriosa morte fundere fecisti.

[C2101so] Praesentia munera, quaesumus, Domine, ita serena pietate intuere, ut Sancti Spiritus perfundantur benedictione, et in nostris cordibus eam dilectionem validam operentur, per quam sancti martyres N. et N. omnia corporis tormenta devicerunt.

[C2102am] Si commortui sumus cum Christo, et convivemus; si sustinemus, et conregnabimus, alleluia.

[C2103am] Gaudete et exsultate, quoniam merces vestra copiosa est in caelis, alleluia.

[C2104pc] Unius panis alimonia refecti, in commemoratione beatorum martyrum N. et N. suppliciter te, Domine, deprecamur, ut nos in tua iugiter caritate confirmes, et in novitate vitae concedas ambulare.

[C2105ai] Lux perpetua lucebit Sanctis tuis, Domine, et aeternitas temporum, alleluia.

[C2106ai] Hic est vir, qui non est derelictus a Deo in die certaminis; modo coronatur, quia fideliter vicit in mandatis Domini, alleluia.

[C2107co] Deus, qui ad illustrandam Ecclesiam tuam beatum N. martyrii victoria decorare dignatus es, concede propitius, ut, sicut ipse dominicae passionis imitator fuit, ita nos, per eius vestigia gradientes, ad gaudia sempiterna pervenire mereamur.

[C2108so] Suscipe, Domine, sacrificium placationis et laudis, quod in commemoratione beati martyris N. tuae offerimus maiestati, ut nos perducat ad veniam, et in perpetua gratiarum constituat actione.

[C2109am] Nisi granum frumenti cadens in terram mortuum fuerit, ipsum solum manet; si autem mortuum fuerit, multum fructum affert, alleluia.

[C2110am] Pretiosa in conspectu Domini; mors Sanctorum eius, alleluia.

[C2111pc] Tua, Domine, sumpsimus dona caelestia de hodierna festivitate laetantes; praesta, quaesumus, ut, qui in hoc divino convivio mortem Filii tui annuntiamus, eiusdem resurrectionis et gloriae cum sanctis martyribus participes esse mereamur.

[C2112ai] Nobis absit gloriari nisi in cruce Domini nostri Iesu Christi. Verbum enim crucis nobis qui salvi facti sumus, virtus Dei est (T.P. alleluia).

[C2113co] Maiestatis tuae clementiam suppliciter deprecamur, omnipotens et misericors Deus, ut, sicut Unigeniti tui agnitionem per beatorum martyrum N. et N. praedicationem populorum cordibus infudisti, ita, eorum intercessione, fidei stabilitate firmentur.

[C2114so] Martyrum tuorum N. et N. passionem venerantes, fac nos, Domine, hoc sacrificio mortem Unigeniti tui digne annuntiare, cui parum fuit hortari martyres verbo, nisi firmaret exemplo.

[C2115am] Beati qui persecutionem patiuntur propter iustitiam, quoniam ipsorum est regnum caelorum (T.P. alleluia).

[C2116am] Qui me confessus fuerit coram hominibus, confitebor et ego eum coram Patre meo, dicit Dominus. (T.P. alleluia).

[C2117pc] Caelestibus, Domine, pasti deliciis, supplices te rogamus, ut, exemplo beatorum N. et N., caritatis et passionis Filii tui in mentibus nostris signa feramus, et perpetuae pacis fructu iugiter perfruamur.

[C2118ai] Iste Sanctus propter opus Christi usque ad mortem accessit, in interitum tradens animam suam (T.P. alleluia).

[C2119co] Praesta, quaesumus, omnipotens Deus, ut beati N. fidem congrua devotione sectemur, qui pro eiusdem dilatatione coronam martyrii meruit.

[C2120so] Beati N. martyrium recensentes, Domine, munera nostra ad altare tuum offerimus, deprecantes, ut, qui dominicae passionis mysteria celebramus, imitemur quod agimus.

[C2121am] Qui perdiderit animam suam propter me et propter Evangelium, dicit Dominus, salvam eam faciet (T.P. alleluia).

[C2122pc] Caeleste convivium celebrantes te, Domine, deprecamur, ut nos ad tantae fidei exempla sectanda beati N. martyris et recordatio incitet et oratio digna perducat.

[C2123ai] Ecce iam sequitur Agnum pro nobis crucifixum strenua virgo, pudoris hostia, victima castitatis (T.P. alleluia).

[C2124ai] Beata virgo, quae abnegans semetipsam et tollens crucem suam, Dominum aemulata est, virginum sponsum martyrumque principem (T.P. alleluia).

[C2125co] Deus, qui nos hodie beatae N. annua commemoratione laetificas, concede propitius, ut eius adiuvemur meritis, cuius castitatis et fortitudinis irradiamur exemplis.

[C2126so] Munera, quaesumus, Domine, quae in celebritate beatae N. deferimus, ita gratiae tuae efficiantur accepta, sicut eius tibi placitum exstitit passionis certamen.

[C2127am] Agnus, qui in medio throni est, deducet eos ad vitae fontes aquarum (T.P. alleluia).

[C2128pc] Deus, qui beatam N. pro gemina virginitatis et martyrii victoria inter Sanctos coronasti, da, quaesumus, per huius virtutem sacramenti, ut, omne malum fortiter superantes, caelestem gloriam consequamur.

[C2129ai] Istarum est enim regnum caelorum quae contempserunt vitam mundi, et pervenerunt ad praemia regni et laverunt stolas suas in sanguine Agni (T.P. alleluia).

[C2130co] Deus, cuius munere virtus in infirmitate perficitur, da omnibus beatae N. gloriam recolentibus, ut, quae abs te sumpsit robur ut vinceret, abs te quoque vincendi nobis gratiam semper obtineat.

[C2131so] Hodiernum, Domine, sacrificium laetanter offerimus, quo, beatae N. caelestem victoriam recensentes, et tua magnalia praedicamus, et nos acquisisse gaudemus suffragia gloriosa.

[C2132am] Non dilexerunt animas suas usque ad mortem, propterea laetamini, caeli, et qui habitatis in eo (T.P. alleluia).

[C2133pc] Sumentes, Domine, gaudia sempiterna de participatione sacramenti, et de memoria beatae N., suppliciter deprecamur, ut, quae sedula servitute, donante te, gerimus, dignis sensibus tuo munere capiamus.

[C2134ai] Elegit eum Dominus sibi in sacerdotem magnum, et aperiens thesaurum suum abundare eum fecit omnibus bonis (T.P. alleluia).

[C2135ai] Ecce sacerdos magnus, qui in diebus suis placuit Deo: ideo iureiurando fecit illum Dominus crescere in plebem suam (T.P. alleluia).

[C2136co] Omnipotens sempiterne Deus, qui beatum N. cuncto populo tuo praeesse, ac verbo et exemplo prodesse voluisti, eodem intercedente, pastores Ecclesiae tuae cum gregibus sibi commissis custodi et dirige in viam salutis aeternae.

[C2137co] Deus, qui Ecclesiae tuae in beato N. boni pastoris exemplum providere dignatus es, concede propitius, ut, eius intercessione, in loco pascuae tuae perpetuo collocari mereamur.

[C2138so] Suscipe, quaesumus, Domine, hoc sacrificium populi tui, ut, quod tibi in honore beati N. offertur ad gloriam, nobis tribuas ad salutem perpetuam.

[C2139am] Pastor bonus animam suam posuit pro ovibus suis (T.P. alleluia).

[C2140pc] Sacramenta quae sumpsimus, Domine Deus noster, in nobis foveant caritatis ardorem, quo beatus N. vehementer accensus pro Ecclesia tua se iugiter impendebat.

[C2141ai] Statuit ei Dominus testamentum pacis, et principem fecit eum, ut sit illi sacerdotii dignitas in aeternum (T.P. alleluia).

[C2142co] Deus, qui beatum N., quem totius Ecclesiae praestitisti esse pastorem, miro virtutis et doctrinae splendore coruscare fecisti, da nobis talis episcopi merita venerantibus, ut per bona opera lucere coram hominibus et per amorem ardere coram te valeamus.

[C2143co] Deus, qui beatum N. vicarium constituisti Petri eique universae curam Ecclesiae commisisti, gregem tuum dilectum ipsius semper intercessione custodi, ut fide integra perfectaque ad patriam caritate procedat.

[C2144co] Da nobis, quaesumus, omnipotens Deus, beati N. episcopi digne memoriam venerari, et, sicut illum quibus praeerat, verbo et exemplo prodesse voluisti, ita ipsius apud te semper intercessionis suffragia sentiamus.

[C2145so] Annue nobis, quaesumus, Domine, ut, in hac festivitate beati N., haec nobis prosit oblatio, quam immolando totius mundi tribuisti relaxari delicta.

[C2146am] Domine, tu omnia nosti; tu scis quia amo te (T.P. alleluia).

[C2147pc] Acceptorum munerum virtus, Domine Deus, in hac festivitate beati N. nobis effectus impleat, ut simul et mortalis vitae subsidium conferat, et gaudium perpetuae felicitatis obtineat.

[C2148ai] Visitabo oves meas, dicit Dominus, et suscitabo pastorem qui pascat eas: ego autem Dominus ero eis in Deum (T.P. alleluia).

[C2149ai] Iste est fidelis et prudens dispensator, quem constituit Dominus super familiam suam, ut det illis in tempore tritici mensuram (T.P. alleluia).

[C2150co] Omnipotens sempiterne Deus, qui beatum N. episcopum plebi tuae sanctae praeesse voluisti, quaesumus, ut, eius suffragantibus meritis, pietatis tuae gratiam largiaris.

[C2151co] Omnipotens aeterne Deus, qui beatum N. episcopum Ecclesiae tuae sanctae dedisti, praesta, ut, quod ille divino affatus spiritu docuit, nostris iugiter stabiliatur in cordibus, et, quem patronum, te donante, amplectimur, eum apud tuam misericordiam defensorem habeamus.

[C2152so] Hostias, quaesumus, Domine, quas in festivitate beati N. sacris altaribus exhibemus, propitius respice, ut, nobis indulgentiam largiendo, tuo nomini dent honorem.

[C2153am] Non vos me elegistis, dicit Dominus; sed ego elegi vos, et posui vos ut eatis et fructum afferatis, et fructus vester maneat (T.P. alleluia).

[C2154am] Beatus ille servus, quem, cum venerit dominus eius, et pulsaverit ianuam, invenerit vigilantem (T.P. alleluia).

[C2155pc] Refecti sacris mysteriis, Domine, humiliter deprecamur, ut, beati N. exemplo, studeamus confiteri quod credidit, et opere exercere quod docuit.

[C2156ai] Suscitabo mihi sacerdotem fidelem, qui iuxta cor meum et animam meam faciet, dicit Dominus (T.P. alleluia).

[C2157ai] Fidelis et prudens dispensator in magni patrisfamilias domo constitutus erat, ut conservis suis mensuram tritici erogaret (T.P. alleluia).

[C2158co] Deus, qui beatum N. divina caritate flagrantem, fideque, quae vincit mundum, insignem, sanctis pastoribus mirabiliter aggregasti, praesta, quaesumus, ut, ipso intercedente, nos quoque, in fide et caritate perseverantes, eius gloriae consortes fieri mereamur.

[C2159co] Domine Deus, qui beatum N. caelesti doctrina imbuere dignatus es, da nobis, ipsius interventu, eandem doctrinam fideliter custodire, et moribus profiteri.

[C2160so] Suscipe, Domine, haec munera populi tui, quae tibi in beati N. festivitate offerimus, ut per eadem, sicut confidimus, tuae pietatis sentiamus auxilium.

[C2161am] Ego veni ut vitam habeant, et abundantius habeant, dicit Dominus (T.P. alleluia).

[C2162am] Signa eorum qui in me credunt, dicit Dominus, haec sequentur: daemonia eicient, super aegros manus imponent, et bene habebunt (T.P. alleluia).

[C2163pc] Corporis sacri et pretiosi Sanguinis alimonia repleti, quaesumus, Domine Deus noster, ut, quod pia devotione gerimus, certa redemptione capiamus.

[C2164ai] Dabo vobis pastores iuxta cor meum, et pascent vos scientia et doctrina (T.P. alleluia).

[C2165ai] Sacerdotes Dei, benedicite Dominum; sancti et humiles corde, laudate Deum (T.P. alleluia).

[C2166co] Deus, qui beatos (episcopos)N. et N. ad pascendum populum tuum spiritu veritatis et dilectionis implevisti, praesta, ut, quorum festivitatem venerando agimus, eorum imitatione proficiamus, et intercessione sublevemur.

[C2167so] Laudis tibi, Domine, hostias offerimus in tuorum commemoratione Sanctorum, quibus nos et praesentibus exui malis confidimus et futuris.

[C2168am] Filius hominis non venit ministrari, sed ministrare, et dare animam suam redemptionem pro multis (T.P. alleluia).

[C2169pc] Sumpsimus, Domine, sanctorum tuorum N. et N. memoriam celebrantes, sacramenta caelestia; praesta, quaesumus, ut, quod temporaliter gerimus, aeternis gaudiis consequamur.

[C2170ai] Sacerdotes tui, Domine, induant iustitiam, et sancti tui exsultent (T.P. alleluia).

[C2171co] Supplices te rogamus, omnipotens Deus, ut, intercedente beato N. (episcopo), et tua in nobis dona multiplices, et tempora nostra in pace disponas.

[C2172so] Praetende munera, quaesumus, Domine, altaribus tuis pro beati tui N. commemoratione proposita, ut, sicut per haec beata mysteria illo gloriam contulisti, ita nobis indulgentiam largiaris.

[C2173am] Beatus servus, quem, cum venerit Dominus, invenerit vigilantem; amen dico vobis, super omnia bona sua constituet eum (T.P. alleluia).

[C2174am] Fidelis servus et prudens, quem constituit Dominus super familiam suam, ut det illis in tempore tritici mensuram (T.P. alleluia).

[C2175pc] Mensa caelestis, omnipotens Deus, in omnibus festivitatem beati N. celebrantibus supernas vires firmet et augeat, ut et fidei donum integrum custodiamus, et per ostensum salutis tramitem ambulemus.

[C2176ai] Spiritus Domini super me: propter quod unxit me, evangelizare pauperibus misit me, sanare contritos corde (T.P. alleluia).

[C2177ai] Elegit eum Dominus sacerdotem sibi, ad sacrificandum ei hostiam laudis (T.P. alleluia).

[C2178co] Deus, fidelium lumen et pastor animarum, qui beatum N. (episcopum)in Ecclesia posuisti, ut oves tuas verbo pasceret et informaret exemplo, da nobis, eius intercessione, et fidem servare, quam verbo docuit, et viam sequi, quam exemplo monstravit.

[C2179so] Maiestatem tuam suppliciter imploramus, omnipotens Deus, ut, sicut gloriam divinae potentiae munera pro beato N. oblata testantur, sic nobis effectum tuae salvationis impendant.

[C2180am] Ecce ego vobiscum sum omnibus diebus usque ad consummationem saeculi, dicit Dominus (T.P. alleluia).

[C2181pc] Sumpta mysteria, quaesumus, Domine, aeternis nos praeparent gaudiis, quae beatus N. fideli dispensatione promeruit.

[C2182pc] Refectione sacra enutritos, fac nos, omnipotens Deus, exempla beati N. iugiter sequentes, te perpeti devotione colere, et indefessa omnibus caritate proficere.

[C2183ai] Dicit Dominus: Sermones mei, quos dedi in os tuum, non deficient de ore tuo, et munera tua accepta erunt super altare meum (T.P. alleluia).

[C2184co] Omnipotens et misericors Deus, qui beati N. praedicatione patres nostros illuminare dignatus es, concede nobis, quaesumus, ut, qui christiano gloriamur nomine, fidem quam profitemur iugiter operibus ostendamus.

[C2185co] Respice, Domine, familiam tuam, quam beatus N. (episcopus)genuit verbo veritatis, et vitae aluit sacramento, ut, quos gratia tua fecit illius ministerio fideles, faciat eiusdem precibus in caritate ferventes.

[C2186so] Annue, quaesumus, omnipotens Deus, ut haec sacrificia populi tui, quae tibi in commemoratione beati N. offerimus, donis caelestibus propitiatus immisceas.

[C2187am] Filius hominis venit, ut daret animam suam redemptionem pro multis (T.P. alleluia).

[C2188am] Fundamentum aliud nemo potest ponere, praeter id quod positum est, quod est Christus Iesus (T.P. alleluia).

[C2189pc] Sumpsimus, Domine, pignus redemptionis aeternae, beati N. festivitate laetantes, quod sit nobis, quaesumus, vitae praesentis auxilium pariter et futurae.

[C2190ai] Isti sunt viri sancti, quos elegit Dominus in caritate non ficta; et dedit illis gloriam sempiternam, quorum doctrina fulget Ecclesia (T.P. alleluia).

[C2191co] Respice, quaesumus, Domine, ad tuam benignus Ecclesiam et, cui per apostolicam sanctorum N. et N. sollicitudinem religionis exordium donasti, per eorum intercessionem, tribue continuum christianae pietatis affectum.

[C2192co] Deus, qui beatorum N. et N. (episcoporum)praedicatione patres nostros vocasti in admirabile Evangelii lumen, fac, ut, eorum intercessione, crescamus in gratia et cognitione Domini nostri Iesu Christi, Filii tui.

[C2193so] Suscipe, quaesumus, Domine, munera populi tui, pro sanctorum tuorum N. et N. festivitate delata, et sincero nos corde perfice benignus acceptos.

[C2194am] Iam non dicam vos servos, quia servus nescit quid faciat dominus eius, dicit Dominus. Vos autem dixi amicos, quia omnia quaecumque audivi a Patre meo, nota feci vobis (T.P. alleluia).

[C2195am] Populus acquisitionis, annuntiate virtutes eius, qui vos de tenebris vocavit in admirabile lumen suum (T.P. alleluia).

[C2196pc] Laetificet nos acceptum de altari salutare tuum, Domine, in sanctorum N. et N. festivitate, qua, de tuis beneficiis solliciti, pretiosa fidei nostrae initia veneramur, et te in sanctis tuis mirabilem praedicamus.

[C2197ai] Isti sunt viri sancti facti amici Dei, divinae veritatis praeconio gloriosi (T.P. alleluia).

[C2198ai] Confitebor tibi in populis, Domine, et narrabo nomen tuum fratribus mei (T.P. alleluia).

[C2199co] Deus, qui per beatum N. (episcopum)infideles populos de tenebris ad lucem veritatis venire tribuisti, da nobis, eius intercessione, in fidei stabilitate consistere, et in spe Evangelii, quod praedicavit, constantes permanere.

[C2200co] Omnipotens sempiterne Deus, qui huius diei laetitiam in beati N. glorificatione consecrasti, concede propitius, ut fidem illam, quam inexplebili studio semper asseruit, iugiter retinere et opere complere studeamus.

[C2201so] Respice quas offerimus hostias, omnipotens Deus, in beati N. festivitate, et praesta, ut, qui dominicae passionis mysteria celebramus, imitemur quod agimus.

[C2202am] Ego pascam oves meas, et ego eas accubare faciam, dicit Dominus (T.P. alleluia).

[C2203am] Quod dico vobis in tenebris, dicite in lumine, dicit Dominus, et quod in aure auditis, praedicate super tecta (T.P. alleluia).

[C2204pc] Huius mysterii virtute, confirma, Domine, famulos tuos in fide veritatis, ut eam ubique ore et opere confiteantur, pro qua beatus N. laborare non destitit et vitam suam impendit.

[C2205ai] Quam pulchri super montes pedes annuntiantis et praedicantis pacem, annuntiantis bonum, praedicantis salutem (T.P. alleluia).

[C2206co] Deus, qui Ecclesiam tuam beati N. religionis zelo et apostolicis curis amplificasti, eius intercessione concede, ut fidei et sanctitatis nova semper incrementa suscipiat.

[C2207so] Propitiare, Domine, supplicationibus nostris, et nos ab omni culpa liberos esse concede, ut, purificante gratia tua, iisdem quibus famulamur mysteriis emundemur.

[C2208am] Euntes in mundum universum, praedicate Evangelium: ego vobiscum sum omnibus diebus, dicit Dominus (T.P. alleluia).

[C2209am] Manete in me, et ego in vobis, dicit Dominus. Qui manet in me et ego in eo, hic fert fructum multum (T.P. alleluia).

[C2210pc] Sacramenta quae sumpsimus, Domine Deus noster, illam nobis fidem innutriant, quam et apostolica docuit praedicatio, et beati N. sollicitudo custodivit.

[C2211ai] Annuntiate inter gentes gloriam Domini, in omnibus populis mirabilia eius, quoniam magnus Dominus et laudabilis nimis (T.P. alleluia).

[C2212co] Deus, cuius ineffabili misericordia beatus N. evangelizavit investigabiles divitias Christi, da nos, eius intercessione, crescere in scientia tua, et, in omni opere bono fructificantes, secundum Evangelii veritatem coram te fideliter ambulare.

[C2213so] Beati N. memoriam recensentes, quaesumus, Domine, ut his muneribus tibi oblatis benedictionem effundas de caelis, quo, ex eis sumentes, et omnibus careamus culpis et caelestibus repleamur eduliis.

[C2214am] Misit Dominus discipulos, qui nuntiarent civitatibus: Appropinquavit in vos regnum Dei (T.P. alleluia).

[C2215am] Semen quod cecidit in terram bonam. hi sunt, qui in corde bono et optimo fructum afferunt in patientia (T.P. alleluia).

[C2216pc] Sancta tua nos, Domine, sumpta vivificent, ut, qui beati N. commemoratione gaudemus, eius quoque apostolicae virtutis proficiamus exemplo.

[C2217ai] In medio Ecclesiae aperuit os eius, et implevit eum Dominus spiritu sapientiae et intellectus; stolam gloriae induit eum (T.P. alleluia).

[C2218ai] Os iusti meditabitur sapientiam, et lingua eius loquetur iudicium; lex Dei eius in corde ipsius (T.P. alleluia).

[C2219co] Omnipotens aeterne Deus, qui beatum N. (episcopum)Ecclesiae tuae doctorem dedisti, praesta, ut, quod ille divino affatus spiritu docuit, nostris iugiter stabiliatur in cordibus, et quem patronum, te donante, amplectimur, eum apud tuam misericordiam defensorem habeamus.

[C2220so] Sacrificium tibi placeat, Deus, in festivitate beati N. libenter exhibitum, quo monente, nos etiam totos tibi reddimus collaudantes.

[C2221am] Fidelis servus et prudens, quem constituit Dominus super familiam suam, ut det illis in tempore tritici mensuram (T.P. alleluia).

[C2222am] Qui meditabitur in lege Domini die ac nocte, dabit fructum suum in tempore suo (T.P. alleluia).

[C2223pc] Quos Christo reficis pane vivo, eosdem edoce, Domine, Christo magistro, ut in festivitate beati N. tuam discant veritatem, et eam in caritate operentur.

[C2224ai] Qui docti fuerint, fulgebunt quasi splendor firmamenti, et qui ad iustitiam erudiunt multos, quasi stellae in perpetuas aeternitates (T.P. alleluia).

[C2225ai] Sapientiam Sanctorum narrent populi, et laudes eorum nuntiet Ecclesia; nomina autem eorum vivent in saeculum saeculi (T.P. alleluia).

[C2226co] Domine Deus, qui beatum N. caelesti doctrina imbuere dignatus es, da nobis, ipsius interventu, eandem doctrinam fideliter custodire et moribus profiteri.

[C2227so] Illa nos, quaesumus, Domine, divina tractantes, Spiritus Sanctus fidei luce perfundat, qua beatum N. ad gloriae tuae propagationem iugiter collustravit.

[C2228am] Nos praedicamus Christum crucifixum, Christum, Dei virtutem et Dei sapientiam (T.P. alleluia).

[C2229pc] Caelesti alimonia refecti, supplices te, Domine, deprecamur, ut, beati N. monitis obsequentes, de acceptis donis semper in gratiarum actione maneamus.

[C2230ai] Virgines laudent nomen Domini, quia exaltatum est nomen eius solius; confessio eius super caelum et terram (T.P. alleluia).

[C2231ai] Afferentur Regi virgines in laetitia et exsultatione, adducentur in templo Regi Domino (T.P. alleluia).

[C2232co] Multiplica super nos, quaesumus, Domine, misericordiam tuam, ut, sicut in beatarum virginum N. et N. festivitate pia devotione laetamur, ita earum perpetua societate, te largiente, fruamur.

[C2233so] In sanctarum virginum N. et N. commemoratione te, Domine, mirabilem praedicantes, munera votiva deferimus; praesta, quaesumus, ut, sicut earum tibi grata sunt merita, sic nostrae servitutis accepta reddantur officia.

[C2234am] Venit Sponsus, et virgines, quae paratae erant, intraverunt cum eo ad nuptias (T.P. alleluia).

[C2235am] Qui diligit me, diligetur a Patre meo, et ad eum veniemus, et mansionem apud eum faciemus (T.P. alleluia).

[C2236pc] Sumpta mysteria, quaesumus, Domine, in hac festivitate beatarum virginum N. et N., incitent nos iugiter et illustrent, ut digne adventum Filii tui praestolemur, et ad supernas eius nuptias admittamur.

[C2237ai] Haec est virgo sapiens, et una de numero prudentum, quae obviam Christo cum lampade accensa exiit (T.P. alleluia).

[C2238ai] O quam pulchra es, virgo Christi, quae coronam Domini digna fuisti accipere, coronam perpetuae virginitatis (T.P. alleluia).

[C2239co] Exaudi nos, Deus, salutaris noster, ut, sicut de beatae N. virginis commemoratione gaudemus, ita piae devotionis erudiamur affectu.

[C2240so] In beata virgine N. te, Domine, mirabilem praedicantes, maiestatem tuam suppliciter exoramus, ut, sicut eius tibi grata sunt merita, sic nostrae servitutis accepta reddantur officia.

[C2241am] Ecce Sponsus venit: exite obviam Christo Domino (T.P. alleluia).

[C2242am] Unam petii a Domino, hanc requiram: ut inhabitem in domo Domini omnibus diebus vitae meae (T.P. alleluia).

[C2243pc] Divini muneris participatione refecti, quaesumus, Domine Deus noster, ut, exemplo beatae N., mortificationem Iesu in corpore nostro circumferentes, tibi soli adhaerere studeamus.

[C2244ai] Gaudeamus et exsultemus, quia Dominus omnium dilexit virginem sanctam atque gloriosam (T.P. alleluia).

[C2245ai] Haec est virgo sapiens, quam Dominus vigilantem invenit, quae acceptis lampadibus sumpsit secum oleum et, veniente Domino, introivit cum eo ad nuptias (T.P. alleluia).

[C2246co] Domine Deus, qui beatam N. virginem caelestibus donis cumulasti, tribue, quaesumus, ut, eius virtutes aemulantes in terris, gaudiis cum ipsa perfruamur aeternis.

[C2247co] Fac, Domine Deus noster, ut beata virgo N., sponsa tibi fidelis, divinae caritatis flammam excitet in cordibus nostris, quam, ad perennem Ecclesiae tuae gloriam, aliis virginibus inseruit.

[C2248so] Dicatae, quaesumus, Domine, capiamus oblationis effectum, ut, beatae N. exemplo, terrenae vetustatis conversatione mundati, caelestis vitae profectibus innovemur.

[C2249am] Quinque prudentes virgines acceperunt oleum in vasis suis cum lampadibus. Media autem nocte clamor factus est: Ecce sponsus venit, exite obviam Christo Domino (T.P. alleluia).

[C2250pc] Corporis et Sanguinis Unigeniti tui sacra perceptio, Domine, ab omnibus nos caducis rebus avertat, ut exemplo beatae N. valeamus tui et sincera in terris caritate proficere, et perpetua in caelis visione gaudere.

[C2251ai] Veni, sponsa Christi, accipe coronam, quam tibi Dominus praeparavit in aeternum (T.P. alleluia).

[C2252ai] Regnum mundi et omne saeculum contempsit propter amorem Domini Iesu Christi (T.P. alleluia).

[C2253co] Deus, qui te in puris manere cordibus asseris, da nobis, beatae N. virginis intercessione, per gratiam tuam tales exsistere, in quibus habitare digneris.

[C2254co] Exaudi, quaesumus, Domine, preces nostras, ut, qui beatae N. virginis virtutem devote recolimus, in tui amore permanere et usque in finem semper crescere mereamur.

[C2255so] Suscipe, Domine, obsequium humilitatis nostrae, quod tibi in commemoratione beatae N. virginis exhibemus, et nos, per immaculatam hostiam, da iugiter in tuo conspectu pio sanctoque amore flagrare.

[C2256am] Optimam partem elegit sibi virgo prudens, quae non auferetur ab ea (T.P. alleluia).

[C2257am] Media nocte clamor factus est: Ecce sponsus venit, exite obviam ei (T.P. alleluia).

[C2258pc] Caelesti pane refecti, humiliter deprecamur clementiam tuam, Domine, ut, qui de beatae N. commemoratione gaudemus, veniam delictorum, sospitatem corporum, gratiamque et gloriam aeternam consequamur animarum.

[C2259ai] Confiteantur tibi, Domine, omnia opera tua, et Sancti tui benedicant tibi: gloriam regni tui dicent, et potentiam tuam loquentur (T.P. alleluia).

[C2260co] Omnipotens aeterne Deus, qui per glorificationem Sanctorum novissima dilectionis tuae nobis argumenta largiris, concede propitius, ut, ad Unigenitum tuum fideliter imitandum, et ipsorum intercessione commendemur, et incitemur exemplo.

[C2261so] Preces nostras, Domine, quaesumus, propitiatus admitte, et, ut digne tuis famulemur altaribus, Sanctorum tuorum nos intercessione custodi.

[C2262am] Iusti epulentur, et exsultent in conspectu Dei, et delectentur in laetitia (T.P. alleluia).

[C2263am] Beati servi illi, quos, cum venerit Dominus, invenerit vigilantes. Amen dico vobis, quod praecinget se, et faciet illos discumbere, et transiens ministrabit illis (T.P. alleluia).

[C2264pc] Omnipotens sempiterne Deus, Pater totius consolationis et pacis, praesta familiae tuae in celebritate Sanctorum ad laudem tui nominis congregatae, ut, per Unigeniti tui sumpta mysteria, pignus accipiat redemptionis aeternae.

[C2265ai] Laetabitur iustus in Domino, et sperabit in eo; et laudabuntur omnes recti corde (T.P. alleluia).

[C2266co] Deus, qui nos conspicis ex nostra infirmitate deficere, ad amorem tuum nos misericorditer per Sanctorum tuorum exempla restaura.

[C2267so] Praesta nobis, quaesumus, omnipotens Deus, ut nostrae humilitatis oblatio et pro tuorum tibi grata sit honore Sanctorum, et nos corpore pariter et mente purificet.

[C2268am] Qui mihi ministrat, me sequatur, dicit Dominus: et ubi ego sum, illic et minister meus erit (T.P. alleluia).

[C2269pc] In nataliciis Sanctorum quaesumus, Domine, ut, sacramenti munere vegetati, bonis, quibus per tuam gratiam nunc fovemur, perfruamur aeternis.

[C2270ai] Iustus ut palma florebit, sicut cedrus Libani multiplicabitur; plantatus in domo Domini, in atriis domus Dei nostri (T.P. alleluia).

[C2271co] Impetret, quaesumus, Domine, fidelibus tuis auxilium oratio iusta Sanctorum, et, in quorum sunt celebritate devoti, fiant in eorum perpetua sorte participes.

[C2272so] Hostias ad altare tuum offerentibus, Domine, da nobis illum pietatis affectum, quem Sanctis tuis infudisti, ut pura mente ac fervido corde rei sacrae attendamus, et sacrificium tibi placitum nobisque proficuum celebremus.

[C2273am] Venite ad me, omnes qui laboratis et onerati estis, et ego reficiam vos, dicit Dominus (T.P. alleluia).

[C2274pc] Sacramentorum tuorum, Domine, communio sumpta nos salvet, et in tuae veritatis luce confirmet.

[C2275ai] Benedictus vir, qui confidit in Domino, et erit Dominus fiducia eius; et erit quasi lignum, quod transplantatur super aquas, quod ad humorem mittit radices suas; et non timebit cum venerit aestus (T.P. alleluia).

[C2276co] Concede, quaesumus, omnipotens Deus, ut ad meliorem vitam Sanctorum tuorum exempla nos provocent, quatenus beatorum N. et N., quorum memoriam celebramus, etiam actus incessanter imitemur.

[C2277so] Munera nostra, Domine, sacris altaribus offerentes, in hac festivitate Sanctorum tuorum, quaesumus clementiam tuam, ut eadem et supremam tibi gloriam operentur, et uberrimam nobis gratiam assequantur.

[C2278am] Sicut dilexit me Pater, et ego dilexi vos, dicit Dominus; manete in dilectione mea (T.P. alleluia).

[C2279pc] Quaesumus, Domine Deus noster, ut divina mysteria, quae in tuorum commemoratione Sanctorum frequentamus, salutem et pacem in nobis operentur aeternam.

[C2280ai] In virtute tua, Domine, laetabitur iustus, et super salutare tuum exsultabit vehementer; desiderium animae eius tribuisti ei (T.P. alleluia).

[C2281co] Deus, qui infirmitati nostrae, ad terendam salutis viam, in Sanctis tuis exemplum et praesidium collocasti, concede propitius, ut, qui beati N. natalicia colimus, per eius ad te exempla gradiamur.

[C2282so] Praesenti oblatione, Domine, in beati N. commemoratione delata, fidelibus tuis, quaesumus, pacis et unitatis dona largire.

[C2283am] Qui vult venire post me, abneget semetipsum, et tollat crucem suam, et sequatur me, dicit Dominus (T.P. alleluia).

[C2284am] Primum quaerite regnum Dei, et omnia adicientur vobis, dicit Dominus (T.P. alleluia).

[C2285pc] Sacramenta quae sumpsimus, Domine, in commemoratione beati N. mentes et corda nostra sanctificent, ut divinae consortes naturae effici mereamur.

[C2286ai] Lex veritatis fuit in ore eius et iniquitas non est inventa in labiis eius; in pace et in aequitate ambulavit mecum, et multos avertit ab iniquitate (T.P. alleluia).

[C2287co] Deus, qui solus es sanctus, et sine quo nullus est bonus, intercessione beati N., iube nos, quaesumus, tales fieri, qui non debeamus tua gloria privari.

[C2288so] Sacrificia, Domine, quae in hac festivitate beati N. tuae offerimus maiestati, nobis sint ad salutem efficacia, et tuae placita pietati.

[C2289am] Beati mundo corde, quoniam ipsi Deum videbunt; beati pacifici, quoniam filii Dei vocabuntur (T.P. alleluia).

[C2290pc] Sacro munere satiati, supplices te, Domine, deprecamur, ut, quod in festivitate beati N. debitae servitutis celebramus officio, salvationis tuae sentiamus augmentum.

[C2291ai] Iustus ut palma florebit, sicut cedrus Libani multiplicabitur; plantatus in domo Domini, in atriis domus Dei nostri (T.P. alleluia).

[C2292ai] Os iusti meditabitur sapientiam, et lingua eius loquetur iudicium; lex Dei eius in corde ipsius (T.P. alleluia).

[C2293co] Da nobis, quaesumus, Domine, inter mundi huius varietates toto corde rebus caelestibus adhaerere, qui per beatum N. abbatem evangelicae nobis perfectionis documenta donasti.

[C2294so] Ad altare tuum accedentibus, Domine, da nobis illum pietatis affectum, quo beatus N., abbas, exarsit, ut, mundi corde et caritate ferventes, tibi sacrificium offerre valeamus.

[C2295am] Fidelis servus et prudens, quem constituit Dominus super familiam suam, ut det illis in tempore tritici mensuram (T.P. alleluia).

[C2296am] Qui maior est vestrum, erit minister vester, dicit Dominus (T.P. alleluia).

[C2297pc]
Huius quod sumpsimus, Domine, virtute sacramenti, renova corda nostra, ut exemplo beati N., abbatis, quae sursum sunt, non quae super terram, sapientes, cum Christo in gloria mereamur apparere.

[C2298ai] Ubi fratres in unum glorificant Deum, ibi dabit Dominus benedictionem (T.P. alleluia).

[C2299ai] Repleatur os meum laude tua, ut possim cantare; gaudebunt labia mea, dum cantavero tibi (T.P. alleluia).

[C2300co] Deus, qui famulum tuum beatum N. ad Christi sequelam benignus vocasti, eius, quaesumus, intercessione, concede, ut, nosmetipsos abnegantes, tibi toto corde adhaerere valeamus.

[C2301so] Suscipe, Domine, quaesumus, hostias pro salute tuae plebis oblatas, quibus nos, intercedente beato N., et peccandi illecebras fugere valeamus et caelestibus propinquare consortiis.

[C2302am] Qui verbum Dei retinent corde perfecto et optimo, fructum afferunt in patientia (T.P. alleluia).

[C2303am] Beati qui habitant in domo tua, Domine, in perpetuum laudabunt te (T.P. alleluia).

[C2304pc] Annue, quaesumus, Domine, Deus noster, ut, beati N. fulti praesidio, per hoc tuae sapientiae sacramentum aequa moderatione vivamus.

[C2305ai] Ego autem sicut oliva fructifera in domo Dei, speravi in misericordia Dei in aeternum et in saeculum saeculi (T.P. alleluia).

[C2306ai] Regnum mundi et omnem ornatum saeculi contempsi propter amorem Domini mei Iesu Christi, quem vidi, quem amavi, in quem credidi, quem dilexi (T.P. alleluia).

[C2307co] Deus, qui ancillam tuam beatam N. ad quaerendum te ante omnia vocasti, eius exemplo et intercessione concede, ut, puro et humili corde tibi servientes, ad gloriam tuam perveniamus aeternam.

[C2308so] Devotionis nostrae munera, Domine, in beatae N. commemoratione tibi sacranda deferimus, qui temporali consolatione significas, ut promissa non desperemus aeterna.

[C2309am] Eructavit cor meum verbum bonum, dico ego opera mea Regi (T.P. alleluia).

[C2310am] Unum est necessarium: optimam partem elegit, quae non auferetur ab ea (T.P. alleluia).

[C2311pc] Salutaribus, Domine, fontibus recreati, te supplices exoramus, ut, beatae N. intercessione, Christo in dies intimius adhaerentes, in eius regno gratiae mereamur esse consortes.

[C2312ai] Dominus pars hereditatis meae et calicis mei: tu es qui restitues hereditatem meam mihi (T.P. alleluia).

[C2313ai] Dominus sponsavit eam sibi in sempiternum, in fide et misericordia (T.P. alleluia).

[C2314co] Deus, cuius munere beatus N. Christum pauperem et humilem perseveravit imitari, concede nobis, ipso intercedente, ut, in vocatione nostra fideliter ambulantes, ad eam perfectionem, quam nobis in Filio tuo proposuisti, pervenire valeamus.

[C2315so] Clementissime Deus, qui, vetere homine consumpto, novum secundum te in beato N. creare dignatus es, concede propitius, ut nos pariter renovati hanc placationis hostiam tibi acceptabilem offeramus.

[C2316am] Amen dico vobis quod vos, qui reliquistis omnia, et secuti estis me, centuplum accipietis, et vitam aeternam possidebitis (T.P. alleluia).

[C2317am] Pars mea Dominus: bonus est animae quaerenti illum (T.P. alleluia).

[C2318pc] Per huius virtutem sacramenti, quaesumus, Domine, beati N. exemplo, deduc nos iugiter in tua dilectione, et opus bonum quod coepisti in nobis perfice usque in diem Christi Iesu. Qui vivit et regnat in saecula saeculorum.

[C2319ai] Isti sunt sancti, qui acceperunt benedictionem a Domino et misericordiam a Deo salutari suo, quia haec est generatio quaerentium Dominum (T.P. alleluia).

[C2320ai] Laetetur cor quaerentium Dominum; quaeritis Dominum et confirmamini, quaerite faciem eius semper (T.P. alleluia).

[C2321co] Deus, qui beatum N. ad tuum regnum in hoc saeculo perquirendum, per caritatis perfectae prosecutionem vocasti, concede, ut, eius intercessione roborati, in dilectionis via spiritu gaudentes progrediamur.

[C2322so] Accepta tibi sint, quaesumus, Domine, munera nostrae servitutis pro beati N. commemoratione altari tuo proposita, et concede, ut, a terrenis impedimentis absoluti, te solo divites efficiamur.

[C2323am] Gustate et videte quoniam suavis est Dominus: beatus vir, qui sperat in eo (T.P. alleluia).

[C2324am] Beati pauperes spiritu, quoniam ipsorum est regnum caelorum (T.P. alleluia).

[C2325pc] Quaesumus, omnipotens Deus, ut, qui huius sacramenti munimur virtute, exemplo beati N., discamus te super omnia semper inquirere, et novi hominis formam in hoc saeculo portare.

[C2326ai] Venite, benedicti Patris mei, dicit Dominus: infirmus eram, et visitastis me. Amen dico vobis, quamdiu fecistis uni ex his fratribus meis minimis, mihi fecistis (T.P. alleluia).

[C2327ai] Dispersit, dedit pauperibus: iustitia eius manet in saeculum saeculi, cornu eius exaltabitur in gloria (T.P. alleluia).

[C2328co] Deus, qui Ecclesiam tuam in dilectione tuae divinitatis et proximi cuncta servare caelestia mandata docuisti, da nobis, ut, beati N. exemplo caritatis opera exercentes, inter benedictos regni tui connumerari mereamur.

[C2329so] Suscipe, Domine, munera populi tui, et praesta, ut, qui Filii tui immensae caritatis opus recolimus, in tui et proximi dilectione, beati N. exemplo, confirmemur.

[C2330am] Maiorem hac dilectionem nemo habet, ut animam suam ponat quis pro amicis suis (T.P. alleluia).

[C2331am] In hoc cognoscent omnes quia discipuli mei estis: si dilectionem habueritis ad invicem, dicit Dominus (T.P. alleluia).

[C2332pc] Sacris mysteriis refectos, da nos, quaesumus, Domine, beati N. exempla sectari, qui te indefessa pietate coluit, et populo tuo immensa profuit caritate.

[C2333pc] Sacramenti salutaris, Domine, pasti deliciis, tuam supplices deprecamur pietatem, ut, beati N. caritatis imitatores effecti, consortes simus et gloriae.

[C2334ai] Sinite parvulos venire ad me, et ne prohibueritis eos: talium est enim regnum Dei, dicit Dominus (T.P. alleluia).

[C2335ai] Qui fecerit et docuerit mandata Domini, hic magnus vocabitur in regno caelorum, dicit Dominus (T.P. alleluia).

[C2336co] Deus, qui in Ecclesia tua beatum N. suscitasti, ut proximis viam salutis monstraret, da nobis, eius exemplo, Christum magistrum ita sequi, ut ad te cum fratribus nostris pervenire valeamus.

[C2337so] Accepta tibi sit, quaesumus, Domine, sacratae plebis oblatio pro beati commemoratione et praesta, ut, ex huius participatione mysterii, exempla tuae caritatis referamus.

[C2338am] Nisi conversi fueritis et efficiamini sicut parvuli, non intrabitis in regnum caelorum, dicit Dominus (T.P. alleluia).

[C2339am] Qui sequitur me, non ambulat in tenebris, sed habebit lumen vitae, dicit Dominus (T.P. alleluia).

[C2340pc] Tribuat nobis, omnipotens Deus, refectio sancta subsidium, ut, exemplo beati N., et fraternitatis caritatem et lumen veritatis in corde exhibeamus et opere.

[C2341ai] Mulier timens Dominum ipsa laudabitur. Filii eius beatissimam praedicaverunt, vir eius laudavit eam (T.P. alleluia).

[C2342ai] Manum suam aperuit inopi, et palmas suas extendit ad pauperem, et panem otiosa non comedit (T.P. alleluia).

[C2343co] Deus, qui nos annua beatae N. festivitate laetificas, da, quaesumus, ut, quam veneramur officio, etiam piae conversationis sequamur exemplo.

[C2344co] Concede, quaesumus, omnipotens Deus, ut veneranda nobis beatarum N. et N. intercessio tribuat caeleste subsidium, quarum vita mirabilis omnibus salutare praestat exemplum.

[C2345so] Hostias tibi, Domine, pro beatae N. commemoratione deferimus, suppliciter deprecantes, ut indulgentiam nobis pariter conferant et salutem.

[C2346am] Simile est regnum caelorum homini negotiatori quaerenti bonas margaritas; inventa autem una pretiosa margarita, dedit omnia sua, et comparavit eam (T.P. alleluia).

[C2347pc] Divini operatio sacramenti, omnipotens Deus, in hac festivitate beatae N. illuminet nos pariter et inflammet, ut et sanctis iugiter desideriis ferveamus, et bonis operibus abundemus.

[C2348ai] Ecce mulier sapiens, quae aedificavit domum suam, et timens Dominum ambulavit recto itinere (T.P. alleluia).

[C2349co] Deus, humilium celsitudo, qui beatam N. caritatis et patientiae decore excellere disposuisti, eius meritis et intercessione concede, ut, crucem nostram iugiter ferentes, te semper diligere valeamus.

[C2350co] Effunde super nos, Domine, spiritum agnitionis et dilectionis tuae, quo ancillam tuam beatam N. implevisti, ut, sedula eius imitatione tibi sincere obsequentes, fide et opere placeamus.

[C2351so] Hostias, Domine, tuae plebis intende, et, quas in honore beatae N. devota mente celebrat, proficere sibi sentiat ad salutem.

[C2352am] Quicumque fecerit voluntatem Patris mei, qui in caelis est, ipse meus frater et soror et mater est, dicit Dominus (T.P. alleluia).

[C2353pc] Repleti sumus, Domine, muneribus tuis, quae in celebritate beatae N. percepimus; tribue, quaesumus, ut eorum et mundemur effectu, et muniamur auxilio.

[R2354ai] Laetetur cor quaerentium Dominum. Quaerite Dominum et confirmamini, quaerite faciem eius semper.

[R2355co] Deus, qui, licet salutem hominum semper operaris, nunc tamen populum tuum gratia abundantiore laetificas, respice propitius ad electionem tuam, ut piae protectionis auxilium et regenerandos muniat et renatos.

[R2356so] Omnipotens sempiterne Deus, qui nos ad aeternam vitam in confessione tui nominis baptismatis reparas sacramento, suscipe tuorum munera et vota famulorum, ut in te sperantium et desideria iubeas perfici et peccata deleri.

[R2357am] In Christo habemus redemptionem per sanguinem eius, remissionem peccatorum, secundum divitias gratiae eius.

[R2358pc] Purificent nos, quaesumus, Domine, sacramenta quae sumpsimus, et famulos tuos ab omni culpa liberos esse concede, ut, qui conscientiae reatu constringuntur, caelestis remedii plenitudine glorientur.

[R2359ai] Cum sanctificatus fuero in vobis, congregabo vos de universis terris; et effundam super vos aquam mundam, et mundabimini ab omnibus inquinamentis vestris. Et dabo vobis spiritum novum, dicit Dominus.

[R2360ai] Sitientes, venite ad aquas, dicit Dominus; et qui non habetis pretium, venite, et bibite cum laetitia.

[R2361co] Da, quaesumus, Domine, electis nostris digne atque sapienter ad confessionem tuae laudis accedere, ut dignitate pristina, quam originali transgressione perdiderant, per tuam gloriam reformentur.

[R2362so] Miseratio tua, Deus, ad haec percipienda mysteria famulos tuos, quaesumus, et praeveniat competenter et devota conversatione perducat.

[R2363pe] Memento, Domine, famulorum famularumque tuarum, qui electos tuos suscepturi sunt ad sanctam gratiam baptismi tui, et omnium circumstantium, quorum tibi fides cognita est... Hanc igitur oblationem, Domine, ut propitius suscipias, deprecamur, quam tibi offerimus pro famulis et famulabus tuis, quos ad aeternam vitam et beatum gratiae tuae donum numerare, eligere atque vocare dignatus es.

[R2364pe] Recordare quoque, Domine, servorum tuorum, qui hos electos suscepturi sunt ad fontem regenerationis.

[R2365pe] Adiuva gratia tua, quaesumus, Domine, servos tuos, ut hos electos verbo et exemplo perducant ad vitam novam in Christo, Domino nostro.

[R2366am] Qui biberit aquam, quam ego dabo ei, dicit Dominus, fiet in eo fons aquae salientis in vitam aeternam.

[R2367pc] Adesto, Domine, quaesumus, redemptionis effectibus, ut, quos sacramentis aeternitatis institues, eosdem protegas dignanter aptandos.

[R2368ai] Oculi mei semper ad Dominum, quia ipse evellet de laqueo pedes meos. Respice in me et miserere mei, quoniam unicus et pauper sum ego.

[R2369co] Omnipotens sempiterne Deus, Ecclesiam tuam spiritali iucunditate multiplica, ut, qui sunt generatione terreni, fiant regeneratione caelestes.

[R2370so] Remedii sempiterni munera, Domine, laetantes offerimus, suppliciter exorantes, ut eadem nos et digne venerari et pro salvandis congruenter exhibere perficias.

[R2371am] Dominus linivit oculos meos: et abii, et lavi, et vidi, et credidi Deo.

[R2372pc] Tu semper, quaesumus, Domine, tuam attolle benignus familiam, tu dispone correctam, tu propitius tuere subiectam, tu guberna perpetua bonitate salvandam.

[R2373ai] Circumdederunt me gemitus mortis, dolores inferni circumdederunt me; et in tribulatione mea invocavi Dominum, et exaudivit de templo sancto suo vocem meam.

[R2374co] Concede, Domine, electis nostris, ut, sanctis edocti mysteriis, et renoventur fonte baptismatis et inter Ecclesiae tuae membra numerentur.

[R2375so] Exaudi nos, omnipotens Deus, et famulos tuos, quos fidei christianae primitiis imbuisti, huius sacrificii tribuas operatione mundari.

[R2376am] Omnis qui vivit et credit in me, non morietur in aeternum, dicit Dominus.

[R2377pc] Concurrat, Domine, quaesumus, populus tuus et toto tibi corde subiectus obtineat, ut, ab omni perturbatione securus, et salvationis suae gaudia promptus exerceat et pro regenerandis benignus exoret.

[R2378ai] Induite novum hominem, qui secundum Deum creatus est in iustitia et sanctitate veritatis (T.P. alleluia).

[R2379co] Deus, qui nos facis passionis et resurrectionis Filii tui participare mysterium, praesta, quaesumus, ut, adoptionis filiorum Spiritu roborati, in novitate vitae iugiter ambulemus.

[R2380so] Quos Filio tuo conformatos (et chrismatis signaculo perfectos)populo sacerdotali propitius aggregasti, rogamus, Domine, ut in acceptabiles hostias computare digneris, et una cum oblationibus Ecclesiae tuae benignus accipias.

[R2381pe] Memento, Domine, famulorum famularumque tuarum, qui electos tuos susceperunt ad sanctam gratiam baptismi tui, et omnium circumstantium, quorum tibi fides cognita est ...

[R2382pe] Hanc igitur oblationem servitutis nostrae, sed et cunctae familiae tuae, quam tibi offerimus pro his quoque, quos regenerare dignatus es ex aqua et Spiritu Sancto, tribuens eis remissionem omnium peccatorum, ut invenires eos in Christo Iesu Domino nostro, quaesumus, Domine, ut placatus accipias, et nomina eorum ascribi iubeas in libro viventium.

[R2383pe] Recordare quoque, Domine, neophytorum, qui hodie per Baptismum (et Confirmationem)familiae tuae adiuncti sunt, ut Christum, Filium tuum, corde magno et animo volenti sequantur.

[R2384pe] Conforta, quaesumus, in sancto proposito famulos tuos, qui hodie per lavacrum regenerationis (et donationem Sancti Spiritus)plebi tuae aggregati sunt, et concede, ut in novitate vitae semper procedant. Omnes filios tuos ubique dispersos ...

[R2385pe] ... sed et totius cleri, et offerentium, et circumstantium, et neophytorum, quos hodie ex aqua et Spiritu Sancto regenerasti, et cuncti populi tui...

[R2386am] Videte qualem caritatem dedit nobis Pater, ut filii Dei nominemur et simus (T.P. alleluia).

[R2387pc] Praesta, quaesumus, Domine, ut, carnis et sanguinis Filii tui praediti sacramento, in communione Spiritus eius fratrumque dilectione ita crescamus, quatenus ad plenam Corporis Christi mensuram caritate vivida dilatemur.

[R2388ai] Salvos nos fecit Deus per lavacrum regenerationis et renovationis Spiritus Sancti, ut, iustificati gratia ipsius, heredes simus secundum spem vitae aeternae (T.P. alleluia).

[R2389co] Deus, qui nos regeneras verbo vitae, da, ut, corde sincero illud accipientes, veritatem alacres faciamus, et fraternae afferamus fructus plurimos caritatis.

[R2390so] Ad paratum panem accedentibus vinumque commixtum ianuam, Domine, resera cenae tuae, ut, caeleste cum gaudiis convivium celebrantes, inter sanctorum cives tuosque domesticos censeamur.

[R2391am] Nunc filii Dei sumus, et nondum apparuit quid erimus (T.P. alleluia).

[R2392pc] Praeclarum, Domine, mortis et resurrectionis Filii tui mysterium, quod annuntiavimus, celebrando, fac, ut, per huius sacramenti virtutem, etiam vivendo fateamur.

[R2393ai] Dicit Dominus: Effundam super vos aquam mundam, et dabo vobis cor novum, et spiritum novum ponam in medio vestri (T.P. alleluia).

[R2394co] Praesta, quaesumus, omnipotens et misericors Deus, ut Spiritus Sanctus adveniens templum nos gloriae suae dignanter inhabitando perficiat.

[R2395co] Promissionem tuam, quaesumus, Domine, super nos propitiatus adimple, ut Spiritus Sanctus adveniens nos coram mundo testes efficiat Evangelii Domini nostri Iesu Christi.

[R2396so] Famulorum tuorum, quaesumus, Domine, suscipe vota clementer, et praesta, ut, Filio tuo perfectius configurati, in testimonium eius indesinenter accrescant, memoriale participantes redemptionis eius, qua Spiritum tuum nobis ipse promeruit.

[R2397pe] Hanc igitur oblationem servitutis nostrae, sed et cunctae familiae tuae, quam tibi offerimus pro iis quoque, quos, Baptismate regeneratos, confirmare dignatus es donatione Spiritus Sancti, quaesumus, Domine, ut placatus accipias, et propitiatus in eis tuam gratiam custodias.

[R2398pe] Recordare quoque, Domine, famulorum tuorum, quos hodie donatione Spiritus Sancti confirmare dignatus es, et eos in gratia tua conserva.

[R2399pe] Memento etiam, Domine, famulorum tuorum, quos, Baptismate regeneratos, confirmare dignatus es donatione Spiritus Sancti, et propitiatus in eis tuam gratiam custodi.

[R2400am] Quicumque illuminati estis, qui gustavistis donum caeleste, et participes facti estis Spiritus Sancti, gaudete omnes in Domino (T.P. alleluia).

[R2401pc] Spiritu Sancto, Domine, perunctos tuique Filii sacramento nutritos tua in posterum benedictione prosequere, ut, omnibus adversitatibus superatis, Ecclesiam tuam sanctitate laetificent, eiusque in mundo incrementa suis operibus et caritate promoveant.

[R2402bs] Benedicat vos Deus Pater omnipotens, qui vos, ex aqua et Spiritu Sancto renatos, filios suae adoptionis effecit, et dignos sua paterna dilectione custodiat. Benedicat vos Filius eius Unigenitus, qui Spiritum veritatis in Ecclesiam mansurum esse promisit, et vos in confessione verae fidei sua virtute confirmet. Benedicat vos Spiritus Sanctus, qui ignem caritatis in cordibus discipulorum accendit, et vos, in unum congregatos, ad gaudium regni Dei sine offensione perducat.

[R2403sp] Confirma hoc, Deus, quod operatus es in nobis, et Spiritus Sancti dona in cordibus tuorum custodi fidelium, ut et Christum crucifixum coram mundo confiteri non erubescant, et mandata eius devota caritate perficiant. Qui vivit et regnat in saecula saeculorum.

[R2404ai] Caritas Dei diffusa est in cordibus nostris per inhabitantem Spiritum eius in nobis (T.P. alleluia).

[R2405co] Spiritum Sanctum tuum, quaesumus, Domine, super nos dignanter effunde, ut omnes, in unitate fidei ambulantes, et caritatis eius fortitudine roborati, ad mensuram aetatis plenitudinis Christi occurramus.

[R2406so] Hos famulos tuos, Domine, una cum Unigenito tuo benignus admitte, ut, qui eius cruce spiritalique sunt unctione signati, se tibi cum ipso iugiter offerentes, largiorem in dies effusionem tui Spiritus mereantur.

[R2407am] Accedite ad Dominum et illuminamini: gustate et videte quoniam suavis est (T.P. alleluia).

[R2408pc] Quos tui Spiritus, Domine, cumulasti muneribus, tuique auxisti Unigeniti nutrimento, fac etiam in plenitudine legis instructos, ut coram mundo tuae libertatem adoptionis iugiter manifestent, et propheticum tui populi munus sua valeant sanctitate praebere.

[R2409co] Mentes nostras, quaesumus, Domine, Paraclitus qui a te procedit illuminet, et inducat in omnem, sicut tuus promisit Filius, veritatem.

[R2410so] Suscipe, quaesumus, Domine, oblationem familiae tuae, ut, qui donum Spiritus Sancti susceperunt, et collata custodiant, et ad aeterna praemia perveniant.

[R2411pc] Spiritum nobis, Domine, tuae caritatis infunde, ut, quos uno pane caelesti satiasti, una facias pietate concordes.

[R2412bs] Benedicat te Deus Pater. Sanet te Dei Filius. Illuminet te Spiritus Sanctus. Corpus tuum custodiat et animam tuam salvet. Cor tuum collustret et te ad supernam vitam perducat. Et vos omnes, qui hic simul adestis, benedicat omnipotens Deus, Pater, et Filius, et Spiritus Sanctus.

[R2413bs] Dominus Iesus Christus apud te sit ut te defendat. Ante te sit ut te deducat, post te sit ut te muniat. Te respiciat, te conservet atque te benedicat.

[R2414ai] Cibavit eos ex adipe frumenti, et de petra melle saturavit eos (T.P. alleluia).

[R2415ai] Vere languores nostros Dominus tulit, et dolores nostros ipse portavit (T.P. alleluia).

[R2416co] Deus, cuius Filius nobis est via, veritas et vita, respice clementer famulum tuum N. et praesta, ut, tuis promissionibus se committens, et Corpore Filii tui recreatus, ad regnum tuum progrediatur in pace.

[R2417so] Sacrificium nostrum, Pater sancte, intuere benignus, ut Agnum tibi paschalem repraesentet, cuius passio paradisi ianuas reseravit, et famulum tuum N. in aeternum munus per gratiam tuam introducat.

[R2418am] Qui manducat meam carnem et bibit meum sanguinem, habet vitam aeternam, dicit Dominus, et ego resuscitabo eum in novissimo die (T.P. alleluia).

[R2419am] Adimpleo quae desunt passionum Christi in carne mea, pro corpore eius, quod est Ecclesia (T.P. alleluia).

[R2420pc] Domine, qui es salus aeterna in te credentium, praesta, quaesumus, ut famulus tuus N., caelesti pane potuque refectus, in regnum luminis et vitae securus perveniat.

[R2421ai] Spiritus Domini super me, propter quod unxit me, evangelizare pauperibus misit me, sanare contritos corde (T.P. alleluia).

[R2422co] Deus, qui sola ineffabilis gratiae largitate, vis famulum tuum N. presbyterum hodie Ecclesiae tuae N. praeficere, tribue illi digne persolvere munus episcopale plebemque commissam, te in omnibus gubernante, verbo et exemplo dirigere concede.

[R2423co] Deus qui, pastor aeternus, gregem tuum assidua custodia gubernans, vis famulum tuum N. presbyterum hodie collegio episcopali sociare, concede, quaesumus, ut, eius sancta conversatione, Christi testis verus ubique exhibeatur.

[R2424so] Pro nostrae servitutis augmento sacrificium tibi, Domine, laudis offerimus, ut, quod immeritis contulisti, propitius exsequaris.

[R2425so] Haec oblatio, Domine, pro Ecclesia tua famuloque tuo N. Episcopo delata sit tibi munus acceptum, et, quem sacerdotem magnum in tuo populo suscitasti, apostolicarum virtutum muneribus, ad gregis profectum, exorna.

[R2426vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum tuum Sancti Spiritus unctione novi et aeterni testamenti constituisti Pontificem, et ineffabili dignatus es dispositione sancire, ut unicum eius sacerdotium in Ecclesia servaretur. Ipse enim non solum regali sacerdotio populum acquisitionis exornat, sed etiam fraterna homines eligit bonitate, ut sacri sui ministerii fiant manuum impositione participes. Qui sacrificium renovent, eius nomine, redemptionis humanae, tuis apparantes filiis paschale convivium, et plebem tuam sanctam caritate praeveniant, verbo nutriant, reficiant sacramentis. Qui, vitam pro te fratrumque salute tradentes, ad ipsius Christi nitantur imaginem conformari, et constanter tibi fidem amoremque testentur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2427pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro me indigno famulo tuo, quem ad episcopatus Ordinem promovere dignatus es, quaesumus, Domine, ut placatus accipias, et propitius in me tua dona custodias, ut, quod divino munere consecutus sum, divinis effectibus exsequar.

[R2428pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro famulo tuo N., quem ad episcopatus Ordinem promovere dignatus es, quaesumus, Domine, ut placatus accipias, et propitius in eo tua dona custodias, ut, quod divino munere consecutus est, divinis effectibus exsequatur.

[R2429pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. (et Episcopo nostro N.), et me indigno famulo tuo, quem hodie pastorem Ecclesiae (N.)providere voluisti, et universo clero.

[R2430pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. (et Episcopo nostro N.), et me indigno famulo tuo, et famulo tuo N., quem hodie pastorem Ecclesiae (N.)providere voluisti, et universo clero.

[R2431pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. (et Episcopo nostro N.), et me indigno famulo tuo, qui hodie pastor Ecclesiae (N.)ordinatus sum, cum episcopali Ordine et universo clero, et omni populo acquisitionis tuae.

[R2432pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. (et Episcopo nostro N.), et famulo tuo N. qui hodie pastor Ecclesiae (N.)ordinatus est, cum episcopali Ordine et universo clero, et omni populo acquisitionis tuae.

[R2433pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., (Episcopi nostri N.), et mei indigni famuli tui, quem hodie ad servitium populi tui eligere dignatus es, et Episcoporum Ordinis universi, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2434pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., (Episcopi nostri N.), mei indigni famuli tui et istius famuli tui N., quem hodie ad servitium populi tui eligere dignatus es, et Episcoporum Ordinis universi, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2435am] Pater sancte, sanctifica eos in veritate. Sicut tu me misisti in mundum, et ego misi eos in mundum, dicit Dominus (T.P. alleluia).

[R2436pc] Plenum, quaesumus, Domine, in nobis remedium tuae miserationis operare, ac tales nos esse perfice propitius, et sic foveri, ut tibi in omnibus placere valeamus.

[R2437pc] Huius, Domine, virtute mysterii, in famulo tuo N. Episcopo gratiae tuae dona multiplica, ut et tibi digne persolvat pastorale ministerium, et fidelis dispensationis aeterna praemia consequatur.

[R2438bs] Deus, qui populis tuis indulgendo consulis et amore dominaris, da Spiritum sapientiae quibus tradidisti regimen disciplinae, ut de profectu sanctarum ovium fiant gaudia aeterna pastorum. Et qui dierum nostrorum numerum temporumque mensuras maiestatis tuae potestate dispensas, propitius ad humilitatis nostrae respice servitutem et pacis tuae abundantiam temporibus nostris praetende perfectam. Collatis quoque in me per gratiam tuam propitiare muneribus et quem fecisti gradu episcopali sublimem, fac operum perfectione tibi placentem atque in eum affectum dirige cor plebis et praesulis, ut nec pastori oboedientia gregis nec gregi desit umquam cura pastoris.

[R2439bs] Benedicat tibi Dominus et custodiat te; sicut voluit super populum suum te constituere pontificem, ita in praesenti saeculo felicem et aeternae felicitatis faciat te esse consortem. Clerum ac populum, quem sua voluit opitulatione congregari, sua dispensatione et tua administratione per diuturna tempora faciat feliciter gubernari. Quatenus divinis monitis parentes, adversitatibus carentes, bonis omnibus exuberantes, tuo ministerio fide obsequentes, et in praesenti saeculo pacis tranquillitate fruantur et tecum aeternorum civium consortio potiri mereantur.

[R2440ai] Spiritus Domini super me, propter quod unxit me, evangelizare pauperibus misit me, sanare contritos corde (T.P. alleluia).

[R2441co] Deus, qui sola ineffabilis gratiae largitate, hos famulos tuos presbyteros hodie ad summi sacerdotii ministerium elevare dignaris, tribue illis digne persolvere munus episcopale plebemque commissam, te in omnibus gubernante, verbo et exemplo dirigere concede.

[R2442co] Deus qui, pastor aeternus, gregem tuum assidua custodia gubernans, vis hos famulos tuos presbyteros hodie collegio episcopali sociare, concede, quaesumus, ut, eorum sancta conversatione, Christi testes veri ubique exhibeantur.

[R2443so] Pro nostrae servitutis augmento sacrificium tibi, Domine, laudis offerimus, ut, quod immeritis contulisti, propitius exsequaris.

[R2444so] Haec oblatio, Domine, pro Ecclesia tua famulisque tuis Episcopis nuper ordinatis delata sit tibi munus acceptum, et, quos sacerdotes magnos in tuo populo suscitasti, apostolicarum virtutum muneribus, ad gregis profectum, exorna.

[R2445pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro me indigno famulo tuo, et pro his famulis tuis, quos ad episcopatus Ordinem promovere dignatus es, quaesumus, Domine, ut placatus accipias, et propitius in me tua dona custodias, ut quod divino munere consecuti sumus, divinis effectibus exsequamur.

[R2446pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro his famulis tuis, quos ad episcopatus Ordinem promovere dignatus es, quaesumus, Domine, ut placatus accipias, et propitius in eis tua dona custodias, ut quod divino munere consecuti sunt, divinis effectibus exsequantur.

[R2447pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. (et Episcopo nostro N.), et me indigno famulo tuo, et pro his famulis tuis, quos hodie pastores Ecclesiae providere voluisti, et universo clero.

[R2448pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. (et Episcopo nostro N.), et me indigno famulo tuo, et his famulis tuis, qui hodie pastores Ecclesiae ordinati sunt, cum episcopali Ordine et universo clero, et omni populo acquisitionis tuae.

[R2449pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., (Episcopi nostri N.), et mei indigni famuli tui, et istorum famulorum tuorum, quos hodie ad servitium populi tui eligere dignatus es, et Episcoporum Ordinis universi, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero. Memento etiam illorum...

[R2450am] Pater sancte, sanctifica eos in veritate. Sicut tu me misisti in mundum, et ego misi eos in mundum, dicit Dominus (T.P. alleluia).

[R2451pc] Plenum, quaesumus, Domine, in nobis remedium tuae miserationis operare, ac tales nos esse perfice propitius, et sic foveri, ut tibi in omnibus placere valeamus.

[R2452pc] Huius, Domine, virtute mysterii, in his famulis tuis Episcopis gratiae tuae dona multiplica, ut et tibi digne persolvant pastorale ministerium, et fidelis dispensationis aeterna praemia consequantur.

[R2453bs] Deus, qui populis tuis indulgendo consulis et amore dominaris, da Spiritum sapientiae quibus tradidisti regimen disciplinae, ut de profectu sanctarum ovium fiant gaudia aeterna pastorum. Et qui dierum nostrorum numerum temporumque mensuras maiestatis tuae potestate dispensas, propitius ad humilitatis nostrae respice servitutem et pacis tuae abundantiam temporibus nostris praetende perfectam. Collatis quoque in nos per gratiam tuam propitiare muneribus et quos fecisti gradu episcopali sublimes, fac operum perfectione tibi placentes atque in eum affectum dirige cor plebis et praesulis, ut nec pastori oboedientia gregis nec gregi desit umquam cura pastoris.

[R2454bs] Benedicat vobis Dominus et custodiat vos; sicut voluit super populum suum vos constituere pontifices, ita in praesenti saeculo felices et aeternae felicitatis faciat vos esse consortes. Clerum ac populum, quem sua voluit opitulatione congregari, sua dispensatione et vestra administratione per diuturna tempora faciat feliciter gubernari. Quatenus divinis monitis parentes, adversitatibus carentes, bonis omnibus exuberantes, vestro ministerio fide obsequentes, et in praesenti saeculo pacis tranquillitate fruantur et vobiscum aeternorum civium consortio potiri mereantur.

[R2455ai] Dabo vobis pastores iuxta cor meum, et pascent vos scientia et doctrina (T.P. alleluia).

[R2456co] Domine Deus noster, qui in regendo populo tuo ministerio uteris sacerdotum, tribue his diaconis Ecclesiae tuae, quos hodie ad presbyteratus munus eligere dignaris, perseverantem in tua voluntate famulatum, ut ministerio atque vita tuam valeant in Christo gloriam procurare.

[R2457so] Deus, qui sacerdotes tuos sacris altaribus tuoque populo ministrare voluisti, per huius sacrificii virtutem concede propitius, ut famulorum tuorum servitium tibi iugiter placeat, et fructum qui semper maneat in Ecclesia tua valeat afferre.

[R2458vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum tuum Sancti Spiritus unctione novi et aeterni testamenti constituisti Pontificem, et ineffabili dignatus es dispositione sancire, ut unicum eius sacerdotium in Ecclesia servaretur. Ipse enim non solum regali sacerdotio populum acquisitionis exornat, sed etiam fraterna homines eligit bonitate, ut sacri sui ministerii fiant manuum impositione participes. Qui sacrificium renovent, eius nomine, redemptionis humanae, tuis apparantes filiis paschale convivium, et plebem tuam sanctam caritate praeveniant, verbo nutriant, reficiant sacramentis. Qui, vitam pro te fratrumque salute tradentes, ad ipsius Christi nitantur imaginem conformari, et constanter tibi fidem amoremque testentur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2459pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro his famulis tuis, quos ad presbyteratus Ordinem promovere dignatus es, quaesumus, Domine, ut placatus accipias, et propitius in eis tua dona custodias, ut, quod divino munere consecuti sunt, divinis effectibus exsequantur.

[R2460pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. Recordare quoque istorum famulorum tuorum, quos hodie presbyteros Ecclesiae providere voluisti, et universi cleri.

[R2461pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali Ordine et his famulis tuis, qui hodie presbyteri Ecclesiae ordinati sunt, et universo clero, et omni populo acquisitionis tuae.

[R2462pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum Ordinis universi, et istorum famulorum tuorum, quos hodie ad populi tui servitium presbyterale eligere dignatus es, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2463am] Euntes in mundum universum, praedicate Evangelium: ego vobiscum sum omnibus diebus, dicit Dominus (T.P. alleluia).

[R2464pc] Sacerdotes tuos, Domine, et omnes famulos tuos vivificet divina, quam obtulimus et sumpsimus, hostia, ut, perpetua tibi caritate coniuncti, digne famulari tuae mereantur maiestati.

[R2465bs] Deus, Ecclesiae institutor et rector, sua vos constanter tueatur gratia, ut presbyterii munera fideli animo persolvatis. Ipse divinae vos faciat caritatis et veritatis in mundo servos et testes, atque reconciliationis ministros fideles. Et vos faciat veros pastores, qui fidelibus tribuant panem vivum et verbum vitae, ut magis crescant in unitate corporis Christi.

[R2466ai] Dabo vobis pastores iuxta cor meum, et pascent vos scientia et doctrina (T.P. alleluia).

[R2467co] Domine Deus noster, qui in regendo populo tuo ministerio uteris sacerdotum, tribue huic diacono Ecclesiae tuae, quem hodie ad presbyteratus munus eligere dignaris, perseverantem in tua voluntate famulatum, ut ministerio atque vita tuam valeat in Christo gloriam procurare.

[R2468so] Deus, qui sacerdotes tuos sacris altaribus tuoque populo ministrare voluisti, per huius sacrificii virtutem concede propitius, ut famulorum tuorum servitium tibi iugiter placeat, et fructum qui semper maneat in Ecclesia tua valeat afferre.

[R2469vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum tuum Sancti Spiritus unctione novi et aeterni testamenti constituisti Pontificem, et ineffabili dignatus es dispositione sancire, ut unicum eius sacerdotium in Ecclesia servaretur. Ipse enim non solum regali sacerdotio populum acquisitionis exornat, sed etiam fraterna homines eligit bonitate, ut sacri sui ministerii fiant manuum impositione participes. Qui sacrificium renovent, eius nomine, redemptionis humanae, tuis apparantes filiis paschale convivium, et plebem tuam sanctam caritate praeveniant, verbo nutriant, reficiant sacramentis. Qui, vitam pro te fratrumque salute tradentes, ad ipsius Christi nitantur imaginem conformari, et constanter tibi fidem amoremque testentur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2470pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro hoc famulo tuo, quem ad presbyteratus Ordinem promovere dignatus es, quaesumus, Domine, ut placatus accipias, et propitius in eo tua dona custodias, ut, quod divino munere consecutus est, divinis effectibus exsequatur.

[R2471pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. Recordare quoque istius famuli tui, quem hodie presbyterum Ecclesiae providere voluisti, et universi cleri.

[R2472pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali Ordine et hoc famulo tuo, qui hodie presbyter Ecclesiae ordinatus est, et universo clero, et omni populo acquisitionis tuae.

[R2473pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum Ordinis universi, et istius famuli tui, quem hodie ad populi tui servitium presbyterale eligere dignatus es, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2474am] Euntes in mundum universum, praedicate Evangelium: ego vobiscum sum omnibus diebus, dicit Dominus (T.P. alleluia).

[R2475pc] Sacerdotes tuos, Domine, et omnes famulos tuos vivificet divina, quam obtulimus et sumpsimus, hostia, ut, perpetua tibi caritate coniuncti, digne famulari tuae mereantur maiestati.

[R2476bs] Deus, Ecclesiae institutor et rector, sua te constanter tueatur gratia, ut presbyterii munera fideli animo persolvas. Ipse divinae te faciat caritatis et veritatis in mundo servum et testem, atque reconciliationis ministrum fidelem. Et te faciat verum pastorem, qui fidelibus tribuat panem vivum et verbum vitae, ut magis crescant in unitate corporis Christi.

[R2477ai] Qui mihi ministrat me sequatur, dicit Dominus; et ubi sum ego, illic et minister meus erit (T.P. alleluia).

[R2478co] Deus, qui ministros Ecclesiae tuae docuisti non ministrari velle, sed fratribus ministrare, his famulis tuis, quos hodie ad diaconatus munus eligere dignaris, concede, quaesumus, et in actione sollertiam, et cum mansuetudine ministerii in oratione constantiam.

[R2479so] Pater sancte, cuius Filius discipulorum voluit lavare pedes, ut nobis praeberet exemplum, suscipe, quaesumus, nostrae munera servitutis, et praesta, ut, nosmetipsos in spiritalem hostiam offerentes, spiritu humilitatis et diligentiae repleamur.

[R2480vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum tuum Sancti Spiritus unctione novi et aeterni testamenti constituisti Pontificem, et ineffabili dignatus es dispositione sancire, ut multa ministeria in Ecclesia exercerentur. Ipse enim non solum regali sacerdotio populum acquisitionis exornat, sed etiam fraterna homines eligit bonitate, ut sacri sui ministerii fiant manuum impositione participes. Qui plebem sanctam caritate praeveniant, verbo nutriant, reficiant sacramentis. Qui, vitam pro te fratrumque salute tradentes, ad ipsius Christi nitantur imaginem conformari, et constantes tibi fidem amoremque testentur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2481pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro famulis tuis, quos ad diaconatus Ordinem promovere dignatus es, quaesumus, Domine, ut placatus accipias, et propitius in eis tua dona custodias, ut, quod divino munere consecuti sunt, divinis effectibus exsequantur.

[R2482pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. Recordare quoque istorum famulorum tuorum, quos hodie ministros Ecclesiae providere voluisti, et universi cleri.

[R2483pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali Ordine et his famulis tuis, qui hodie ministri Ecclesiae ordinati sunt, et universo clero, et omni populo acquisitionis tuae.

[R2484pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum Ordinis universi, et istorum famulorum tuorum, quos hodie ad populi tui servitium diaconale eligere dignatus es, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2485am] Filius hominis non venit ministrari, sed ministrare, et dare animam suam redemptionem pro multis (T.P. alleluia).

[R2486pc] Concede famulis tuis, Domine, caelesti cibo potuque repletis, ut, ad gloriam tuam et salutem credentium procurandam, fideles inveniantur Evangelii, sacramentorum caritatisque ministri.

[R2487bs] Deus, qui vos vocavit ad servitium hominum in Ecclesia sua, det vobis magnum zelum erga omnes, maxime erga afflictos et pauperes. Ipse qui vobis munus dedit praedicandi Evangelium Christi, adiuvet vos ut, viventes secundum verbum suum, testes eius sitis sinceri atque ardentes. Et qui vos fecit dispensatores mysteriorum suorum, praestet vos esse imitatores Filii sui Iesu Christi et in mundo ministros unitatis et pacis.

[R2488ai] Qui mihi ministrat me sequatur, dicit Dominus; et ubi sum ego, illic et minister meus erit (T.P. alleluia).

[R2489co] Deus, qui ministros Ecclesiae tuae docuisti non ministrari velle, sed fratribus ministrare, huic famulo tuo, quem hodie ad diaconatus munus eligere dignaris, concede, quaesumus, et in actione sollertiam, et cum mansuetudine ministerii in oratione constantiam.

[R2490so] Pater sancte, cuius Filius discipulorum voluit lavare pedes, ut nobis praeberet exemplum, suscipe, quaesumus, nostrae munera servitutis, et praesta, ut, nosmetipsos in spiritalem hostiam offerentes, spiritu humilitatis et diligentiae repleamur.

[R2491vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui Unigenitum tuum Sancti Spiritus unctione novi et aeterni testamenti constituisti Pontificem, et ineffabili dignatus es dispositione sancire, ut multa ministeria in Ecclesia exercerentur. Ipse enim non solum regali sacerdotio populum acquisitionis exornat, sed etiam fraterna homines eligit bonitate, ut sacri sui ministerii fiant manuum impositione participes. Qui plebem sanctam caritate praeveniant, verbo nutriant, reficiant sacramentis. Qui, vitam pro te fratrumque salute tradentes, ad ipsius Christi nitantur imaginem conformari, et constantes tibi fidem amoremque testentur. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2492pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro famulo tuo, quem ad diaconatus Ordinem promovere dignatus es, quaesumus, Domine, ut placatus accipias, et propitius in eo tua dona custodias, ut, quod divino munere consecutus est, divinis effectibus exsequatur.

[R2493pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. Recordare quoque istius famuli tui, quem hodie ministrum Ecclesiae providere voluisti, et universi cleri.

[R2494pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali Ordine et hoc famulo tuo, qui hodie minister Ecclesiae ordinatus est, et universo clero, et omni populo acquisitionis tuae.

[R2495pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum Ordinis universi, et istius famuli tui, quem hodie ad populi tui servitium diaconale eligere dignatus es, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2496am] Filius hominis non venit ministrari, sed ministrare, et dare animam suam redemptionem pro multis (T.P. alleluia).

[R2497pc] Concede famulis tuis, Domine, caelesti cibo potuque repletis, ut, ad gloriam tuam et salutem credentium procurandam, fideles inveniantur Evangelii, sacramentorum caritatisque ministri.

[R2498bs] Deus, qui te vocavit ad servitium hominum in Ecclesia sua, det tibi magnum zelum erga omnes, maxime erga afflictos et pauperes. Ipse qui tibi munus dedit praedicandi Evangelium Christi, adiuvet te ut, vivens secundum verbum suum, testis eius sis sincerus atque ardens. Et qui te fecit dispensator mysteriorum suorum, praestet te esse imitatorem Filii sui Iesu Christi et in mundo ministrum unitatis et pacis.

[R2499ai] Qui mihi ministrat me sequatur, dicit Dominus; et ubi sum ego, illic et minister meus erit (T.P. alleluia).

[R2500co] Deus, qui pastores populo tuo providere voluisti, effunde in Ecclesia tua spiritum pietatis et fortitudinis, qui hos famulos tuos dignos altaribus tuis reddat ministros et Evangelii tui strenuos ac mites adsertores efficiat.

[R2501so] Pater sancte, cuius Filius discipulorum voluit lavare pedes, ut nobis praeberet exemplum, suscipe, quaesumus, nostrae munera servitutis, et praesta, ut, nosmetipsos in spiritalem hostiam offerentes, spiritu humilitatis et diligentiae repleamur.

[R2502pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro his famulis tuis, quos ad diaconatus et presbyteratus Ordines promovere dignatus es, quaesumus, Domine, ut placatus accipias, et propitius in eis tua dona custodias, ut, quod divino munere consecuti sunt, divinis effectibus exsequantur.

[R2503pe] Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. Recordare quoque istorum famulorum tuorum, quos hodie diaconos vel presbyteros Ecclesiae providere voluisti, et universi cleri.

[R2504pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali Ordine et his famulis tuis, qui hodie diaconi vel presbyteri Ecclesiae ordinati sunt, et universo clero, et omni populo acquisitionis tuae.

[R2505pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum Ordinis universi, et istorum famulorum tuorum, quos hodie ad populi tui servitium diaconale vel presbyterale eligere dignatus es, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2506am] Pater sancte, sanctifica eos in veritate. Sicut tu me misisti in mundum, et ego misi eos in mundum, dicit Dominus (T.P. alleluia).

[R2507pc] Concede famulis tuis, Domine, caelesti cibo potuque repletis, ut, ad gloriam tuam et salutem credentium procurandam, fideles inveniantur Evangelii, sacramentorum caritatisque ministri.

[R2508bs] Deus, Ecclesiae institutor et rector, sua vos constanter tueatur gratia, ut munera vestra fideli animo persolvatis. Ipse qui diaconis munus dedit praedicandi Evangelium, altari et hominibus inserviendi, vos faciat in mundo testes eius ardentes ac ministros caritatis. Et vos presbyteros faciat veros pastores, qui fidelibus tribuant panem vivum et verbum vitae, ut magis crescant in unitate corporis Christi.

[R2509ai] Mittat vobis Dominus auxilium de sancto, et de Sion tueatur vos. Tribuat vobis secundum cor vestrum, et omne consilium vestrum confirmet (T.P. alleluia).

[R2510co] Adesto, Domine, supplicationibus nostris, et institutis tuis, quibus propaginem humani generis ordinasti, benignus assiste, ut quod te auctore coniungitur, te auxiliante servetur.

[R2511co] Deus, qui, in humano genere creando, unitatem inter virum et mulierem esse voluisti, famulos tuos, qui coniugali copulandi sunt foedere, unius vinculo dilectionis astringe, ut, quos in caritate fructificare largiris, ipsius caritatis testes esse concedas.

[R2512so] Suscipe, quaesumus, Domine, pro sacra connubii lege munus oblatum, et, cuius largitor es operis, providus quoque esto dispositor.

[R2513vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui foedera nuptiarum blando concordiae iugo et insolubili pacis vinculo nexuisti, ut multiplicandis adoptionum filiis sanctorum connubiorum fecunditas pudica serviret. Tua enim, Domine, providentia, tuaque gratia ineffabilibus modis utrumque dispensas, ut, quod generatio ad mundi produxit ornatum, regeneratio ad Ecclesiae perducat augmentum: per Christum Dominum nostrum. Per quem, cum Angelis et omnibus Sanctis, hymnum laudis tibi canimus, sine fine dicentes: Sanctus.

[R2514pe] Hanc igitur oblationem servitutis nostrae, sed et famulorum tuorum N. et N. totiusque familiae tuae, quae pro illis tuam exorat maiestatem, quaesumus, Domine, ut placatus accipias: et sicut eos ad diem nuptiarum pervenire tribuisti, sic (tuo munere desiderata sobole gaudere proficias, atque)ad optatam seriem provehas benignus annorum.

[R2515pe] Recordare quoque, Domine, N. et N., quos ad diem nuptiarum pervenire tribuisti: ut gratia tua in mutua dilectione et pace permaneant.

[R2516pe] Conforta, quaesumus, in gratia Matrimonii N. et N., quos ad diem nuptiarum feliciter adduxisti, ut foedus quod in conspectu tuo firmaverunt, te protegente, in vita semper conservent.

[R2517mn] Dominum, fratres carissimi, suppliciter deprecemur, ut super hos famulos suos, qui nupserunt in Christo, benedictionem gratiae suae clementer effundat, et quos foedere sancto coniunxit (Christi Corporis et Sanguinis sacramento)una faciat caritate concordes.

[R2518bn] Deus, qui potestate virtutis tuae de nihilo cuncta fecisti, qui, dispositis universitatis exordiis et homine ad imaginem tuam facto, inseparabile viro mulieris adiutorium condidisti, ut iam non duo essent, sed una caro, docens quod unum placuisset institui numquam licere disiungi; Deus, qui tam excellenti mysterio coniugalem copulam consecrasti, ut Christi et Ecclesiae sacramentum praesignares in foedere nuptiarum; Deus, per quem mulier iungitur viro, et societas, principaliter ordinata, ea benedictione donatur, quae sola nec per originalis peccati poenam nec per diluvii est ablata sententiam. Respice propitius super hos famulos tuos, qui, maritali iuncti consortio, tua se expetunt benedictione muniri: emitte super eos Spiritus Sancti gratiam ut, caritate tua in cordibus eorum diffusa, in coniugali foedere fideles permaneant. Sit in famula tua N. gratia dilectionis et pacis, imitatrixque sanctarum remaneat feminarum, quarum in Scripturis laudes praedicantur. Confidat in ea cor viri sui, qui, parem sociam et gratiae vitae coheredem agnoscens, eam honore debito prosequatur eoque diligat semper amore, quo Christus suam dilexit Ecclesiam. Et nunc te, Domine, deprecamur, ut hi famuli tui nexi fidei mandatisque permaneant, et, uni thoro iuncti, morum sint integritate conspicui; Evangelii robore communiti, bonum Christi testimonium omnibus manifestent (in sobole sint fecundi, sint parentes virtutibus comprobati; videant ambo filios filiorum suorum)et, optatam demum senectutem adepti, ad beatorum vitam et ad caelestia regna perveniant.

[R2519am] Christus dilexit Ecclesiam et seipsum tradidit pro ea, ut exhiberet sibi uxorem sanctam et immaculatam (T.P. alleluia).

[R2520pc] Huius, Domine, sacrificii virtute, instituta providentiae tuae pio favore comitare, ut, quos sancta societate iunxisti (et uno pane unoque calice satiasti), una etiam facias caritate concordes.

[R2521bs] Deus Pater aeternus in mutuo vos servet amore concordes, ut pax Christi habitet in vobis, et in domo vestra iugiter maneat. Benedictionem habeatis in filiis, ab amicis solacium, et veram cum omnibus pacem. Caritatis Dei testes sitis in mundo, ut, quos afflicti et egeni benignos invenerint, in aeterna Dei tabernacula vos grati aliquando recipiant.

[R2522ai] Repleti sumus mane, Domine, misericordia tua, et exsultavimus et delectati sumus omnibus diebus nostris. Sit splendor Domini super nos et super opera manuum nostrarum (T.P. alleluia).

[R2523co] Adesto, Domine, supplicationibus nostris, et super hos famulos tuos (N. et N.)gratiam tuam benignus effunde, ut qui apud tua coniunguntur altaria in mutua caritate firmentur.

[R2524co] Deus, qui tam excellenti mysterio coniugale vinculum consecrasti, ut Christi et Ecclesiae sacramentum praesignares in foedere nuptiarum, praesta, quaesumus, his famulis tuis, ut, quod fide percipiunt, opere persequantur.

[R2525so] Munera, quae tibi, Domine, laetantes offerimus, benignus assume, et, quos sacramenti foedere coniunxisti, paterna pietate custodi.

[R2526vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quia in ipso novum nexuisti cum tuo populo testamentum, ut, quem mortis eius et resurrectionis redemisses mysterio, divinae faceres naturae consortem eiusque in caelis gloriae coheredem. Cuius piissimam gratiae largitatem in viri mulierisque significasti connubio, ut ad ineffabile tui amoris consilium nos revocaret quod agitur sacramentum. Et ideo, cum Angelis et omnibus Sanctis, te laudamus, sine fine dicentes: Sanctus.

[R2527mn] Super hos sponsos, qui, Matrimonium ineuntes, ad altare accedunt, ut, (Christi Corporis Sanguinisque participes), mutua semper dilectione nectantur, Dominum deprecemur.

[R2528bn] Pater sancte, qui hominem ad imaginem tuam conditum masculum creasti et feminam, ut vir et mulier, in carnis et cordis unitate coniuncti, munus suum in mundo adimplerent: Deus, qui, ad amoris tui consilium revelandum, in mutua dilectione sponsorum foedus illud adumbrari voluisti, quod ipse cum populo tuo inire dignatus es, ut, sacramenti significatione completa, in fidelium tuorum coniugali consortio Christi et Ecclesiae nuptiale pateret mysterium: Super hos famulos tuos (N. et N.)dexteram tuam, quaesumus, propitiatus extende. et in eorum corda Spiritus Sancti virtutem effunde. Praesta, Domine, ut, in huius quod ineunt sacramenti consortio, inter se amoris tui dona communicent, et, praesentiae tuae signum invicem ostendentes, cor unum fiant et anima una. Da etiam Domine, ut domum, quam aedificant, opere quoque sustentent, (filiosque suos, evangelica disciplina formatos, caelesti familiae tuae praeparent cooptandos). Hanc famulam tuam N. tuis digneris benedictionibus cumulare, ut, uxoris (ac matris)munera complens, casta suam domum dilectione refoveat, et gratia decoret affabili. Hunc etiam famulum tuum N. caelesti, Domine, benedictione prosequere, ut mariti fidelis (et providi patris)officia digne persolvat. Concede, Pater sancte, ut, qui coram te coniugio copulati ad mensam tuam accedere cupiunt, caeleste aliquando convivium participare laetentur.

[R2529am] Mandatum novum do vobis, ut diligatis invicem, sicut dilexi vos, dicit Dominus (T.P. alleluia).

[R2530pc] Mensae tuae participes effecti, quaesumus, Domine, ut, qui nuptiarum iunguntur sacramento, tibi semper adhaereant, et tuum hominibus nomen annuntient.

[R2531bs] Deus Pater omnipotens gaudium suum vobis concedat et in filiis vos benedicat. Unigenitus Dei Filius in prosperis et adversis vobis miseratus assistat. Spiritus Dei Sanctus caritatem suam in corda vestra semper effundat.

[R2532ai] Per singulos dies benedicam tibi, Domine, et laudabo nomen tuum in saeculum saeculi, quia suavis es universis, et miserationes tuae super omnia opera tua (T.P. alleluia).

[R2533co] Praesta, quaesumus, omnipotens Deus, ut hi famuli tui, nuptiarum sacramento iungendi, in fide quam profitentur accrescant, et sobole fideli tuam ditent Ecclesiam.

[R2534co] Deus, qui mundi crescentis exordio multiplicatae proli benedicis, propitiare supplicationibus nostris et super hos famulos tuos (N. et N.)opem tuae benedictionis infunde, ut in coniugali consortio affectu compari, mente consimili, sanctitate mutua copulentur.

[R2535so] Propitiare, Domine, supplicationibus nostris, et has oblationes, quas tibi pro his famulis tuis sancto foedere copulatis offerimus, benigno suscipe vultu, ut per haec mysteria in mutua caritate tuoque amore firmentur.

[R2536vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui hominem pietatis tuae dono creatum ad tantam voluisti dignitatem extolli, ut in viri mulierisque consortio veram relinqueres tui amoris imaginem; quem enim ex caritate creasti, eum ad caritatis legem vocare non desinis, ut aeternae tuae caritatis participem esse concedas. Cuius connubii sancti mysterium dum tuae dilectionis signum exsistit, amorem sacrat humanum: per Christum Dominum nostrum. Per quem, cum Angelis et omnibus Sanctis, hymnum laudis tibi canimus, sine fine dicentes: Sanctus.

[R2537mn] Precibus nostris, fratres carissimi, super hos sponsos Dei benedictionem supplices invocemus, ut ipse suo foveat benignus auxilio, quos ditavit connubii sacramento.

[R2538bn] Pater sancte, mundi conditor universi, qui virum atque mulierem ad imaginem tuam creasti, eorumque societatem tua voluisti benedictione cumulari; te pro his famulis tuis humiliter deprecamur, qui hodie nuptiarum iunguntur sacramento. Super hanc sponsam N., Domine, eiusque vitae consortem N. benedictio tua copiosa descendat, et virtus Spiritus Sancti tui corda eorum desuper inflammet, ut, dum mutuo connubii dono fruuntur, (familiam ornent filiis), ditent(que)Ecclesiam. Laeti te laudent, Domine, te maesti requirant; te in laboribus sibi gaudeant adesse ut faveas, te sentiant in necessitatibus adstare ut lenias; te in coetu sancto precentur, tuos in mundo se testes ostendant; et, adepti prosperam senectutem cum hac qua circumdantur amicorum corona, ad caelestia regna perveniant.

[R2539am] Benedicam Dominum in omni tempore, semper laus eius in ore meo. Gustate et videte quoniam suavis est Dominus; beatus vir, qui sperat in eo (T.P. alleluia).

[R2540pc] Concede, quaesumus, omnipotens Deus, ut accepti virtus sacramenti in his famulis tuis sumat augmentum, et hostiae quam obtulimus a nobis omnibus percipiatur effectus.

[R2541bs] Dominus Iesus, qui in Cana adesse dignatus est nuptiis, vestris benedictionem suam largiatur vobis et propinquis. Ipse, qui Ecclesiam dilexit in finem, in corda vestra indesinenter effundat suum amorem. Det vobis Dominus ut, eius resurrectionis testantes fidem, exspectetis in gaudio beatam spem.

[R2542ai] Non vos me elegistis; sed ego elegi vos, et posui vos, ut eatis et fructum afferatis, et fructus vester maneat, dicit Dominus (T.P. alleluia).

[R2543ai] Super omnia caritatem habete, quod est vinculum perfectionis; et pax Christi exsultet in cordibus vestris (T.P. alleluia).

[R2544co] Concede, quaesumus, Domine, famulo tuo N., quem huius communitatis N. abbatem elegisti, ut factis et doctrina ad ea quae recta sunt fratrum suorum animos instruat, quatenus aeternae remunerationis mercedem a te, Pastore piissimo, una cum ipsis laetus percipiat.

[R2545so] Suscipe, quaesumus, Domine, munera famulorum tuorum et praesta, ut, seipsos in spiritalem hostiam offerentes, vera humilitate, oboedientia et pace iugiter repleantur.

[R2546pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro famulo tuo N., qui ad regimen huius congregationis eligere dignatus es, quaesumus, Domine, ut placatus accipias, et propitius in eo tua dona custodias, ut, quod gratia tua consecutus est, fratrum corda confirmet. Recordare, Domine, Ecclesiae tuae toto orbe diffusae, ut eam in caritate perficias una cum Papa nostro N. et Episcopo nostro N. Recordare quoque istius famuli tui quem hodie abbatem huius congregationis providere voluisti, et universi cleri.

[R2547pe] Ecclesiam tuam, peregrinantem in terra, in fide et caritate firmare digneris cum famulo tuo Papa nostro N. et Episcopo nostro N., cum episcopali Ordine et hoc famulo tuo N., qui hodie abbatem huius congregationis electus est et universo clero, et omni populo acquisitionis tuae.

[R2548pe] Nunc ergo, Domine, omnium recordare, pro quibus tibi hanc oblationem offerimus: in primis famuli tui, Papae nostri N., Episcopi nostri N., et Episcoporum Ordinis universi, et istius famuli tui N., quem hodie ad servitium huius congregationis eligere dignatus es, sed et totius cleri; recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2549am] Filius hominis non venit ministrari, sed ministrare, et dare animam suam redemptionem pro multis (T.P. alleluia).

[R2550am] Ubi caritas est vera, Deus ibi est. Congregavit nos in unum Christi amor (T.P. alleluia).

[R2551pc] Familiam tuam, Domine, respice propitius, et nos, qui mysterium fidei celebravimus, fac per semitas Evangelii indesinenter currere, in omnibus te glorificantes.

[R2552bs] Deus, ex quo omnis nominatur paternitas, det tibi virtute corroborari in interiorem hominem secundum divitias gloriae suae. Concedat tibi ut cum fratribus tuis viam mandatorum suorum, dilatato corde, in Christi gaudio percurras. Gratia divina, haec monastica familia, in nomine Domini congregata, tua moderatione ad caelestem conversationem perveniat.

[R2553bs] Deus Pater misericordiae custodiat vos in bona voluntate; et sicut disposuit me super vos constituere abbatem, ita nos omnes aeternae felicitatis faciat esse consortes. Concedat vobis Dominus Iesus Christus viam mandatorum suorum, dilatato corde, in fraterno gaudio percurrere. Det nobis omnibus Spiritus Sanctus opera pietatis et vitae unanimes implere, ut imitatores patrum nostrorum concordi simus animo.

[R2554ai] Non vos me elegistis; sed ego elegi vos, et posui vos, ut eatis et fructum afferatis, et fructus vester maneat, dicit Dominus (T.P. alleluia).

[R2555ai] Super omnia caritatem habete, quod est vinculum perfectionis; et pax Christi exsultet in cordibus vestris (T.P. alleluia).

[R2556co] Concede, quaesumus, Domine, famulae tuae N., quam huius communitatis N. abbatissam elegisti, ut factis et doctrina ad ea quae recta sunt sororum suarum animos instruat, quatenus aeternae remunerationis mercedem a te, Pastore piissimo, una cum ipsis laeta percipiat.

[R2557so] Suscipe, quaesumus, Domine, munera famulorum tuorum et praesta, ut, seipsos in spiritalem hostiam offerentes, vera humilitate, oboedientia et pace iugiter repleantur.

[R2558pe] Hanc igitur oblationem servitutis nostrae, sed et cunctae familiae tuae, quam tibi offerimus etiam pro famula tua N., quae ad regimen huius congregationis eligere dignatus es, quaesumus, Domine, ut placatus accipias, et propitius in ea tua dona custodias, ut, quod gratia tua consecuta est, sororum corda confirmet.

[R2559pe] Recordare quoque istius famulae tuae quam hodie abbatissam huius congregationis providere voluisti.

[R2560pe] Confortare quoque, Domine, in servitio sororum eius hanc famulam tuam, quam hodie abbatissam huius congregationis providere voluisti.

[R2561pe] et istius famulae tuae N., quam hodie ad servitium huius congregationis eligere dignatus es, recordare quoque offerentium, et circumstantium, et cuncti populi tui, et omnium, qui te quaerunt corde sincero.

[R2562am] Filius hominis non venit ministrari, sed ministrare, et dare animam suam redemptionem pro multis (T.P. alleluia).

[R2563am] Ubi caritas est vera, Deus ibi est. Congregavit nos in unum Christi amor (T.P. alleluia).

[R2564pc] Familiam tuam, Domine, respice propitius, et nos, qui mysterium fidei celebravimus, fac per semitas Evangelii indesinenter currere, in omnibus te glorificantes.

[R2565bs] Deus, qui ad Ecclesiae bonum has famulas in Filii sui amore sociavit, det tibi spiritum pietatis ut familiam tibi commissam in quaerenda perfectione dirigas. Concedat tibi ut cum sororibus tuis viam mandatorum suorum, dilatato corde, in Christi gaudio percurras. Gratia divina haec monastica familia, in nomine Domini congregata, tua moderatione ad caelestem conversationem perveniat.

[R2566ai] Quaerite Dominum et confirmamini, quaerite faciem eius semper. Mementote mirabilium eius, quae fecit (T.P. alleluia).

[R2567co] Da, quaesumus, Domine, his famulabus tuis, quibus virginale infudisti propositum, inchoati operis consummatum effectum, et, ut perfectam tibi offerant plenitudinem, initia sua perducere mereantur ad finem.

[R2568so] Oblatis hostiis, quaesumus, Domine, his famulabus tuis perseverantiam suscepti propositi benignus accommoda, ut, apertis ianuis, summi Regis adventu, regnum caeleste cum laetitia mereantur intrare.

[R2569pe] Hanc igitur oblationem servitutis nostrae, sed et famularum tuarum, quam tibi in die earum consecrationis offerimus, quaesumus, Domine, placatus accipe et propitiatus sanctifica; ut quae, te largiente, arctius se hodie Filio tuo sociarunt, eidem in fine temporum gloriose advenienti iucundanter occurrant.

[R2570pe] Recordare quoque, Domine, istarum sororum, quas spiritali unctione hodie sacrasti; ut, caritatis et fidei accensis lampadibus, tibi et populo tuo constanter deserviant, Christi Sponsi exspectantes adventum.

[R2571pe] Confortare quoque, Domine, in sancto proposito digneris has famulas tuas, quae pia devotione Christum tuum student sectari, evangelicae vitae atque fraternae dilectionis testimonium praebentes.

[R2572pe] et istarum sororum, quas hodie divino cultui et hominum servitio perpetuo dicasti, et offerentium, et circumstantium...

[R2573am] Quemadmodum desiderat cervus ad fontes aquarum, ita desiderat anima mea ad te, Deus (T.P. alleluia).

[R2574pc] Repleti, Domine, muneribus sacris, supplices deprecamur, ut famularum tuarum N. et N. conversatio et humanae societatis profectui constanter faveat, et ad Ecclesiae incrementum indesinenter proficiat.

[R2575bs] Omnipotens Pater, beatae virginitatis propositum, quod pectoribus vestris infudit, sua protectione inviolatum custodiat. Dominus Iesus, qui sacrarum virginum corda sponsali sibi foedere iungit, mentes vestras divini seminis verbo fecundet. Spiritus Sanctus, qui supervenit in Virginem quique corda vestra hodie suo sacravit illapsu, ad Dei Ecclesiaeque servitium vos vehementer accendat.

[R2576bs] Deus, sancti consilii inspirator et effector, sua vos constanter tueatur gratia, ut fideli animo persolvatis vestrae vocationis munera. Ipse divinae vos faciat caritatis consortes et eiusdem testimonium et signum apud omnes gentes. Et vincula quibus Christo vos nexuit in terris, benignus perennet in caelis.

[R2577ai] Ecce venio, Domine, ut faciam voluntatem tuam. Deus meus, volui, et lex tua in praecordiis meis (T.P. alleluia).

[R2578co] Concede, quaesumus, Domine, his fratribus nostris, quibus Christum pressius sectandi propositum inspirasti, incepti itineris felicem exitum, ut perfectum devotionis munus tibi mereantur offerre.

[R2579so] Suscipe, Domine, quaesumus, oblationes et preces, quas tibi offerimus celebrantes professionis religiosae primordia, et praesta, ut famulorum tuorum primitiae, tua fovente gratia, in fructus uberrimos convertantur.

[R2580am] Qui fecerit voluntatem Dei, hic frater meus et soror mea et mater est, dicit Dominus (T.P. alleluia).

[R2581pc] Laetificent nos, Domine, sumpta mysteria et praesta, ut, eorum virtute, hi famuli tui inchoata religionis munera fideliter adimpleant et liberam tibi exhibeant servitutem.

[R2582ai] Laetatus sum in his quae dicta sunt mihi: in domum Domini ibimus. Stantes erant pedes nostri in atriis tuis, Ierusalem (T.P. alleluia).

[R2583co] Deus, qui in his famulis tuis baptismatis gratiam tanta voluisti frondere virtute, ut Filii tui vestigia pressius sequi contenderent, concede, ut ipsi, evangelicam perfectionem iugiter sectantes, Ecclesiae sanctitatem adaugeant eiusque apostolicum confirment vigorem.

[R2584so] Servorum tuorum, Domine, munera et vota benignus assume, et evangelica profitentes consilia tua caritate confirma.

[R2585vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, de radice Virginis flos illibatus egressus, mundos corde dixit beatos suaque conversatione docuit castitatis fastigium. Qui tuis semper beneplacitis optavit haerere, et, usque ad mortem pro nobis factus oboediens, hostiam se tibi voluit perfectae suavitatis offerre. Qui omnia propter te relinquentes in terris ad servitium tuae maiestatis dicavit impensius et caelorum confirmavit inventuros esse thesaurum. Et ideo, cum Angelorum atque Sanctorum turba, hymnum laudis tibi canimus, sine fine dicentes: Sanctus.

[R2586pe] Hanc igitur oblationem servitutis nostrae, sed et famulorum tuorum, quam tibi in die eorum professionis offerimus, quaesumus, Domine, placatus accipe et propitiatus sanctifica; ut qui, te largiente, hodie vitam suam tibi dicarunt, in Filii tui glorioso adventu aeternae Paschae gaudio mereantur admitti.

[R2587pe] Recordare quoque, Domine, istorum fratrum, qui hodie se tibi dicarunt perpetuo servitio, et concede, ut ad te semper corda mentesque erigant nomenque tuum glorificent.

[R2588pe] Confortare quoque in sancto proposito digneris hos famulos tuos, qui hodie sacris religionis vinculis perpetuo tibi se devinxerunt, et fac, ut in Ecclesia tua novam et aeternam vitam manifestent Christi redemptione comparatam.

[R2589pe] et istorum fratrum, qui professione perpetua hodie tibi arctius consecrantur, et offerentium, et circumstantium...

[R2590pe] Hanc igitur oblationem servitutis nostrae, sed et famularum tuarum, quam tibi in die earum professionis offerimus, quaesumus, Domine, placatus accipe et propitiatus sanctifica; ut quae, te largiente, arctius se hodie Filio tuo sociarunt, eidem in fine temporum gloriose advenienti iucundanter occurrant.

[R2591pe] Recordare quoque, Domine, istarum sororum, quae omnia propter te reliquerunt, ut te in omnibus invenirent et, sui oblitae, cunctorum prospicerent necessitatibus.

[R2592pe] Confortare quoque in sancto proposito digneris has famulas tuas, quae pia devotione Christum tuum student sectari, evangelicae vitae atque fraternae dilectionis testimonium praebentes.

[R2593pe] et istarum sororum, quae sacro religionis pignore hodie tibi perpetuo se consecrantur, et offerentium, et circumstantium...

[R2594am] Christo confixus sum cruci. Vivo autem, iam non ego: vivit vero in me Christus (T.P. alleluia).

[R2595pc] Divinis mysteriis veneranter assumptis, te, Domine, supplices deprecamur, ut hos famulos tuos, sacra tibi oblatione devinctos, et Sancti Spiritus igne succendas et Filio tuo perenni iungas consortio.

[R2596bs] Deus, bonarum inspirator voluntatum, vestra foveat consilia cordaque roboret, ut, quae promisistis, perseveranti servetis fide. Ipse concedat vobis, ut arctam viam, quam elegistis, in gaudio Christi percurratis, onera fratrum cum exsultatione portantes. Caritas Dei ex vobis familiam efficiat in nomine Domini congregatam, quae Christi amoris reddat imaginem.

[R2597ai] Introibo in domum tuam in holocaustis, reddam tibi vota mea, quae distinxerunt labia mea (T.P. alleluia).

[R2598co] Domine, sancte Pater, servorum tuorum N. et N. propositum confirma benignus, et fac ut baptismatis gratia, quam novis cupiunt nexibus roborari, plenum in eis sumat effectum, quo tuae maiestati debitum cultum retribuant, et Christi regnum apostolico dilatent ardore.

[R2599so] Oblationes famulorum tuorum, Domine, clementer assume, easque in sacramentum redemptionis converte, et, quos ad Filium tuum pressius imitandum paterna voluisti dispensatione vocare, Sancti Spiritus reple muneribus.

[R2600am] Gustate et videte quoniam suavis est Dominus; beatus vir, qui sperat in eo (T.P. alleluia).

[R2601pc] Laetificet nos, Domine, confirmati propositi hodierna sollemnitas ac divini sacramenti veneranda perceptio, et concede propitius, ut geminatum devotionis munus famulorum tuorum pectora in Ecclesiae hominumque servitium vehementi caritate compellat.

[R2602bs] Deus, sancti consilii inspirator et effector, sua vos constanter tueatur gratia, ut fideli animo persolvatis vestrae vocationis munera. Ipse divinae vos faciat caritatis consortes et eiusdem testimonium et signum apud omnes gentes. Et vincula, quibus Christo vos nexuit in terris, benignus perennet in caelis.

[R2603co] Deus, rerum ordinator hominumque rector, respice super hos filios tuos, qui oblationem sui cupiunt confirmare, et praesta, ut, in dies, Ecclesiae mysterio arctius coniungantur, et humanae familiae bono devoveantur impensius.

[R2604so] Populi tui, quaesumus, Domine, munera propitius intuere, quae hi fratres nostri castitatis, paupertatis, oboedientiae renovata augent oblatione, et temporalia dona in sacramentum aeternitatis converte, et offerentium mentes ad Filii tui conforma imaginem.

[R2605pc] Sumptis, Domine, caelestibus sacramentis, supplices te rogamus, ut hi famuli tui, qui, superna gratia tantum confisi, ardua renovarunt proposita, Christi virtute roborentur et Sancti Spiritus muniantur praesidio.

[R2606ai] Deus in loco sancto suo, Deus, qui inhabitare facit unanimes in domo: ipse dabit virtutem et fortitudinem plebi suae (T.P. alleluia).

[R2607ai] In domum Domini laetantes ibimus (T.P. alleluia).

[R2608co] Omnipotens sempiterne Deus, effunde super hunc locum gratiam tuam, et omnibus te invocantibus auxilii tui munus impende, ut hic verbi tui et sacramentorum virtus omnium fidelium corda confirmet.

[R2609so] Accepta tibi sint, Domine, munera laetantis Ecclesiae, ut populus tuus, in hanc domum sanctam conveniens, per haec mysteria salutem perpetuam consequatur.

[R2610vd] Vere dignum et iustum est,aequum et salutare, nos tibi, sancte Pater, semper et ubique gratias agere. Qui templum gloriae tuae universum mundum fecisti, ut nomen tuum ubique clarificaretur, sed et loca divinis apta mysteriis non renuis tibi sacrari. Hanc ergo orationis domum, humano exstructam labore, maiestati tuae exsultantes dicamus. Hic veri Templi adumbratur mysterium et caelestis Ierusalem praenotatur imago. Corpus enim Filii tui, ex alma Virgine nati, templum effecisti tibi sacratum, in quo inhabitaret plenitudo divinitatis. Ecclesiam autem sanctam constituisti civitatem, super fundamentum Apostolorum aedificatam, summo angulari lapide ipso Christo Iesu; sed electis construendam lapidibus, Spiritu vivificatis, coagmentatis caritate, ubi tu per infinita saecula omnia omnibus eris et Christi lumen fulgebit perenne. Per quem nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2611vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Quia in domo visibili quam nobis exstruere concessisti, ubi familiae in hoc loco ad te peregrinanti favere non desinis, mysterium tuae nobiscum communionis mire figuras et operaris: hic enim tibi templum illud quod nos sumus aedificas, et Ecclesiam per orbem diffusam in dominici compagem corporis facis augeri, in pacis visione complendam, caelesti civitate Ierusalem. Et ideo, cum multitudine ordinum beatorum, in templo gloriae tuae, te collaudamus, benedicimus et magnificamus, dicentes: Sanctus.

[R2612pe] Hanc igitur oblationem servitutis nostrae, sed et famulorum tuorum qui hanc ecclesiam (in honorem N.)fideli tibi obtulerunt animo vel indefesso aedificarunt labore, quaesumus, Domine, ut placatus accipias.

[R2613pe] Votis huius familiae, quae hanc tibi dicat ecclesiam, adesto propitius: sit ei domus salutis et aula caelestium sacramentorum; hic resonet evangelium pacis et sacra mysteria celebrentur, quibus fideles tui, verbo vitae ac divina gratia instructi, per temporalem civitatem peregrinantes ad aeternam Ierusalem pervenire mereantur, in qua omnes filios tuos ubique dispersos tibi, clemens Pater, miseratus coniungas.

[R2614am] Domus mea, domus orationis vocabitur, dicit Dominus: in ea omnis qui petit accipit; et qui quaerit invenit; et pulsanti aperietur (T.P. alleluia).

[R2615am] Sicut novellae olivarum, Ecclesiae filii sint in circuitu mensae Domini (T.P. alleluia).

[R2616pc] Multiplica, Domine, quaesumus, per haec sancta quae sumpsimus, veritatem tuam in mentibus nostris, ut te in templo sancto iugiter adoremus, et in conspectu tuo cum omnibus Sanctis gloriemur.

[R2617bs] Deus, Dominus caeli et terrae, qui vos hodie ad huius domus dedicationem adunavit, ipse vos caelesti benedictione faciat abundare. Concedatque vos fieri templum suum et habitaculum Spiritus Sancti, qui omnes filios dispersos voluit in Filio suo congregari. Quatenus feliciter emundati, habitatorem Deum in vobismetipsis possitis habere, et aeternae beatitudinis hereditatem cum omnibus Sanctis possidere.

[R2618ai] Protector noster, aspice, Deus, et respice in faciem Christi tui; quia melior est dies una in atriis tuis super milia (T.P. alleluia).

[R2619ai] Introibo ad altare Dei, ad Deum qui laetificat iuventutem meam (T.P. alleluia).

[R2620co] Deus, qui ad Filium tuum in ara crucis exaltatum omnia adtrahere voluisti, caelesti gratia perfunde Ecclesiam tuam hanc tibi dicantem altaris mensam, ad quam fideles tuos, in unum congregatos, provide nutries Spirituque effuso, in dies constitues plebem tibi sacratam.

[R2621so] Descendat, quaesumus, Domine Deus noster, Spiritus tuus Sanctus super hoc altare, qui et dona populi tui sanctificet, et sumentium corda dignanter emundet.

[R2622vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui verus sacerdos veraque effectus hostia, memoriale sacrificii, quod ipse in ara crucis tibi obtulit, nobis praecepit in perpetuum celebrare. Ideo populus tuus hoc erexit altare, quod tibi, Domine, exsultantes dicamus. Hic est vere locus excelsus, ubi Christi sacrificium in mysterio iugiter offertur, laus tibi perfecta tribuitur nostraque exseritur redemptio. Hic dominica mensa paratur, ad quam filii tui, Christi Corpore refecti, in unam et sanctam congregantur Ecclesiam. Hic fideles Spiritum tuum hauriunt de fluminibus a Christo, spiritali petra, manantibus, per quem et ipsi fiunt oblatio sancta, vivum altare. Unde et nos, Domine, cum Angelis et Sanctis universis tibi confitemur, in exsultatione dicentes: Sanctus.

[R2623am] Passer invenit sibi domum, et turtur nidum, ubi reponat pullos suos: altaria tua, Domine virtutum, rex meus et Deus meus. Beati qui habitant in domo tua, in saeculum saeculi laudabunt te (T.P. alleluia).

[R2624am] Sicut novellae olivarum, Ecclesiae filii sint in circuitu mensae Domini (T.P. alleluia).

[R2625pc] Da nobis, Domine, tuis semper altaribus inhaerere, ubi sacrificii sacramentum celebratur, ut, fide et caritate coniuncti, dum Christo reficimur, in Christum transformemur.

[R2626bs] Deus, qui vos exornat regali sacerdotio, tribuat ut, munus vestrum sancte perficientes, Christi sacrificium valeatis digne participare. Et qui ad unam mensam vos congregat unoque reficit pane, ex vobis faciat cor unum et animam unam. Ut eos, quibus Christum annuntiatis, ad Christum trahatis exemplo vestrae dilectionis.

[V2627ai] Deus notum fecit nobis sacramentum voluntatis suae instaurare omnia in Christo, quae in caelis et quae in terra sunt, in ipso.

[V2628co] Deus, qui regnum Christi ubique terrarum dilatari providentia mirabili disposuisti, et omnes homines salutaris effici redemptionis participes, praesta, quaesumus, ut Ecclesia tua universale sit salutis sacramentum, et cunctis hominibus reveletur exspectatio gentium et Salvator earum.

[V2629so] Plebis tibi sacratae respice munera, misericors Deus, et per huius sacramenti virtutem concede, ut credentium in te multitudo genus electum, regale sacerdotium, gens sancta, populus acquisitionis tibi iugiter efficiatur.

[V2630am] Spiritus et sponsa dicunt: Veni. Amen. Veni, Domine Iesu.

[V2631pc] Deus, qui tuis Ecclesiam iugiter pascis et roboras sacramentis, concede nobis mensa caelesti refectis, ut, caritatis tuae documentis obsequendo, fermentum vivificans et salutis instrumentum humano efficiamur consortio.

[V2632ai] Vidi turbam magnam, quam dimunerare nemo poterat, ex omnibus gentibus et tribubus et populis et linguis.

[V2633co] Deus, qui in Christi tui testamento ex omnibus gentibus populum tibi congregare non desinis, in Spiritu ad unitatem coalescentem, concede, ut Ecclesia tua, missioni sibi creditae fidelis, cum hominum familia iugiter incedat, et tamquam fermentum et veluti anima societatis humanae in Christo renovandae et in familiam Dei transformandae semper exsistat.

[V2634so] Munera quae tibi offerimus, Domine, suscipe benignus, et praesta, ut Ecclesia tua, de latere Christi in cruce dormientis exorta, ex huius participatione mysterii suam iugiter hauriat sanctitatem, qua semper vivat suoque digne respondeat auctori, Iesu Christo Domino nostro.

[V2635am] Unus militum lancea latus eius aperuit, et continuo exivit sanguis et aqua.

[V2636am] Benedictio et claritas et sapientia et gratiarum actio, honor et virtus et fortitudo Deo nostro in saecula saeculorum. Amen.

[V2637pc] Sacramento Filii tui recreati, te, Domine, deprecamur, ut Ecclesiae tuae operationem fecundes, qua salutaris mysterii plenitudinem pauperibus continuo revelas, quos ad tui regni praecipuam vocasti portionem.

[V2638ai] Ubi sunt duo vel tres congregati in nomine meo, ibi sum in medio eorum, dicit Dominus.

[V2639ai] Multi unum corpus sumus in Christo, singuli autem alter alterius membra.

[V2640co] Concede, quaesumus, omnipotens Deus, ut Ecclesia tua semper ea plebs sancta permaneat de unitate Patris et Filii et Spiritus Sancti adunata, quae tuae sanctitatis et unitatis sacramentum mundo manifestet, et ipsum ad perfectionem tuae conducat caritatis.

[V2641so] Immensae Filii tui caritatis memoriale celebrantes, te, Domine, suppliciter exoramus, ut eiusdem salutaris operis fructus, per Ecclesiae tuae ministerium, ad totius mundi proficiat salutem.

[V2642am] Unus panis, unum corpum multi sumus, omnes qui de uno pane et de uno calice participamus.

[V2643pc] Deus, qui mirabili sacramento Ecclesiae fortitudinem tribuis et solamen, da populo tuo per haec sancta Christo adhaerere, ut, temporalibus muneribus quae gerit, tuum in libertate regnum aedificet aeternum.

[V2644ai] Rogo, Pater, pro eis qui credituri sunt in me, ut ipsi in nobis unum sint, ut credat mundus quia tu me misisti.

[V2645co] Omnipotens sempiterne Deus, qui gloriam tuam omnibus in Christo gentibus revelasti, custodi opera misericordiae tuae, ut Ecclesia sancta, toto orbe diffusa, stabili fide in confessione tui nominis perseveret.

[V2646so] Deus, qui eodem sacrificio Ecclesiam tuam iugiter sanctificas, quo eam mundasti, da, ut, capiti suo Christo unita, cum eo se tibi offerat, et pura tibi voluntate concordet.

[V2647am] Qui manet in me et ego in eo, hic fert fructum multum, quia sine me nihil potestis facere, dicit Dominus.

[V2648pc] Refectione sancta enutritam, guberna, quaesumus, Domine, tuam placatus Ecclesiam, ut, potenti moderatione recta, et incrementa libertatis accipiat, et in religionis integritate persistat.

[V2649ai] Iesu Christo, qui dilexit nos, et lavit nos a peccatis nostris in sanguine suo, et fecit nos regnum et sacerdotes Deo et Patri suo: ipsi gloria et imperium in saecula saeculorum.

[V2650co] Deus, qui in singulis Ecclesiis per orbem peregrinis unam, sanctam, catholicam et apostolicam manifestas Ecclesiam, plebi tuae concede benignus ita pastori suo adunari atque per Evangelium et Eucharistiam congregari in Spiritu Sancto, ut universitatem populi tui digne valeat repraesentare, et signum fiat atque praesentiae Christi in mundo instrumentum. Qui tecum.

[V2651so] Immensae Filii tui caritatis memoriale celebrantes, te, Domine, suppliciter exoramus, ut eiusdem salutaris operis fructus, per Ecclesiae tuae ministerium, ad totius mundi proficiat salutem.

[V2652am] Ecce sto ad ostium et pulso, dicit Dominus; si quis audierit vocem meam et aperuerit mihi ianuam, intrabo ad illum, et cenabo cum illo, et ipse mecum.

[V2653pc] Vigeat in hac Ecclesia tua, Domine, et usque in finem perseveret fidei integritas, morum sanctitas, fraterna caritas et munda religio, et, quam Filii tui Corpore et verbo tuo pascere non desinis, eam quoque tuis non cesses gubernare praesidiis.

[V2654ai] Tu es Petrus, et super hanc petram aedificabo Ecclesiam meam, et portae inferi non praevalebunt adversus eam, et tibi dabo claves regni caelorum.

[V2655co] Deus, qui providentiae tuae consilio super beatum Petrum, ceteris Apostolis praepositum, Ecclesiam tuam aedificari voluisti, respice propitius ad Papam nostrum N., et concede, ut, quem Petri constituisti successorem, populo tuo visibile sit unitatis fidei et communionis principium et fundamentum.

[V2656co] Deus, omnium fidelium pastor et rector, famulum tuum N., quem pastorem Ecclesiae tuae praeesse voluisti, propitius respice; da ei, quaesumus, verbo et exemplo, quibus praeest proficere, ut ad vitam, una cum grege sibi credito, perveniat sempiternam.

[V2657co] Deus, qui in apostoli Petri successione famulum tuum N. elegisti totius gregis esse pastorem, supplicantem populum intuere propitius, et praesta, ut, qui Christi vices gerit in terris, fratres confirmet, et omnis Ecclesia cum ipso communicet in vinculo unitatis, amoris et pacis, quatenus in te, animarum pastore, omnes veritatem et vitam assequantur aeternam.

[V2658so] Oblatis, quaesumus, Domine, placare muneribus, et Ecclesiam tuam sanctam, una cum Papa nostro N., quem ipsi constituisti pastorem, assidua protectione guberna.

[V2659am] Simon Ioannis, diligis me plus his? Domine, tu omnia nosti; tu scis, Domine, quia amo te.

[V2660pc] Mensae caelestis participes effecti, supplices te, Domine, deprecamur, ut, huius virtute mysterii, Ecclesiam tuam in unitate et caritate confirmes, et famulum tuum N., cui pastorale munus tradidisti, una cum commisso sibi grege salves semper et munias.

[V2661ai] Visitabo oves meas, dicit Dominus, et suscitabo pastorem qui pascat eas; ego autem Dominus ero eis in Deum.

[V2662co] Deus, pastor aeterne fidelium, qui Ecclesiae tuae multiplici dispensatione praees et amore dominaris, da, quaesumus, famulo tuo N., quem plebi tuae praefecisti, ut gregi, cuius est pastor, Christi vice praesideat, et fidelis sit doctrinae magister, sacri cultus sacerdos et gubernationis minister.

[V2663co] Deus, omnium fidelium pastor et rector, famulum tuum N., quem pastorem Ecclesiae N. praeesse voluisti, propitius respice; da ei, quaesumus, verbo et exemplo, quibus praeest proficere, ut ad vitam, una cum grege sibi credito, perveniat sempiternam.

[V2664co] Da, quaesumus, Domine, famulo tuo N., quem pascendo gregi tuo in Apostolorum successione praefecisti, spiritum consilii et fortitudinis, spiritum scientiae et pietatis, ut, populum sibi creditum fideliter gubernans, Ecclesiae aedificet in mundo sacramentum.

[V2665so] Haec oblatio, Domine, pro famulo tuo N. delata sit tibi munus acceptum, et, quem sacerdotem magnum in tuo populo suscitasti, apostolicarum virtutum muneribus, ad gregis profectum, exorna.

[V2666am] Filius hominis non venit ministrari, sed ministrare, et dare animam suam redemptionem pro multis.

[V2667pc] Huius, Domine, virtute mysterii, in famulo tuo N. episcopo nostro gratiae tuae dona multiplica, ut et tibi digne persolvat pastorale ministerium, et fidelis dispensationis aeterna praemia consequatur.

[V2668ai] Suscitabo mihi sacerdotem fidelem, qui iuxta cor meum et animam meam faciet; et aedificabo ei domum fidelem, et ambulabit coram me cunctis diebus.

[V2669co] Deus, qui, pastor aeternus, gregem tuum assidua custodia gubernas, eum immensa tua pietate concedas Ecclesiae pastorem, qui tibi sanctitate placeat, et vigili nobis sollicitudine prosit.

[V2670so] Tuae nobis, Domine, abundantia pietatis indulgeat, ut, per sacra munera quae tibi reverenter offerimus, gratum maiestati tuae pastorem Ecclesiae sanctae praeesse gaudeamus.

[V2671am] Ego elegi vos et posui vos, ut fructum afferatis, et fructus vester maneat, dicit Dominus.

[V2672pc] Refectos, Domine, Corporis et Sanguinis Unigeniti tui saluberrimo sacramento, nos mirifica tuae maiestatis gratia de illius pastoris concessione laetificet, qui et plebem tuam virtutibus instruat, et fidelium mentes evangelica veritate perfundat.

[V2673ai] Super omnia caritatem habete, quod est vinculum perfectionis: et pax Christi exsultet in cordibus vestris.

[V2674co] Ecclesiae tuae, Domine, rector et custos, infunde, quaesumus, famulis tuis spiritum intellegentiae, veritatis et pacis, ut, quae tibi placita sunt, toto corde cognoscant et, agnita, tota virtute sectentur.

[V2675co] Deus, qui populis tuis indulgentia consulis et amore dominaris, da spiritum sapientiae quibus dedisti regimen disciplinae, ut plebs tua ad veritatis agnitionem pleniorem et sanctitatis tibi acceptum ducatur augmentum.

[V2676so] Respice, clementissime Deus, munera servorum tuorum, et gratiam tui luminis illis impende, ut quae recta sunt in oculis tuis veraciter intellegant, et fiducialiter exsequantur.

[V2677am] Ubi caritas et amor, Deus ibi est. Congregavit nos in unum Christi amor.

[V2678pc] Da, quaesumus, misericors Deus, ut sancta quae sumpsimus famulos tuos in veritate confirment, et honorem tui nominis illos faciant exquirere.

[V2679ai] Spiritus Domini super me, propter quod unxit me, evangelizare pauperibus misit me, sanare contritos corde, dimittere confractos in remissionem.

[V2680co] Deus, qui Unigenitum tuum summum aeternumque constituisti sacerdotem, praesta, ut, quos ministros tuorumque mysteriorum dispensatores elegit, in accepto ministerio adimplendo fideles inveniantur.

[V2681co] Domine Deus noster, qui in regendo populo tuo ministerio uteris sacerdotum, tribue illis perseverantem in tua voluntate famulatum, ut ministerio atque vita tuam valeant in Christo gloriam procurare. Qui tecum.

[V2682so] Deus, qui sacerdotes tuos sacris altaribus tuoque populo ministrare voluisti, per huius sacrificii virtutem concede propitius, ut eorum servitium tibi iugiter placeat, et fructum qui semper manet in Ecclesia tua valeat afferre.

[V2683am] Pater sancte, sanctifica eos in veritate: sermo tuus veritas est. Sicut tu me misisti in mundum, et ego misi eos in mundum, dicit Dominus.

[V2684pc] Sacerdotes tuos, Domine, et omnes famulos tuos vivificet divina, quam obtulimus et sumpsimus, hostia, ut, perpetua tibi caritate coniuncti, digne famulari tuae mereantur maiestati.

[V2685ai] Ecclesiae factus sum ego minister, secundum dispensationem Dei quae data est mihi in vos: Christum nos annuntiamus, ut exhibeamus omnem hominem perfectum in Christo Iesu.

[V2686co] Deus, qui non propriis suffragantibus meritis, sed sola ineffabilis gratiae tuae largitate, me familiae tuae praeesse voluisti, tribue me tibi digne persolvere ministerium sacerdotalis officii, plebemque commissam, te in omnibus gubernante, dirigere concede.

[V2687so] Deus, dierum temporumque potens et benigne moderator, collatis in me per gratiam tuam propitiare muneribus, et, praesentis oblationis virtute, in hunc affectum dirige cor plebis et sacerdotis, ut nec pastori oboedientia gregis, nec gregi desit cura pastoris.

[V2688am] Sicut dilexit me Pater, et ego dilexi vos; manete in dilectione mea, dicit Dominus.

[V2689pc] Omnipotens sempiterne Deus, origo cunctarum perfectioque virtutum, da mihi, quaesumus, huius participatione mysterii, et exercere quae recta sunt et praedicare quae vera, ut instructionem gratiae tuae fidelibus et agendo praebeam et docendo.

[V2690ai] Dixi Domino: Dominus meus es tu, bonum mihi non est sine te. Dominus pars hereditatis meae et calicis mei: tu es qui detines sortem meam.

[V2691co] Aures tuae pietatis, clementissime Deus, inclina precibus meis, et gratia Sancti Spiritus illumina cor meum, ut tuis mysteriis digne ministrare, Ecclesiae tuae fideliter servire, teque merear aeterna caritate diligere.

[V2692so] Suscipe, Deus omnipotens, haec munera, quae tibi offerimus veneranter, et respiciens Christum tuum, sacerdotem simul et hostiam, da, ut, eius sacerdotii particeps effectus, oblationem spiritalem me tibi semper exhibeam placentem.

[V2693am] Dixit Iesus illis qui permanserunt in tentationibus suis: Ego dispono vobis regnum, ut edatis et bibatis super mensam meam.

[V2694pc] Pane caelesti confirmatum et novi testamenti calice congaudentem, fac me, Pater sancte, tibi servire fideliter, et in salutem hominum vitam fortiter devoteque consumere.

[V2695ai] Nos vos me elegistis, dicit Dominus; sed ego elegi vos, et posui vos ut eatis et fructum afferatis, et fructus vester maneat.

[V2696co] Pater sancte, qui me ad communionem cum aeterno Christi tui sacerdotio et ad Ecclesiae tuae ministerium nullis meis meritis elegisti, praesta, ut Evangelii strenuus ac mitis praedicator exsistam, et mysteriorum tuorum fidelis dispensator inveniar.

[V2697so] Pro nostrae servitutis augmento sacrificium tibi, Domine, laudis offerimus, ut, quod immeritis contulisti, propitius exsequaris.

[V2698am] Calix benedictionis cui benedicimus, communicatio Sanguinis Christi est; et panis quem frangimus, participatio Corporis Domini est.

[V2699pc] Ad gloriam, Domine, tui nominis annua festa repetens sacerdotalis exordii, mysterium fidei laetanter celebravi, ut in veritate hoc sim, quod in sacrificio mystice tractavi.

[V2700ai] Divisiones gratiarum sunt, idem autem Spiritus; et divisiones ministrationum, idem autem Dominus; et divisiones operationum, idem vero Deus, qui operatur omnia in omnibus.

[V2701co] Deus, qui ministros Ecclesiae tuae docuisti non ministrari velle, sed fratribus ministrare, illis, quaesumus, concede et in actione sollertiam, et cum mansuetudine ministerii in oratione constantiam.

[V2702so] Pater sancte, cuius Filius discipulorum voluit lavare pedes, ut nobis praeberet exemplum, suscipe, quaesumus, nostrae munera servitutis, et praesta, ut, nosmetipsos in spiritalem hostiam offerentes, spiritu humilitatis et diligentiae repleamur.

[V2703am] Beati servi illi, quos cum venerit Dominus, invenerit vigilantes. Amen dico vobis, quod praecinget se, et faciet illos discumbere, et transiens ministrabit illis.

[V2704pc] Concede famulis tuis, Domine, caelesti cibo potuque repletis, ut, ad gloriam tuam et salutem credentium procurandam, fideles inveniantur Evangelii, sacramentorum caritatisque ministri.

[V2705ai] Rogate Dominum messis, ut mittat operarios in messem suam, dicit Iesus discipulis suis.

[V2706co] Deus, qui pastores populo tuo providere voluisti, effunde in Ecclesia tua spiritum pietatis et fortitudinis, qui dignos altaribus tuis excitet ministros, et Evangelii tui strenuos ac mites assertores efficiat.

[V2707so] Plebis tuae, quaesumus, Domine, preces et munera benignus intende, ut dispensatores mysteriorum tuorum multiplicentur, et in amore tuo iugiter perseverent.

[V2708am] In hoc cognovimus caritatem Dei: quoniam ille animam suam pro nobis posuit, et nos debemus pro fratribus animas ponere.

[V2709pc] Pane mensae caelestis refecti, te, Domine, deprecamur, ut, per hoc sacramentum caritatis, illa semina maturescant, quae magna in agrum Ecclesiae tuae largitate dispergis, quatenus multi sorte sibi eligant tibi in fratribus ministrare.

[V2710ai] Simile est regnum caelorum fermento, quod acceptum mulier abscondit in farinae satis tribus, donec fermentatum est totum.

[V2711co] Deus, qui Evangelii virtutem veluti fermentum in mundum misisti, concede fidelibus tuis, quos in medio mundi negotiorumque saecularium vitam agere vocasti, ut, spiritu christiano ferventes, per temporalia quae gerunt munera, regnum tuum iugiter instaurent.

[V2712so] Deus, qui Filii tui sacrificio cunctum voluisti mundum salvare, per huius oblationis virtutem concede, ut famuli tui, quos etiam in statu laicali ad apostolatum vocare non desinis, et mundum spiritu imbuant Christi, et eius sint sanctificationis fermentum.

[V2713am] Iubilate Domino, omnis terra, servite Domino in laetitia; introite in cospectu eius in exsultatione, alleluia.

[V2714am] In hoc clarificatus est Pater meus, ut fructum plurimum afferatis et efficiamini mei discipuli, dicit Dominus.

[V2715pc] De plenitudine gratiae tuae sumentes, quaesumus, Domine, ut, eucharistici convivii fortitudine roborati, fideles tui, quos rebus saecularibus deditos esse voluisti, strenui sint evangelicae testes veritatis, et Ecclesiam tuam in rebus temporalibus praesentem iugiter reddant et actuosam.

[V2716co] Deus, creator omnium, qui virum et feminam in principio condidisti, ut vinculum constituerent coniugale, unionem famulorum tuorum N. et N. benedic et confirma, ut coniunctionis Christi cum Ecclesia imaginem semper perfectiorem exhibeant.

[V2717so] Deus, qui ex latere Christi sanguinem et aquam manare fecisti ad humanae regenerationis significanda mysteria, munera nostra in gratiarum actionem pro famulis tuis N. et N. dignare suscipere, et eorum coniugium tuis donis omnibus munerari.

[V2718pc] Superno cibo potuque refectis, Domine, his famulis tuis in gaudio et caritate corda dilata, ut sit eorum domus sedes honestatis et pacis, et omnibus ad consolationes pateat caritatis.

[V2719co] Domine, qui hos famulos tuos N. et N. indissolubili matrimonii nexu coniunxisti, et animorum communione dignatus es inter labores et gaudia sustentare, eorum, quaesumus, auge et purifica caritatem, ut mutua (cum prole sua)sanctificatione laetentur.

[V2720so] Haec munera, Deus, in gratiarum actionem pro famulis tuis N. et N. dignanter assume, ut exinde pacem et gaudium abundanter exhauriant.

[V2721pc] Deus, qui ad mensam familiae tuae hos coniuges N. et N. (cum liberis et amicis)propitius admisisti, da eis fortiter et alacriter in mutuam communionem sic progredi, ut usque ad caeleste convivium, tuo munere, coniungantur.

[V2722co] Deus Pater omnipotens, hos coniuges N. et N. clementer aspicias, (cum sobole sua, quam ad vitam fidemque genuerunt)pro bonis longaevae conversationis operibus, et eorum fructiferam benedic senectutem, sicut eorum caritatis primitias sacramento mirabili confirmasti.

[V2723so] Haec munera, Deus, in gratiarum actionem pro famulis tuis N. et N. dignanter assume, qui tot annos una simul fide sincera vixerunt, et omnia bona unitatis et pacis a tua postulant largitate.

[V2724pc] Mensae tuae pasti deliciis, te, Domine, deprecamur, ut hos coniuges N. et N. in sancta senectute custodias, donec ambos, plenos dierum, ad tuum admittas caeleste convivium.

[V2725ai] Honora patrem tuum et matrem tuam, quod est mandatum primum in promissione, ut bene sit tibi et sis longaevus super terram.

[V2726co] Deus, cuius in ordinatione societas familiaris firmum suum habet fundamentum, respice famulorum tuorum preces miseratus, et praesta, ut, exemplo sanctae Familiae Unigeniti tui domesticis virtutibus caritatisque obsequio sectantes, in laetitia domus tuae praemiis fruamur aeternis.

[V2727so] Hostiam tibi placationis offerimus, Domine, suppliciter deprecantes, ut familias nostras in tua gratia firmiter et pace constituas.

[V2728am] Numquid oblivisci potest mulier infantem suum? Et si illa oblita fuerit, ego tamen non obliscar tui, dicit Dominus.

[V2729pc] Quos caelestibus reficis sacramentis, fac, clementissime Pater, sanctae Familiae Unigeniti tui exempla iugiter imitari, ut, post aerumnas saeculi, eius consortium consequantur aeternum.

[V2730ai] Spera in Domino et fac bonitatem, et inhabitabis terram et pasceris in fide. Delectare in Domino, et dabit tibi petitiones cordis tui.

[V2731co] Deus, omnis boni propositi inspirator atque perfector, dirige famulos tuos in viam salutis aeternae, et, quos, relictis omnibus, tibi se totos devoverunt, fac, ut Christum sequentes et ea quae sunt saeculi abnegantes, in spiritu paupertatis et cordis humilitate tibi et fratribus suis fideliter ministrent.

[V2732so] Sanctifica, quaesumus, Domine, per haec sancta quae tibi offerimus, famulos tuos, quos in nomine tuo congregasti, ut, fideliter vota sua tibi reddentes, maiestati tuae sincero corde deserviant.

[V2733am] Angelus Domini dixit Eliae: Surge, comede; grandis enim tibi restat via.

[V2734pc] Servos tuos, Domine, in amore tuo congregatos et de uno pane participantes, da unanimes considerare invicem in provocationem caritatis et bonorum operum, ut eorum sancta conversatione Christi testes veri ubique exhibeantur.

[V2735ai] Ecce venio, Domine, ut faciam voluntatem tuam. Volui legem tuam in medio cordis mei.

[V2736co] Domine Deus fidelis, da nobis, quaesumus, gratias tibi referre pro tua erga fratrem nostrum (sororem nostram)N. benignitate, qui acceptum a te donum hodie renovare contendit; robora in eo (ea)spiritum perfectae caritatis ut gloriae tuae et operi salutis in dies valeat ferventius inservire.

[V2737so] Suscipe, Domine, una cum muneribus oblationem sui quam hodie frater noster (soror nostra)N. confirmare desiderat, et per virtutem Sancti Spiritus imagini dilecti Filii tui amplius eum (eam)conformare digneris.

[V2738am] Quemadmodum desiderat cervus ad fontes aquarum, ita desiderat anima mea ad te, Deus.

[V2739pc] Sumpsimus, Domine, Corpus et Sanguinem Filii tui, quae in iucunda celebratione huius anniversarii contulisti; concede, quaesumus, ut frater noster (soror nostra)N., caelesti pane potuque refectus (refecta), incepti itineris ad te ducentis felicem progressum obtineat.

[V2740ai] Si vis perfectus esse, vade, vende quae habes et da pauperibus, et veni, sequere me, dicit Dominus.

[V2741co] Pater sancte, qui, licet fideles omnes ad perfectionem caritatis invitas, multos tamen excitare non desinis, ad Filii tui vestigia pressius sequenda, concede, ut, quos tibi in sortem peculiarem elegeris, conversatione sua valeant regni tui signum ostendere Ecclesiae mundoque perspicuum.

[V2742co] Familiam tuam, quaesumus, Domine, propitius respice et nova prole semper amplifica, ut et filios suos ad propositam caritatis perfectionem adducere, et ad hominum salutem efficaciter valeat laborare.

[V2743so] Munera quae tibi offerimus, Pater sancte, suscipe miseratus, et omnibus, qui Filium tuum per arctam viam imitari laeta sibi mente proponunt, communionem concede fraternam et spiritalem libertatem.

[V2744am] Amen dico vobis, quod vos qui reliquistis omnia, et secuti estis me, centuplum accipietis et vitam aeternam possidebitis, dicit Dominus.

[V2745pc] Famulos tuos, Domine, spiritali cibo potuque confirma, ut, evangelicae semper vocationi fideles, vivam ubique Filii tui imaginem repraesentent. Qui vivit et regnat in saecula saeculorum.

[V2746pc] Huius, Domine, virtute sacramenti, da nobis, quaesumus, perseverantem in tua voluntate famulatum, ut tuam caritatem mundo testari et bona quae sola non amittuntur valeamus fortiter inquirere.

[V2747ai] Multitudinis credentium erat cor unum et anima una. Et virtute magna reddebant Apostoli testimonium resurrectionis Iesu Christi Domini nostri; et gratia magna erat in omnibus illis, alleluia.

[V2748co] Deus, summa unitas et vera caritas, da fidelibus tuis cor unum et animam unam, ut Ecclesiae tuae corpus concordia vigeat, et, quae veritatis confessione nititur, stabili unitate firmetur.

[V2749co] Deus, qui Ecclesiam tuam in dilectionem tuae divinitatis et proximi cuncta servare caelestia mandata docuisti, da nobis spiritum pacis et gratiae, ut universa familia tua et toto tibi sit corde devota, et pura sibi voluntate concordet.

[V2750so] Deus, qui nos ad imaginem tuam sacramentis renovas et praeceptis, gressus nostros in semitis tuis perfice miseratus, ut caritatis donum, quod a nobis sperari fecisti, per haec quae offerimus sacrificia tribuas apprehendi.

[V2751am] Rogo, Pater, pro eis qui credituri sunt in me, ut ipsi in nobis unum sint, ut credat mundus quia tu me misisti, dicit Dominus.

[V2752pc] Sumpsimus, Domine, sacramentum unitatis; praesta nobis, quaesumus, sancta unanimitate in domo tua viventibus, pacem habere quam tradimus, pacem servare quam sumimus.

[V2753ai] Salus populi ego sum, dicit Dominus. De quacumque tribulatione clamaverint ad me, exaudiam eos, et ero illorum Dominus in perpetuum.

[V2754co] Deus clementiae et reconciliationis, qui praecipuos dies salutis hominibus praebes ad te omnium creatorem et patrem agnoscendum, (per hoc acceptabile tempus)propitius nos adiuva, ut, libenter verbum pacis a te accipientes, omnia in Christo instaurandi tuae deserviamus voluntati.

[V2755co] Deus, verae libertatis auctor, qui omnes homines unum vis efformare populum a servitute solutum, (quique gratiae et benedictionis tempus nobis praebes,)concede, quaesumus, ut, incrementa libertatis accipiens, universale salutis sacramentum in mundum Ecclesia tua vividius appareat atque in homines caritatis manifestet et operetur mysterium.

[V2756so] Memorare, Domine, Filium tuum, qui est pax et reconciliatio nostra, mundi peccatum suo sanguine delevisse, et munera Ecclesiae tuae propitiatus aspiciens, da, ut, (gratiam huius temporis cum laetitia celebrantes,)libertatem Christi ad omnes possimus extendere.

[V2757am] Venite ad me, omnes qui laboratis et onerati estis, et ego reficiam vos, dicit Dominus.

[V2758am] Petite et accipietis, ut gaudium vestrum sit plenum, dicit Dominus.

[V2759pc] Sacramentum Filii tui, quod sumpsimus, quaesumus, Domine, vires nostras adaugeat, ut, ex hoc unitatis mysterio, validum hauriamus amorem et ubique tuae pacis operatores efficiamur.

[V2760ai] Ego sum pastor bonus, et cognosco oves meas, et cognoscunt me meae, dicit Dominus. Sicut novit me Pater, et ego agnosco Patrem; et animam meam pono pro ovibus meis.

[V2761co] Omnipotens sempiterne Deus, qui dispersa congregas et congregata conservas, ad gregem Filii tui placatus intende, ut, quos unum sacravit baptisma, eos et fidei iungat integritas, et vinculum societ caritatis.

[V2762co] Supplices te rogamus, amator hominum, Domine: pleniorem Spiritus tui gratiam super nos effunde benignus, et praesta, ut, digne qua nos vocasti vocatione ambulantes, testimonium veritatis exhibeamus hominibus, et omnium credentium unitatem in vinculo pacis fidentes inquiramus.

[V2763so] Qui una semel hostia, Domine, adoptionis tibi populum acquisisti, unitatis et pacis in Ecclesia tua propitius nobis dona concedas.

[V2764vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Per ipsum enim nos adduxisti ad agnitionem tuae veritatis, ut unius fidei et baptismi vinculo Corpus eius efficeremur; per ipsum in cunctis gentibus largitus es Spiritum Sanctum tuum, qui, in diversitate donorum mirabilis operator et unitatis effector, filios adoptionis inhabitat totamque replet et regit Ecclesiam. Et ideo, choris angelicis sociati, te laudamus in gaudio confitentes: Sanctus.

[V2765am] Unus panis, et unum corpus multi sumus, omnes qui de uno pane et de uno calice participamus.

[V2766pc] Haec tua, Domine, sumpta sacra communio, sicut fidelium in te unionem praesignat, sic in Ecclesia tua unitatis operetur effectum.

[V2767ai] Salvos nos fac, Domine Deus noster, et congrega nos de nationibus, ut confiteamur nomini sancto tuo, et gloriemur in laude tua.

[V2768co] Deus, qui diversitatem gentium in confessione tui nominis adunasti, da nobis et velle et posse quae praecipis, ut populo ad regnum tuum vocato una sit fides mentium et pietas actionum.

[V2769co] Preces populi tui, quaesumus, Domine, placatus intende, et praesta, ut fidelium corda in tua laude et communi paenitentia iungantur, quatenus, christianorum divisione sublata, in perfecta Ecclesiae communione ad aeternum tuum regnum properemus laetantes.

[V2770so] Salutis nostrae memoriale celebrantes, clementiam tuam, Domine, suppliciter exoramus, ut hoc sacramentum pietatis fiat nobis signum unitatis et vinculum caritatis.

[V2771am] Super omnia caritatem habete, quod est vinculum perfectionis; et pax Christi exsultet in cordibus vestris, in qua et vocati estis in uno corpore.

[V2772pc] Spiritum nobis, Domine, tuae caritatis infunde, ut, huius sacrificii virtute, una facias in te credentes pietate concordes.

[V2773ai] Unum corpus et unus spiritus, sicut vocati estis in una spe vocationis vestrae; unus Dominus, una fides, unum baptisma; unus Deus et Pater omnium, qui est super omnes et per omnia et in omnibus nobis.

[V2774co] Populum tuum, quaesumus, Domine, propitius respice, et Spiritus tui super ipsum dona clementer effunde, ut in veritatis iugiter amore succrescat, et perfectam christianorum unitatem studio perquirat et opere.

[V2775co] Ubertatem misericordiarum tuarum, Domine, revela super nos et, in virtute Spiritus tui, christianorum divisiones remove, ut Ecclesia tua signum inter nationes elevatum clarius appareat, et mundus, tuo Spiritu illustratus, in Christum credat quem misisti. Qui tecum.

[V2776so] Quam tibi, Domine, offerimus hostia et purificationem conferat, et omnes uno baptismate coniunctos eorundem mysteriorum tandem participes efficiat.

[V2777am] Ut omnes unum sint, sicut tu, Pater, in me, et ego in te, ut et ipsi in nobis unum sint: ego in eis et tu in me, ut sint consummati in unum.

[V2778pc] Sacramenta Christi tui sumentes, quaesumus, Domine, ut in Ecclesia tua sanctificationis gratiam renoves quam dedisti, et omnes qui christiano gloriantur nomine in unitate fidei tibi servire mereantur.

[V2779ai] Deus misereatur nostri, et benedicat nobis, illuminet vultum suum super nos et misereatur nostri; ut cognoscamus in terra viam tuam, in omnibus gentibus salutare tuum.

[V2780co] Deus, qui omnes homines vis salvos fieri et ad agnitionem veritatis venire, respice messem tuam multam et operarios in eam mitte dignanter, ut omni creaturae Evangelium praedicetur, et plebs tua, verbo vitae congregata et sacramentorum virtute suffulta, in via salutis et caritatis procedat.

[V2781co] Deus, qui Filium tuum lumen verum in mundum misisti, effunde Spiritum promissionis, qui veritatis semina in cordibus hominum iugiter diffundat et fidei suscitet obsequium, ut omnes, per baptismum ad novam vitam generati, unum populum tuum ingredi mereantur.

[V2782so] Respice, Domine, in faciem Christi tui, qui pro omnibus redemptionem tradidit semetipsum, ut per eum ab ortu solis usque ad occasum nomen tuum magnificetur in gentibus, et una ubique maiestati tuae exhibeatur oblatio.

[V2783am] Docete omnes gentes servare quaecumque mandavi vobis, dicit Dominus. Ego vobiscum sum omnibus diebus, usque ad consummationem saeculi.

[V2784pc] Redemptionis nostrae munere vegetati, quaesumus, Domine, ut, hoc perpetuae salutis auxilio, fides semper vera proficiat.

[V2785ai] Annuntiate inter gentes gloriam Domini, in omnibus populis mirabilia eius: quoniam magnus Dominus et laudabilis nimis.

[V2786co] Deus, qui Ecclesiam tuam sacramentum salutis cunctis gentibus esse voluisti, ut Christi salutiferum opus usque in fines saeculorum perseveret, excita tuorum corda fidelium, et praesta, ut ad omnem creaturam salvandam urgentius vocari se sentiant, quatenus ex omnibus populis una familia unusque tibi populus exsurgat et crescat.

[V2787so] Munera supplicantis Ecclesiae, Domine, in conspectum maiestatis tuae ascendant accepta, cui pro totius mundi salute grata exstitit Filii tui passio gloriosa.

[V2788am] Laudate Dominum, omnes gentes, collaudate eum, omnes populi; quoniam confirmata est super nos misericordia eius, et veritas Domini manet in aeternum.

[V2789am] Euntes in mundum universum, praedicate Evangelium omni creaturae, dicit Dominus.

[V2790pc] Sanctificet nos, quaesumus, Domine, mensae tuae participatio, et praesta, ut, quam Unigenitus tuus in cruce operatus est salutem, omnes gentes per Ecclesiae tuae sacramentum gratanter accipiant.

[V2791ai] Respice, Domine, in testamentum tuum, et animas pauperum tuorum ne derelinquas in finem; exsurge, Domine, et iudica causam tuam, et ne obliviscaris voces quaerentium te.

[V2792ai] Petrus servabatur in carcere; oratio autem fiebat sine intermissione ab Ecclesia ad Deum pro eo.

[V2793co] Deus, qui inscrutabili providentia passionibus Filii tui vis Ecclesiam sociari, praesta fidelibus tuis, in tribulatione propter nomen tuum versantibus, spiritum patientiae et caritatis, ut promissionum tuarum fidi inveniantur testes atque veraces.

[V2794so] Suscipe, quaesumus, Domine, humilitatis nostrae preces et hostias, et praesta, ut, qui, tibi fideliter servientes, hominum persecutiones patiuntur, gaudeant se Christi Filii tui sacrificio sociari, et sua sentiant inter electorum nomina scripta esse in caelis.

[V2795am] Beati estis, cum maledixerint vobis et persecuti vos fuerint propter me, dicit Dominus; gaudete et exsultate, quoniam merces vestra copiosa est in caelis.

[V2796am] Omnis qui confitebitur me coram hominibus, confitebor et ego eum coram Patre meo, qui in caelis est, dicit Dominus.

[V2797pc] Per huius sacramenti virtutem famulos tuos, Domine, in veritate confirma, et fidelibus tuis in tribulatione positis concede, ut, crucem sibi post Filium tuum baiulantes, christiano nomine iugiter valeant inter adversa gloriari.

[V2798ai] Dicit Dominus: Ubi sunt duo vel tres congregati in nomine meo, ibi sum in medio eorum.

[V2799ai] Super omnia caritatem habete, quod est vinculum perfectionis; et pax Christi exsultet in cordibus vestris, in qua et vocati estis in uno corpore.

[V2800co] Infunde in nobis, quaesumus, Domine, spiritum intellegentiae, veritatis et pacis, ut quae tibi sunt placita toto corde noscamus, et, quae noverimus, unanimi voluntatum consensione sectemur.

[V2801co] Deus, cuius Filius omnibus in nomine suo congregatis promisit seipsum in medio eorum affuturum, praesta, quaesumus, ut illum praesentem nobiscum sentiamus, et abundare in cordibus nostris gratiam, misericordiam et pacem in veritate et caritate experiamur.

[V2802so] Respiciat, quaesumus, clementia tua, Domine, tuorum munera famulorum, ut, quae sunt in oculis tuis salutaria atque recta, et veraciter intellegant, et fiducialiter eloquantur.

[V2803am] Ubi caritas est vera, Deus ibi est. Congregavit nos in unum Christi amor.

[V2804pc] Da nobis, misericors Deus, ut sancta quae sumpsimus et nos in tua voluntate confirment, et testes ubique veritatis efficiant.

[V2805co] Deus, qui mirabili consilio universa disponis, suscipe benignus quas pro patria nostra tibi fundimus preces, ut sapientia moderatorum et honestate civium concordia et iustitia firmentur, atque fiat cum pace prosperitas perpetua.

[V2806co] Omnipotens sempiterne Deus, in cuius manu sunt hominum corda et iura populorum, respice benignus ad eos qui nos in potestate moderantur, ut ubique terrarum populorum prosperitas, pacis securitas et religionis libertas, te largiente, consistant.

[V2807co] Deus, qui miro ordine universa disponis et ineffabiliter gubernas, respice propitius in congregatos moderatores nationum, eisque spiritum tuae sapientiae clementer infunde, ut in communem salutem et pacem omnia disponant, atque a voluntate tua numquam discedant.

[V2808co] Deus, cui potestates humanae deserviunt, da famulo tuo (regi nostro)N. prosperum suae dignitatis effectum, in qua, te semper timens tibique placere contendens, populo sibi credito liberam ordinis tranquillitatem iugiter procuret et servet.

[V2809ai] Benedices coronae anni benignitatis tuae, et campi tui replebuntur ubertate.

[V2810ai] Ecce ego vobiscum sum omnibus diebus, dicit Dominus, usque ad consummationem saeculi, alleluia.

[V2811co] Deus, qui, sine initio et sine fine, totius es principium creaturae, da nobis ita hunc annum, cuius initia tibi dedicamus, transigere, ut et substantiis abundemus, et sanctitatis operibus fulgeamus.

[V2812so] Sacrificia quae tibi offerimus ita tuis oculis, Domine, sint accepta, ut omnes, qui initia huius anni cum laetitia celebramus, reliquum excursum eius in tua mereamur transigere caritate.

[V2813am] Iesus Christus heri et hodie, ipse et in saecula.

[V2814pc] Adesto, Domine, populis, qui sacra mysteria contigerunt, ut in toto decursu huius anni nullis periculis affligantur, qui in tua semper protectione confidunt.

[V2815ai] In principio creavit Deus caelum et terram. Et creavit Deus hominem ad imaginem suam. Viditque Deus cuncta quae fecerat, et erant valde bona.

[V2816ai] Bonitas tua, Domine, sit super nos, et opus manuum nostrarum secunda nobis.

[V2817co] Rerum conditor Deus, qui hominem iussisti laboris officia sustinere, da, ut opus quod incipimus huius vitae prosit incrementis, et regno Christi dilatando tua benignitate proficiat.

[V2818co] Deus, qui humano labore immensum creationis opus iugiter perficis atque gubernas, exaudi preces populi supplicantis, et praesta, ut omnes homines digno potiantur labore, quo, suam condicionem honestantes, arctius coniuncti fratribus suis valeant inservire.

[V2819so] Deus, qui humanum genus praesentium munerum et alimento vegetas et renovas sacramento, tribue, quaesumus, ut eorum et corporibus nostris subsidium non desit et mentibus.

[V2820am] Omne quodcumque facitis in verbo aut in opere, omnia in nomine Domini Iesu Christi, gratias agentes Deo et Patri per ipsum.

[V2821pc] Unitatis et caritatis mensae participes effecti, rogamus, Domine, clementiam tuam, ut, per opera quae nobis implenda commisisti, et vitam sustentemus terrenam, et regnum tuum aedificemus fidentes.

[V2822co] Deus, qui naturalium rerum virtutes hominum labori subdere voluisti, concede propitius, ut, operibus nostris christiano spiritu intenti, sinceram caritatem cum fratribus exercere, et creationi divinae perficiendae sociam operam praestare mereamur.

[V2823so] Suscipe, Domine, munera supplicantis Ecclesiae, et praesta, ut, per humanum quem tibi offerimus laborem, operi Christi redemptoris consociari mereamur.

[V2824pc] Guberna, quaesumus, Domine, temporalibus adiumentis quos dignaris aeternis recreare mysteriis.

[V2825ai] Bonitas tua, Domine, sit super nos, et opus manuum nostrarum secunda nobis.

[V2826co] Deus, quo iuvante, semina terrae mandamus, tua multiplicanda virtute, concede, ut, quae nostris scimus deesse laboribus, per te, qui das solus incrementum, suppleantur abunde.

[V2827so] Deus, qui verus es corporalium auctor fructuum et spiritalium summus agricola, da, quaesumus, laborum profectus nostrorum, ut fructus terrae abundanter capiamus, et, quae ab una providentia sumunt principium, ad tuam gloriam semper cooperentur.

[V2828am] Dominus dabit benignitatem, et terra nostra dabit fructum suum.

[V2829pc] Qui tuis nos, Domine, reficis sacramentis, manuum nostrarum adesto laboribus, ut, qui in te vivimus, movemur et sumus, terrae seminibus benedictione concessa de segetibus multiplicatis nutriamur.

[V2830co] Benedictionem tuam, Domine Deus, super populum tuum propitiatus infunde, quatenus, dante te benignitatem, terra nostra proferat fructus suos, quibus ad honorem sancti tui nominis grata semper mente fruamur.

[V2831so] Nostris, Domine, adesto muneribus, ut, qui de granis frumenti deferimus tibi panem in tui Corpus Filii transmutandum, semini terrae committendo per te concessa benedictione laetemur.

[V2832pc] Concede fidelibus tuis, omnipotens Deus, congruam terrae fructuum largitatem, quibus temporaliter enutriti, spiritalibus quoque proficiant incrementis, ut, quorum in hoc sacramento pignus acceperunt, bona consequantur aeterna.

[V2833ai] Terra dedit fructum suum: benedicat nos Deus, Deus noster.

[V2834co] Domine, Pater bone, qui terram homini providus tradidisti, concede, ut fructibus ex ea collectis vitam sustentare possimus, iisdemque ita semper utamur, ut laudi tuae et omnium utilitati, te opitulante, proficiant.

[V2835co] Gratias tibi referimus, Domine, pro fructibus, quos in salutem hominum terra produxit, quatenus, sicut illos summae tuae temperamentum providentiae comparavit, ita de terra cordis nostri germen iustitiae et fructus caritatis facias exoriri.

[V2836so] Sanctifica, Domine, munera, quae tibi de terra fructificante cum gratiarum actione deferimus, et, qui nobis terrenarum frugum tribuis ubertatem, fac mentes nostras caelesti fertilitate fecundas.

[V2837am] De fructu operum tuorum, Domine, satiabitur terra, ut educas panem de terra, et vinum laetificet cor hominis.

[V2838pc] Da, quaesumus, Domine, ut de perceptis terrae fructibus hoc salutari mysterio tibi gratias exhibentes, eodem operante in nobis, bona potiora consequi mereamur.

[V2839ai] Qui habuerit substantiam huius mundi, et viderit fratrem suum necessitatem habere et clauserit viscera sua ab eo, quomodo caritas Dei manet in eo?

[V2840co] Deus, qui unam dedisti cunctis gentibus originem, et unam ex eis in te voluisti familiam congregare, tuae caritatis ardore omnium corda perfunde et fratrum suorum desiderio iustae progressionis accende, ut, per bona quae cunctis affluenter largiris, humana singulorum perficiatur persona, et aequitas atque iustitia, quavis divisione sublata, in hominum societate firmentur.

[V2841so] Preces ad te clamantium, Domine, propitiatus exaudi, et, Ecclesiae tuae oblatione suscepta, praesta, ut omnes homines spiritu filiorum Dei repleantur, quatenus, inaequalitatibus in caritate superatis, una fiat in tua pace populorum familia.

[V2842am] De fructu operum tuorum, Domine, satiabitur terra, ut educas panem de terra, et vinum laetificet cor hominis.

[V2843am] Petite, et dabitur vobis; quaerite, et invenietis; pulsate, et aperietur vobis, dicit Dominus.

[V2844pc] Uno pane refecti, quo humanam familiam iugiter instauras, quaesumus, Domine, ut, ex unitatis participatione sacramenti, validum et purum hauriamus amorem ad progredientes populos iuvandos, et ad opus iustitiae, inspirante caritate, perficiendum.

[V2845ai] Da pacem, Domine, sustinentibus te, et exaudi orationes servorum tuorum, et dirige nos in viam iustitiae.

[V2846co] Deus, qui pacificos revelasti filios tuos esse vocandos, praesta, quaesumus, ut illam instauremus sine intermissione iustitiam, quae sola firmam pacem spondeat et veracem.

[V2847co] Deus, qui paternam curam omnium geris, concede propitius, ut homines, quibus unam originem dedisti, et unam in pace familiam constituant, et fraterno semper animo uniantur.

[V2848so] Filii tui, pacifici Regis, sacrificium salutare, his sacramentorum signis oblatum, quibus pax et unitas designantur, quaesumus, Domine, ad concordiam proficiat inter omnes filios tuos confirmandam.

[V2849am] Beati pacifici, quoniam filii Dei vocabuntur.

[V2850am] Pacem relinquo vobis, pacem meam do vobis, dicit Dominus.

[V2851pc] Largire nobis, quaesumus, Domine, spiritum caritatis, ut, Corpore et Sanguine Unigeniti tui vegetati, pacem inter omnes, quam ipse reliquit, efficaciter nutriamus.

[V2852co] Deus, conditor mundi, sub cuius arbitrio omnium saeculorum ordo decurrit, adesto propitius invocationibus nostris et tranquillitatem pacis praesentibus concede temporibus, ut in laudibus misericordiae tuae incessabili exsultatione laetemur.

[V2853co] Deus pacis, immo pax ipsa, quem discordans animus non capit, quem mens cruenta non recipit, praesta, ut, qui concordes sunt, boni perseverantiam teneant, qui discordes sunt, mali oblivione sanentur.

[V2854ai] Dicit Dominus: Ego cogito cogitationes pacis et non afflictionis; invocabitis me, et ego exaudiam vos, et reducam captivitatem vestram de cunctis locis.

[V2855ai] Circumdederunt me gemitus mortis, dolores inferni circumdederunt me; et in tribulatione mea invocavi Dominum, et exaudivit de templo sancto suo vocem meam.

[V2856co] Deus misericors et fortis, qui bella conteris deprimisque superbos, immanitates a nobis et lacrimas dignare festinanter arcere, ut omnes in veritate tui nominari filii mereamur.

[V2857co] Deus, auctor pacis et amator, quem nosse vivere, cui servire regnare est, protege ab omnibus impugnationibus supplices tuos, ut, qui in defensione tua confidimus, nullius hostilitatis arma timeamus.

[V2858so] Memorare, Domine, Filium tuum, qui est ipse pax, odia nostra suo Sanguine peremisse, et, mala nostra propitiatus aspiciens, da, ut hominibus quos diligis pacem haec hostia cum tranquillitate restituat.

[V2859am] Pacem relinquo vobis, pacem meam do vobis, dicit Dominus; non quomodo mundus dat, ego do vobis. Non turbetur cor vestrum neque formidet.

[V2860pc] Uno pane, qui cor hominis confirmat, suaviter satiatis, da nobis, Domine, et belli furores superare feliciter, et tuam amoris ac iustitiae legem firmiter custodire.

[V2861ai] Angelis suis Deus mandavit de te, ut custodiant te in omnibus viis tuis.

[V2862ai] Dicit Dominus: Ego cogito cogitationes pacis et non afflictionis; invocabitis me, et ego exaudiam vos, et reducam captivitatem vestram de cunctis locis.

[V2863co] Domine, cui nullus est alienus, nemo ab opitulatione longinquus, profugos et exsules, segregatos homines puerosque dispersos propitius intuere, ut illis reditus in patriam, nobis erga egenum et advenam a te benignitas tribuatur.

[V2864so] Domine, qui tuum voluisti Filium ponere animam suam, ut in unum tuos dispersos filios congregaret, praesta, ut haec pacifica oblatio communionem obtineat animorum, et caritatem fraternitatis adaugeat.

[V2865am] Refugium meum et fortitudo mea, Deus meus, sperabo in eum.

[V2866pc] Domine, qui nos uno pane et uno calice refecisti, da nobis humanitatem in advenas ac derelictos sincero corde sectari, ut omnes in terra viventium congregari denique mereamur.

[V2867ai] Respice, Domine, in testamentum tuum, et animas pauperum tuorum ne obliviscaris in finem.

[V2868co] Deus, qui bonus et omnipotens omnibus provides creaturis, efficacem da nobis dilectionem erga fratres ciborum inopiam patientes, ut, fame depulsa, libero ac securo corde tibi valeant deservire.

[V2869so] Respice, Domine, oblationem, quam tibi de tuis datis optimis exhibemus, ut, quae divinae abundantiam vitae et unitatem in caritate significat, ad aequam nos partitionem mutuumque impellat fraternitatis officium.

[V2870am] Venite ad me, omnes qui laboratis et onerati estis, et ego reficiam vos, dicit Dominus.

[V2871pc] Deus, Pater omnipotens, supplices te rogamus, ut panis vivus, qui de caelo descendit, ad fratres inopes nos roboret sublevandos.

[V2872co] Deus, qui mortem non fecisti, et escam praebes omni carni, tuorum famem famulorum miseratus expelle, ut laetius corda nostra et expeditius tibi valeant deservire.

[V2873so] Tibi, Domine, de nostra egestate haec munera libenter offerimus, a tua benignitate suppliciter exorantes, ut tuae sint nobis largitionis primitiae salutaris.

[V2874pc] Qui cibum caelestem, Domine, a tua largitate suscepimus, quaesumus, ut spem nobis et robur sic conferat ad laborem, ut efficaciter nostris fratrumque necessitatibus subvenire possimus.

[V2875co] Deus, qui fundasti terram super stabilitatem suam, parce metuentibus, propitiare supplicibus, ut, trementis terrae periculis penitus amotis, clementiam tuam iugiter sentiamus, et, tua protectione securi, tibi serviamus gratanter.

[V2876co] Deus, in quo vivimus, movemur et sumus, pluviam nobis tribue congruentem, ut, praesentibus subsidiis sufficienter adiuti, sempiterna fiducialius appetamus.

[V2877co] Omnipotens sempiterne Deus, qui nos et castigando sanas et ignoscendo conservas, praesta supplicibus tuis, ut optata aeris serenitate laetemur, et pietatis tuae donis ad gloriam nominis tui salutemque nostram semper utamur.

[V2878co] Deus, cuius nutu universa oboediunt elementa, te supplices exoramus, ut, sedatis terrentibus procellis, in materiam transeat laudis comminatio potestatis.

[V2879ai] Misereris omnium, Domine, et nihil odisti eorum quae fecisti, dissimulans peccata hominum propter paenitentiam, et parcens illis, quia tu es Dominus Deus noster.

[V2880co] Supplicum preces, quaesumus, Domine, propitiatus exaudi, et confitentium tibi parce peccatis, ut pariter nobis indulgentiam tribuas benignus et pacem.

[V2881co] Propitiare, Domine, populo tuo, et ab omnibus absolve peccatis, ut, quod nostris offensionibus promeremur, tua indulgentia repellatur.

[V2882so] Hostias tibi, Domine, placationis et laudis offerimus, ut et delicta nostra miseratus absolvas, et nutantia corda tu dirigas.

[V2883am] Gaudium erit coram Angelis Dei super uno peccatore paenitentiam agente.

[V2884pc] Praesta nobis, misericors Deus, ut, percipientes hoc munere veniam peccatorum, illa deinceps vitare tua gratia valeamus, et tibi sincero corde servire.

[V2885co] Omnipotens et mitissime Deus, qui sitienti populo tuo fontem viventis aquae de petra produxisti: educ de cordis nostri duritia lacrimas compunctionis; ut peccata nostra plangere valeamus, remissionemque eorum, te miserante, mereamur accipere.

[V2886so] Hanc oblationem, quaesumus, Domine quam maiestati tuae pro peccatis nostris offerimus, propitius respice et praesta, ut sacrificium ex quo hominibus profluit fons veniae Sancti Spiritus gratiam lacrimas effundendi pro nostris offensionibus largiatur.

[V2887pc] Tui, Domine, sacramenti veneranda perceptio faciat nos gemitibus lacrimarum maculas nostrorum diluere peccatorum atque optatae nobis, te largiente, indulgentiae praestet effectum.

[V2888co] Caelesti, Domine, Sancti Spiritus igne corda nostra clementer exure ut tibi casto corpore serviamus, et mundo corde placeamus.

[V2889so] Accepta tibi sint, Domine, nostra dona ut, indulgentia tua adiuvante, sacrificare tibi hostiam laudis plena libertate ac pura mente possimus quos dignatus es salvare per gratiam.

[V2890pc] Percepta nobis sacramenta, quae sumpsimus, refloreat cor et caro nostra vigore pudicitiae et castimoniae novitate, ut, quod ore contingimus, pura mente capiamus.

[V2891ai] Dicit Dominus: Auferam cor lapideum de carne vestra, et dabo vobis cor carneum, et spiritum meum ponam in medio vestri: et eritis mihi in populum, et ego ero vobis in Deum.

[V2892co] Corda nostra, quaesumus, Domine, tuae Spiritu caritatis inflamma, ut tuae digna semper ac placita maiestati cogitare et te in fratribus sincere diligere valeamus.

[V2893so] Propitius, Domine, quaesumus, haec dona sanctifica, et, hostiae spiritalis oblatione suscepta, concede, ut caritatem tuam ad omnes possimus extendere.

[V2894am] Nunc autem manent fides, spes, caritas, tria haec: maior autem horum est caritas.

[V2895pc] Quos uno pane caelesti satiasti, quaesumus, Domine, ut Sancti Spiritus gratia perfundas, et abundanter reficias perfectae dulcedine caritatis.

[V2896ai] Rogate quae ad pacem sunt Ierusalem, et abundantia diligentibus te Propter fratres meos et proximos meos loquebar pacem de te.

[V2897co] Deus, qui caritatis dona, per gratiam Sancti Spiritus, tuorum fidelium cordibus infudisti, da famulis tuis, pro quibus tuam deprecamur clementiam, salutem mentis et corporis, ut te tota virtute diligant, et, quae tibi sunt placita, tota dilectione perficiant.

[V2898so] Miserere, Domine, famulis tuis, pro quibus hoc laudis sacrificium tuae offerimus maiestati, ut, per haec sancta, supernae benedictionis gratiam obtineant, et gloriam aeternae beatitudinis acquirant.

[V2899am] Quicumque fecerit voluntatem Patris mei, qui in caelis est, ipse meus frater et soror et mater est, dicit Dominus.

[V2900pc] Te quaesumus, Domine, sumentes divina mysteria, ut famulis tuis, quibus dedisti in nos caritatem, indulgentiam tribuas peccatorum, consolationem vitae gubernationemque perpetuam, quatenus nos omnes, tibi unanimes servientes, ante faciem tuam congaudentes pervenire mereamur.

[V2901ai] Diligite inimicos vestros, dicit Dominus; benefacite his qui oderunt vos; benedicite maledicentibus vobis, et orate pro calumniantibus vos.

[V2902co] Deus, qui caritatis tuae praecepto voluisti, ut nos affligentibus amorem impendamus sincerum, da nobis ita novae legis sequi mandata, ut bona pro malis reddere et alii aliorum onera portare studeamus.

[V2903so] Pacem cum omnibus habere cupientes, tibi, Domine, pro his qui nobis adversantur hoc sacrificium offerimus, et Filii tui mortem commemoramus, per quam, cum inimici essemus, tibi reconciliati sumus.

[V2904am] Beati pacifici, quoniam filii Dei vocabuntur. Beati qui persecutionem patiuntur propter iustitiam, quoniam ipsorum est regnum caelorum.

[V2905pc] Per haec pacis nostrae mysteria, da nos, Deus, cum omnibus esse pacificos, et eos qui nobis adversantur tibi gratos efficere, nobisque placatos.

[V2906ai] Domine, Deus salutis meae, in die clamavi et nocte coram te. Intret in conspectu tuo oratio mea, inclina aurem tuam ad precem meam.

[V2907co] Deus, cuius Filius, ad redimendum genus humanum a captivitate peccati, formam servi accipere dignatus est, da famulis tuis in vinculis constitutis, ut illa libertate potiantur, qua omnes homines, filios tuos, voluisti donari.

[V2908so] Per humanae redemptionis salutare sacramentum, quod tibi, Domine, offerimus, praesta, ut famuli tui a captivitate solvantur, et animae perpetua gaudeant libertate.

[V2909am] Laudabo nomen Dei cum cantico, et magnificabo eum in laude. Quoniam exaudivit pauperes Dominus, et vinctos suos non despexit.

[V2910pc] Nostrae libertatis pretium recolentes, tuam, Domine, pro fratribus nostris imploramus clementiam, ut a vinculis solvantur, et servi fiant iustitiae tuae.

[V2911co] Omnipotens et misericors Deus, cui soli patent cordium secreta, qui iustum agnoscis et impium iustificare vales, exaudi preces nostras pro famulis tuis in carcere detentis, et praesta, ut per patientiam et spem in afflictione subleventur, et citius valeant sine offensione ad propria reverti.

[V2912ai] Miserere mei, Domine, quoniam infirmus sum; sana me, Domine, quoniam conturbata sunt ossa mea, et anima mea turbata est valde.

[V2913ai] Vere languores nostros Dominus tulit, et dolores nostros ipse portavit.

[V2914co] Deus, qui languores nostros voluisti ab Unigenito Filio tuo portari, ut infirmitatis et patientiae virtutem ostenderes humanae, preces nostras pro fratribus in aegritudine positis benignus exaudi, et praesta, ut, qui doloribus, aerumnis aliisve morbis premuntur, et inter eos qui beati praedicantur se sentiant electos, et Christo pro mundi salute patienti se sciant unitos.

[V2915co] Omnipotens sempiterne Deus, salus aeterna credentium, exaudi nos pro famulis tuis infirmis, pro quibus misericordiae tuae imploramus auxilium, ut, reddita sibi sanitate, gratiarum tibi in Ecclesia tua referant actiones.

[V2916so] Deus, cuius nutibus vitae nostrae momenta decurrunt, suscipe preces et hostias, quibus tuam pro fratribus aegrotantibus misericordiam imploramus, ut, de quorum periculo metuimus, de eorum salute laetemur.

[V2917am] Adimpleo, quae desunt passionum Christi in carne mea, pro corpore eius, quod est Ecclesia.

[V2918pc] Deus, infirmitatis humanae singulare praesidium, auxilii tui super infirmos famulos tuos ostende virtutem, ut, ope misericordiae tuae adiuti, Ecclesiae tuae sanctae incolumes repraesentari mereantur.

[V2919ai] Nemo nostrum sibi vivit, et nemo sibi moritur: sive enim vivimus, Domino vivimus; sive morimur, Domino morimur. Sive ergo vivimus sive morimur, Domini sumus.

[V2920ai] Vere languores Dominus tulit, et dolores nostros ipse portavit.

[V2921co] Omnipotens et misericors Deus, qui humano generi, per ipsum mortis institutum, aeternae vitae aditum misericorditer reserasti, respice propitius famulum tuum extremo agone laborantem, ut, consociatus Filii tui passioni et eius sanguine signatus, tibi valeat immaculatus praesentari.

[V2922co] Omnipotens et misericors Deus, qui amorem tuum creaturis omnibus ubique manifestas, audi benigne preces quas pro hodie morituris effundimus, ut, pretioso sanguine Filii tui redempti, absque peccati macula de hoc mundo valeat exire atque in sinu misericordiae tuae perenniter requiescere.

[V2923so] Suscipe, Deus, hostiam, quam tibi pro famulo tuo in extremo vitae constituto fidenter offerimus, et da per eam universa illius delicta purgari, ut, qui tuae dispositionis aerumnis in hac vita premitur, in futura requiem consequatur aeternam.

[V2924am] Adimpleo quae desunt passionum Christi in carne mea, pro corpore eius, quod est Ecclesia.

[V2925am] Qui manducat meam carnem et bibit meum sanguinem, habet vitam aeternam, dicit Dominus, et ego resuscitabo eum in novissimo die.

[V2926pc] Per huius, Domine, sacramenti virtutem, famulum tuum dignare clementer tua gratia sustinere, ut in hora mortis contra se inimicum praevalere non videat, sed cum Angelis tuis transitum habere mereatur ad vitam.

[V2927ai] Si ambulavero in medio umbrae mortis, non timebo mala, quoniam tu mecum es, Domine, Deus meus. Virga tua et baculus tuus ipsa me consolata sunt.

[V2928co] Deus, qui nos ad imaginem tuam creasti, et pro nobis Filium tuum mortem subire voluisti, concede supplicibus tuis ita vigilare omni tempore orantes, ut absque peccati macula de hoc mundo exire, et in sinu misericordiae tuae cum exsultatione requiescere mereamur.

[V2929so] Sicut mortem nostram occidisti, Domine, morte Unigeniti tui, ita eiusdem sacramenti virtute praesta, ut, voluntati tuae oboedientes usque ad mortem, cum pace et fiducia de hoc saeculo exire, et ipsius resurrectionis participes effici tuo munere valeamus.

[V2930am] Nemo nostrum sibi vivit, et nemo sibi moritur: sive enim vivimus, Domino vivimus. sive morimur, Domino morimur. Sive ergo vivimus sive morimur, Domini sumus.

[V2931am] Vigilate omni tempore, orantes, ut digni habeamini stare ante Filium hominis.

[V2932pc] Immortalitatis pignora, Domine, per haec mysteria consecuti, pro nostrae mortis exitu pietatis tuae auxilium supplices imploramus, ut, inimici superatis insidiis, in sinu gloriae tuae reficiamur aeternae.

[V2933ai] Salus populi ego sum, dicit Dominus: de quacumque tribulatione clamaverint ad me, exaudiam eos, et ero illorum Dominus in perpetuum.

[V2934co] Deus, refugium nostrum in laboribus, virtus in languoribus, solamen in fletibus, parce populo tuo, ut, dignis flagellationibus castigatus, in tua miseratione denique respiret.

[V2935so] Oblationes familiae tuae, quaesumus, Domine, suscipe miseratus, ut, sub tuae protectionis auxilio, et collata non perdant, et ad aeterna dona perveniant.

[V2936am] Venite ad me, omnes qui laboratis et onerati estis, et ego reficiam vos, dicit Dominus.

[V2937pc] Sentiamus, Domine, quaesumus, tui perceptione sacramenti, subsidium mentis et corporis, ut, in utroque salvati, de caelestis remedii plenitudine gloriemur.

[V2938ai] Exsurge, Domine, adiuva nos et redime nos propter misericordiam tuam.

[V2939co] Omnipotens et misericors Deus, afflictionem nostram propitiatus intende, et ita filiorum tuorum onus alleva fidemque confirma, ut in paterna semper providentia tua sine dubitatione confidant.

[V2940so] Suscipe, Domine, munera, quae tibi fidenter offerimus, et, quam maeroris amaritudinem sustinemus, fac, ut in suavitatis sacrificium convertatur.

[V2941am] Si quid petieritis Patrem in nomine meo, dabit vobis. Petite et accipietis, ut gaudium vestrum sit plenum, dicit Dominus.

[V2942pc] Te supplices, Domine, exoramus, ut, dapibus recreati munitique divinis, et futuros labores fortiter aggredi valeamus, et fratres in pressura positos impensius confirmemus.

[V2943co] Deus, qui nos in tantis periculis constitutos, pro humana scis fragilitate non posse subsistere, da nobis salutem mentis et corporis, ut ea, quae pro peccatis nostris patimur, te adiuvante vincamus.

[V2944co] Da, quaesumus, Domine, populo tuo diabolica vitare contagia, et te solum Deum pura mente sectari.

[V2945so] Suscipe, quaesumus, Domine, preces et oblationes nostras, ut, qui peccatorum nostrorum flagellis percutimur, miserationis tuae gratia liberemur.

[V2946pc] Tribulationem nostram, quaesumus, Domine, propitius respice, et iram tuae indignationis, quam pro peccatis nostris iuste meremur, per passionem Filii tui, propitiatus averte.

[V2947ai] Cantate et psallite in cordibus vestris Domino, gratias agentes semper pro omnibus in nomine Domini nostri Iesu Christi Deo et Patri.

[V2948co] Deus, qui famulos tuos in tribulatione positos semper miseratus exaudis, pro benignitate tua gratias agentes, te supplices deprecamur, ut, liberi a malis omnibus, in gaudio tibi iugiter serviamus.

[V2949so] Domine, qui Filium tuum dedisti nobis, ut nos a morte omnique malo benignus eriperet, quaesumus, ut hoc sacrificium clementer accipias, quod ab aerumnis liberi tibi in gratiarum offerimus actionem.

[V2950am] Confitebor tibi, Domine, in toto corde meo, quoniam audisti verba oris mei.

[V2951am] Quid retribuam Domino pro omnibus quae retribuit mihi? Calicem salutaris accipiam, et nomen Domini invocabo.

[V2952pc] Omnipotens Deus, qui per hunc panem vitae famulos tuos et peccati vinculo liberare et vires eorum dignaris tua pietate reficere, da nobis in spem gloriae sine intermissione proficere.

[V2953co] Deus, Pater donorum omnium, a quo descendere confitemur quidquid habemus aut sumus, beneficia doce nos immensae tuae pietatis agnoscere, ac te sincero corde totaque nostra virtute diligere.

[V2954so] Pro collatis donis sacrificium tibi, Domine, laudis offerimus, suppliciter deprecantes, ut, quod immeritis contulisti, ad nominis tui gloriam referamus.

[V2955pc] Deus, qui nobis in cibum spiritalem reddidisti Filii tui sacramentum salutare, quod tibi in actionem obtulimus gratiarum, da nobis ita virtutis et gaudii muneribus confirmari, ut tibi servire devotius et nova beneficia consequi mereamur.

[Y2956ai] Benedictus sit Deus Pater, Unigenitusque Dei Filius, Sanctus quoque Spiritus, quia fecit nobiscum misericordiam suam.

[Y2957co] Deus Pater, qui, Verbum veritatis et Spiritum sanctificationis mittens in mundum, admirabile mysterium tuum hominibus declarasti, da nobis, in confessione verae fidei, aeternae gloriam Trinitatis agnoscere, et Unitatem adorare in potentia maiestatis.

[Y2958so] Sanctifica, quaesumus, Domine Deus noster, per tui nominis invocationem, haec munera nostrae servitutis, et per ea nosmetipsos tibi perfice munus aeternum.

[Y2959am] Quoniam autem estis filii, misit Deus Spiritum Filii sui in corda vestra clamantem: Abba, Pater.

[Y2960pc] Proficiat nobis ad salutem corporis et animae, Domine Deus noster, huius sacramenti susceptio, et sempiternae sanctae Trinitatis eiusdemque individuae Unitatis confessio.

[Y2961ai] In caritate perpetua dilexit nos Deus: Filium suum Unigenitum misit propitiationem pro peccatis nostris, non pro nostris autem tantum, sed etiam pro totius mundi.

[Y2962ai] Misericordias Domini in aeternum cantabo, in generationem et generationem annuntiabo veritatem tuam in ore meo.

[Y2963co] Deus, cuius misericordiae non est numerus et bonitatis infinitus est thesaurus auge propitius fidem plebis tibi sacratae, ut digna omnes intellegentia comprehendant qua dilectione sunt creati, quo sanguine redempti, quo Spiritu regenerati.

[Y2964so] Oblationes nostras, Domine, clementer assume, easque in redemptionis sacramentum converte, mortis et resurrectionis Filii tui memoriale, ut huius sacrificii virtute, Christo iugiter confidentes, ad vitam perveniamus aeternam.

[Y2965am] Misericordia Domini ab aeterno et usque in aeternum super timentes eum.

[Y2966am] Unus militum lancea latus eius aperuit et continuo exivit sanguis et aqua.

[Y2967pc] Concede nobis, misericors Deus, ut Corpore et Sanguine Filii tui enutriti fiducialiter e misericordiae fontibus hauriamus et in fratres magis magisque misericordes nosmetipsos praebeamus.

[Y2968ai] Iuravit Dominus et non paenitebit eum: Tu es sacerdos in aeternum secundum ordinem Melchisedech.

[Y2969co] Deus, qui ad gloriam tuam et generis humani salutem Christum voluisti summum aeternumque constituere sacerdotem, praesta, ut populus, quem sanguine suo tibi acquisivit, ex eius memorialis participatione, virtutem crucis ipsius capiat et resurrectionis. Qui tecum.

[Y2970so] Concede nobis, quaesumus, Domine, haec digne frequentare mysteria, quia, quoties huius hostiae commemoratio celebratur, opus nostrae redemptionis exercetur.

[Y2971am] Hoc Corpus, quod pro vobis tradetur; hic calix novi testamenti est in meo Sanguine, dicit Dominus. Hoc facite quotiescumque sumitis, in meam commemorationem.

[Y2972pc] Quaesumus, Domine, ut, huius participatione sacrificii, quod in sui commemorationem Filius tuus praecepit offerri, nosmetipsos cum illo oblationem facias tibi sempiternam. Qui vivit et regnat in saecula saeculorum.

[Y2973ai] Nos autem gloriari oportet in cruce Domini nostri Iesu Christi, in quo est salus, vita et resurrectio nostra, per quem salvati et liberati sumus.

[Y2974co] Deus, qui Unigenitum tuum crucem subire voluisti, ut salvum faceret genus humanum, praesta, quaesumus, ut, cuius mysterium in terra cognovimus, eius redemptionis praemia in caelo consequi mereamur.

[Y2975so] Haec oblatio, Domine, quaesumus, ab omnibus nos purget offensis, quae in ara crucis totius mundi tulit offensam.

[Y2976am] Ego si exaltatus fuero a terra, omnes traham ad meipsum, dicit Dominus.

[Y2977pc] Refectione tua sancta enutriti, Domine Iesu Christe, supplices deprecamur, ut, quos per lignum crucis vivificae redemisti, ad resurrectionis gloriam perducas. Qui vivis et regnas in saecula saeculorum.

[Y2978ai] Ianuas caeli aperuit Dominus, et pluit illis manna ad manducandum, et panem caeli dedit eis: panem angelorum manducavit homo.

[Y2979co] Deus, qui humanae redemptionis opus per Unigeniti tui paschale mysterium implevisti, concede propitius, ut, qui Christi mortem et resurrectionem in sacramentorum signis annuntiamus fidenter, salvationis tuae continuum experiamur augmentum.

[Y2980so] Salutis nostrae memoriale celebrantes, clementiam tuam, Domine, suppliciter exoramus, ut hoc sacramentum pietatis fiat nobis signum unitatis et vinculum caritatis.

[Y2981am] Ego sum panis vivus, qui de caelo descendi, dicit Dominus. Si quis manducaverit ex hoc pane, vivet in aeternum; et panis, quem ego dabo, caro mea est pro mundi vita.

[Y2982pc] Sanctificet nos, quaesumus, Domine, mensae caelestis participatio, ut, per Corpus et Sanguinem Christi, fraternitas cuncta copuletur.

[Y2983ai] In nomine Iesu omne genu flectatur, caelestium, terrestrium et infernorum; et omnis lingua confiteatur quia Dominus Iesus Christus in gloria est Dei Patris.

[Y2984co] Sanctissimum Iesu nomen venerantibus, nobis, Domine, concede propitius, ut, eius in hac vita dulcedine perfruentes, sempiterno gaudio in patria repleamur.

[Y2985so] In eius nomine, Pater omnipotens, munera nostra dignare suscipere, in quo quidquid petierimus nos certe consecuturos esse confidimus, ipso Filio tuo benignissime pollicente.

[Y2986am] Non est aliud nomen sub caelo datum hominibus, in quo oporteat nos salvos fieri.

[Y2987pc] Tua nobis, quaesumus, Domine, miseratione concede, ut in his sacris mysteriis Dominum Iesum dignis obsequiis veneremur, in cuius nomine voluisti omne genu flecti, omnesque homines invenire salutem.

[Y2988ai] Redemisti nos, Domine, in Sanguine tuo, ex omni tribu et lingua et populo et natione, et fecisti nos Deo nostro regnum.

[Y2989co] Deus, qui pretioso Unigeniti tui Sanguine universos homines redemisti, conserva in nobis opus misericordiae tuae, ut, nostrae salutis mysterium iugiter recolentes, eiusdem fructum consequi mereamur.

[Y2990so] Maiestati tuae, Domine, oblationis nostrae munera proferentes, ad novi testamenti Mediatorem Iesum his mysteriis accedamus, eiusque aspersionem Sanguinis salutiferam innovemus.

[Y2991am] Calix benedictionis, cui benedicimus, communicatio Sanguinis Christi est; et panis, quem frangimus, participatio Corporis Domini est.

[Y2992pc] Cibo refecti, Domine, potuque salutis, Salvatoris nostri, quaesumus, semper Sanguine perfundamur, qui fons aquae nobis fiat in vitam salientis aeternam.

[Y2993pc] Refecti cibo potuque caelesti, quaesumus, omnipotens Deus, ut ab hostium defendas formidine, quos pretioso Filii tui Sanguine redemisti. Qui vivit et regnat in saecula saeculorum.

[Y2994ai] Cogitationes Cordis eius in generatione et generationem, ut eruat a morte animas eorum et alat eos in fame.

[Y2995co] Fac nos, Domine Deus, Cordis Filii tui virtutibus indui et affectibus inflammari, ut, eius imagini conformes effecti, aeternae redemptionis mereamur esse participes.

[Y2996so] Deus, Pater misericordiarum, qui propter nimiam caritatem, qua dilexisti nos, Unigenitum tuum nobis ineffabili bonitate donasti, praesta, quaesumus, ut, cum ipso in unum consummati, dignum tibi offeramus obsequium.

[Y2997am] Dicit Dominus: Si quis sitit, veniat ad me et bibat. Qui credit in me, flumina de ventre eius fluent aquae vivae.

[Y2998am] Unus militum lancea latus eius aperuit, et continuo exivit sanguis et aqua.

[Y2999pc] Tui sacramenti caritatis participes effecti, clementiam tuam, Domine, suppliciter imploramus, ut Christo conformemur in terris, et eius gloriae consortes fieri mereamur in caelis.

[Y3000ai] Caritas Dei diffusa est in cordibus nostris, per inhabitantem Spiritum eius in nobis.

[Y3001co] Deus, qui corda fidelium Sancti Spiritus illustratione docuisti, da nobis in eodem Spiritu recta sapere, et de eius semper consolatione gaudere.

[Y3002so] Munera, quaesumus, Domine, oblata sanctifica, et corda nostra Sancti Spiritus illustratione emunda.

[Y3003vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: per Christum Dominum nostrum. Qui, ascendens super omnes caelos sedensque ad dexteram tuam, promissum Spiritum Sanctum in filios adoptionis effudit. Quapropter nunc et usque in saeculum, cum omni militia Angelorum, devota tibi mente concinimus, clamantes atque dicentes: Sanctus.

[Y3004am] Confirma hoc, Deus, quod operatus es in nobis, a templo sancto tuo, quod est in Ierusalem.

[Y3005pc] Sancti Spiritus, Domine, corda nostra mundet infusio, et sui roris intima aspersione fecundet.

[Y3006ai] Cum venerit Spiritus veritatis, docebit vos omnem veritatem, dicit Dominus.

[Y3007co] Mentes nostras, quaesumus, Domine, Paraclitus qui a te procedit illuminet, et inducat in omnem, sicut tuus promisit Filius, veritatem.

[Y3008co] Deus, cui omne cor patet et omnis voluntas loquitur, et quem nullum latet secretum, purifica per infusionem Spiritus Sancti cogitationes cordis nostri, ut te perfecte diligere, et digne laudare mereamur.

[Y3009so] Intende, quaesumus, Domine, spiritalem hostiam altaribus tuis piae devotionis studio propositam, et da famulis tuis spiritum rectum, ut fides eorum haec dona tibi conciliet, et commendet humilitas.

[Y3010vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Qui singulis quibusque temporibus aptanda dispensas, mirisque modis Ecclesiae tuae gubernacula moderaris. Virtute enim Spiritus Sancti ita eam adiuvare non desinis, ut subdito tibi semper affectu nec in tribulatione supplicare deficiat, nec inter gaudia gratias referre desistat, per Christum Dominum nostrum. Et ideo, choris angelicis sociati, te laudamus in gaudio confitentes: Sanctus.

[Y3011am] Spiritus qui a Patre procedit, ille me clarificabit, dicit Dominus.

[Y3012pc] Domine Deus noster, qui nos vegetare dignatus es caelestibus alimentis, suavitatem Spiritus tui penetralibus nostri cordis infunde, ut, quae temporali devotione percepimus, sempiterno munere capiamus.

[Y3013ai] Spiritus Domini super me, evangelizare pauperibus misit me, dicit Dominus.

[Y3014co] Deus, qui universam Ecclesiam tuam in omni gente et natione sanctificas, in totam mundi latitudinem Spiritus tui dona defunde, ut, quod in ipsis evangelicae praedicationis exordiis tua est operata dignatio, nunc quoque per credentium corda diffundat.

[Y3015co] Deus, cuius Spiritu regimur, cuius protectione servamur, praetende nobis misericordiam tuam, et exorabilis tuis esto supplicibus, ut in te credentium fides tuis semper beneficiis adiuvetur.

[Y3016so] Sacrificia, Domine, tuis oblata conspectibus, ignis Spiritus sanctificet, qui discipulorum Filii tui corda succendit.

[Y3017am] Emitte Spiritum tuum, et creabuntur, et renovabis faciem terrae.

[Y3018pc] Haec nobis, Domine, munera sumpta proficiant, ut illo iugiter Spiritu ferveamus, quem Apostolis tuis ineffabiliter infudisti.

[Y3019ai] Erant discipuli perseverantes unanimiter in oratione cum Maria, matre Iesu.

[Y3020co] Deus, misericordiarum Pater, cuius Unigenitus, cruci affixus, beatam Mariam Virginem, Genetricem suam, Matrem quoque nostram constituit, concede, quaesumus, ut, eius cooperante caritate, Ecclesia tua, in dies fecundior, prolis sanctitate exsultet et in gremium suum cunctas attrahat familias populorum.

[Y3021so] Suscipe, Domine, oblationes nostras et in mysterium salutis converte, cuius virtute et caritate Virginis Mariae, Ecclesiae Matris, inflammemur et operi redemptionis cum ea arctius sociari mereamur.

[Y3022vd] Vere dignum et iustum est, aequum et salutare, nos tibi semper et ubique gratias agere: Domine, sancte Pater, omnipotens aeterne Deus: Et te in celebratione beatae Mariae Virginis debitis magnificare praeconiis. Quae Verbum tuum immaculato corde suscipiens virgineo meruit sinu concipere atque, pariens Conditorem, Ecclesiae fovit exordia. Quae iuxta crucem testamentum divinae caritatis accipiens, universos homines in filios assumpsit, Christi morte ad supernam vitam generatos. Quae, cum Apostoli Promissum exspectarent tuum, supplicationem suam discipulorum precibus iungens, exemplar exstitit orantis Ecclesiae. Ad gloriam autem evecta caelorum, Ecclesiam peregrinantem materno prosequitur amore eiusque gressus ad patriam tuetur benigna, donec dies Domini gloriosus adveniat. Et ideo cum Sanctis et Angelis universis te collaudamus, sine fine dicentes: Sanctus.

[Y3023am] Nuptiae factae sunt in Cana Galilaeae, et erat mater Iesu ibi; tunc fecit initium signorum Iesus et manifestavit gloriam suam, et crediderunt in eum discipuli eius.

[Y3024am] Ex cruce pendens dixit Iesus discipulo, quem diligebat: Ecce mater tua.

[Y3025pc] Sumpto, Domine, pignore redemptionis et vitae, supplices adprecamur, ut Ecclesia tua, materna Virginis ope, et Evangelii praeconio universas gentes erudiat et Spiritus effusione orbem terrarum adimpleat.

[Y3026ai] Benedicta es tu, Virgo Maria, a Domino Deo excelso prae omnibus mulieribus super terram; quia nomen tuum ita magnificavit, ut non recedat laus tua de ore hominum.

[Y3027co] Deus, qui beatam Virginem Mariam, gratia tua plenam, inter mulieres elegisti, ut Filii tui, Redemptoris nostri, fieret Mater; concede nobis, qui sanctum nomen eius veneramur, praesentis temporis pericula declinare, et vitam cum ipsa consequi aeternam.

[Y3028co] Deus, cuius Filius in ara crucis exspirans beatissimam Virginem Mariam Matrem voluit esse nostram, quam suam elegerat, concede propitius, ut, qui sub eius praesidium secure confugimus, materno invocato nomine confortemur.

[Y3029so] Muneribus, Domine, oblatis intende, ut corda nostra, Sancti Spiritus illustratione perfusa, beata Maria semper Virgine intercedente, Christo Filio tuo iugiter studeant adhaerere.

[Y3030am] Missus est angelus Gabriel a Deo ad virginem, et nomen virginis Maria.

[Y3031pc] Tribue nobis, quaesumus, Domine, quos ad verbi et sacramenti mensam roborasti, ut, beatae Mariae ductu et patrocinio, et illa respuamus, quae christiano inimica sunt nomini et ea, quae sunt apta, sectemur.

[Y3032ai] Erant discipuli perseverantes unanimiter in oratione cum Maria matre Iesu.

[Y3033co] Deus, qui Apostolis tuis, cum Maria Matre Iesu orantibus, Sanctum dedisti Spiritum, da nobis, ut, ipsa intercedente, maiestati tuae fideliter servire et nominis tui gloriam verbo et exemplo diffundere valeamus.

[Y3034so] Tua, Domine, propitiatione, et beatae Mariae semper Virginis intercessione haec nostra obtineat oblatio, ut Ecclesia tua fidelium numero crescat, et iugiter fulgeat ubertate virtutum.

[Y3035am] Beatus venter qui portavit Christum Dominum; quinimmo beati qui audiunt verbum Dei, et custodiunt illud.

[Y3036pc] Sumptis, Domine, salutis nostrae subsidiis in memoria beatae Mariae Virginis, Apostolorum reginae, te supplices, deprecamur, ut in tua voluntate et in hominum servitio perseverans, populus tuus semper proficiat ad salutem.

[Y3037ai] Benedicite Dominum, omnes Angeli eius; potentes virtute, qui facitis verbum eius, ad audiendam vocem sermonum eius.

[Y3038co] Deus, qui miro ordine Angelorum ministeria hominumque dispensas, concede propitius, ut, a quibus tibi ministrantibus in caelo semper assistitur, ab his in terra vita nostra muniatur.

[Y3039so] Hostias tibi, Domine, laudis offerimus, suppliciter deprecantes, ut easdem, angelico ministerio in conspectum tuae maiestatis delatas, et placatus accipias, et ad salutem nostram provenire concedas.

[Y3040am] In conspectu Angelorum psallam tibi, Deus meus.

[Y3041pc] Pane caelesti refecti, supplices te, Domine, deprecamur, ut, eius fortitudine roborati, sub Angelorum fideli custodia, fortes, salutis progrediamur in via.

[Y3042ai] Hic erit magnus coram Domino, et Spiritu Sancto replebitur adhuc ex utero matris suae, et multi in nativitate eius gaudebunt.

[Y3043co] Praesta, quaesumus, omnipotens Deus, ut familia tua per viam salutis incedat, et, beati Ioannis Praecursoris hortamenta sectando, ad eum quem praedixit, secura perveniat, Dominum nostrum Iesum Christum.

[Y3044so] Munera populi tui, Domine, propitius intende, in beati Ioannis Baptistae commemoratione delata, et praesta, ut, quae mysterio gerimus, debitae servitutis actione sectemur.

[Y3045am] Benedictus Dominus Deus Israel, quia visitavit et fecit redemptionem plebis suae.

[Y3046pc] Sacris dapibus satiatos, beati Ioannis Baptistae nos, Domine, praeclara comitetur oratio, et, quem Agnum nostra ablaturum crimina nuntiavit, ipsum Filium tuum poscat nobis fore placatum. Qui vivit et regnat in saecula saeculorum.

[Y3047ai] Ecce fidelis servus et prudens, quem constituit Dominus super familiam suam.

[Y3048co] Deus, qui ineffabili providentia beatum Ioseph sanctissimae Genetricis Filii tui sponsum eligere dignatus es, praesta, quaesumus, ut, quem protectorem veneramur in terris, intercessorem habere mereamur in caelis.

[Y3049so] Laudis hostiam immolaturi, Pater sancte, suppliciter postulamus, ut in ministerio nostro beati Ioseph precibus foveamur, cui dedisti Unigenitum tuum vice in terris custodire paterna.

[Y3050am] Euge, serve bone et fidelis: intra in gaudium Domini tui.

[Y3051pc] His recreati, Domine, vivificis sacramentis, in iustitia tibi semper et sanctitate vivamus, beati Ioseph exemplo et intercessione, qui magnis tuis perficiendis mysteriis vir iustus et oboediens ministravit.

[Y3052ai] Non vos me elegistis, sed ego elegi vos, ut eatis et fructum afferatis, et fructus vester maneat, dicit Dominus.

[Y3053co] Beatorum Apostolorum honore continuo Ecclesia tua, Domine, semper exsultet, ut his praesulibus gubernetur, quorum doctrina gaudet et meritis.

[Y3054so] Effunde in nos, Domine, quem in Apostolos effudisti abunde, Spiritum Sanctum tuum, ut cognoscamus ea, quae per eos nobis donasti, et sacrificium laudis ad gloriam tuam rite offeramus.

[Y3055am] Vos, qui secuti estis me, sedebitis super sedes, iudicantes duodecim tribus Israel, dicit Dominus.

[Y3056pc] Fac nos, Deus, cum exsultatione et simplicitate cordis perseverare in doctrina Apostolorum, in fractione panis communicantes et orationibus.

[Y3057ai] Petrus apostolus et Paulus doctor gentium, ipsi nos docuerunt legem tuam, Domine.

[Y3058co] Da nobis, quaesumus, Domine Deus noster, beatorum apostolorum Petri et Pauli intercessionibus sublevari, ut per quos Ecclesiae tuae superni muneris rudimenta donasti, per eos subsidia perpetuae salutis impendas.

[Y3059so] Munera, Domine, tuis altaribus adhibemus, de beatorum apostolorum Petri et Pauli commemoratione gloriantes, ut quantum sumus de nostro merito formidantes, tantum de tua benignitate gloriemur salvandi.

[Y3060am] Simon Ioannis, diligis me plus his? Domine, tu omnia nosti, tu scis, Domine, quia amo te.

[Y3061pc] Caelestibus sacramentis, quaesumus, Domine, fideles tuos corrobora, quos Apostolorum doctrina illuminasti.

[Y3062ai] Dicit Dominus Simoni Petro: Ego rogavi pro te, ut non deficiat fides tua, et tu aliquando conversus, confirma fratres tuos.

[Y3063co] Deus, qui beato Petro apostolo tuo, collatis clavibus regni caelestis, ligandi atque solvendi pontificium tradidisti, concede, ut, intercessionis eius auxilio, a peccatorum nostrorum nexibus liberemur.

[Y3064so] Oblationem populi tui, quaesumus, Domine, suscipe propitius in commemoratione beati Petri apostoli, quem ad confitendum te Deum vivum tuumque Filium secreta revelatione docuisti, et gloriosa fecisti passione Magistro suo testimonium perhibere.

[Y3065am] Dixit Petrus ad Iesum: Tu es Christus, Filius Dei vivi. Respondit Iesus: Tu es Petrus, et super hanc petram aedificabo Ecclesiam meam.

[Y3066pc] Ad convivium, Domine, salutis admissi, beati Petri apostoli memoriam venerantes, gratanter exposcimus, ut Filio tuo, qui solus verba vitae habet, iugiter haereamus, quatenus oves gregis tui fideles ad pascua feliciter deducamur aeterna.

[Y3067ai] Scio cui credidi, et certus sum quia potens est depositum meum servare in illum diem iustus iudex.

[Y3068co] Domine Deus, qui beatum Paulum apostolum ad praedicandum Evangelium mirabiliter designasti, da fide mundum universum imbui, quam ipse coram regibus gentibusque portavit, ut iugiter Ecclesia tua capiat augmentum.

[Y3069so] Illo nos, quaesumus, Domine, divina tractantes, fidei lumine Spiritus perfundat, quo beatum Paulum apostolum ad gloriae tuae propagationem collustravit.

[Y3070am] In fide vivo Filii Dei, qui dilexit me, et tradidit semetipsum pro me.

[Y3071pc] Corporis et Sanguinis Filii tui, Domine, communione refectis, concede, ut ipse Christus sit nobis vivere, nihilque ab eius nos separet caritate, et, beato monente Apostolo, in dilectione cum fratribus ambulemus.

[Y3072ai] Annuntiate de die in diem salutare Dei, annuntiate inter gentes gloriam eius.

[Y3073co] Robora in nobis, Domine, fidem, qua Filio tuo beatus N. apostolus sincero animo adhaesit, et praesta, ut, ipso deprecante, Ecclesia tua cunctis gentibus salutis fiat sacramentum.

[Y3074so] Beati N. apostoli commemoratione tibi munera deferentes, quaesumus, Domine, ut, eius exemplo, digne Evangelio Christi conversantes, fidei evangelicae collaboremus.

[Y3075am] Ego dispono vobis, sicut disposuit mihi Pater meus, regnum, ut edatis et bibatis super mensam meam in regno meo, dicit Dominus.

[Y3076pc] Sumpsimus, Domine, pignus salutis aeternae, memoriam beati N. apostoli celebrantes, quod sit nobis, quaesumus, vitae praesentis auxilium pariter et futurae.

[Y3077ai] Gaudent in caelis animae Sanctorum, qui Christi vestigia sunt secuti: ideo cum Christo exsultant sine fine.

[Y3078co] Deus, omnis fons sanctitatis, fac nos in nostra unumquemque vocatione digne ambulare, intercedentibus Sanctis tuis, quibus divisiones gratiarum in terra et unam in caelo mercedem gloriosam contulisti.

[Y3079so] Grata tibi sint, Domine, munera, quae pro cunctorum offerimus honore Sanctorum, et concede, ut, quos iam credimus de sua immortalitate securos, sentiamus de nostra salute sollicitos.

[Y3080am] Beati mundo corde, quoniam ipsi Deum videbunt; beati pacifici, quoniam filii Dei vocabuntur; beati qui persecutionem patiuntur propter iustitiam, quoniam ipsorum est regnum caelorum.

[Y3081pc] Deus, qui nos uno pane reficis et una spe sustentas, tua nos pariter gratia corrobora, ut omnes, cum Sanctis tuis unum in Christo corpus et unus spiritus, ad gloriam cum ipso resurgamus. Qui vivit et regnat in saecula saeculorum.

[D3082ai] Requiem aeternam dona eis, Domine, et lux perpetua luceat eis.

[D3083co] Deus, Pater omnipotens, cuius Filium mortuum fuisse et resurrexisse fides nostra fatetur, concede propitius, ut hoc mysterio famulus tuus N., qui in illo dormivit, per illum resurgere laetetur.

[D3084co] Deus, cui proprium est misereri semper et parcere, te supplices exoramus pro famulo tuo N., quem (hodie)ad te migrare iussisti, ut, quia in te speravit et credidit, concedas eum ad veram patriam perduci, et gaudiis perfrui sempiternis.

[D3085so] Pro famuli tui N. salute hostias tibi, Domine, suppliciter offerimus tuam clementiam deprecantes, ut, qui Filium tuum pium Salvatorem esse non dubitavit, misericordem Iudicem inveniat.

[D3086am] Lux aeterna luceat eis, Domine, cum Sanctis tuis in aeternum, quia pius es. Requiem aeternam dona eis, Domine, et lux perpetua luceat eis, cum Sanctis tuis in aeternum, quia pius es.

[D3087pc] Domine Deus, cuius Filius in sacramento Corporis sui viaticum nobis reliquit, concede propitius, ut per hoc frater noster N. ad ipsam Christi perveniat mensam aeternam.

[D3088ai] Aperiat ei Dominus paradisi ianuam, ut ad illam patriam revertatur, ubi mors non est, ubi aeternum gaudium perseverat.

[D3089co] Deus, misericordia peccatorum et tuorum beatitudo Sanctorum, da, quaesumus, famulo tuo N., cuius depositionis (hodie)officia humanitatis persolvimus, cum electis tuis beati muneris portionem, ut eum, a mortalitatis nexibus absolutum, in die resurrectionis ante faciem tuam praesentari concedas.

[D3090co] Deus, qui posuisti praesentis vitae terminum, ut aeternitatis reseres introitum, te supplices deprecamur, ut nomen famuli tui N. in libro vitae miserationis tuae gratia iubeas conscribi.

[D3091so] Adesto, Domine, quaesumus, pro famulo tuo N., cuius in die depositionis hoc sacrificium tibi placationis offerimus, ut, si qua ei peccati macula inhaesit aut vitium humanum infecit, dono tuae pietatis indulgeas et abstergeas.

[D3092am] Salvatorem exspectamus Dominum nostrum Iesum Christum, qui reformabit corpus humilitatis nostrae configuratum corpori claritatis suae.

[D3093pc] Praesta, quaesumus, omnipotens Deus, ut famulus tuus N., qui (hodie)de hoc saeculo migravit, his sacrificiis purgatus et a peccatis expeditus, resurrectionis suscipiat gaudia sempiterna.

[D3094ai] Sicut Iesus mortuus est et resurrexit, ita et Deus eos qui dormierunt per Iesum adducet cum eo. Et sicut in Adam omnes moriuntur, ita et in Christo omnes vivificabuntur, alleluia.

[D3095co] Preces nostras, quaesumus, Domine, benignus exaudi, ut, dum extollitur nostra fides in Filio tuo a mortuis suscitato, in famuli tui N. praestolanda resurrectione spes quoque nostra firmetur.

[D3096co] Deus, qui per finem praesentium principia pandis futurorum, praesta, quaesumus, ut anima famuli tui N. ad redemptionis aeternae perveniat, te ducente, consortium.

[D3097so] Nostris, Domine, propitiare muneribus, ut famulus tuus N. assumatur in gloriam cum Filio tuo, cuius magno pietatis iungimur sacramento.

[D3098am] Ego sum resurrectio et vita, dicit Dominus. Qui credit in me, etiam si mortuus fuerit, vivet; et omnis, qui vivit et credit in me, non morietur in aeternum, alleluia.

[D3099pc] Praesta, quaesumus, Domine, ut famulus tuus N. in mansionem lucis transeat et pacis, pro quo paschale celebravimus sacramentum.

[D3100co] Deus, cui soli competit vitam post mortem praestare, libera famulum tuum N. ab omnibus peccatis, ut, qui Christi tui resurrectionem credidit, tempore resurrectionis gloriosus tibi iungatur.

[D3101so] Omnipotens et misericors Deus, his sacrificiis ablue, quaesumus, famulum tuum N. a peccatis suis in sanguine Christi, ut, quem mundasti aqua baptismatis, indesinenter purifices indulgentia pietatis.

[D3102pc] Sumpto sacramento Unigeniti tui, qui pro nobis immolatus resurrexit in gloria, te, Domine, suppliciter exoramus pro famulo tuo N., ut, paschalibus mysteriis mundatus, futurae resurrectionis munere glorietur.

[D3103ai] Venite, benedicti Patris mei, dicit Dominus: percipite regnum, quod vobis paratum est ab origine mundi (T.P. alleluia).

[D3104co] Clementissime Deus, qui sapientiae tuae consiliis hunc parvulum, in ipso vitae limine, ad te vocasti, preces nostras benignus exaudi, et praesta, ut cum ipso, quem baptismatis gratia adoptionis tibi filium effecisti, et in regno tuo iam credimus commorari, nos etiam aeternae vitae tribuas esse aliquando consortes.

[D3105so] Haec munera tibi, Domine, oblata sanctifica, ut, quem parentes a te donatum tibi reddunt infantem, ipsum laeti in regno tuo mereantur amplecti.

[D3106am] Consepulti cum Christo per baptismum in mortem, credimus quia simul etiam vivemus cum Christo (T.P. alleluia).

[D3107pc] Corporis, Domine, et Sanguinis Filii tui communione percepta, te fideliter deprecamur, ut, quos in spem vitae aeternae sacris dignatus es nutrire mysteriis, in huius tribuas vitae maeroribus confortari.

[D3108co] Deus, qui maerore scis corda nostra comprimi propter huius infantis excessum, praesta, ut, quem iam hac vita defunctum, te disponente, deflemus, aeternam in caelo sedem credamus adeptum.

[D3109so] Hanc oblationem, Deus, dignare in nostrae signum devotionis excipere, ut, qui tuae providentiae consiliis submittimur confidentes, tuae quoque pietatis dulcedine sublevemur.

[D3110pc] Divino munere satiati, te, Domine, deprecamur, ut, qui hunc infantem ad mensam tribuis regni caelestis accumbere, eandem et nos participare concedas.

[D3111ai] Absterget Deus omnem lacrimam ab oculis eorum, et mors ultra non erit, neque luctus, neque clamor, neque dolor erit ultra, quia prima transierunt.

[D3112co] Fidelium tuorum, Domine, suscipe vota, ut, quos permittis infantis sibi erepti desiderio deprimi, eosdem concedas in tuae spem miserationis fidenter attolli.

[D3113co] Scrutator cordium, Deus, et piissime consolator, qui horum parentum fidem novisti, praesta, ut infantem suum, quem plorant hac vita defunctum, tuae sentiant divinae pietati commissum.

[D3114so] Hanc oblationem, Deus, dignare in nostrae signum devotionis excipere, ut, qui tuae providentiae consiliis submittimur confidentes, tuae quoque pietatis dulcedine sublevemur.

[D3115am] Praecipitabit Dominus mortem in sempiternum, et auferet Deus lacrimam ab omni facie.

[D3116pc] Corporis, Domine, et Sanguinis Filii tui communione percepta, te fideliter deprecamur, ut, quos in spem vitae aeternae sacris dignatus es nutrire mysteriis, in huius tribuas vitae maeroribus confortari.

[D3117ai] Absterget Deus omnem lacrimam ab oculis eorum, et mors ultra non erit, neque luctus, neque clamor, neque dolor erit ultra, quia prima transierunt.

[D3118co] Deus, gloria fidelium et vita iustorum, cuius Filii morte et resurrectione redempti sumus, propitiare famulo tuo N., ut, qui resurrectionis nostrae mysterium agnovit, aeternae beatitudinis gaudia percipere mereatur.

[D3119so] Munera, quaesumus, Domine, quae tibi pro anima famuli tui N. offerimus, placatus intende, ut, remediis purgata caelestibus, in tua gloria semper viva sit et beata.

[D3120am] Ego sum resurrectio et vita, dicit Dominus. Qui credit in me, habet vitam aeternam, et in iudicium non venit, sed transiet de morte ad vitam.

[D3121pc] Sacris reparati mysteriis, te, Domine, suppliciter exoramus, ut famulus N., a delictis omnibus emundatus, aeterno resurrectionis munere ditari mereatur.

[D3122ai] Domine Iesu, concede requiem aeternam eis, pro quibus tuum pretiosum effudisti sanguinem.

[D3123co] Quaesumus, Domine, ut famulo tuo N., cuius corporis depositionis diem commemoramus, rorem misericordiae tuae perennem infundas, et Sanctorum tuorum largiri digneris consortium.

[D3124so] Adesto, Domine, supplicationibus nostris pro famulo tuo N., cuius mortis hodie annua dies agitur, ut, per hoc sacrificium propitiationis et laudis, eum Sanctorum tuorum consortio sociare digneris.

[D3125am] Qui es, Domine, requies post laborem, qui es vita post mortem, tu dona eis requiem sempiternam.

[D3126pc] Precibus nostris et sacrificiis, Domine, pro anima famuli tui N. benigne susceptis, te supplices deprecamur, ut, si quae ei maculae peccati adhaeserunt, remissionis tuae misericordia deleantur.

[D3127ai] Deus, qui suscitavit Iesum a mortuis, vivificabit et mortalia corpora nostra, propter inhabitantem Spiritum eius in nobis, alleluia.

[D3128co] Omnipotens et misericors Deus, cuius Filius voluntarie pro nobis carnis subiit mortem, concede propitius famulo tuo N. admirabili eius resurrectionis victoriae sociari.

[D3129so] Omnipotens et misericors Deus, his sacrificiis ablue, quaesumus, animam famuli tui N. a peccatis suis in sanguine Christi, ut, quem aqua baptismatis mundasti, indesinenter purifices indulgentia pietatis.

[D3130am] Ego sum panis vivus, qui de caelo descendi, dicit Dominus. Si quis manducaverit ex hoc pane, vivet in aeternum; et panis, quem ego dabo, caro mea est pro mundi vita, alleluia.

[D3131pc] Sumpto sacramento Unigeniti tui, qui pro nobis immolatus resurrexit in gloria, te, Domine, suppliciter exoramus pro famulo tuo N., ut, paschalibus mysteriis emundatus, futurae resurrectionis munere glorietur.

[D3132co] Concede, quaesumus, Domine, per beatam Filii tui passionem, famulo tuo N. remissionem, quam semper optavit, peccatorum, ut, te in veritate cognoscens, visione tua iugiter perfrui mereatur.

[D3133so] Sacrificium tibi, Domine, pro famulo tuo N. suppliciter offerimus, ut, qui te iam dono tuae illuminationis agnovit, tibi adhaerere perpetuo laetetur.

[D3134pc] Repleti alimonia reparationis et vitae, quaesumus, Domine, ut per eam frater noster N., ab omnibus peccatis emundatus, ad caeleste valeat transire consortium.

[D3135co] Deus indulgentiarum, da animae famuli tui N., cuius corporis anniversarium depositionis diem celebramus, refrigerii sedem, quietis beatitudinem et luminis claritatem.

[D3136so] Supplicatio tibi nostra, Domine, et grata pariter exsistat oblatio, ut famulo tuo N., pro cuius salute defertur, plenitudinem tuae redemptionis acquirat.

[D3137pc] Praesta, quaesumus, omnipotens Deus, ut anima famuli tui N., pro qua hoc sacrificium tuae obtulimus maiestati, per huius virtutem sacramenti a peccatis omnibus expiata, lucis perpetuae, te miserante, recipiat beatitudinem.

[D3138ai] Aperiat ei Dominus paradisi ianuam, ut ad illam patriam revertatur, ubi mors non est, ubi gaudium aeternum perseverat.

[D3139co] Deus, Pater omnipotens, qui nos crucis mysterio confirmasti et Filii tui resurrectionis sacramento signasti, concede propitius famulo tuo N., ut, electorum tuorum aggregetur consortio.

[D3140co] Inclina, Domine, aurem tuam ad preces nostras, quibus misericordiam tuam supplices deprecamur, ut famulus tuus N., quem in hoc saeculo tuo populo misericorditer aggregasti, in pacis ac lucis regione constituas, et Sanctorum tuorum concedas esse consortem.

[D3141so] Propitiare, quaesumus, Domine, famulo tuo N., pro quo hostiam tibi laudis immolamus, te suppliciter deprecantes, ut, per haec piae placationis officia, resurgere mereatur ad vitam.

[D3142am] Omne quod dat mihi Pater, ad me veniet, dicit Dominus, et eum qui venit ad me, non eiciam foras.

[D3143pc] Vitalibus refecti sacramentis, quaesumus, Domine, ut anima fratris nostri N., quam testamenti tui participem effecisti, huius mysterii purificata virtute, in pace Christi sine fine laetetur. Qui vivit et regnat in saecula saeculorum.

[D3144ai] Scio quod Redemptor meus vivit, et in novissimo die de terra surrecturus sum, et in carne mea videbo Deum meum.

[D3145co] Absolve, quaesumus, Domine, famulum tuum N. ab omni vinculo delictorum, ut, qui in hoc saeculo Christo meruit conformari, in resurrectionis gloria inter Sanctos tuos resuscitatus respiret.

[D3146so] Annue nobis, quaesumus, Domine, ut famulo tuo N. haec prosit oblatio, quam immolando, totius mundi tribuisti relaxari delicta.

[D3147am] Hic est panis de caelo descendens, dicit Dominus; si quis ex ipso manducaverit, non morietur in aeternum.

[D3148pc] Prosit, quaesumus, Domine, animae famuli tui N. sacrificium Ecclesiae tuae, ut, cum Sanctis tuis, Christi consortium inveniat, cuius misericordiae consecuta est sacramentum.

[D3149co] Deus, apud quem mortui vivunt et in quo Sancti tui plena felicitate laetantur, praesta supplicantibus nobis, ut famulus tuus N., qui nunc temporali huius mundi lumine caret, aeternae tuae lucis solatio perfruatur.

[D3150so] Placeat tibi, Domine, sacrificii praesentis oblatio, ut anima famuli tui N., peccatorum veniam, quam quaesivit, te miserante inveniens, cum Sanctis tuis semper exsultet, et gloriam tuam in aeternum collaudet.

[D3151pc] Sumentes dona caelestia, gratias tibi, Domine, referimus, humiliter deprecantes, ut anima famuli tui N., per Filii tui passionem a peccatorum vinculis absoluta, feliciter valeat ad te pervenire.

[D3152co] Ascendant ad te, Domine, preces nostrae, et animam famuli tui N. gaudia aeterna suscipiant, ut, quem ad imaginem tuam creare dignatus es et adoptionis participem fecisti, iubeas hereditatis tuae esse consortem.

[D3153so] Oblationem nostram, quaesumus, Domine, quam pro anima famuli tui N. fidenter exhibemus, placatus accipias, ut ei per hoc sacrificium, quod cunctis esse remedium singulare voluisti, salutem tribuas sempiternam.

[D3154pc] Recreati sacri muneris alimonia, quaesumus, Domine, ut frater noster N., mortis vinculis absolutus, resurrectionis Filii tui participatione laetetur.

[D3155co] Inclina, Domine, precibus nostris aures tuae pietatis, et animae famuli tui N. remissionem omnium tribue peccatorum, ut in resurrectionis die vivat, et in lucis amoenitate requiescat.

[D3156so] Omnipotens sempiterne Deus, cuius Filius panem vitae nobis praebuit semetipsum, et sanguinem suum in poculum salutis effudit, miserere famuli tui N., ut, quod tibi offerimus, sit illi causa salutis.

[D3157pc] Aeternae pignus vitae capientes, te, Domine, humiliter imploramus pro anima famuli tui N., ut, mortalibus nexibus expedita, redemptorum possit adunari consortio.

[D3158ai] Dona eis, Domine, requiem sempiternam et imple splendoribus animas eorum.

[D3159co] Deus, qui Unigenitum tuum, devicta morte, ad caelestia transire fecisti, concede famulis tuis (N. et N.), ut, huius vitae mortalitate devicta, te conditorem et redemptorem possint perpetuo contemplari.

[D3160so] Hostias, quaesumus, Domine, quas tibi pro animabus famulorum tuorum offerimus, propitiatus intende, ut, quibus fidei christianae meritum contulisti, dones et praemium.

[D3161am] Filium suum Unigenitum misit Deus in mundum, ut vivamus per eum.

[D3162pc] Multiplica, Domine, his sacrificiis susceptis, super famulos tuos defunctos misericordiam tuam, et, quibus donasti baptismi gratiam, da eis aeternorum plenitudinem gaudiorum.

[D3163ai] Sic Deus dilexit mundum, ut Filium suum Unigenitum daret; ut omnis qui credit in ipsum, non pereat, sed habeat vitam aeternam.

[D3164co] Omnipotens sempiterne Deus, vita mortalium et exsultatio Sanctorum, te supplices exoramus pro famulis tuis (N. et N.), ut, mortalitatis nexibus expediti, regnum tuum in gloria possideant sempiterna.

[D3165so] Pro famulis tuis (N. et N.)et omnibus in Christo dormientibus hostiam, Domine, suscipe benignus oblatam, ut, per hoc sacrificium singulare vinculis mortis exuti, vitam mereantur aeternam.

[D3166am] Salvatorem exspectamus Dominum nostrum Iesum Christum, qui reformabit corpus humilitatis nostrae configuratum corpori claritatis suae.

[D3167pc] Divina participantes mysteria, quaesumus, omnipotens Deus, ut haec eadem nobis proficiant ad salutem, et animabus famulorum tuorum, pro quibus tuam deprecamur clementiam, prosint ad veniam.

[D3168ai] Beati mortui, qui in Domino moriuntur. Amodo requiescant a laboribus suis: opera enim illorum sequuntur illos.

[D3169co] Deus, cuius miseratione animae fidelium requiescunt, famulis tuis (N. et N.)et omnibus in Christo quiescentibus da propitius veniam peccatorum, ut, a cunctis reatibus absoluti, Christi tui resurrectioni socientur. Qui tecum.

[D3170so] Munera, Domine, quaesumus, quae pro animarum famulorum tuorum requie offerimus, placatus intende, ut, per haec salutis humanae subsidia, tuorum numero redemptorum sorte perpetua censeantur.

[D3171am] Pro quorum memoria Corpus et Sanguis Christi sumitur, dona eis, Domine, requiem sempiternam.

[D3172pc] Sumpsimus, Domine, redemptionis sacramenta, tuam clementiam obsecrantes, ut, te miserante, nobis viventibus tutelam, et nostris defunctis veniam sempiternam obtineant.

[D3173ai] In te, Domine, speravi, non confundar in aeternum; in iustitia tua libera me.

[D3174co] Fidelium, Deus, omnium conditor et redemptor, famulis tuis remissionem cunctorum tribue peccatorum, ut indulgentiam, quam semper optaverunt, piis supplicationibus consequantur.

[D3175so] Propitiare, quaesumus, Domine, famulis tuis (N. et N.)pro quibus tibi hostias placationis offerimus, et, quia in fide catholica in hac luce permanserunt, in futura vita eis retributio condonetur.

[D3176am] Ego sum lux mundi, dicit Dominus; qui sequitur me, non ambulat in tenebris, sed habebit lumen vitae.

[D3177pc] Animabus famulorum tuorum, quaesumus, Domine, oratio proficiat supplicantium, ut eos, his sacrificiis, et a peccatis omnibus exuas, et aeternae salvationis facias esse participes.

[D3178ai] Laetetur cor quaerentium Dominum; quaeritis Dominum et confirmamini, quaerite faciem eius semper.

[D3179co] Omnipotens sempiterne Deus, qui vivorum dominaris simul et mortuorum, omniumque misereris, te suppliciter exoramus, ut, pro quibus effundimus preces, pietatis tuae clementia delictorum suorum veniam consequantur, et de te beati congaudeant ac te sine fine collaudent.

[D3180so] Huius sacrificii, Deus, oblatione suscepta, da famulis tuis (N. et N.)abundantiae Christi divitiarum esse participes, ut cum eodem Filio tuo resuscitari valeant et ad eius dexteram collocari.

[D3181am] Illumina faciem tuam super servum tuum, et salvum me fac in tua misericordia. Domine, non confundar, quoniam invocavi te.

[D3182pc] Exaudi, Deus, tuos sacramento salutis filios enutritos, et, qui Christum Unigenitum tuum per Sanctum Spiritum e mortuis suscitasti, fidelibus tuis (N. et N.)immortalitatis et vitae concede laetitiam.

[D3183ai] Respice, Deus, in faciem Christi tui, quia melior est dies una in atriis tuis super millia.

[D3184co] Quaesumus, Domine, famulis tuis defunctis misericordiam concede perpetuam, ut eis proficiat in aeternum quod in te speraverunt et crediderunt.

[D3185so] Famulos tuos (N. et N.), Domine, ab omnibus vitiis condicionis humanae sacrificium hoc absolvat, quo peccata mundi abstulit universa Filius tuus pro nobis innocens immolatus.

[D3186am] Quemadmodum desiderat cervus ad fontes aquarum, ita desiderat anima mea ad te, Deus: sitivit anima mea ad Deum fortem vivum.

[D3187pc] Inveniant, quaesumus, Domine, famuli tui, omnesque in Christo quiescentes, lucis aeternae consortium, qui, in hac luce positi, tuum consecuti sunt sacramentum.

[D3188co] Propitiare, Domine, famulis tuis (N. et N.), ut, quos regenerationis fonte mundasti, ad caelestis vitae beatitudinem facias pervenire.

[D3189so] Pro famulis tuis (N. et N.), Domine, tibi sacrificium offerentes, supplices exoramus, ut ad tuam misericordiam illis conferendam perpetuam dignanter vota nostra perficias.

[D3190pc] Sumptis, Domine, caelestibus sacramentis, tuam clementiam humiliter deprecamur, ut famuli tui, percipientes hoc munere veniam peccatorum, regnum tuum introire, teque in aeternum mereantur collaudare.

[D3191co] Tibi, Domine, commendamus famulos tuos (N. et N.), ut defuncti saeculo tibi vivant, et quae, per fragilitatem carnis, peccata in mundi conversatione commiserunt, tu venia misericordissimae pietatis absterge.

[D3192so] Propitiare, quaesumus, Domine, famulis tuis (N. et N.), pro quibus tibi hostias placationis offerimus, et quia in hac vita tibi manserunt fideles, apud te pia illis retributio donetur.

[D3193pc] Praesta, quaesumus, omnipotens Deus, ut famulos tuos, per huius sacramenti virtutem, in congregatione iustorum aeternae beatitudinis iubeas esse consortes.

[D3194co] Omnipotens sempiterne Deus, cui numquam sine spe misericordiae supplicatur, propitiare famulis tuis (N. et N.), ut, qui de hac vita in tui nominis confessione discesserunt, Sanctorum tuorum numero facias aggregari.

[D3195so] Domine Deus, cuius Filius se tibi obtulit hostiam vivam, accipe, quaesumus, Ecclesiae tuae sacrificium, ut famuli tui (N. et N.), a peccatis omnibus absoluti, ad praemium immortalitatis mereantur pertingere.

[D3196pc] Purificent nos, quaesumus, omnipotens et misericors Deus, sacramenta quae sumpsimus, et praesta, ut hoc sacrificium sit nobis intercessio ad veniam, sit fortitudo fragilium, sit in periculis firmamentum, sit vivis atque defunctis remissio omnium peccatorum, et pignus redemptionis aeternae.

[D3197co] Deus, fidelis remunerator animarum, praesta, ut defunctus famulus tuus Papa N., quem Petri constituisti successorem et Ecclesiae tuae pastorem, gratiae et miserationis tuae mysteriis, quae fidenter dispensavit in terris, laetanter apud te perpetuo fruatur in caelis.

[D3198so] Quaesumus, Domine, ut, per haec piae placationis officia, animam famuli tui Papae N. beata retributio comitetur, et misericordia tua nobis gratiae dona conciliet.

[D3199pc] Divinae tuae communionis refecti sacramentis, quaesumus, Domine, ut famulus tuus Papa N., quem Ecclesiae tuae visibile voluisti fundamentum unitatis in terris, beatitudini gregis tui feliciter aggregetur.

[D3200co] Deus, qui Ecclesiae tuae famulum tuum Papam N. ineffabili tua dispositione praeesse voluisti, praesta, quaesumus, ut, qui Filii tui vices gerebat in terris, ab ipso in gloria recipiatur aeterna.

[D3201so] Munera, Domine, supplicantis Ecclesiae respice propitius, et, huius sacrificii virtute, concede, ut famulus tuus Papa N., quem sacerdotem magnum tuo gregi praefecisti, in electorum tuorum numero constituas sacerdotum.

[D3202pc] Caritatis tuae, Domine, sumentes sacra subsidia, quaesumus, ut famulus tuus Papa N. misericordiam tuam in Sanctorum gloria perpetuo collaudet, qui fidelis exstitit mysteriorum tuorum dispensator in terris.

[D3203co] Deus, immortalis pastor animarum, respice populum supplicantem, et praesta, ut famulus tuus Papa N., qui Ecclesiae tuae in caritate praefuit, fidelis dispensatoris remunerationem cum grege sibi credito misericorditer consequatur.

[D3204so] Oblationem pacificam populi tui, quaesumus, Domine, propitius intuere, qua animam famuli tui Papae N. tuae misericordiae fidenter committimus, et praesta, ut, quae tuae caritatis et pacis in humana familia fuit instrumentum, earum fructu cum Sanctis tuis perpetuo laetari mereatur.

[D3205pc] Ad mensam aeterni accedentes convivii, misericordiam tuam, Domine, pro anima famuli tui Papae N. suppliciter imploramus, ut veritatis possessione tandem congaudeat, in qua populum tuum fidenter confirmavit.

[D3206co] Da, quaesumus, omnipotens Deus, ut anima famuli tui N. episcopi, cui familiae tuae curam tradidisti, cum multiplici laboris fructu gaudia Domini sui ingrediatur aeterna.

[D3207so] Immensam clementiam tuam, Domine, suppliciter imploramus, ut hoc sacrificium, quod famulus tuus N. episcopus, dum esset in corpore, maiestati tuae pro salute fidelium obtulit, ipsi nunc prosit ad veniam.

[D3208pc] Prosit, quaesumus, Domine, animae famuli tui N. episcopi misericordiae tuae implorata clementia, ut Christi, in quo speravit et quem praedicavit, aeternum capiat, his sacrificiis, consortium.

[D3209co] Deus, qui inter apostolicos sacerdotes famulum tuum N. episcopum (vel cardinalem)pontificali fecisti dignitate vigere, praesta, quaesumus, ut eorum quoque perpetuo aggregetur consortio.

[D3210so] Suscipe, Domine, quaesumus, pro anima famuli tui N. episcopi (vel cardinalis)quas tibi offerimus hostias, ut, cui in hoc saeculo pontificale donasti meritum, in caelesti regno Sanctorum tuorum iubeas iungi consortio.

[D3211pc] Quaesumus, omnipotens et misericors Deus, ut famulum tuum N. episcopum (vel cardinalem), quem in terris pro Christo legatione fungi tribuisti, his emundatum sacrificiis, consedere facias in caelestibus cum ipso.

[D3212co] Praesta, quaesumus, Domine, ut anima famuli tui N. sacerdotis, quem in hoc saeculo commorantem sacris muneribus decorasti, in caelesti sede gloriosa semper exsultet.

[D3213so] Concede, quaesumus, omnipotens Deus, ut famulus tuus N. sacerdos, per haec sancta mysteria, conspectu semper claro conspiciat quae hic fideliter ministravit.

[D3214pc] Sumptis salutaribus sacramentis, imploramus, Deus, clementiam tuam, ut famulum tuum N. sacerdotem, quem fecisti mysteriorum tuorum dispensatorem in terris, eorum facias in caelis aperta veritate nutriri.

[D3215co] Preces nostras, quaesumus, Domine, quas pro animae famuli tui N. sacerdotis salute suppliciter deferimus, propitiatus exaudi, ut, qui nomini tuo ministerium fidele dependit, perpetua Sanctorum tuorum societate laetetur.

[D3216so] Quaesumus, Domine, clementiam tuam, ut hoc sacrificium servitutis nostrae, pro anima famuli tui N. sacerdotis oblatum, ipsi nunc prosit ad veniam, quae illud in Ecclesia devota tibi mente exhibuit.

[D3217pc] Mensae caelestis alimonia refecti, te, Domine, suppliciter exoramus, ut, huius virtute sacrificii, anima famuli tui N. sacerdotis ante conspectum tuum semper exsultet, qui in Ecclesia tua fideliter ministravit.

[D3218co] Concede, quaesumus, misericors Deus, animae famuli tui N. diaconi felicitatis aeternae consortium, cui donasti in Ecclesia tua consequi ministerium.

[D3219so] Propitiare, Domine, famulo tuo N. diacono, pro cuius salute hoc tibi sacrificium offerimus, ut, sicut Christo Filio tuo ministravit in carne, cum fidelibus servis exsurgat in gloriam sempiternam.

[D3220pc] Muneribus sacris repleti, te, Domine, humiliter deprecamur, ut per hoc sacrificium famulum tuum N. diaconum, quem inter servos Ecclesiae tuae vocasti, a mortis vinculis absolutum, cum iis qui bene ministraverunt partem recipere et in gaudium tuum intrare benigne concedas.

[D3221co] Praesta, quaesumus, omnipotens Deus, ut anima famuli tui N., qui pro Christi amore perfectae caritatis viam percurrit, in adventu gloriae tuae laetetur, et cum fratribus suis de regni tui beatitudine gaudeat sempiterna.

[D3222co] Misericordiam tuam, Domine, pro famulo tuo N. supplices deprecamur, ut, qui pro Evangelio dilatando allaboravit assiduus, ad praemia regni mereatur intrare securus.

[D3223co] Deus, qui omnium hominum vitam moderaris et tempora, hunc famulum tuum N., quem consummatum in brevi deflemus, tibi humiliter commendamus, ut in beatitudine domus tuae perenni facias iuventute vigere.

[D3224co] Deus, qui famulo tuo N. dedisti in aerumnis tibi et infirmitate servire, concede, quaesumus, ut, qui Filii tui secutus est patientiae documentum, eiusdem gloriae consequatur et praemium.

[D3225co] Immensam, Domine, tuae bonitatis ostende virtutem, ut, qui fratrem nostrum N. repentina flemus morte sublatum, ad tuum confidamus transisse consortium.

[D3226co] Famulos tuos N. et N., quaesumus, Domine, miseratus absolve, ut, quos coniugalis amor in hac vita fideliter sociavit, in aeterna tuae caritatis plenitudo coniungat.

[D3227co] Famulum tuum (Famulam tuam)N., quaesumus, Domine, miseratus absolve, et famulam tuam (famulum tuum)N. continua pietate custodi, ut, quos coniugalis amor in hac vita fideliter sociavit, in aeterna tuae caritatis plenitudo coniungat.

[D3228co] Deus, qui nos patrem et matrem honorare praecepisti, miserere clementer patri et matri meae (parentibus nostris), eorumque peccata dimitte, meque (nosque)eos in aeternae claritatis gaudio fac videre.

[D3229so] Suscipe sacrificium, Domine, quod tibi pro patre et matre mea (parentibus nostris)offerimus eisque gaudium sempiternum in regione vivorum concede, meque (nosque)cum illis felicitati Sanctorum coniunge.

[D3230pc] Caelestis participatio sacramenti, quaesumus, Domine, patri et matri meis (parentibus nostris)requiem et lucem obtineat perpetuam, meque (nosque)cum illis gloria tua satiet sempiterna.

[D3231co] Deus, veniae largitor et humanae salutis amator, quaesumus clementiam tuam, ut nostrae congregationis fratres, propinquos et benefactores, qui ex hoc saeculo transierunt, beata Maria semper Virgine intercedente cum omnibus Sanctis tuis, ad perpetuae beatitudinis consortium pervenire concedas.

[D3232so] Deus, cuius misericordiae non est numerus, suscipe propitius preces humilitatis nostrae, et animabus fratrum, propinquorum et benefactorum nostrorum, per haec sacramenta salutis nostrae, cunctorum remissionem tribue peccatorum.

[D3233pc] Praesta, quaesumus, omnipotens et misericors Deus, ut animae fratrum, propinquorum et benefactorum nostrorum, pro quibus hoc sacrificium laudis tuae obtulimus maiestati, per huius virtutem sacramenti a peccatis omnibus expiatae, lucis perpetuae, te miserante, recipiant beatitudinem.

[Z3234mn] Dominum Deum nostrum, fratres carissimi, suppliciter deprecemur, ut hanc creaturam aquae benedicere dignetur, super nos aspergendam in nostri memoriam baptismi. Ipse autem nos adiuvare dignetur, ut fideles Spiritui, quem accepimus, maneamus.

[Z3235bn] Omnipotens sempiterne Deus, qui voluisti ut per aquam, fontem vitae ac purificationis principium, etiam animae mundarentur aeternaeque vitae munus exciperent, dignare, quaesumus, hanc aquam benedicere, qua volumus hac die tua, Domine, communiri. Fontem vivum in nobis tuae gratiae renovari et ab omni malo spiritus et corporis per ipsam nos defendi concedas, ut mundis tibi cordibus propinquare tuamque digne salutem valeamus accipere.

[Z3236bn] Domine Deus omnipotens, qui es totius vitae corporis et animae fons et origo, hanc aquam, te quaesumus, benedicas, qua fidenter utimur ad nostrorum implorandam veniam peccatorum et adversus omnes morbos inimicique insidias tuae defensionem gratiae consequendam. Praesta, Domine, ut, misericordia tua interveniente, aquae vivae semper nobis saliant in salutem, ut mundo tibi corde appropinquare possimus, et omnia corporis animaeque pericula devitemus.

[Z3237bn] Domine Deus omnipotens, precibus populi tui adesto propitius; et nobis, mirabile nostrae creationis opus, sed et redemptionis nostrae mirabilius, memorantibus, hanc aquam benedicere tu dignare. Ipsam enim tu fecisti, ut et arva fecunditate donaret, et levamen corporibus nostris munditiamque praeberet. Aquam etiam tuae ministram misericordiae condidisti; nam per ipsam solvisti tui populi servitutem, illiusque sitim in deserto sedasti; per ipsam novum foedus nuntiaverunt prophetae, quod eras cum hominibus initurus; per ipsam denique, quam Christus in Iordane sacravit, corruptam naturae nostrae substantiam in regenerationis lavacro renovasti. Sit igitur haec aqua nobis suscepti baptismatis memoria, et cum fratribus nostris, qui sunt in Paschate baptizati, gaudia nos tribuas sociare.

[Z3238bn] Supplices te rogamus, omnipotens Deus, ut hanc creaturam salis benedicere tua pietate digneris, qui per Eliseum prophetam in aquam mitti eam iussisti, ut sanaretur sterilitas aquae. Praesta, Domine, quaesumus, ut, ubicumque haec salis et aquae commixtio fuerit aspersa, omni impugnatione inimici depulsa, praesentia Sancti tui Spiritus nos iugiter custodiat.

[Z3239an] Asperges me, Domine, hyssopo et mundabor: lavabis me, et super nivem dealbabor.

[Z3240an] Effundam super vos aquam mundam, et mundabimini ab omnibus inquinamentis vestris, et dabo vobis cor novum, dicit Dominus.

[Z3241hy] Benedictus Deus et Pater Domini nostri Iesu Christi, qui secundum misericordiam suam magnam regeneravit nos in spem vivam, per resurrectionem Iesu Christi ex mortuis, in hereditatem incorruptibilem, in caelis conservatam nobis in salutem tempore novissimo revelandam!

[Z3242an] Vidi aquam egredientem de templo, a latere dextro, alleluia; et omnes, ad quos pervenit aqua ista, salvi facti sunt, et dicent: alleluia, alleluia.

[Z3243an] In die resurrectionis meae, dicit Dominus, alleluia, congregabo gentes et colligam regna, et effundam super vos aquam mundam, alleluia.

[Z3244an] Fontes et omnia, quae moventur in aquis, hymnum dicite Deo, alleluia.

[Z3245an] Vos genus electum, regale sacerdotium, gens sancta, virtutes annuntiate eius, qui de tenebris vos vocavit in admirabile lumen suum, alleluia.

[Z3246an] E latere tuo, Christe, fons aquae prorumpit, quo abluuntur mundi sordes et vita renovatur, alleluia.

[Z3247or] Deus omnipotens, nos a peccatis purificet, et per huius Eucharistiae celebrationem dignos nos reddat, qui mensae regni sui participes efficiamur.

[Z3248bn] Benedicat te Dominus ad Corpus Christi fratribus tuis nunc ministrandum.

[Z3249an] Calicem salutaris accipiam, et nomen Domini invocabo

[Z3250or] In altari tuo, Domine Deus, hunc calicem et hanc patenam ad novi foederis sacrificium celebrandum cum gaudio deponimus: Filii tui Corpus et Sanguis, quae in eis offeruntur et sumuntur, vasa haec sancta efficiant. Praesta, quaesumus, Domine, ut, sacrificia illibata celebrantes, tuis in terra reficiamur sacramentis tuoque imbuamur Spiritu, donec in regno caelorum tuo cum Sanctis fruamur convivio. Tibi gloria et honor in aeternum.

[Z3251fr] Benedictus Deus in saecula.

[Z3252an] Calicem salutaris accipiam, et sacrificabo hostiam laudis (T. P. alleluia).

[Z3253mn] Ad Deum Patrem omnipotentem, qui vult omnes homines salvos fieri et ad agnitionem veritatis venire, tota mentis nostrae, fratres carissimi, dirigatur oratio.

[Z3254fr] Praesta, omnipotens Deus.

[Z3255iv] Pro Ecclesia sancta Dei; ut eam Dominus custodire et fovere dignetur, Dominum deprecemur. Pro totius orbis populis; ut inter eos Dominus concordiam servare dignetur, Dominum deprecemur. Pro omnibus qui variis premuntur necessitatibus; ut omnes Dominus sublevare dignetur, Dominum deprecemur. Pro nobismetipsis ac pro nostra communitate; ut nos omnes Dominus hostiam sibi acceptabilem admittere dignetur, Dominum deprecemur.

[Z3256or] Deus, refugium nostrum et virtus, adesto piis Ecclesiae tuae precibus, auctor ipse pietatis, et praesta, ut, quod fideliter petimus, efficaciter consequamur.

[Z3257mn] Fratres, in hac publica et communi oratione quam nunc incipimus, non quisquis pro se, nec tantum pro necessariis suis, sed omnes pro toto populo oremus Christum Dominum.

[Z3258fr] Christe, audi nos. Exaudi, Christe.

[Z3259iv] Pro cuncto populo christiano, divinae bonitatis abundantiam deprecemur. Pro omnibus nondum credentibus, largitorem spiritalium munerum imploremus. Pro rei publicae moderatoribus, Domini potentiam imploremus. Pro aeris temperie ac fructuum ubertate, rectorem mundi Dominum imploremus. Pro fratribus nostris, qui huic sacro coetui interesse non possunt, inspectorem omnium imploremus. Pro refrigerio fidelium animarum, universae carnis iudicem imploremus. Pro nobis omnibus plena fide supplicantibus et Domini misericordiam poscentibus, Salvatoris clementiam imploremus. Pro nobis et necessariis nostris bonitatem Domini exspectantibus, Christi Domini misericordiam imploremus.

[Z3260or] Precibus nostris, quaesumus, Domine, aures tuae pietatis accommoda, et orationes supplicum benignus exaudi.

[Z3261mn] Adventum Domini nostri Iesu Christi, fratres carissimi, votis omnibus praestolantes, ipsius misericordiam impensius imploremus, ut, sicut ipse ad evangelizandum pauperibus et sanandos contritos corde venit in mundum, ita, nostris quoque temporibus, cunctis egentibus velit praebere salutem.

[Z3262iv] Ut Ecclesiam suam sanctam visitet semperque custodiat, Dominum deprecemur. Ut Romanum Pontificem, Antistitem nostrum, universumque ordinem episcopatus donis repleat spiritualium gratiarum, Dominum deprecemur. Ut tempora nostra sint, ipsius protectione, tranquilla, Dominum deprecemur. Ut mentes eorum, qui nos in potestate regunt, secundum voluntatem suam dirigat ad omnium bonum promovendum, Dominum deprecemur. Ut morbos auferat, famem depellat, omnemque tribulationem avertat, Dominum deprecemur. Ut omnes persecutione vexatos misericorditer liberare dignetur, Dominum deprecemur. Ut caritatis suae testes coram omnibus hominibus in veritate maneamus, Dominum deprecemur. Ut nos in suo adventu vigilantes inveniat, Dominum deprecemur.

[Z3263or] Omnipotens sempiterne Deus, qui salvas omnes et neminem vis perire, exaudi preces populi tui et praesta, ut et mundi cursus pacifico nobis tuo ordine dirigatur, et Ecclesia tua tranquilla devotione laetetur.

[Z3264mn] Hac die (hac nocte, hoc tempore), fratres carissimi, qua apparuit benignitas et humanitas Salvatoris nostri Dei, non in operibus iustitiae nostrae, sed in eius misericordia confidentes, preces Deo nostro supplices effundamus.

[Z3265fr] Domine, miserere.

[Z3266iv] Pro Ecclesia Dei; ut integra fide sustineat et laetanter excipiat quem immaculata Virginitas verbo concepit et ineffabiliter generavit, Dominum deprecemur. Pro universi orbis profectu et tranquillitate; ut temporale donum in praemium transeat sempiternum, Dominum deprecemur. Pro iis, qui fame, infirmitate vel solitudine tribulantur; ut per mysterium Nativitatis (manifestationis)Christi tam mente quam corpore subleventur, Dominum deprecemur. Pro congregationis nostrae familiis; ut Christum recipientes, illum etiam in pauperibus discant excipere, Dominum deprecemur.

[Z3267or] Quaesumus, Domine Deus noster, ut fidelium tuorum supplicationes apud te ipsa commendet, quae Deum et hominem castis visceribus meruit baiulare.

[Z3268mn] Omni quidem tempore, fratres carissimi, preces debemus effundere; sed in his praecipue diebus Quadragesimae vigilantius cum Christo et instantius ad Deum orationes dirigere nos oportet.

[Z3269iv] Pro universo populo christiano, ut ex omni verbo quod procedit de ore Dei in hoc sacro tempore uberius nutriatur, Dominum deprecemur. Pro universo mundo, ut, tranquillitate et pace servata, vere fiant dies nostri acceptabile tempus gratiae et salutis, Dominum deprecemur. Pro peccatoribus et neglegentibus, ut hoc propitiationis tempore revertantur ad ipsum, Dominum deprecemur. Pro nobismetipsis, ut in praecordiis nostris tandem detestationem nostrorum suscitet peccatorum, Dominum deprecemur.

[Z3270or] Da, quaesumus, Domine, populum tuum ad te toto corde converti, ut, quod audet congruis orationibus postulare, tua miseratione percipiat.

[Z3271mn] Appropinquante, dilectissimi, sollemnitate paschali, Dominum impensius imploremus, ut et nos omnes, et baptizatorum multitudo, et mundus universus, abundantius huius sacri mysterii participes evadamus.

[Z3272iv] Ut catechumenis proxima sollemnitate paschali sacro baptismo initiandis, fidem et intellectum augere dignetur, Dominum exoremus. Ut, adiutis populis qui subsidio egeant alieno, pax et securitas ubique stabilitate firmentur, Dominum exoremus. Ut omnes afflicti et tentati ipsius gratia roborentur, Dominum exoremus. Ut nos omnes discamus fructum abstinentiae in bonum indigentium erogare, Dominum exoremus.

[Z3273or] Miserere, Domine, deprecantis Ecclesiae, et quae inclinantur tibi corda propitiatus intende, ut, quos divini mysterii tribuis esse participes, numquam tuis destituantur auxiliis.

[Z3274mn] Hoc Passionis tempore, quo Christus Patri suo preces supplicationesque cum clamore valido et lacrimis obtulit, Deum humiles exoremus, ut, pro reverentia Filii sui, preces quoque nostras clementer exaudiat.

[Z3275iv] Ut Sponsa Christi Ecclesia, hoc Passionis tempore, ipsius sanguine plenius emundetur, Dominum deprecemur. Ut per sanguinem Crucis Christi omnia in mundo pacificari valeant in salutem, Dominum deprecemur. Ut omnibus qui infirmitate et laboribus sunt Passionis Christi participes, fortitudinem et patientiam largiatur, Dominum deprecemur. Ut omnes per dominicam Passionem et Crucem ad Resurrectionis gloriam perducamur, Dominum deprecemur.

[Z3276or] Adesto, Domine, tuo populo supplicanti, ut, quod propria fiducia non praesumit, Passionis Filii tui meritis consequatur.

[Z3277mn] In hoc paschali gaudio, fratres carissimi, Deum instantius exoremus, ut, qui preces supplicationesque dilecti Filii sui propitius exaudivit, humilitatem quoque nostram dignetur aspicere.

[Z3278iv] Pro pastoribus animarum nostrarum, ut gregem ipsis a Pastore bono commissum regere valeant providenter, Dominum deprecemur. Pro universo mundo, ut pace a Christo donata veraciter perfruatur, Dominum deprecemur. Pro fratribus nostris afflictis, ut eorum tristitia vertatur in gaudium, quod nemo ab eis tollere possit, Dominum deprecemur. Pro congregatione nostra, ut testimonium Resurrectionis Christi cum fiducia magna perhibeat, Dominum deprecemur.

[Z3279or] Deus, qui praesentium hominum vitam agnoscis diversarum necessitatum passionibus subiacere, exaudi desideria supplicantium, suscipe vota credentium.

[Z3280mn] In unum congregati, fratres carissimi, ad Dei nostri beneficia recolenda, rogemus eum, ut ipse nobis vota subiciat, quae digne possit audire.

[Z3281iv] Pro Pontifice nostro N., et Antistite nostro N., et omni clero cum populo ipsorum gubernaculis commendato, Dominum deprecemur. Pro moderatoribus rerum publicarum eorumque ministris bonum commune curantibus, Dominum deprecemur. Pro navigantibus, iter agentibus, et captivis vel in carceribus detentis, Dominum deprecemur. Pro nobis omnibus fide, devotione et Dei dilectione ac timore in hac aula sacratissima congregatis, Dominum deprecemur.

[Z3282or] Fiant, Domine, tuo grata conspectui vota supplicantis Ecclesiae, ut tua nobis misericordia conferatur quod nostrorum non habet fiducia meritorum.

[Z3283mn] Omnes huc convenimus, fratres carissimi, ad Redemptionis nostrae recolenda mysteria; rogemus ergo Deum omnipotentem, ut mundus universus his totius benedictionis et vitae fontibus irrigetur.

[Z3284iv] Pro omnibus qui seipsos Deo voverunt, ut, illo adiuvante, propositum suum in fidelitate custodiant, Dominum exoremus. Pro pace gentium, ut, omni perturbatione remota, liberis ipsi mentibus populi servire mereantur, Dominum exoremus. Pro senibus, qui solitudine vel infirmitate laborant, ut fraterna nostra caritate firmentur, Dominum exoremus. Pro nobis hic congregatis, ut sic sciamus bonis uti praesentibus, quibus nos Deus fovere non desinit, ut iam possimus inhaerere perpetuis, Dominum exoremus.

[Z3285or] Adsit, Domine, quaesumus, propitiatio tua populo supplicanti, ut, quod te inspirante fideliter expetit, tua celeri largitate percipiat.

[Z3286mn] Deum Patrem omnipotentem, qui Christum Filium suum suscitavit a mortuis, pro salute vivorum atque mortuorum fideliter invocemus.

[Z3287iv] Ut populum christianum in fide et unitate stabiliat, Dominum deprecemur. Ut ab omni bellorum nequitia orbem eruat universum, Dominum deprecemur. Ut fratribus qui carent opere, victu vel tecto, se patrem dignetur ostendere, Dominum deprecemur. Ut huic defuncto N., qui olim per Baptismum aeternae vitae semen accepit, perpetuam velit societatem donare sanctorum, Dominum deprecemur. Ut eum, qui manducavit Corpus Christi, panem vitae aeternae, resuscitet in novissimo die, Dominum deprecemur. Ut eum, qui in Ecclesia sacerdotii munus exercuit, faciat caelestis participem liturgiae, Dominum deprecemur. Ut animabus fratrum, propinquorum et benefactorum nostrorum mercedem laboris attribuat, Dominum deprecemur. Ut omnes, qui dormierunt in spe resurrectionis, in lumine sui vultus accipiat, Dominum deprecemur. Ut fratres nostros, qui in afflictione versantur, adiuvet et propitius consoletur, Dominum deprecemur. Ut omnes, qui huc in fide et devotione convenerunt, in gloriosum suum regnum congregare dignetur, Dominum deprecemur.

[Z3288or] Animabus, quaesumus, Domine, famulorum tuorum oratio proficiat supplicantium, ut eas et a peccatis omnibus exuas, et tuae redemptionis facias esse participes.

[Z3289vd] Domine, Pater bone, qui nos congregasti in unum, coram te sistimus, ut te celebremus, et, quantum animi nostri mirentur, fateamur. Tibi laus pro pulchritudine, quae in universo est orbe, et pro gaudio, quod cordibus nostris infundis. Tibi laus pro luce diei atque pro verbo, quo mentes nostras illuminas. Tibi laus pro terra et pro hominibus, qui eam inhabitant, et pro vita, quam a te nobis datam cognoscimus. Vere bonus es tu, qui nos amas et mirabilia pro nobis operaris. Quapropter simul tibi omnes cantamus:

[Z3290fr] Sanctus, Sanctus, Sanctus Dominus Deus Sabaoth.

[Z3291pe] Tu, Pater, qui semper de hominibus cogitas, nec illis usquam desinis adesse, misisti nobis Filium tuum dilectum; qui nosmet venit salvare, curavit infirmos, peccatoribus veniam tribuit; omnibus amorem tuum ostendit, parvulos suscepit et benedixit. Grato ergo animo acclamemus:

[Z3292fr] Pleni sunt caeli et terra gloria tua. Hosanna in excelsis.

[Z3293pe] Clementissime Pater, non soli sumus in tuis laudibus celebrandis, cum per totum orbem terrarum te populus tuus glorificet. Te ergo precamur cum universa Ecclesia, cum Papa nostro N. et Episcopo nostro N. In caelis autem beata Virgo Maria et Apostoli omnesque Sancti te sine fine collaudant. Cum quibus et cum Angelis te adoramus una voce dicentes:

[Z3294fr] Benedictus qui venit in nomine Domini. Hosanna in excelsis.

[Z3295pe] Pater sancte, gratias tibi referre volentes, panem et vinum attulimus; fac ut virtute Spiritus Sancti Corpus fiant et Sanguis Iesu Christi, dilectissimi Filii tui. Sic tibi offerre poterimus, quod tuo munere nobis praebetur.

[Z3296pe] Ipse enim, vespere facto, antequam pateretur, cum Apostolis suis convescens, accepit de mensa panem, et tibi gratias agens benedixit, fregit deditque discipulis suis dicens: Accipite et manducate ex hoc omnes hoc est enim Corpus meum, quod pro vobis tradetur.

[Z3297pe] Item, exeunte cena, accipiens calicem, vino repletum, tibi gratias agens benedixit deditque discipulis suis dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Deinde dixit ad eos: Hoc facite in meam commemorationem.

[Z3298pe] Quae igitur Iesus Christus nos facere mandavit, ea hic reverenter facimus; tibique panem vitae et calicem salutis offerimus mortem et resurrectionem annuntiantes ipsius. Qui nos ad te benignus adducit, suscipe nos, quaesumus, cum illo.

[Z3299pe] Christum, qui mortuus est pro nobis et resurrexit, exspectamus venientem in gloria. Mortem tuam annuntiamus, Domine, et tuam resurrectionem confitemur, donec venias. Quotiescumque manducamus panem hunc et calicem bibimus, mortem tuam annuntiamus, Domine, donec venias. Salvator mundi, salva nos, qui per crucem et resurrectionem tuam liberasti nos.

[Z3300pe] Pater, qui nos tantopere diligis, ad hanc tuam sine nos mensam accedere et mitte nobis Spiritum Sanctum ut, Filii tui Corpus et Sanguinem sumamus, et simus cor unum et anima una. Qui nullius umquam oblivisceris, Domine, te deprecamur pro eis, quos amamus pro papa nostro N. et episcopo nostro N., pro parentibus, fratribus et amicis et pro eis, qui in pace de hoc saeculo transierunt. Recordare omnium, qui affliguntur doloribus et contristantur, et familiae tuae christianae late diffusae, et cunctorum hominum, qui in toto sunt orbe terrarum. Cum autem videmus ea, quae nobis operaris per Iesum Christum Filium tuum, admiramur iterumque te collaudamus.

[Z3301vd] Vere, amantissime Pater, hoc gaudium nobis praebetur, ut tibi gratias agamus et una cum Iesu Christo in Ecclesia tua exsultemus. Sic nos dilexisti, ut pro nobis conderes hunc mundum immensum et pulchrum.

[Z3302fr] Gloria tibi, Domine, qui nos homines amas.

[Z3303pe] Sic nos diligis, ut nobis des Iesum Filium tuum, qui ad te nos adducat.

[Z3304fr] Gloria tibi, Domine, qui nos homines amas.

[Z3305pe] Sic nos diligis, ut in Christo nos congreges, et per Spiritum adoptionis unius familiae filios nos facias.

[Z3306fr] Gloria tibi, Domine, qui nos homines amas.

[Z3307pe] Pro tanti amoris dono tibi gratias agimus cum Angelis et Sanctis, qui te adorant, canentes:

[Z3308fr] Sanctus, Sanctus, Sanctus Dominus Deus Sabaoth. Pleni sunt caeli et terra gloria tua. Hosanna in excelsis. Benedictus qui venit in nomine Domini. Hosanna in excelsis.

[Z3309pe] Vere benedictus sit Iesus, missus a te, amicus parvulorum et pauperum. Ipse venit, ut nos doceret, te, Pater noster, et nosmetipsos ad invicem diligere. Ipse venit, ut a cordibus hominum peccatum et malum auferret, quod amicitiam impedit, et odium, quod non sinit esse felices. Ipse promisit Spiritum Sanctum cunctis diebus nobis adfuturum, ut de tu a vita tamquam filii viveremus.

[Z3310fr] Benedictus qui venit in nomine Domini. Hosanna in excelsis.

[Z3311pe] Te Deum, Patrem nostrum, rogamus mitte Spiritum tuum, ut haec dona panis et vini Corpus et Sanguis fiant Iesu Christi, Domini nostri.

[Z3312pe] Qui pridie quam pateretur infinitum tuum manifestavit amorem, in cena enim cum discipulis discumbens, accepit panem, gratias egit, fregit deditque eis dicens: Accipite et manducate ex hoc omnes: hoc est enim Corpus meum, quod pro vobis tradetur. Iesus Christus pro nobis traditus.

[Z3313pe] Item accepit calicem vino repletum, oravit tibi, gratias agens, et porrexit eis calicem, dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum.

[Z3314fr] Iesus Christus pro nobis traditus.

[Z3315pe] Deinde dixit ad eos: Hoc facite in meam commemorationem. Mysterium fidei.

[Z3316pe] Memores igitur sumus, amantissime Pater, mortis et resurrectionis Iesu, mundi Salvatoris, qui in manus nostras dedit se ipsum, ut esset hostia reconciliationis et pacis sacrificium nostrum, quo ad te traheremur.

[Z3317fr] Gloria et laus Deo nostro. Te laudamus, te benedicimus, tibi gratias agimus.

[Z3318pe] Exaudi nos, Domine Deus, et dona Spiritum tui amoris cunctis, qui de hoc participant convivio, ut in Ecclesia magis magisque sint unum, cum Papa nostro N. et Episcopo nostro N., ceterisque Episcopis et omnibus, qui plebi tuae ministrant.

[Z3319fr] Unum corpus, unus spiritus sint ad gloriam tuam, Domine.

[Z3320pe] Ne obliviscaris illorum, quos diligimus: parentum, fratrum et amicorum nostrorum et eorum, quos non satis amamus. Recordare etiam illorum, qui ex hac vita in pace migrarunt (N. et N.), eosque in gaudium domus tuae benignus admitte.

[Z3321fr] Unum corpus, unus spiritus sint ad gloriam tuam, Domine.

[Z3322pe] Ad te, Pater, nos quondam congrega, cum beata Virgine Maria, Matre Dei et nostra, ad diem aeternam in Regno tuo celebrandam, ubi omnes amici Iesu Christi, Domini nostri, laudis canticum tibi sine fine cantabunt.

[Z3323vd] Gratias agimus tibi, Deus, qui nos creasti, ut tibi viveremus, nos invicem fraterne diligentes. Tuum est munus quod mutuo contuentes et colloquentes, cuncta quae bona sunt, cuncta quae aspera, inter nos partiri valeamus.

[Z3324vd] Quia tu es Deus viventium, qui nos ad vitam vocasti et vis, ut felicitate aeterna fruamur. Primum quidem e nobis Iesum Christum suscitasti a mortuis novamque ei vitam donasti. Idem es nobis pollicitus vitam sine termino, sine miseriis, sine doloribus. De hoc, Pater, gavisi, et gratias referentes, cum omnibus, qui in te credunt, et cum Sanctis et Angelis confitemur in exsultatione dicentes: Sanctus.

[Z3325pe] Vere sanctus es, Domine, et erga nos omnes benignus, cunctisque hominibus clementiam tuam ostendis. Tibi gratias agimus, imprimis pro Filio tuo Iesu Christo. Qui in mundum venire dignatus est, quia dereliquerunt te homines propter peccatum neque amplius inter se eorum consentiunt animi. Ipse oculos nostros et aures aperuit, ut te Patrem omnium nostrum agnosceremus et nos alterutrum diligeremus.

[Z3326pe] Ipse nobis vitae nuntium attulit in splendoribus tuis apud te sine fine ducendae, et illius vitae viam nobis ostendit gressibus amoris percurrendam, in qua nos ipse praecessit.

[Z3327pe] Nunc autem Christus ad unam nos congregat mensam, volens ut faciamus, quod ipse antea fecit. Pater optime, haec dona panis et vini per virtutem Sancti Spiritus sanctificare digneris, ut nobis fiant Corpus et Sanguis Filii tui Iesu Christi.

[Z3328pe] Vespere enim illo, priusquam propter nos mortem subiret, cum discipulis suis postremum discumbens, accepit panem, gratias egit, fregit deditque eis dicens: Accipite et manducate ex hoc omnes: hoc est enim Corpus meum, quod pro vobis tradetur.

[Z3329pe] Similiter, accipiens calicem, vino repletum, gratias egit, deditque discipulis suis dicens: Accipite et bibite ex eo omnes: hic est enim calix Sanguinis mei novi et aeterni testamenti, qui pro vobis et pro multis effundetur in remissionem peccatorum. Deinde dixit ad eos: Hoc facite in meam commemorationem

[Z3330pe] Quapropter hic, Pater sancte, tibi astamus, cum gaudio memores eorum, quae Iesus Christus pro salute nostra est operatus. In hoc sancto sacrificio, quod ipse Ecclesiae suae commisit, mortem eius ac resurrectionem recolimus. Pater sancte, qui es in caelis, nos suscipe, quaesumus, una cum Filio tuo dilecto. Ipse mortem voluntarie pro nobis sustinuit. Tu autem eum resuscitasti; unde acclamemus:

[Z3331fr] Te Deum, qui bonus es, laudamus; tibi gratias agimus.

[Z3332pe] Qui cum apud te semper vivit, tamen nobiscum conversatur. In fine autem venturus est cum gloria, in cuius Regno non amplius erit, qui miseria affligatur, qui lacrimetur, qui tristitiam habeat, nec peccatum nec mors ultra dominabuntur. Pater sancte, qui nos vocasti, ut de hac mensa in laetitia Corpus Christi sumeremus, tribue, quaesumus, ut huius cibi virtute roborati, tibi magis magisque placeamus, et per communionem Spiritus Sancti unum corpus in caritate fiamus. Recordare, Domine, Papae nostri N., Episcopi nostri N., et ceterorum Episcoporum. Adiuva cunctos Christi discipulos, ut pacem concilient aliisque laetitiae donum impertiant. Tempore paschali sacerdos dicit:

[Z3333pe] Fac ut corda fidelium paschalibus gaudiis repleantur, et hanc laetitiam ad cunctos perferant homines, qui tristitiam habent.

[Z3334pe] Nobis omnibus concede, ut cum beata Virgine Maria, Matre Dei, cum Sancto N. et universis Sanctis, apud Christum in caelestibus quondam habitemus, et apud te simus cum illo in sempiternum.

[Z3335od] Ad mensam dulcissimi convivii tui, pie Domine Iesu Christe, ego peccator de propriis meis meritis nihil praesumens, sed de tua confidens misericordia et bonitate, accedere vereor et contremisco. Nam cor et corpus habeo multis criminibus maculatum, mentem et linguam non caute custoditam. Ergo, o pia Deitas, o tremenda maiestas, ego miser, inter angustias deprehensus, ad te fontem misericordiae recurro, ad te festino sanandus, sub tuam protectionem fugio; et, quem Iudicem sustinere nequeo, Salvatorem habere suspiro. Tibi, Domine, plagas meas ostendo, tibi verecundiam meam detego. Scio peccata mea multa et magna, pro quibus timeo: spero in misericordias tuas, quarum non est numerus. Respice ergo in me oculis misericordiae tuae, Domine Iesu Christe, Rex aeterne, Deus et homo, crucifixus propter hominem. Exaudi me sperantem in te: miserere mei pleni miseriis et peccatis, tu qui fontem miserationis numquam manare cessabis. Salve, salutaris victima, pro me et omni humano genere in patibulo Crucis oblata. Salve, nobilis et pretiose Sanguis, de vulneribus crucifixi Domini mei Iesu Christi profluens, et peccata totius mundi abluens. Recordare, Domine, creaturae tuae, quam tuo Sanguine redemisti. Paenitet me peccasse, cupio emendare quod feci. Aufer ergo a me, clementissime Pater, omnes iniquitates et peccata mea, ut, purificatus mente et corpore, digne degustare merear Sancta sanctorum. Et concede, ut haec sancta praelibatio Corporis et Sanguinis tui, quam ego indignus sumere intendo, sit peccatorum meorum remissio, sit delictorum perfecta purgatio, sit turpium cogitationum effugatio ac bonorum sensuum regeneratio, operumque tibi placentium salubris efficacia, animae quoque et corporis contra inimicorum meorum insidias firmissima tuitio.

[Z3336od] Omnipotens sempiterne Deus, ecce accedo ad sacramentum Unigeniti Filii tui, Domini nostri Iesu Christi, accedo tamquam infirmus ad medicum vitae immundus ad fontem misericordiae, caecus ad lumen claritatis aeternae, pauper et egenus ad Dominum caeli et terrae. Rogo ergo immensae largitatis tuae abundantiam, quatenus meam curare digneris infirmitatem, lavare foeditatem, illuminare caecitatem, ditare paupertatem, vestire nuditatem, ut panem Angelorum, Regem regum et Dominum dominantium, tanta suscipiam reverentia et humilitate, tanta contritione et devotione, tanta puritate et fide, tali proposito et intentione, sicut expedit saluti animae meae. Da mihi, quaeso, dominici Corporis et Sanguinis non solum suscipere sacramentum, sed etiam rem et virtutem sacramenti. O mitissime Deus, da mihi Corpus Unigeniti Filii tui, Domini nostri Iesu Christi, quod traxit de Virgine Maria, sic suscipere, ut corpori suo mystico merear incorporari et inter eius membra connumerari. O amantissime Pater, concede mihi dilectum Filium tuum, quem nunc velatum in via suscipere propono, revelata tandem facie perpetuo contemplari: Qui tecum vivit et regnat in saecula saeculorum.

[Z3337od] O Mater pietatis et misericordiae, beatissima Virgo Maria, ego miser et indignus peccator ad te confugio toto corde et affectu, et precor pietatem tuam, ut, sicut dulcissimo Filio tuo in Cruce pendenti astitisti, ita et mihi, misero peccatori, et sacerdotibus omnibus, hic et in tota sancta Ecclesia hodie offerentibus, clementer assistere digneris, ut, tua gratia adiuti, dignam et acceptabilem hostiam in conspectu summae et individuae Trinitatis offerre valeamus.

[Z3338fr] Ego volo celebrare Missam, et conficere Corpus et Sanguinem Domini nostri Iesu Christi, iuxta ritum sanctae Romanae Ecclesiae, ad laudem omnipotentis Dei totiusque Curiae triumphantis, ad utilitatem meam totiusque Curiae militantis, pro omnibus qui se commendaverunt orationibus meis in genere et in specie, et pro felici statu sanctae Romanae Ecclesiae.

[Z3339od] Gaudium cum pace, emendationem vitae, spatium verae paenitentiae, gratiam et consolationem Sancti Spiritus, perseverantiam in bonis operibus, tribuat nobis omnipotens et misericors Dominus.

[Z3340od] Gratias tibi ago, Domine, sancte Pater, omnipotens aeterne Deus, qui me peccatorem, indignum famulum tuum, nullis meis meritis, sed sola dignatione misericordiae tuae satiare dignatus es pretioso Corpore et Sanguine Filii tui, Domini nostri Iesu Christi. Et precor, ut haec sancta communio non sit mihi reatus ad poenam, sed intercessio salutaris ad veniam. Sit mihi armatura fidei, et scutum bonae voluntatis. Sit vitiorum meorum evacuatio, concupiscentiae et libidinis exterminatio, caritatis et patientiae, humilitatis et oboedientiae, omniumque virtutum augmentatio: contra insidias inimicorum omnium tam visibilium quam invisibilium, firma defensio: motuum meorum, tam carnalium quam spiritalium, perfecta quietatio: in te uno ac vero Deo firma adhaesio, atque finis mei felix consummatio. Et precor te, ut ad illud ineffabile convivium me peccatorem perducere digneris, ubi tu, cum Filio tuo et Spiritu Sancto, Sanctis tuis es lux vera, satietas plena, gaudium sempiternum, iucunditas consummata et felicitas perfecta. Per Christum Dominum nostrum.

[Z3341od] Anima Christi, sanctifica me. Corpus Christi, salva me. Sanguis Christi, inebria me. Aqua lateris Christi, lava me. Passio Christi, conforta me. O bone Iesu, exaudi me. Intra tua vulnera absconde me. Ne permittas me separari a te. Ab hoste maligno defende me. In hora mortis meae voca me. Et iube me venire ad te, ut cum Sanctis tuis laudem te in saecula saeculorum.

[Z3342od] Suscipe, Domine, universam meam libertatem. Accipe memoriam, intellectum atque voluntatem omnem. Quidquid habeo vel possideo, mihi largitus es: id tibi totum restituo, ac tuae prorsus voluntati trado gubernandum. Amorem tui solum cum gratia tua mihi dones, et dives sum satis, nec aliud quidquam ultra posco.

[Z3343od] En ego, o bone et dulcissime Iesu, ante conspectum tuum genibus me provolvo, ac maximo animi ardore te oro atque obtestor, ut meum in cor vividos fidei, spei et caritatis sensus, atque veram peccatorum meorum paenitentiam, eaque emendandi firmissimam voluntatem velis imprimere; dum magno animi affectu et dolore tua quinque vulnera mecum ipse considero ac mente contemplor, illud prae oculis habens, quod iam in ore ponebat tuo David propheta de te, o bone Iesu: Foderunt manus meas et pedes meos: dinumeraverunt omnia ossa mea.

[Z3344od] Credo, Domine, sed credam firmius; spero, sed sperem securius; amo, sed amem ardentius; doleo, sed doleam vehementius. Adoro te ut primum principium; desidero ut finem ultimum; laudo ut benefactorem perpetuum; invoco ut defensorem propitium. Tua me sapientia dirige, iustitia contine, clementia solare, potentia protege. Offero tibi, Domine, cogitanda, ut sint ad te; dicenda, ut sint de te; facienda, ut sint secundum te; ferenda, ut sint propter te. Volo quidquid vis, volo quia vis, volo quomodo vis, volo quamdiu vis. Oro, Domine: intellectum illumines, voluntatem inflammes, cor emundes, animam sanctifices. Defleam praeteritas iniquitates, repellam futuras tentationes, corrigam vitiosas propensiones, excolam idoneas virtutes. Tribue mihi, bone Deus, amorem tui, odium mei, zelum proximi, contemptum mundi. Studeam superioribus oboedire, inferioribus subvenire, amicis consulere, inimicis parcere. Vincam voluptatem austeritate, avaritiam largitate, iracundiam lenitate, tepiditatem fervore. Redde me prudentem in consiliis, constantem in periculis, patientem in adversis, humilem in prosperis. Fac, Domine, ut sim in oratione attentus, in epulis sobrius, in munere sedulus, in proposito firmus. Curem habere innocentiam interiorem, modestiam exteriorem, conversationem exemplarem, vitam regularem. Assidue invigilem naturae domandae, gratiae fovendae, legi servandae, saluti promerendae. Discam a te quam tenue quod terrenum, quam grande quod divinum, quam breve quod temporaneum, quam durabile quod aeternum. Da, ut mortem praeveniam, iudicium pertimeam, infernum effugiam, paradisum obtineam.

[Z3345od] O Maria, Virgo et Mater sanctissima, ecce suscepi dilectissimum Filium tuum, quem immaculato utero tuo concepisti, genuisti, lactasti atque suavissimis amplexibus strinxisti. Ecce, cuius aspectu laetabaris et omnibus deliciis replebaris, illum ipsum tibi humiliter et amanter repraesento et offero, tuis bracchiis constringendum, tuo corde amandum, sanctissimaeque Trinitati in supremum latriae cultum, pro tui ipsius honore et gloria et pro meis totiusque mundi necessitatibus, offerendum. Rogo ergo te, piissima Mater, impetra mihi veniam omnium peccatorum meorum, uberemque gratiam ipsi deinceps fidelius serviendi, ac denique gratiam finalem, ut eum tecum laudare possim per omnia saecula saeculorum.

[Z3346od] Ave Maria, gratia plena, Dominus tecum; benedicta tu in mulieribus, et benedictus fructus ventris tui, Iesus. Sancta Maria, Mater Dei, ora pro nobis peccatoribus nunc et in hora mortis nostrae. Amen.